പിൻഗാമിയായ റോബർട്ട് ബ്രൂസിന്റെ കീഴിൽ ഗോത്രപ്രമുഖരും യുദ്ധപ്രഭുക്കന്മാരും കർഷക ജനതയും ഒരുമിച്ചു. റോബർട്ട് ബ്രൂസ് ഇംഗ്ലിഷ് പടയെ തോൽപിച്ച് സ്വാതന്ത്ര്യ പ്രഖ്യാപനത്തിനു വഴി തുറന്നു. പിന്നീട് ആഭ്യന്തര യുദ്ധമുണ്ടായി, ഹൈലാൻഡ്-ലോലാൻഡ്‌ വിഭജനമുണ്ടായി, കറുത്ത മരണമായി പ്ലേഗ് വ്യാപിച്ചു. പതിനാലാം നൂറ്റാണ്ടിന്റെ അന്ത്യത്തിൽ, നവോത്ഥാനവും പരിഷ്കരണവും സാംസ്കാരിക മുന്നേറ്റത്തെ സഹായിച്ചു. ഇംഗ്ലണ്ടുമായി വീണ്ടും യുദ്ധവും സമാധാനവും. 

 

മേരി ക്വീൻ ഓഫ് സ്കോട്ടിന്റെ കാലത്ത് യുദ്ധം. മേരിയുടെ കസിനാണ് ഇംഗ്ലിഷ് രാജ്ഞി. പക്ഷേ അധികാര വടംവലിയിൽ മേരി ലണ്ടനിൽ വധിക്കപ്പെട്ടു, പിന്നീട് മേരിയുടെ മകൻ ഇംഗ്ലിഷ് രാജാവായി. രാജാധികാരം, ബന്ധുത്വം, അനന്തരാവകാശം... ഇംഗ്ലിഷ്, സ്കോട്ടിഷ്, ഐറിഷ് ചരിത്രം പിന്നെ കുറേക്കാലം അതിൽ ചുറ്റിക്കറങ്ങി. 1603 ൽ സ്കോട്ട്ലൻഡ് രാജാവായ ഹെൻറി ജനിതകം വഴി ഇംഗ്ലിഷ്, ഐറിഷ് രാജാവായി. ലണ്ടൻ ഭരണകേന്ദ്രമാക്കി ഗ്രേറ്റ്‌ ബ്രിട്ടൻ എന്ന ഒരൊറ്റ രാഷ്ട്രത്തിലേക്കുള്ള പ്രയാണവും ആരംഭിച്ചു, വെയിൽസിനെ പിന്നീട് ചേർത്തു. രാജ്യാധികാരവും രാഷ്ട്രീയവും മതവും നിയമവും ചേർന്ന ഒരു തീച്ചൂള. ഈ സംഗമം വേണ്ടായിരുന്നുവെന്ന് പിന്നീട് സ്കോട്ടിഷ് അനന്തര തലമുറകൾക്ക് തോന്നി. ഇംഗ്ലണ്ടിന്റെ പിടിമുറുകി, വെസ്റ്റ് മിൻസ്റ്റർ ഭരണസിരാകേന്ദ്രമായി. 

 

