ഏവിയേഷൻ മേഖലയിൽ ജോലിചെയ്തു നല്ല സംരംഭകർ ആയി മാറിയ എല്ലാവരും എന്റെ റോൾമോഡലുകളാണ്. അതിൽ മൂന്നുപേർ എനിക്ക് പ്രിയപ്പെട്ടതാണ്. ഇൻഡിഗോയുടെ സ്ഥാപകരായ രാഹുൽ ബാട്ടിയ, രാകേഷ് ഗംഗ്വാൾ. എത്ര പ്ലാനിങ്ങോടു കൂടിയാണ് അവർ പ്രവർത്തിച്ചു ലോകത്തിലെതന്നെ നമ്പർ വൺ എയർലൈൻ കമ്പനിയാക്കി മാറ്റിയത്. അവരുടെ നിശ്ചയദാർഢ്യം എടുത്തുപറയേണ്ടതു തന്നെയാണ്. മറ്റൊരാൾ എയർ അറേബ്യയുടെ തലവൻ ആദിൽ അബ്ദുള്ളാ അലിയാണ്. ഷാർജയിലെ ഏറ്റവും മികച്ച സർവീസുകളിലൊന്നാണ് എയർ അറേബ്യ. ഇവരേക്കാളൊക്കെ ഞാൻ ഏറ്റവും കൂടുതൽ ആരാധിക്കുന്ന മറ്റൊരാളുണ്ട്, ഡേവി‍ഡ് നീൽമാൻ. ജെറ്റ് ബ്ലൂ എയർവേയ്സിന്റെ തലവൻ. 

അമേരിക്കയിലെ പ്രശസ്തമായ ഒരു ഏവിയേഷൻ കമ്പനിയാണിത്. അഞ്ച് എയർവേയ്സ് അദ്ദേഹത്തിനുണ്ട്. മോറിസ് എയർ, വെസ്റ്റ് ജെറ്റ്, അസൂൾ എയർവേയ്സ്, ഇത് ബ്രസീലിലെ തന്നെ ഏറ്റവും വലുതാണ്. അവസാനമായി ബ്രീസ് എയർവേയ്സ്. ഇവരൊക്കെത്തന്നെയാണ് എന്റെ ഊർജം. നമുക്ക് ഇൻഡസ്ട്രിയെക്കുറിച്ച് വ്യക്തമായ ധാരണയുണ്ടെങ്കിൽ വിജയിക്കാമെന്ന് തെളിയിച്ചവരാണിവരൊക്കെ. ഏറ്റവുമൊടുവിൽ വിജയ് ഡൂബെ ആകാശ എയർലൈൻ അവതരിപ്പിച്ചില്ലേ ഇവിടെ. എത്ര വിജയകരമായി പോകുന്നു. അത് ഈ മേഖലയെക്കുറിച്ച് വ്യക്തമായ ധാരണയുള്ളതുകൊണ്ടാണ്.

∙ സാധാരണക്കാരനും വിമാനസഞ്ചാരം, അതും കുറഞ്ഞനിരക്കിൽ. ഇതായിരുന്നല്ലോ ആകാശ എയർലൈനിന്റെ മോട്ടോ. ഇതിൽനിന്ന് എങ്ങനെയാണ് ഫ്ലൈ91 വ്യത്യാസപ്പെട്ടിരിക്കുന്നത്?

ഒരുപാടു വ്യത്യാസങ്ങളുണ്ട്. ഞങ്ങൾ പ്രധാനമായും ലക്ഷ്യമിടുന്നത് മറ്റ് എയർവേയ്സുകളൊന്നും എത്തിപ്പെടാത്ത റൂട്ടുകളാണ്. ചെറിയ ചെറിയ നഗരങ്ങൾ തമ്മിലുള്ള കണ്ക്ടിവിറ്റി. വലിയ എയർക്രാഫ്റ്റുകൾക്ക് ഇത്തരത്തിലുള്ള ചെറിയ നഗരങ്ങളെ ബന്ധിപ്പിക്കുക അസാധ്യമാണ്. അത്രയും അടിസ്ഥാന സൗകര്യങ്ങൾ അവിടെ ലഭ്യമാക്കണം. അതുകൊണ്ടാണ് ഇന്ത്യയിലെ ഓരോ ചെറിയ നഗരങ്ങളെയും ബന്ധിപ്പിക്കേണ്ടത് ഞങ്ങളായിരിക്കണം എന്നു തീരുമാനിച്ചത്. നിലവിലുള്ള എയർവേയ്സുമായി ചേർന്നുതന്നെ പ്രവർത്തിക്കാൻ സാധിക്കുമെങ്കിൽ അങ്ങനെയും ശ്രമിക്കും. അല്ലാതെ ഒരു മത്സരത്തിനല്ല ഞങ്ങൾ ശ്രമിക്കുന്നത്. 

