‘പുതിയ ശരീരത്തിലെ പഴയ ആത്മാവ്’; രാജരാജ ചോളന്റെ ആരാധിക; ന‍ൃത്തം ‘ഭാഷ’യാക്കിയ കലാകാരി

? പഴമയെ മറക്കാതെയാണോ ജീവിതം

എന്നെ ഞാൻ തന്നെ വിശേഷിപ്പിക്കുന്നത് ‘പുതിയ ശരീരത്തിലെ പഴയ ആത്മാവ്’ എന്നാണ്. പാട്ടി പറഞ്ഞുതന്ന ഒന്നുണ്ട്, ‘പാലിക്കാനാകാത്ത വാക്കു പറയരുത്. തലവെട്ടി വയ്ക്കുമെന്ന് ഉറപ്പുപറഞ്ഞാൽ അതു ചെയ്യണം’. സത്യസന്ധത, കൃത്യനിഷ്ഠ പോലുള്ള ചില പാട്ടി ഇഫക്ട് ഇപ്പോഴും കൂടെയുണ്ട്. 2024ലും ഞാൻ ജീവിക്കുന്നതു പഴമയുടെ ലോകത്താണ്.

? കലയിലുമുണ്ടല്ലോ ട്രെൻഡുകളും റീലുകളും, എങ്ങനെ കാണുന്നു

കലയ്ക്ക് ഇന്ന് പിടിച്ചുനിൽക്കാൻ സമൂഹമാധ്യമങ്ങളിലെ സാന്നിധ്യം അനിവാര്യമാണ്. പക്ഷേ, ജോലിയുടെ ഭാഗമായി മാത്രമാണ് ഞാൻ അവ ഉപയോഗിക്കുന്നത്. വൈറൽ, ട്രെൻഡ്, റീൽ എല്ലാം എന്റെ പരിധിക്കു പുറത്താണ്. ചമയങ്ങളില്ലാതെ വിയർത്തൊലിച്ചു നൃത്തം ചെയ്യുന്ന വിഡിയോകൾ പോസ്റ്റ് ചെയ്യും. ക്യാമറ ആംഗിളോ പരിസരമോ അല്ല, നൃത്തമാണ് എനിക്കു പ്രധാനം. ലൈക്കിനല്ല...സംതൃപ്തിക്കാണ് അവിടെ റീച്ച്.

? ഗുരുശിഷ്യ പരമ്പരയെക്കുറിച്ച്...

ലോകപ്രശസ്തരായ, അതിലുപരി നൃത്തത്തിന്റെ ആത്മാവു തൊട്ടറിഞ്ഞ പത്മ സുബ്രഹ്മണ്യത്തെയും മാധവി ചന്ദ്രശേഖറെയും ഗുരുക്കന്മാരായി ലഭിച്ചു. ഗുരുമുഖത്തുനിന്നാണ് അടവുകളും അഭിനയവും പഠിച്ചത്. ഇന്നത് അന്യമാണ്. ഇന്നു മത്സര ഇനങ്ങൾ പഠിക്കാനാണേവർക്കും ഇഷ്ടം. വർഷങ്ങളുടെ അടിസ്ഥാന പഠനമാണു കലയ്ക്ക് അനിവാര്യം. വീടു പണിയും പോലെയാണ് കലാപഠനവും. നന്നായി അടിത്തറകെട്ടാതെ മോടിപിടിപ്പിച്ചിട്ടു കാര്യമില്ല.

? നവരാത്രിയിലെ നൃത്തം പെൺശക്തിയുടേതല്ലേ...

വർഷങ്ങളായി സാമൂഹിക പ്രതിബദ്ധതയുള്ള വിഷയങ്ങൾ നൃത്തത്തിനു വിഷയമാക്കാറുണ്ട്. അത്തരത്തിലൊന്നാണ് ഈ നവരാത്രിക്കാലത്ത് ചെയ്ത ‘വെൻ ഷാഡോസ് സിങ്’ എന്ന ഇനം. അധികം അറിയപ്പെടാത്തതും എന്നാൽ ശക്തമായ സ്ത്രീ കഥാപാത്രങ്ങളെ തമിഴ് കവിതയിലൂടെ അവതരിപ്പിക്കുകയാണതിൽ. നവരാത്രി, കൃഷ്ണാഷ്ടമി, ദീപാവലി എന്നിങ്ങനെ ആഘോഷമേതായാലും ചിലങ്കയുടെ നാദം കൂടെയില്ലെങ്കിൽ‌ എനിക്ക് അവ വെറും ദിവസങ്ങൾ മാത്രം. ന‍ൃത്തം എനിക്കു വെറുമൊരു കലയല്ല, ഭാഷയാണ്. പറയാനുള്ളത് ആസ്വാദക ഹൃദയങ്ങളിലേക്കെത്തിക്കാനുള്ള ശക്തമായ വിനിമയോപാധി.

? നൃത്തത്തിനപ്പുറം....

രാവിലെ ഒരു മണിക്കൂർ യോഗ, നാലു മണിക്കൂർ ഡാൻസ് പ്രാക്ടിസ്. ഇതാണ് ദിനചര്യ. വീണ വായനയും സംഗീതവും മുടക്കാറില്ല. വളരെ വിരളമായി സിനിമകളും ആസ്വദിക്കാറുണ്ട്. മലയാള കൃതികളും സിനിമകളും എന്നെ പരിചയപ്പെടുത്തിയതു സൂര്യ കൃഷ്ണമൂർത്തിയാണ്. ആടുജീവിതവും ഉള്ളൊഴുക്കും പോലെയുള്ള സിനിമകൾ നന്നായി ആസ്വദിക്കാനും അവയെപ്പറ്റി ചർച്ചചെയ്യാനും ഇഷ്ടമാണ്. സമയം കിട്ടിയാൽ വായിക്കാറുണ്ട്. കൂടുതലും കവിതകളാണിഷ്ടം. അതിൽ എനിക്കുവേണ്ട ആശയങ്ങളും കഥാപാത്രങ്ങളും തിരയും. മലയാളത്തിൽ ഒഎൻവി കുറുപ്പിന്റെയും സുഗതകുമാരിയുടെയും കവിതകളുടെ ഇംഗ്ലിഷ് തർജമ ആവർത്തിച്ച് വായിക്കാറുണ്ട്.

? രാധ അരങ്ങിലേക്കെത്തുമോ 

സുഗതകുമാരിയാണു മലയാളത്തിൽ എനിക്ക് ഏറ്റവും പ്രിയപ്പെട്ട എഴുത്തുകാരി. ‘രാധയെവിടെ’ പലപ്പോഴും വായിക്കാറുണ്ട്. മോഹിനിയാട്ടത്തിലൂടെ കേരളത്തിനകത്തും പുറത്തുമുള്ള വേദികളിൽ‌ രാധ നൃത്തമാടിക്കഴിഞ്ഞു. ഇനി അവശേഷിപ്പുകളുണ്ടോയെന്ന തിരച്ചിലിലാണ്. ചിലപ്പോൾ രാധ തന്നെയോ അല്ലെങ്കിൽ സുഗതകുമാരിയുടെ കവിതകളിലെ അപ്രതീക്ഷിത നായികമാരോ എന്നിൽ പരകായപ്രവേശം ചെയ്യാം. എന്ന്, എപ്പോൾ എന്നറിയില്ല.