പത്തൊൻപതാം നൂറ്റാണ്ടിൽ, സാഹിത്യകാരനായ വാൾട്ടർ സ്കോട്ടും കൂട്ടരും സ്കോട്ട് ദേശീയബോധം ഉത്തേജിപ്പിച്ചു, പക്ഷേ സ്വാതന്ത്ര്യസമരമില്ല. അതേസമയം ചോരയോഴുകിയ സമരത്തിലൂടെ ഇംഗ്ലിഷ് അതിക്രമം അവസാനിപ്പിച്ച് തെക്കൻ അയർലൻഡ് സ്വാതന്ത്ര്യം നേടി. ഇന്ന് ബ്രിട്ടന്റെ പരിധിയിൽ സ്കോട്ട്ലൻഡ് അർധ-സ്വയംഭരണ പ്രദേശമായി നിലനിൽക്കുന്നു. 2014 ൽ വിട്ടു പോകാനുള്ള അവസരം വന്നിട്ടും വേണ്ടെന്നാണ് ജനങ്ങൾ വോട്ടിലൂടെ തീരുമാനിച്ചത്. അതു നടന്നാൽ ഇംഗ്ലണ്ടിന് സാമ്പത്തികമായി കനത്ത പ്രഹരമായേനെ. ചേർന്നു നിന്നാൽ രണ്ടു കൂട്ടർക്കും പ്രയോജനമുണ്ടെന്ന് തിരിച്ചറിവായി. ഇംഗ്ലിഷ് രാജാവാണ് സ്കോട്ട് രാഷ്ട്രത്തലവൻ, ജനങ്ങൾ തിരഞ്ഞെടുത്ത ഫസ്റ്റ് മിനിസ്റ്റർ സ്കോട്ട് ഭരണാധികാരി. സ്കോട്ടുകൾക്ക് ബ്രിട്ടിഷ് പാർലമെന്റിൽ മതിയായ പ്രാതിനിധ്യം ഉണ്ട്. പ്രതിരോധം, വിദേശകാര്യം, കുടിയേറ്റം- ഈ ചുമതലകൾ ബ്രിട്ടന്. നിയമം, ആരോഗ്യം, വിദ്യാഭ്യാസം, സാമ്പത്തികം, ഭരണനിർവഹണം, ക്രമസമാധാനം എന്നിവ സ്കോട്ട്ലൻഡിനു സ്വന്തം.

 

∙ എല്ലാം മാറ്റിമറിച്ച ‘വാറ്റ്’

 

സ്കോച്ചിനു മുൻപ് ഐറിഷ് വിസ്കി ഉണ്ടായിരുന്നു. മദ്യ പാരമ്പര്യത്തിൽ ഊറ്റം കൊള്ളുന്ന സ്കോട്ട്ലൻഡ് അയൽക്കാരായ അയർലൻഡിലെ സന്യാസികളോട് കടപ്പെട്ടിരിക്കുന്നു. ആറാം നൂറ്റാണ്ടു മുതൽ അയർലൻഡിൽ മദ്യ നിർമാണം ആരംഭിച്ചിരുന്നു. അതിനു വീഞ്ഞും സുഗന്ധദ്രവ്യവുമായും ബന്ധമുണ്ട്. ഐറിഷ് മൊണസ്ട്രികളിലെ സന്യാസിമാർ മിഷനറി പ്രവർത്തനത്തിനായി ചുറ്റി സഞ്ചരിച്ചിരുന്നു. മിഷനറികളെ മതപരിവർത്തകരായി മാത്രം കാണരുത്, അവർ സാംസ്കാരിക പരിവർത്തകരായിരുന്നു; അറിവിന്റെ വാഹകരായിരുന്നു. ജ്ഞാനം കടൽ കടന്നു സഞ്ചരിച്ചു. മധ്യകാലത്തിന്റെ ആദ്യ പകുതിയിൽ, ഫ്രാൻസിലെ സന്യാസികൾ വീഞ്ഞുണ്ടാക്കുന്ന അതേരീതിയിൽ മറ്റു മദ്യവും ഉണ്ടാക്കാമെന്നു കണ്ടെത്തി. 

 

മധ്യപൂർവ ദേശത്തും ആഫ്രിക്കയിലും സഞ്ചരിച്ച സന്യാസിമാർ സുഗന്ധദ്രവ്യം (Per-fume, through smoke) ഉണ്ടാക്കുന്ന രീതിയും കണ്ടു പഠിച്ചിരുന്നു. ഐറിഷ് ആശ്രമങ്ങളിലെ ലളിതമായ ആഹാരമായ കുറുക്ക് (Porridge) അവർ ആദ്യമായി പരീക്ഷണ വസ്തുവാക്കി.‌ അതിൽ സൂക്ഷ്മ ജീവികൾ സ്വാഭാവികമായും കാണും. അതിനെ വീണ്ടും വീണ്ടും ചൂടാക്കിയാൽ ലഭിക്കുന്ന വാതകത്തെ തണുപ്പിച്ചാൽ മൃദുവായ ലഹരി പാനീയമായി. സന്യാസികൾക്കു ചാരായം വാറ്റാണോ പണിയെന്ന് നിശ്ചയമായും സംശയിക്കാം. തണുപ്പുരാജ്യങ്ങളിൽ വീഞ്ഞും മദ്യവും ഭക്ഷണത്തിന്റെ ഭാഗമാണ്. കൊടും തണുപ്പിൽ മിതമായ ഉപയോഗം ഗുണം ചെയ്യും. 