ഉദാഹരണത്തിന് ബെംഗളൂരു മുതൽ കൊൽക്കത്ത വരെ പോകുന്ന ഒരു ട്രിപ്പിൽ കോലാപൂരിലേക്ക് (മഹാരാഷ്ട്ര) കണക്ട് ചെയ്യാൻ മറ്റ് എയർക്രാഫ്റ്റുകൾ ഒന്നും തന്നെയില്ല. ഒരു എയർലൈനുമായി ഇങ്ങനെ കണക്ട് ചെയ്തു പോകാൻ ഞങ്ങൾ തയാറാണ്. ഇതിനായി നൂതന സാങ്കേതികവിദ്യയാണ് ഞങ്ങൾ ഉപയോഗിക്കുക. ടെക്നോളജി, പ്രത്യേകിച്ച് ആപ്ലിക്കേഷൻ പ്രോഗ്രാമിങ് ഇന്റർഫേസ് ഉപയോഗിച്ചുകൊണ്ടു യാത്രാസൗകര്യം സുഗമമാക്കുന്നു. അത് ഇന്ത്യയിലെ എല്ലാ ട്രാവൽ ഏജൻസികൾക്കിടയിലും എത്തിക്കും. ആർക്കു വേണമെങ്കിലും എപ്പോൾ വേണമെങ്കിലും ഞങ്ങളുടെ ഫ്ലൈ91 സർവീസ് ഉപയോഗപ്പെടുത്താം.

∙ എയർ ഇന്ത്യയെ ടാറ്റ ഗ്രൂപ്പ് ഏറ്റെടുത്തതിനെ എങ്ങനെ കാണുന്നു?

അതൊരു തെറ്റായ തീരുമാനമായി തോന്നുന്നില്ല. കാരണം ടാറ്റ ഗ്രൂപ്പ് വളരെ ശക്തമാണ്. പ്രഫഷനലാണ്. 100 വർഷത്തെ പ്രവർത്തനപരിചയം രാജ്യത്ത് അവർക്കുണ്ട്. ഈ എറ്റെടുക്കൽ ഇന്ത്യൻ വ്യോമയാന മേഖലയെ ശക്തിപ്പെടുത്തും.

∙ കേരളത്തിലേക്ക് ഫ്ലൈ91 സർവീസുകൾ ഉടനെ പ്രതീക്ഷിക്കാമോ? അഞ്ചാമത്തെ എയർപോർട്ട് കേരളത്തിൽ ഉടൻ പ്രവർത്തനസജ്ജമാകും. ഇന്ത്യയുടെ തെക്കൻ സംസ്ഥാനങ്ങളിൽനിന്ന് ലക്ഷക്കണക്കിനാളുകൾ ശബരിമലയിലേക്ക് എത്താറുണ്ട്. ഇതൊരു മികച്ച അവസരമായി കാണുന്നുണ്ടോ?

കേരളത്തിൽ സർവീസുകൾ നടത്തുന്നതിനെപ്പറ്റി ആലോചിച്ചു തുടങ്ങിയിട്ടില്ല. വലിയ എയർക്രാഫ്റ്റുകളാണല്ലോ നിലവിൽ സർവീസുകൾ നടത്തുന്നത്. ചെറിയ എയർപോട്ടുകൾക്കുള്ള സജ്ജീകരണങ്ങൾ ആയിവരേണ്ടതുണ്ട്. ഉദാഹരണത്തിന് സേലത്തുനിന്ന് കണ്ണൂരിലേക്ക് ഒരുപാട് അന്വേഷണങ്ങൾ വന്നാൽ പരിഗണിക്കാവുന്ന വിഷയമേയുള്ളൂ. ഇതൊക്കെ അടുത്തഘട്ടത്തിൽ പ്രാവർത്തികമാക്കാനുള്ള ആലോചനയുണ്ട്. ആദ്യപടിയായി ഓരോ പ്രധാന നഗരങ്ങളിലും ചെറിയ വിമാനങ്ങൾക്ക് എത്താനുള്ള സാഹചര്യം ഉണ്ടാക്കിയെടുക്കലാണ്. പിന്നീട്, ഏതു റൂട്ടിലാണ് ഏറ്റവും കൂടുതൽ അന്വേഷണം ലഭിക്കുന്നത് എന്നതനുസരിച്ച് ആ റൂട്ട് പ്രവർത്തനസജ്ജമാക്കാൻ ശ്രമിക്കും.

∙ താങ്കളുടെ വലിയൊരു സ്വപനമാണ് യാഥാർഥ്യമാകാൻ പോകുന്നത്? എന്താണ് അടുത്തത്?

