‘എന്റെ പാട്ട് അന്നു പാടിയത് മറ്റൊരു ഗായിക: ഈ റീ–റിലീസ് ഒരു നിമിത്തം’പോലെ: ‘കരളേ നിൻ കൈ പിടിച്ച്’ വീണ്ടും പ്രീത

∙ യാദൃച്ഛികമായി ലഭിച്ച അവസരം

കോഴിക്കോട് മാക്ടയുടെ ഒരു ഷോയിൽ പങ്കെടുക്കാൻ ട്രെയിനിൽ പോകുന്ന സമയത്ത് യാദൃച്ഛികമായി ഒരു സിനിമാ മാസിക വായിക്കാനിടയായി. അതിൽ ദേവദൂതനെക്കുറിച്ച് ഒരു റിപ്പോർട്ട് ഉണ്ടായിരുന്നു. നരസിംഹം എന്ന സിനിമയ്ക്കു ശേഷം പ്രകൃതിചികിത്സ ചെയ്ത് തടി കുറച്ച് ലാലേട്ടൻ അഭിനയിക്കുന്ന സിനിമയാണെന്നും സിബി മലയിൽ സാറാണ് സംവിധാനമെന്നും വിദ്യാസാഗറാണ് സംഗീതമെന്നുമൊക്കെ അതിലുണ്ടായിരുന്നു. വേദിയിലെത്തിയപ്പോൾ രഞ്ജിത്തേട്ടനെ (രജപുത്ര രഞ്ജിത്) കണ്ടു.

സിബി സാറിന്റെ സിനിമയിൽ ഒരു പുതുമുഖത്തിന് പുതിയൊരു ശബ്ദം നോക്കുന്നുണ്ടെന്നും ചെന്നൈയിൽ പോയി പാടി നോക്കണമെന്നും അദ്ദേഹം പറഞ്ഞു. എന്നിട്ട് എന്നെ നേരെ സിബി സാറിന്റെ അടുത്തേക്ക് കൊണ്ടു പോയി. ജയപ്രദ മാഡം അവതരിപ്പിക്കുന്ന കഥാപാത്രത്തിന്റെ ചെറുപ്പകാലം അഭിനയിക്കുന്ന കുട്ടിക്കു വേണ്ടി ഒരു ഫ്രഷ് വോയ്സ് വേണമെന്നു പറഞ്ഞു. എനിക്കു വലിയ അദ്ഭുതം തോന്നി. കാരണം, അന്ന് രാവിലെ ആ സിനിമയെക്കുറിച്ചുള്ള വാർത്ത വായിച്ചതേയുള്ളൂ. അതേ സിനിമയിൽ പാടാനൊരു ക്ഷണം കിട്ടിയപ്പോൾ വലിയ സന്തോഷം തോന്നി.

∙ ആദ്യം പാടിയത് ‘പൂവേ പൂവേ’

ആ സമയത്ത് ഞാൻ ആറുമാസം ഗർഭിണിയാണ്. പക്ഷേ, യാത്ര ചെയ്യാനോ മറ്റു കാര്യങ്ങൾക്കോ ബുദ്ധിമുട്ടൊന്നും ഉണ്ടായിരുന്നില്ല. ഞാനും കണ്ണേട്ടനും കൂടിയാണ് ചെന്നൈയിലെ വിദ്യാജിയുടെ ‘വർഷവല്ലകി’ എന്ന സ്റ്റുഡിയോയിലേക്കു പോകുന്നത്. നല്ല പേടിയുണ്ടായിരുന്നു. പക്ഷേ, ഒരു ചിരിച്ച മുഖത്തോടെയാണ് അദ്ദേഹം സ്വീകരിച്ചത്. ഞാൻ സ്റ്റുഡിയോയിൽ കയറി ചെല്ലുമ്പോൾ ആദ്യം കേൾക്കുന്നത് ജാനകിയമ്മ പാടിയ ‘എൻ ജീവനെ’ എന്ന ഗാനമാണ്. വിദ്യാജിക്ക് വളരെ തിരക്കുള്ള സമയമാണ്. 