 

മുന്തിരി, സുഗന്ധദ്രവ്യം, കുറുക്ക്- നിരന്തരം പരിഷ്കരിച്ച് ഐറിഷ് വിസ്കിയുടെ ആദിരൂപം ഉണ്ടായി. ഐറിഷ് സന്യാസികൾ ഇംഗ്ലണ്ടിലും സ്കോട്ട്ലൻഡിലും ചുറ്റി സഞ്ചരിക്കുന്നത് സാധാരണം. അക്കാലത്ത് അനേകം കോട്ടകളും മൊണസ്ട്രികളും ഉയർന്നു, കെൽറ്റിക്-ഗേലിക് സംസ്കാരം ക്രിസ്തുമതത്തോടു കലർന്നു. മഹത്തായ പുസ്തകങ്ങൾ രചിക്കപ്പെട്ടു (തിളങ്ങുന്ന ലിപികളിൽ ചിത്രാലേഖനം ചെയ്ത വിശുദ്ധ ഗ്രന്ഥം 'ബുക്ക് ഓഫ് കെൽസ്' ഉൾപ്പെടെ). വൈക്കിങ് ആക്രമണ ഭീഷണിക്കിടയിലും സന്യാസികൾ വാറ്റുവിദ്യ സ്കോട്ടിഷ് ദ്വീപുകളിൽ പ്രചരിപ്പിച്ചു. അത് മെയിൻലാൻഡിൽ പരന്ന് ആ നാടിന്റെ സവിശേഷ വ്യക്തിത്വമായി.

 

∙ വരുന്നു സ്കോ‌ച്ച് വിസ്‌കി

 

ഇഷ്കെ ബാഹ (Uisge beatha) അഥവാ ജീവജലം എന്ന ഗേലിക് വാക്കിൽനിന്നാണ് വിസ്കി വരുന്നത്. പതിനൊന്നാം നൂറ്റാണ്ടിൽ തുടക്കം, പക്ഷേ പതിനഞ്ചാം നൂറ്റാണ്ടിന്റെ ആരംഭത്തിലാണ് വാറ്റിനെ കുറിച്ചുള്ള ആദ്യ പരാമർശം. 1494 ലെ നികുതി രേഖകളിൽ ഇങ്ങനെ കാണുന്നു - ‘ഫാദർ ജോൺ കോറിന് മദ്യമുണ്ടാക്കാൻ എട്ട് ബോൾ മാൾട്ട്.’ അദ്ദേഹം ഭാഗ്യവാൻ! 1500 കുപ്പിക്ക് അതു ധാരാളം. നാട്ടിൽ വാറ്റുവിദ്യ വളർന്നു കഴിഞ്ഞു. സ്കോച്ചിന്റെ വർധിച്ച പ്രചാരം, സാമ്പത്തിക പ്രതിസന്ധി നേരിടുന്ന ബ്രിട്ടിഷ് പാർലമെന്റിന്റെ ശ്രദ്ധ നേടി. നികുതി ഏർപ്പെടുത്താൻ വൈകിയില്ല. 1644 ൽ നിലവിലായ നികുതി പക്ഷേ കള്ളവാറ്റിന് തുടക്കമിട്ടു. എക്‌സൈസും അനധികൃത ഡിസ്റ്റിലറികളുടെ കടത്തുകാരും തമ്മിലുള്ള യുദ്ധം അവിടെ തുടങ്ങി. 

