മഹേഷ് ബാബുവിനെ ‘സൈഡാക്കിയ’ നടി; പുഷ്പയിലെ ഡാൻസിങ് ‘ഫയർ’; 21–ാം വയസ്സിൽ ദത്തെടുത്തത് 2 കുട്ടികളെ; ആരാണ് ശ്രീലീല?

∙ പാൻ ഇന്ത്യൻ ഡാൻസർ

എല്ലാതരത്തിലും ശ്രീലീലയെ താരമാക്കിയ വർഷമായിരുന്നു 2024. മഹേഷ് ബാബു നായകനായുള്ള ഇരുപത്തിയെട്ടാമത്തെ ചിത്രം ‘ഗുണ്ടൂർ കാരം’ റിലീസ് ചെയ്തത് 2024 ജനുവരിയിലായിരുന്നു. ചിത്രത്തിലെ നായിക അമ്മുവായി കസറിയ ശ്രീലീലയുടെ ഭാഗ്യം തെളിഞ്ഞത് പക്ഷേ ഒരു പാട്ടിലായിരുന്നു. അതുവരെ തെലുങ്കിന്റെ നാലതിരുകളിൽ മാത്രം ഒതുങ്ങിക്കിടന്നിരുന്ന ശ്രീലീല എന്ന പേര് പാൻ ഇന്ത്യൻ ലെവലിലേക്ക് ഉയർന്നു. ‘കുർച്ചി മടത്തപ്പെട്ടി’ എന്ന പാട്ട് അത്രയേറെയായിരുന്നു ഹിറ്റായത്.

ഗുണ്ടൂരിലെ നല്ല സ്പൈസി ഡാൻസായി ‘കുർച്ചി’ മാറിയപ്പോൾ ശ്രീലീലയുടെ ഗ്രാഫും കുത്തനെ ഉയർന്നു. ഗുണ്ടൂർ കാരം സിനിമയേക്കാൾ പ്രശസ്തമായി ആ പാട്ടും അതിലെ നായികയും. കേരളത്തിൽപ്പോലും കോളജ്–സ്കൂൾ മേളകളിൽ നിറസാന്നിധ്യമായി ആ പാട്ട്. ‘കുർച്ചി’പ്പാട്ടുമായുള്ള റീലുകളും വൈറലായി. ഇൻസ്റ്റഗ്രാമിൽ പ്രമുഖ താരങ്ങളുൾപ്പെടെയാണ് ഈ പാട്ടിനൊപ്പം ഡാൻസ് ചെയ്ത് റീലിട്ടത്. ഇതോടെ ശ്രീലീലയെക്കുറിച്ച് ആളുകൾ തിരഞ്ഞുതുടങ്ങി. നേരത്തേ അവർ അഭിനയിച്ച സിനിമകളിലെ യുട്യൂബ് വ്യൂസ് കുത്തനെ കൂടാൻ തുടങ്ങി. പഴയ ഡാൻസ് വിഡിയോകളും വൈറലായി.

∙ പുഷ്പ ‘ഭരിക്കാൻ’

സുകുമാർ സംവിധാനം ചെയ്ത ‘പുഷ്പ–ദ് റൈസ്’ എന്ന ആദ്യഭാഗം രണ്ട് ദേശീയ പുരസ്കാരവും ഏഴ് സംസ്ഥാന ചലച്ചിത്ര പുരസ്കാരവും നേടിയിട്ടുണ്ട്. ഈ ചിത്രത്തിൽ ഏറ്റവും കൂടുതൽ ശ്രദ്ധിക്കപ്പെട്ടത് സമാന്ത ചെയ്ത ‘ഊ ആണ്ടവ’ എന്ന ഐറ്റം നമ്പറായിരുന്നു. നാഗചൈതന്യയുമായുള്ള വിവാഹമോചനത്തിനുശേഷം സമാന്ത ചെയ്യുന്ന ആദ്യ സിനിമ കൂടിയായിരുന്നു അത്. വിഷമഘട്ടത്തിലൂടെ കടന്നുപോകുന്നതിനാൽ ഈ അതിഥി വേഷം ചെയ്യരുതെന്ന് അടുത്ത സുഹൃത്തുക്കൾ വരെ സമാന്തയെ അന്ന് ഉപദേശിച്ചിരുന്നു. എന്നാൽ അതിനെയെല്ലാം നിരാകരിച്ച തീരുമാനം ഹിറ്റായിരുന്നെന്ന് പിന്നീട് ആ പാട്ടിനു ലഭിച്ച പ്രശസ്തിതന്നെ തെളിയിച്ചു. അത്രയേറെ ഹിറ്റായിരുന്നു ‘ഊ ആണ്ടവ’; അതും എല്ലാ ഭാഷകളിലും.