∙ ടെൻഷനില്ലാതെ പാടിയ പാട്ട്

‘‘കുറേ പ്രാവശ്യം പാടൂ, ഞാനൊരു ഇംപോസിഷൻ തന്നതാണെന്നു കരുതിയാൽ മതി’’യെന്ന് വിദ്യാജി പറഞ്ഞു. അങ്ങനെ ഞാൻ ആവർത്തിച്ചു പാടി. അതിനിടയിൽ അദ്ദേഹം റിക്കോർഡ് ചെയ്യുന്നുണ്ടായിരുന്നു. ഞാൻ അറിഞ്ഞില്ല. ‘റെഡി ടേക്ക്’ എന്നു പറഞ്ഞു കേൾക്കുമ്പോഴുള്ള ടെൻഷൻ ഇല്ലാതെ ഞാൻ പാടി. ഞാൻ പാടുമ്പോൾ ദാസേട്ടൻ പാടിയിട്ടില്ല. ഹമ്മിങ് ഞാൻ പാടിയത് കേട്ടപ്പോൾ വിദ്യാജിക്ക് ഇഷ്ടപ്പെട്ടു. ഹമ്മിങ്ങിന്റെ അവസാന ഭാഗത്ത് ആശാ ഭോസ്‍‍ലെയുടെ ശൈലി വരുന്ന ഒരു ഭാഗമുണ്ട്. ഞാനത് പാടിയപ്പോൾ അദ്ദേഹം ‘കൊള്ളാം നന്നായിട്ടുണ്ട്’ എന്നു പറഞ്ഞു.

∙ ആ പാട്ട് നഷ്ടപ്പെട്ടപ്പോൾ കരഞ്ഞു

പാട്ടുകളുടെ റിക്കോർഡിങ് പൂർത്തിയാക്കി ഞങ്ങൾ തിരിച്ചു പോന്നു. ഞാൻ പാടിയ രണ്ടു പാട്ടും സിനിമയിൽ ഉണ്ടാകണേ എന്നായിരുന്നു എന്റെ പ്രാർഥന. നാട്ടിലെത്തി കുറച്ചു നാളുകൾ കഴിഞ്ഞപ്പോൾ വേണു ചേട്ടൻ (ജി.വേണുഗോപാൽ) എന്നെ വിളിച്ചു. അദ്ദേഹമാണ് പറഞ്ഞത് ‘പൂവേ പൂവേ’ എന്ന പാട്ടിൽ നിന്ന് എന്നെ മാറ്റിയെന്ന്! അതു കേട്ടപ്പോൾ വലിയ വിഷമം ആയി. ഞാൻ ആ സമയത്ത് ഗർഭിണി ആയിരുന്നുവെന്ന് പറഞ്ഞുവല്ലോ. അന്ന് ഞാൻ ഒരുപാടു കരഞ്ഞു. പനി പിടിച്ചു. ആശുപത്രിയിലായി. അപ്പോഴാണ് അറിഞ്ഞത്, അന്ന് പാടിയ രണ്ടാമത്തെ പാട്ടാണ് സ്ട്രെയ്റ്റ് ആക്കിയത് എന്ന്. സിനിമ റിലീസായ സമയത്ത് പോയി കാണാൻ കഴിഞ്ഞില്ല. ഡെലിവറി കഴിഞ്ഞ് ഒരു മാസം ആകുന്നേയുണ്ടായിരുന്നുള്ളൂ. പിന്നീട് സിഡി ഇട്ടാണ് ​ഞാൻ സിനിമ കണ്ടത്.