 

നൂറ്റൻപതു വർഷം അങ്ങനെ തുടർന്നു. മദ്യം കടത്തുന്നവർ വെറുതെയിരുന്നില്ല, അവർ നൂതന മാർഗങ്ങൾ കണ്ടു പിടിച്ചു. പതിനെട്ടാം നൂറ്റാണ്ടിലെ പ്രശസ്തനായ സ്കോട്ട് കവി റോബർട്ട് ബേൺസ് എക്‌സൈസ് ഉദ്യോഗസ്ഥനുമായിരുന്നു. മടിച്ചു ചെയ്ത ജോലി. ‘സ്കോച്ച് ഡ്രിങ്ക്’ എന്ന കവിതയിൽ, നാട്ടിൽ സഹകരണവും സൗഹൃദവും സാമൂഹ്യ ബോധവും ഊട്ടിയുറപ്പിക്കുന്നതിൽ വിസ്കിയുടെ പങ്കിനെക്കുറിച്ച് കവി വാചാലനായി. 1820 ആയപ്പോഴേക്കും ഓരോ വർഷവും ഏകദേശം പതിനാലായിരം അനധികൃത വാറ്റ് സാമഗ്രികൾ പിടിച്ചെടുക്കുന്ന സ്ഥിതി. 

 

സ്കോട്ട്ലൻഡിൽ ഉണ്ടാക്കുന്ന മദ്യത്തിൽ പാതിയും നികുതി വെട്ടിച്ചത്. ജനങ്ങൾക്ക് അതൊരു ലഹരിയും സമര മാർഗവും. നിരോധിച്ചില്ലെങ്കിൽ ഇത്രയും പേർ അരയും തലയും മുറുക്കി ഇറങ്ങില്ല, ഇതിപ്പോൾ കുടിൽ വ്യവസായം പോലെയായി. ജനങ്ങളുടെ തുടർച്ചയായ നിയമ ലംഘനം ഗോർഡൻ പ്രഭുവിനെ ഇരുത്തി ചിന്തിപ്പിച്ചു. ചിന്തിക്കാൻ കാരണമുണ്ട്, ഏറ്റവും നല്ല കള്ളവാറ്റ് വിസ്കി ഉദ്പാദിപ്പിരുന്ന ഭൂപ്രദേശങ്ങളൂടെ ഉടമ പ്രഭുവാണ്. വിസ്കി നിയമ വിധേയമാക്കിയാൽ സർക്കാരിന് നേട്ടമാകുമെന്ന് ഗോർഡൻ പാർലമെന്റിനെ ധരിപ്പിച്ചു.

 

1823 ൽ ബ്രിട്ടിഷ് പാർലമെന്റ് നിയന്ത്രണങ്ങൾ കുറച്ചു, അബ്കാരി നിയമം നിലവിൽ വന്നു. പത്ത് പൗണ്ട് ഫീസ്‌ അടച്ച് വാറ്റാം. ഓരോ ഗാലൻ സ്പിരിറ്റിനും നിശ്ചിത തുക സർക്കാരിന് നൽകണം. ഡ്യൂക്ക് ഗോർഡന്റെ ഭൂമിയിൽ പണിയെടുത്തിരുന്ന കർഷകൻ ജോർജ് സ്മിത്ത് പുതിയ നിയമ പ്രകാരം ആദ്യമായി ഡിസ്റ്റിലറി ലൈസൻസ് എടുത്തു 1824 ൽ ഗ്ലെൻവിവറ്റ് സ്ഥാപിച്ചു, ആദ്യ സിംഗിൾ മാൾട്ട് ഡിസ്റ്റിലറി. തൊട്ടടുത്ത വർഷങ്ങളിൽ തുടങ്ങിയ ബോമോർ, ബാൽബ്ലെയർ, ഗ്ളെൻമോറൻജി എന്നിവ ഇപ്പോഴും തുടരുന്നു. 1831 ൽ ഒരു നിർണായക നേട്ടം! ആനിയാസ് കോഫി എന്നൊരാൾ കോളം സ്റ്റിൽ കണ്ടു പിടിച്ചു, നിലവിലുള്ളതിനെ പരിഷ്കരിച്ച ഉപകരണം. ഓരോ ബാച്ച് കഴിയുമ്പോഴും വൃത്തിയാക്കേണ്ടി വരാതെ തുടർച്ചയായി വാറ്റാം. മൾട്ടിപ്പിൾ ഡിസ്റ്റിലേഷൻ നടത്താം. അങ്ങനെ ഉൽപാദനം കൂടി.

