മുറിവിൽ ഒട്ടിക്കുന്ന എന്തിനും 'ബാൻഡ് എയിഡ്' എന്ന് നമ്മളെ പറയാൻ പഠിപ്പിച്ച ജോൺസൺ ആൻഡ് ജോൺസന്റെ ബാൻഡ് എയിഡ് പരസ്യത്തിലാണ് സച്ചിൻ ആദ്യമായി അഭിനയിക്കുന്നത്. ബാൻഡ് എയിഡ് പരസ്യത്തിനായി സച്ചിനെ തിരഞ്ഞെടുത്തതിനു പിന്നിലും സച്ചിന്റെ ആദ്യ പാക്കിസ്ഥാൻ സീരീസിൽ സംഭവിച്ച ഒരു കാര്യമാണെന്നു പറഞ്ഞു കേട്ടിട്ടുണ്ട്. സച്ചിന്റെ അരങ്ങേറ്റ സമയത്തുതന്നെ അരങ്ങേറ്റം നടത്തിയ പാക്കിസ്ഥാൻ പേസർ വഖാർ യൂനിസിന്റെ ഒരു പന്തിൽ സച്ചിന് മൂക്കിന് പരിക്കേൽക്കുകയും അത് വകവയ്ക്കാതെ മൂക്കിൽ ഒരു ബാൻഡ് എയിഡ് ഒട്ടിച്ചു കളി തുടരുകയും ടെസ്റ്റിലെ തന്റെ രണ്ടാമത്തെ അർധ സെഞ്ചറി നേടുകയും ചെയ്തത് സച്ചിന്റെ ആരാധകർ ഇപ്പോഴും ഓർക്കുന്നുണ്ടാകും. ഈ സംഭവമാണ് ബാൻഡ് എയിഡ് പരസ്യത്തിലേക്ക് സച്ചിന്റെ വഴി തുറന്നതെന്നാണ് പരസ്യമേഖലയിലെ ഒരു പിന്നാമ്പുറ സംസാരം. 

ഇന്ത്യൻ ക്രിക്കറ്റിലെ എക്കാലത്തെയും മികച്ച ഓൾ റൗണ്ടറായ കപിൽ ദേവിനൊപ്പം വന്നു ‘ബൂസ്റ്റ് ഈസ് ദ് സീക്രട്ട് ഓഫ് മൈ എനർജി’ എന്നു പറഞ്ഞ സച്ചിനെയും  പിന്നീട് നമ്മൾ കണ്ടു. ബജാജിന്റെ 'സണ്ണി' എന്ന ഗിയറില്ലാത്ത കൊച്ചു സ്കൂട്ടറായിരുന്നു സച്ചിന്റെ പരസ്യങ്ങളിൽ ശ്രദ്ധ നേടിയ മറ്റൊന്ന്. സത്യത്തിൽ സുനിൽ ഗാവസ്കറുടെ വിളിപ്പേരാണ് സണ്ണിയെന്നതെങ്കിലും ‘ലിറ്റിൽ മാസ്റ്റർ രണ്ടാമനായ’ സച്ചിനെപ്പോലെത്തന്നെയാണ് സണ്ണിയെന്നാണ് ബജാജ് അവകാശപ്പെട്ടത്. ചെറിയ സൈസ് വലിയ പെർഫോമൻസ്, എന്നാലോ ഏതു തിരക്കിലൂടെയും അനായാസം ഓടിച്ചു പോകാനും എത്ര ചെറിയ സ്ഥലത്ത് പാർക്ക് ചെയ്യാനും കഴിയും സണ്ണിക്കെന്നതാണ് സച്ചിനെ സണ്ണിയുടെ ബ്രാൻഡ് അംബാസഡർ ആക്കാൻ ബജാജിനെ പ്രേരിപ്പിച്ച ഘടകങ്ങൾ.   

∙ സച്ചിന്റെ നല്ല സമയം 

1989ൽ അന്താരാഷ്ട്ര ക്രിക്കറ്റിൽ അരങ്ങേറ്റം നടത്തിയ സച്ചിനെ കാത്തിരുന്നത് ഇന്ത്യൻ പരസ്യ മേഖലയുടെ ഏറ്റവും നല്ല സമയത്തിന്റെ വരവായിരുന്നു. സച്ചിന് 18 തികഞ്ഞതോടെ, അതായത് 1991ൽ ആഗോളവത്കരണം ഇന്ത്യൻ വിപണിക്ക് സമ്മാനിച്ച ഉണർവിന്റെ ഏറ്റവും വലിയ ഗുണഭോക്താക്കളിൽ ഒരാളായിരുന്നു സച്ചിൻ എന്ന് നിസ്സംശയം പറയാം. പെപ്സിയും കോക്ക കോളയും അവരുടെ ആഗോള മത്സരത്തിന്റെ വീറും വാശിയും ഇന്ത്യൻ വിപണിയിലും തുടർന്നു. തങ്ങളുടെ പ്രചാരണത്തിനായി ഇന്ത്യയിൽ അവരും തിരഞ്ഞെടുത്തത് ക്രിക്കറ്റും ബോളിവുഡും തന്നെയായിരുന്നു. 