എനിക്ക് ഞാൻ ചെയ്യാൻ പോകുന്നതിനെക്കുറിച്ച് കൃത്യമായ ധാരണയുണ്ട്. അടുത്ത അഞ്ചു വർഷത്തേക്ക് എന്താവണമെന്നും എങ്ങനെയായിരിക്കണമെന്നും വ്യക്തമായ പദ്ധതിയുണ്ട്. അത് പ്രാവർത്തികമാക്കി മുന്നോട്ടു പോകുക എന്നതാണ് എന്റെ ഏറ്റവും വലിയ സ്വപ്നം. അടുത്ത മൂന്നോ അഞ്ചോ വർഷത്തിനുള്ളിൽ ഒരുപാട് എയർക്രാഫ്റ്റുകൾ, ഇന്ത്യയിലുടനീളം റൂട്ടുകൾ ഇതിലെല്ലാമുപരി കമ്പനിയെ ലാഭത്തിലേക്കെത്തിക്കുക എന്നതും വെല്ലുവിളിയാണ്. ഞങ്ങളുടെ ഉപഭോക്താക്കൾക്ക് യാത്രാനുഭവം മികച്ചതാക്കണം. ഫ്ലൈ91നെക്കുറിച്ചുള്ള എന്റെ സ്വപ്നങ്ങളാണ് ഇതൊക്കെ. നല്ലരീതിയിൽ പ്രാവർത്തികമാക്കുകയാണ് ഇനിയുള്ള ഏറ്റവുംവലിയ സ്വപ്നം. 

∙ ഫണ്ടിങ് ഒരു സ്റ്റാർട്ടപ്പിനെ സംബന്ധിച്ച് വളരെ പ്രാധാന്യമുള്ളതാണല്ലോ. എങ്ങനെയാണ് ഫണ്ട് കണ്ടെത്തിയത്?

തീർച്ചയായും. പ്രൈവറ്റ് ഇക്വിറ്റി ഫിനാൻസ് മേഖലയിൽ ശക്തനായ കൺവേർജന്റ് ഫിനാൻസാണ് സഹസ്ഥാപകർ. ഫ്ലൈ91ന്റെ ആങ്കർ ഇൻവെസ്റ്റേഴ്സും കമ്പനിയാണ്. ഇവരെക്കൂടാതെ കുറച്ചു വ്യക്തിഗത നിക്ഷേപവും കമ്പനിക്കുണ്ട്. മറ്റു സ്റ്റാർട്ടപ്പുകളെ പോലെയല്ലല്ലോ ഏവിയേഷൻ ഇൻഡസ്ട്രി. ഇവിടെ പിടിച്ചുനിൽക്കാൻ ഫണ്ടിങ് അത്യാവശ്യമാണ്. മിക്ക ഏവിയേഷൻ സ്റ്റാർട്ടപ്പുകളും വിജയിക്കാതെ പോയത് പ്ലാനിങ്ങിന്റെയും ഫണ്ടിങ്ങിന്റെയും അഭാവത്തിലാണ്. അതുകൊണ്ടുതന്നെ ഇക്കാര്യത്തിൽ പ്രത്യേകം പദ്ധതികൾ ഉണ്ടാക്കിയെടുത്തിട്ടുണ്ട്.

∙ അടുത്ത അഞ്ചുവർഷത്തിനുള്ളിൽ എന്തു മാറ്റമാണ് ഏവിയേഷൻ മേഖലയിൽ താങ്കൾ പ്രതീക്ഷിക്കുന്നത്? 

ഇന്ത്യ അനുദിനം വളരുകയാണ്. മാക്രോ ഇക്കണോമിക് തലത്തിൽ പോലും വലിയ മാറ്റം പ്രകടമാണ്. അടുത്ത പത്തുവർഷം രാജ്യത്ത് യാതൊരു പ്രതിസന്ധിക്കും ഇടമില്ല. ഇക്കാലത്ത് നിർമാണമേഖല സജീവമാകുന്നമാകുന്നതോടെ വിപണിയിലും മാറ്റം പ്രകടമാകും. കൂടുതൽ യാത്രകൾ ആവശ്യമായി വരും. ഇത് ട്രാവൽമേഖലയിലും വലിയൊരു സാധ്യതയാണ്. ഈ സാധ്യതകളെ മികച്ചരീതിയിൽ പ്രയോജനപ്പെടുത്തുകയാണ് ഞങ്ങളുടെയും ലക്ഷ്യം. 

∙ നമ്മുടെ രാജ്യത്ത് സർക്കാർ വന്ദേഭാരത് പോലുള്ള പ്രീമിയം ട്രെയിനുകൾ കൊണ്ടുവരുന്നു. ബുള്ളറ്റ് ട്രെയിൻ പദ്ധതി വിപുലീകരിക്കുമെന്ന വാർത്തകളുണ്ട്. ഇത് നല്ലൊരു ശതമാനം ആളുകളെ അങ്ങോട്ടേക്ക് ആകർഷിക്കില്ലേ?