 

പുതിയ രീതിയിലെ ലഹരിയും രുചിയും ആളുകൾക്ക് ഇഷ്ടമായി. കനം കുറഞ്ഞ, മൃദുലമായ മദ്യം. അതുവരെ ഉണ്ടായിരുന്നത് മാൾട്ട് വിസ്കി മാത്രം. പുതിയ വാറ്റുപാത്രമായ കോളം സ്റ്റിൽ ഗ്രെയിൻ വിസ്കിയ്ക്ക് വഴി തുറന്നു. നേർത്ത രുചിയുള്ള ഗ്രെയിൻ വിസ്കി തീക്ഷ്ണമായ മാൾട്ട് വിസ്കിയുമായി ചേർത്ത് ബ്ലെൻഡഡ് വിസ്കി നിർമ്മിച്ചു. അങ്ങനെ സ്കോച്ചിന്റെ മാർക്കറ്റ് വലുതായി, വ്യാവസായിക ഉൽപന്നമായി അതു മാറി. ക്രമേണ അനധികൃത നിർമാണം നിലച്ചു. എന്നാൽ ഉന്നത നിലവാരം തുടർന്നു. ഇന്നത്തെ പ്രമുഖ ഡിസ്റ്റിലറികളുടെ പൂർവികർ പലരും പഴയ കള്ളവാറ്റുകാരത്രേ, എന്നാൽ കള്ളവാറ്റ് എന്ന പേര് പോലും അധികപ്പറ്റ്. ഈ ‘ശ്രേഷ്ഠകല’ നിയമത്തിൽ കുരുങ്ങി നശിച്ചു പോകാതെ നിലനിർത്തിയതിന് അവർക്ക് നന്ദി പറയുക.

 

∙ വിപണിയിലെ രാജാവ്

 

പത്തൊൻപതാം നൂറ്റാണ്ടിലെ വിസ്കി പ്രമാണികൾ (ജെയിംസ് ബുക്കാനൻ, ടോമി ഡ്യൂവർ, ജോണി വാക്കർ, ജെയിംസ് ഷിവാസ്) സ്കോച്ചിനെ ഇതാദ്യമായി രാജ്യത്തിനു പുറത്ത് കൊണ്ടു പോയി. സംരംഭകരുടെ സാഹസികതയുമായി ചേർന്ന് സ്കോച്ച് ബ്രിട്ടനിൽ വ്യാപിച്ചു. യൂറോപ് വൻകര, ബ്രിട്ടിഷ് കോളനികളായ ഇന്ത്യ, അമേരിക്ക, കാനഡ, സൗത്ത് ആഫ്രിക്ക, ഓസ്‌ട്രേലിയ... വിപണി വളർന്നു വലുതായി. അവരന്ന് വികസിപ്പിച്ച കയറ്റുമതിയാണ് ഇന്നും സ്കോച്ചിന്റെ വിജയം. ലോകം മുഴുവൻ പടരാൻ ഭാഗ്യവും തുണച്ചു. 1880കളിൽ വണ്ടുകൾ പരത്തിയ വൈറസ് ഫ്രാൻസിലെ മുന്തിരിത്തോപ്പുകളെ നശിപ്പിച്ചിരുന്നു. ഏതാനും വർഷങ്ങൾക്കകം വീഞ്ഞും ബ്രാൻഡിയും നിലവറകളിൽനിന്ന് അപ്രത്യക്ഷമായി. സ്കോട്ട്ലൻഡിലെ സംരംഭകർ അവസരം മുതലെടുത്തു, ഫ്രഞ്ച് മദ്യവിപണി തിരിച്ചു വന്നപ്പോഴേക്കും സ്കോച്ച് അവരുടെ സ്ഥാനം കയ്യടിക്കിയിരുന്നു. ഫ്രഞ്ച് വൈൻ ഇന്നും കാൽപനികമാണ്, പക്ഷേ വിപണിയിൽ ഒരേയൊരു രാജാവ് - സ്കോച്ച്.