പുഷ്പ ഒന്നാം ഭാഗത്തിനു ലഭിച്ച പ്രചാരത്തിലും വിജയത്തിലും നിർണായക പങ്കുണ്ടായിരുന്നു സമാന്തയുടെ ഐറ്റം ഡാൻസിന്. ഒരു കൊള്ളിയാൻ പോലെ വന്ന് പാട്ടിനൊടുവിൽ കത്തിയമരുകയായിരുന്നു സമാന്ത. ചിത്രത്തിലെ മറ്റൊരു രംഗത്തിലും ഒരു കഥാപാത്രമായി അവരെത്തിയില്ല. ഒരു സീനിലെങ്കിലും സമാന്തയെ പ്രതീക്ഷിച്ച ആരാധകരേറെയായിരുന്നു. അതോടെ പുഷ്പ2ലും സമാന്ത ഉണ്ടാവില്ലെന്ന് ഉറപ്പായി. പക്ഷേ ഒരു ഐറ്റം ഡാൻസ് വേണ്ടേ? അതിനെപ്പറ്റിയും ചർച്ചകൾ കനത്തു. ആരായിരിക്കും രണ്ടാം ഭാഗത്തിൽ പുഷ്പരാജിനൊപ്പം ആടിത്തിമിർക്കാൻ എത്തുകയെന്ന ചോദ്യം അന്തരീക്ഷത്തിൽ അലയടിച്ച നാളുകൾ.

ഒരൊറ്റപ്പാട്ടിനു വേണ്ടി അഞ്ചു കോടിയാണ് സമാന്ത ‘പുഷ്പ: ദ് റൈസി’ൽ പ്രതിഫലം കൈപ്പറ്റിയത്. അതിനെയും മറികടക്കുന്ന ആരെങ്കിലുമായിരിക്കുമോ രണ്ടാം ഭാഗത്തിലേക്കു വരികയെന്നാണ് എല്ലാവരും ഉറ്റുനോക്കിയത്. അങ്ങനെയിരിക്കെയാണ് ‘കുർച്ചി മടത്തപ്പട്ടി’ എന്ന പാട്ടിലൂടെ മഹേഷ്ബാബുവിനെ ‘സൈഡാക്കി’ക്കൊണ്ടുള്ള ശ്രീലീലയുടെ ഡാൻസിന്റെ വരവ്. അധികം വൈകിയില്ല, പുഷ്പയുടെ അണിയറ പ്രവർത്തകർ ശ്രീലീലയെ സ്വാഗതം ചെയ്തുകൊണ്ടുള്ള പോസ്റ്റർ പുറത്തിറക്കി. അതോടെ സിനിമാപ്രേമികൾക്കിടയിൽ ആകാംക്ഷയേറി. വൈകാതെ അവർ ഉറപ്പിച്ചു, ‘പുഷ്പ 2 ദ് റൂൾ’ അടക്കിഭരിക്കാൻ വരുന്നത് ശ്രീലീലയാണ്.

‘കിസിക്’ എന്ന ഗാനത്തിനാണ് ശ്രീലീലയും അല്ലുവും ചേർന്ന് ചുവടുവച്ചത്. ഗാനം ശ്രദ്ധിക്കപ്പെട്ടെങ്കിലും പുഷ്പയുടെ ആദ്യഭാഗത്തെ പാട്ടുകളുടെയത്ര ശോഭിച്ചില്ലെന്ന ആരോപണങ്ങൾ ഉയർന്നു. 2024 ഡിസംബർ 5നായിരുന്നു പുഷ്പ 2 റിലീസ് ചെയ്തത്. ചിത്രത്തിന്റെ ഓഡിയോ റിലീസ് ചടങ്ങിൽ അല്ലു അർജുൻ ‘ഡാൻസിങ് ക്വീൻ’ എന്നാണ് ശ്രീലീലയെ വിശേഷിപ്പിച്ചത്. കിസിക് ഡാൻസിന് വാങ്ങിയ പ്രതിഫലത്തിന്റെ കാര്യത്തിൽ പക്ഷേ ശ്രീലീലയ്ക്ക് സമാന്തയെ കടത്തിവെട്ടാനായില്ല.  2 കോടി രൂപയാണ് പുഷ്പ2ലെ ഐറ്റം ഡാൻസിന് ശ്രീലീലയ്ക്ക് പ്രതിഫലമായി ലഭിച്ചത്.