എന്റെ അഭിപ്രായത്തിൽ ട്രെയിൻ, റോ‍‌‍ഡുഗതാഗതം വികസിക്കുക വഴി അത് ഏവിയേഷൻ മേഖലയ്ക്കും ഗുണകരമാകുമെന്നാണ്. ലോകത്താകെ അതിനുദാഹരണങ്ങളുണ്ട്. പാരിസിൽനിന്ന് ലണ്ടനിലേക്കു പോകാൻ യൂറോസ്റ്റാർ ട്രെയിനിൽ മൂന്നു മണിക്കൂർ മതി. ന്യൂയോർക്കിൽനിന്ന് വാഷിങ്ടണിലേക്ക് ആംട്രാക്കിൽ നല്ല സുഖമായി പോയിവരാം. ബെയ്ജിങിൽനിന്നു ഷാങ്ഹായിലേക്ക് ബുള്ളറ്റ് ട്രെയിനുണ്ട്. അതും ഓരോ പതിനഞ്ച് മിനിറ്റിലും. പക്ഷെ ഇവിടെയൊക്കെ വിമാനസർവീസുകളും കൂടുതലാണ്. ആളുകൾക്ക് അതൊരു ചോയ്‌സാണ്. ഏറ്റവും സുഖകരമായ യാത്ര തിരഞ്ഞെടുക്കാനുള്ള സൗകര്യമാണത്. ഇതൊക്കെ പരസ്പരപൂരകമാണ്. അതുകൊണ്ടുതന്നെ ഞങ്ങൾ ആരോടും മത്സരിക്കാനല്ല ഉദ്ദേശിക്കുന്നത്. യാത്ര എളുപ്പമാക്കുക എന്നതു മാത്രമാണ്. 

∙ കുടുംബത്തെക്കുറിച്ച്?

ഞാൻ ഒരു തൃശൂർകാരനാണ്. പക്ഷേ അങ്ങനെ പറയാനും കഴിയില്ല. അമ്മയും അച്ഛനും ചെറുപ്പം തൊട്ട് ഗോവയിലാണ്. ഞാൻ ജനിച്ചതും അവിടെത്തന്നെ. അച്ഛന്റെ കുടുംബം കുന്ദംകുളത്തും അമ്മയുടെ വീട് വടക്കാഞ്ചേരിയുമായിരുന്നു. അതുകൊണ്ടു കുടുംബക്കാർ കുറച്ചുപേർ കേരളത്തിലുണ്ട്. ഭാര്യയും ഒരു മകളുമടങ്ങുന്നതാണ് കുടുംബം. പിന്നെ ജോലിയുമായി ചെന്നൈയിലും ഡൽഹിയിലുമൊക്കെയായിരുന്നു. കഴിഞ്ഞ 20 വർഷമായി ബോംബെയിലാണ്. തിരിച്ചു ഗോവയിലേക്ക് മടങ്ങാനുള്ള ചിന്തയിലാണ്. കാരണം ഫ്ലൈ91ന്റെ പ്രവർത്തനം ഗോവ കേന്ദ്രീകരിച്ചാണ്. 

∙ എന്താണ് യുവതലമുറയോട് പറയാനുള്ളത്, പ്രത്യേകിച്ച് സംരംഭകരോട്?

നല്ലൊരു ബിസിനസ് മോ‍ഡൽ മനസ്സിൽ കണ്ടുകൊണ്ടാകണം വിപണിയിലേക്ക് വരേണ്ടത്. കമ്പനി തുടങ്ങുമ്പോൾതന്നെ യുണികോൺ കമ്പനിയാക്കാം എന്നല്ല ചിന്തിക്കേണ്ടത്. ലോകത്ത് ഒരേയൊരു ബിൽഗേറ്റ്സും ഇലോൺ മസ്കും സ്റ്റീവ്ജോബ്സും ബൈജു രവീന്ദ്രനും മാത്രമേയുള്ളൂ. ഒരുപാട് തോൽവികളേറ്റു വാങ്ങിത്തന്നെയാണ് ഇവരും ഇവിടെവരെയെത്തിയത്. ഒരുപാടു പരിശ്രമവും ചിന്തയും വ്യക്തമായ പ്ലാനും നമുക്കുണ്ടാകണം. പണത്തോടും പണം തരുന്നവരോടും എപ്പോഴും ബഹുമാനമുണ്ടാകണം. അത് തിരിച്ചുകൊടുക്കാനുള്ളതാണെന്നതും ഓർമയിലുണ്ടാകണം. സ്വപ്നം കാണുന്നത് നല്ലതാണ്, അതിനേക്കാൾ പതിന്മടങ്ങ് പരിശ്രമവും ആവശ്യമാണ്.

English Summary: Interview with Manoj Chacko, Chief Executive Officer of Fly91 Airlines