 

1920-ൽ അമേരിക്കയിൽ മദ്യം നിരോധിച്ചു, എന്നാൽ വിസ്കിയെ നിബന്ധനകളോടെ ഒഴിവാക്കി. ഡോക്ടറുടെ അനുമതിയോടെ ഔഷധാവശ്യങ്ങൾക്ക് ഉപയോഗിക്കാം. ചില പ്രശസ്തർ ഇത് ദുരുപയോഗം ചെയ്തു. 1932 ജനുവരി 26 ന് ഡോക്ടർ പിക്കാർട്ടിന്റെ കുറിപ്പടി: ‘അപകടത്തിനു ശേഷം സുഖം പ്രാപിക്കുന്ന ശ്രീ. വിൻസ്റ്റൺ ചർച്ചിലിന് ആഹാരത്തോടൊപ്പം മദ്യം നൽകേണ്ടത് ആവശ്യമായി വരുന്നു. ചുരുങ്ങിയത് 250 ക്യുബിക് സെന്റിമീറ്റർ എങ്കിലും അനുവദിക്കുക.’ സ്കോച്ചുമായുള്ള ചർച്ചിലിന്റെ ബന്ധം രണ്ടാം ലോകമഹായുദ്ധ കാലത്ത് തുടർന്നു. വാർ റൂമിൽ ബലം നൽകുന്ന സഹചാരിയായിരുന്നു സ്കോച്ച്. 

 

ഗ്രേറ്റ് ഡിപ്രഷനിൽ തകർന്ന വിപണി, യുദ്ധം കഴിഞ്ഞപ്പോൾ വീണ്ടും ഉണർന്നു. 1960 ൽ തകർന്നു, 70 ൽ ഉയർന്നു, 80 ൽ വീണ്ടും തകർന്നു, ആഗോള യാത്ര തുടർന്നു. 1994 ൽ അഞ്ഞൂറാം വാർഷികം ആഘോഷിച്ചു, കയറ്റുമതി 200 കോടി പൗണ്ട് കടന്നു. ശക്തമായ നിയമ സംരക്ഷണം സ്കോച്ചിന്റെ പ്രചാരവും നിലവാരവും കൂട്ടി. നിയമം അനുസരിച്ച്, സ്കോട്ട്ലൻഡിൽ മാത്രമേ സാധനം വാറ്റി ഓക്ക് വീപ്പകളിൽ മൂപ്പിക്കാവൂ. 1933 ൽ ബ്രിട്ടിഷ് നിയമത്തിൽ സ്കോച്ചിന് ഒരു നിർവചനമുണ്ടായി. 1988 ൽ സ്കോച്ച് വിസ്കി ആക്ട്, 2009 ൽ സ്കോച്ച് വിസ്കി റഗുലേഷൻസ്. മദ്യം രാജ്യത്തിന്റെ ബ്രാൻഡ് അംബാസഡർ, ജയിംസ് ബോണ്ട് ഉൾപ്പെടെയുള്ള പുരുഷ കേസരികൾക്ക് സ്കോച്ചില്ലാതെ പറ്റില്ലെന്നായി! 

 

ആഗോള വ്യാപനത്തിന്റെയും, ഉയരുന്ന നികുതിയുടെയും പശ്ചാത്തലത്തിൽ വ്യവസായത്തിന് ഐക്യസ്വരം വേണമായിരുന്നു. അങ്ങനെ ഇരുപതാം നൂറ്റാണ്ടിന്റെ ആരംഭത്തിൽ സ്കോച്ച് വിസ്കി അസോസിയേഷൻ രൂപം കൊണ്ടു. കോവിഡ്‌കാലത്ത് സ്കോച്ച് ഇൻഡസ്ട്രി തുണയായി. അസോസിയേഷൻ ഓൺലൈൻ പോർട്ടൽ വഴി ഹാൻഡ് സാനിറ്റൈസർ വിതരണം ചെയ്തു. ഡിസ്റ്റിലറികൾ ഒരാഴ്ചയിൽ പതിനഞ്ച് ലക്ഷം ലിറ്റർ എത്തനോൾ ഉൽപാദിപ്പിച്ചു. ഒരു മാസം ഒരു കോടിയിലധികം. 500 മില്ലി ബോട്ടിലിന് അത് ധാരാളമായി. അകത്തും പുറത്തും ആൽക്കഹോൾ കൊണ്ടു നേരിടാം! കോവിഡ്‌കാലത്തെ തളർച്ച മറികടന്ന് വീണ്ടും വളർന്നു, ഇന്ന് 175 രാജ്യങ്ങളിൽ സ്കോച്ച് ഉണ്ട്. കയറ്റുമതി 600 കോടി പൗണ്ട് കടന്നു. വിസ്കി വിദേശനാണ്യം നേടിത്തരും, ആ പണം ജനങ്ങൾക്ക് ഭക്ഷണം നൽകും. അനേകായിരം തൊഴിലവസരങ്ങൾ, അനേകലക്ഷം സംതൃപ്തരായ മദ്യപാനികൾ!