ആഗോളവൽകരണത്തിന് തൊട്ടു പിന്നാലെയെത്തിയ ക്രിക്കറ്റ് ലോകകപ്പിന്റെ ഔദ്യോഗിക സ്‌പോൺസർഷിപ് കോക്ക കോള നേടിയപ്പോൾ 'നതിങ് ഒഫിഷ്യൽ എബൗട്ട് ഇറ്റ്' എന്ന ക്യാംപെയ്നുമായി പെപ്സി തിരിച്ചടിച്ചു. 'നതിങ് ഒഫിഷ്യൽ എബൗട്ട് ഇറ്റ്' എന്ന പരസ്യ വാചകം ഇപ്പോഴും ക്രിക്കറ്റ് പ്രേമികളുടെ കാതുകളിൽ മുഴങ്ങുന്നത് സച്ചിന്റെ ശബ്ദത്തിലായിരിക്കും. 1996 ക്രിക്കറ്റ് ലോകകപ്പ് സമയത്തെ ക്യാംപെയ്നിനു വേണ്ടി പെപ്സി ഒന്നരക്കോടി രൂപയാണ് സച്ചിന് നൽകിയത്. ഇന്ത്യൻ സ്പോർട്സിലെ ആദ്യ മെഗാ സ്റ്റാർ സച്ചിനൊപ്പം, ഇന്ത്യ കണ്ട എക്കാലത്തെയും ഏറ്റവും താരമൂല്യമുള്ള ഷാറുഖ് ഖാനും പെപ്സി പരസ്യത്തിൽ തകർത്തഭിനയിച്ചു. 

2000ത്തിനു ശേഷം സച്ചിൻ പരുക്കുകളുടെ പിടിയിലാകുകയും ഫോമിൽ ചെറിയ മങ്ങലേൽക്കുകയും ചെയ്തപ്പോൾ പെപ്സി സച്ചിനുമായുള്ള കൂട്ടൂകെട്ടവസാനിപ്പിച്ചു, തക്കം പാത്തിരുന്ന ബദ്ധശത്രു കോക്ക കോള ഉടൻതന്നെ 20 കോടി മുടക്കി സച്ചിനുമായി കരാറിൽ ഒപ്പിടുകയും ചെയ്തുവന്നത് സച്ചിന്റെ വിപണിമൂല്യത്തിന് ഏറ്റവും വലിയ തെളിവ് നൽകുന്നു.  

അന്താരാഷ്ട്ര ഉൽപന്നങ്ങൾക്കും സേവനങ്ങൾക്കും ഇന്ത്യയിൽ അനുദിനം വികസിച്ചു വരുന്ന വിപണിയെ മുന്നിൽക്കണ്ട, വേൾഡ് ടെൽ ഉടമയായ മാർക്ക് മസ്‌കരീനസ് എന്ന മാർക്കറ്റിങ് ബുദ്ധിരാക്ഷസനാണ് സച്ചിൻ തെൻഡുൽക്കറുമായി ആദ്യമായി 5 വർഷത്തേക്ക് 30 കോടി നൽകി കരാറിൽ ഏർപ്പെടുന്നത്. 1995ൽ 30 കോടി രൂപയുടെ ഒരു കരാർ ഏതൊരു ക്രിക്കറ്റ് താരത്തിനും ചിന്തിക്കാവുന്നതിലും അപ്പുറത്തായിരുന്നു. അമേരിക്കയിൽ ബ്രോഡ്‌കാസ്റ്റ് രംഗത്ത് പ്രവർത്തിച്ചിരുന്ന ഇന്ത്യൻ വംശജനായ മസ്‌കരീനസ് ആണ് അമേരിക്കയിലെ 'എൻബിഎ' പോലുള്ള ലീഗുകളുടെ പരസ്യരീതികൾ ഇന്ത്യയിലേക്ക് ഇറക്കുമതി ചെയ്യുന്നത്. 

ഈ കരാറോടെ ഫിലിപ്സ്, വിസ കാർഡ്, ജില്ലറ്റ്, അഡിഡാസ് തുടങ്ങി ഒട്ടനവവധി ബ്രാൻഡുകളുടെ ഇന്ത്യൻ മുഖമായി മാറി സച്ചിൻ തെൻഡുൽക്കർ. 2001ൽ സച്ചിന്റെ അഞ്ചു വർഷത്തെ കരാറിനായി മസ്‌കരീനസ് മുടക്കിയത് 100 കോടിയാണ്, തുടർന്ന് 2006ൽ 180 കോടി ചെലവഴിച്ചാണ് വേൾഡ് സ്പോർട്സ് ഗ്രൂപ്പിന്റെ (ഡബ്ല്യുഎസ്ജി) ഹരീഷ് കൃഷ്ണമാചാർ സച്ചിന്റെ പരസ്യക്കരാർ സ്വന്തമാക്കുന്നത്. 