∙ ഇത്ര വിശേഷപ്പെട്ടതാണെന്ന് തിരിച്ചറിഞ്ഞപ്പോൾ

പടം ഇറങ്ങിയപ്പോൾ ‘പൂവേ പൂവേ’ ഒരു സീസണൽ ഹിറ്റ് ആയിരുന്നു. അന്ന് ‘കരളേ നിൻ കൈ പിടിച്ചാൽ’ എന്ന ഗാനം അത്രയ്ക്ക് ഹിറ്റായിരുന്നില്ല. ക്രമേണയാണ് ആ പാട്ട് പലരുടെയും ഹൃദയത്തിൽ കയറിക്കൂടിയത്. ദാസേട്ടനു പ്രിയപ്പെട്ട 10 പാട്ടുകൾ എന്ന വിശേഷണത്തോടെ സത്യം ഓഡിയോസ് ഗ്രാമഫോൺ ഡിസ്ക് ഇറക്കിയപ്പോൾ അതിലൊരു ഗാനം ഈ പാട്ടായിരുന്നു. കടലു പോലെ പാട്ടുകൾ പാടി വച്ചിരിക്കുന്ന അദ്ദേഹത്തിന്റെ പ്രിയപ്പെട്ട പാട്ടുകളൊന്നിൽ എന്റെ ശബ്ദവും ഉണ്ടല്ലോ എന്നത് എനിക്ക് കിട്ടിയ പുരസ്കാരം ആണ്. 

പ്രീത എന്ന ഗായിക ഇന്നും തിരിച്ചറിയപ്പെടുന്നത് ‘കരളേ നിൻ കൈ പിടിച്ചാൽ’ എന്ന പാട്ടിന്റെ പേരിലാണ്. കൂടാതെ, യേശുദാസ് സാറിന്റെ ശബ്ദത്തിനൊപ്പമാണ് എന്റെയും ശബ്ദം ആ പാട്ടിൽ കേൾക്കുന്നത്. ഇതെല്ലാം എന്റെ ഭാഗ്യങ്ങളാണ്. മറ്റൊരു പ്രത്യേകത കൂടി ആ പാട്ടിനുണ്ട്. സംഗീതത്തിലെ 12 മ്യൂസിക് നോട്സ് വരുന്ന സിനിമാഗാനങ്ങൾ അപൂർവമാണ്. ദേവരാജൻ മാഷ് ഈണമിട്ട ‘ഹിമവാഹിനി ഹൃദയവാഹിനി’, കണ്ണൂർ രാജൻ മാഷ് ഈണമിട്ട ‘തൂമഞ്ഞിൻതുള്ളി’ എന്നീ പാട്ടുകളിലാണ് മലയാളത്തിൽ 12 നോട്സ് ഉപയോഗിച്ചിട്ടുള്ളത്. അതിനുശേഷം ഈ പാട്ടിലാണ് അങ്ങനെ സംഭവിച്ചത്. അത്രയ്ക്ക് ഗംഭീരമാണ് ഈ പാട്ടിന്റെ ഈണം.

∙ ആദ്യ ഗാനം സിനിമയിൽ വന്നില്ല

ഒൻപതാം ക്ലാസിൽ പഠിക്കുമ്പോൾ മുതൽ വലിയ വേദികളിൽ പാടിത്തുടങ്ങി. ‘പണ്ടു പണ്ടൊരു രാജകുമാരി’ എന്ന സിനിമയിൽ എട്ടുവരി കവിത പാടിക്കൊണ്ടാണ് ചലച്ചിത്രപിന്നണിഗാനരംഗത്ത് വരുന്നത്. ശ്യാം സാർ ആയിരുന്നു സംഗീതം. സിനിമയിൽ എത്തിപ്പെടാൻ പറ്റുമോ എന്നൊന്നും അറിയില്ലായിരുന്നു. ചിത്ര ചേച്ചിയും സുജാത ചേച്ചിയുമൊക്കെ വളരെ സജീവമായി നിൽക്കുന്ന സമയമാണ്. അങ്ങനെയിരിക്കുമ്പോഴാണ് ‘സമാന്തരങ്ങൾ’ എന്ന സിനിമയിൽ ബാലചന്ദ്ര മേനോൻ സർ സംഗീതം നൽകിയ ഗാനം പാടാൻ അവസരം ലഭിച്ചത്.