∙ സച്ചിന്റെ സ്വന്തം ബ്രാൻഡുകൾ 

മറ്റുള്ള ബ്രാൻഡുകൾക്കു വേണ്ടി പരസ്യങ്ങളിൽ പ്രത്യക്ഷപ്പെടുക മാത്രമല്ല, തന്റെ പേരിന്റെ ക്രെഡിബിലിറ്റി പൂർണമായും പ്രയോജനപ്പെടുത്തി സ്വന്തം ബ്രാൻഡുകൾ സൃഷ്ടിക്കുകയും ചെയ്തു സച്ചിൻ. ഭക്ഷണപ്രേമിയാണ് സച്ചിൻ, സച്ചിന്റെ ഇൻസ്റ്റഗ്രാമിൽ അദ്ദേഹം പാചകം ചെയ്യുന്നതിന്റെ വിഡിയോകൾ ഏറെയുണ്ട്. ഒപ്പം പാസ്ത മുതൽ പാവ് ഭാജി വരെ കഴിച്ചഭിപ്രായം പറയുന്ന വിഡിയോകളും. ഈ ഇഷ്ടം തന്നെയായിരിക്കണം ഹോട്ടൽ മേഖലയിൽ പ്രശസ്തനായ സഞ്ജയ് നാരംഗുമൊന്നിച്ചു മുംബൈയിൽ 'തെൻഡുൽക്കേഴ്സ്' എന്ന റസ്റ്ററന്റ് ആരംഭിക്കാന്‍ സച്ചിനെ പ്രേരിപ്പിച്ചത്. 

പിന്നീട് 'സച്ചിൻസ്' എന്ന പേരിൽ മുംബൈയിലും ബെംഗളൂരുവിലും അദ്ദേഹം റസ്റ്ററന്റുകൾ ആരംഭിച്ചു. ഫ്യൂച്ചർ ഗ്രൂപ്പുമായി സഹകരിച്ച് 'സച്ച്' ബൈ സച്ചിൻ തെൻഡുൽക്കർ എന്ന ബ്രാൻഡ് നെയിമിൽ സോപ്പ്, ടൂത്ത് പേസ്റ്റ് തുടങ്ങിയ പഴ്സ‍നൽ  കെയർ ഉൽപന്നങ്ങളും സച്ചിൻ പുറത്തിറക്കി. സച്ചിൻ രമേശ് തെൻഡുൽക്കർ എന്ന തന്റെ പേരിന്റെ ചുരുക്കെഴുത്തായ 'എസ്ആർടി' എന്ന പേരിൽ ഒരു മൊബൈൽ ഫോണും സ്മാർട്രോൺ എന്ന കമ്പനിയുമായി ചേർന്ന് സച്ചിന്റേതായി പുറത്തിറങ്ങി. ബിസിസിഐ ലോഗോയ്ക്കൊപ്പം ഹെൽമറ്റിൽ ഇന്ത്യയുടെ ദേശീയ പതാക കൂടി പതിച്ചാണു സച്ചിൻ കളിക്കളത്തിലേക്ക് ഇറങ്ങാറുണ്ടായിരുന്നത്. ഹെൽമറ്റിലെ ഈ ദേശീയ പതാക പോലും ലോകമെമ്പാടുമുള്ള ഇന്ത്യക്കാർക്കിടയിൽ സച്ചിൻ എന്ന ബ്രാൻഡിന്റെ മൂല്യം മറ്റേതൊരു താരത്തേക്കാളും വർധിപ്പിക്കാൻ കാരണമായിട്ടുണ്ട്. 

കളിക്കളങ്ങളിൽ ബാറ്റുമായി നിറയുന്നില്ലെങ്കിലും ഇന്ത്യക്കാരുടെ മനസ്സിൽ ഇപ്പോഴും സച്ചിൻ തെൻഡുൽക്കറിന് ഒരു സ്ഥാനമുണ്ട്. വാതുവയ്പുകളിലും വിവാദങ്ങളിലും പെടാതെ, രാജ്യസഭാ അംഗമായിരുന്നിട്ടു പോലും രാഷ്ട്രീയ വിവാദങ്ങൾക്ക് പിടികൊടുക്കാതെ ക്രിക്കറ്റിനെ സ്നേഹിച്ച പോലെ കുടുംബത്തെയും നാടിനെയും സ്നേഹിച്ച ഒരു കൊച്ചു മനുഷ്യന് നമ്മൾ നൽകിയ വലിയൊരിടം. ആ ഇടത്തിന്റെ ബലത്തിൽതന്നെയാണ്, ഇപ്പോഴും സച്ചിനെ ബ്രാൻഡുകളുടെ പ്രിയതോഴനാക്കി നിലനിർത്തുന്നതും പേടിഎമ്മും സ്പിന്നിയുമൊക്കെ ഇപ്പോഴും സച്ചിനെവച്ച് പരസ്യങ്ങൾ ചെയ്യുന്നതും.

English Summary: Why is Sachin Tendulkar's Brand Value Still Higher around the World?