 

∙ ജീവന്റെ ജലം

 

പ്രകൃതിരമണീയമാണ് സ്കോട്ട്ലൻഡ്. മലയിറമ്പിലെ ചരിത്ര നഗരങ്ങൾ. മഞ്ഞു മൂടിയ മലകളുടെ പശ്ചാത്തലത്തിൽ പുരാതനമായ കോട്ടകൾ, കുന്നുകൾ നിറഞ്ഞ വശ്യമായ ഉയർന്ന പ്രദേശങ്ങൾ, പഴമയും പുതുമയും ചേരുന്ന എഡിൻബറ, ഗ്ലാസ്ഗോ നഗരങ്ങൾ, ഹെബ്രൈഡ്സിലെ ദ്വീപ സമൂഹങ്ങൾ. എണ്ണമറ്റ തടാകങ്ങൾ, അതിലൊന്നിൽ ‘ലോക് നെസ് മോൺസ്റ്റർ’, മലനിരകൾ അതിരിടുന്ന തടാകത്തിലെ മൂടൽ മഞ്ഞ്. കരയിൽ പുരാതന ദുർഗത്തിന്റെ അവശിഷ്ടങ്ങൾ. റോമൻ സേന കൊണ്ടു വന്ന ബാഗ്പൈപ്പ് പിന്നീട് സ്കോട്ട് സംഗീതത്തിന്റെ അവിഭാജ്യ ഘടകമായി. ശോകഛായയും ഗൃഹാതുരത്വവും നിറഞ്ഞ നാടോടിഗാനങ്ങളുടെ അകമ്പടി വാദ്യം. ബാഗ്പൈപ്പ് നാദം ഉയരാത്ത ഒരു സാസ്‌കാരിക പരിപാടിയോ ആഘോഷമോ അവിടെയില്ല. പരമ്പരാഗത വസ്ത്രമായ കിൽറ്റിന് ഗേലിക്/ കെൽറ്റിക് പാരമ്പര്യം. 

 

സ്കോട്ട് പൈതൃകത്തിൽ സ്കോച്ചിന്റെ സ്ഥാനം ഇപ്പോൾ വ്യക്തം. രാജ ചതുരംഗത്തിൽ മേധാവിത്വവും സ്വയംഭരണവും നഷ്ടമായെന്ന പൊതുവികാരത്തിൽ, 1644 ൽ ബ്രിട്ടന്റെ നികുതി വ്യവസ്ഥയെ വെല്ലുവിളിച്ച് തുടങ്ങിയ നിയമവിരുദ്ധ മദ്യനിർമാണം, സ്വാതന്ത്ര്യ പ്രഖ്യാപനവും സാംസ്കാരിക സ്വത്വബോധ ചിഹ്നവുമായി മാറിയ കഥയാണത്. കുടിയേറ്റ ജനതകളുടെ കൂടിച്ചേരൽ, അതിനു മുൻപ് ഗോത്രങ്ങളുടെ ഇടകലരൽ. വേട്ടയാടി ജീവിച്ച മനുഷ്യൻ പിന്നീട് ഗ്രാമങ്ങൾ സ്ഥാപിച്ചു കൃഷി ചെയ്തു കുടുംബം പുലർത്തി. വിളകളിൽനിന്നുതന്നെ മാനസിക ഉല്ലാസത്തിനായുള്ള മദ്യവും വികസിപ്പിച്ചു. 

 

മതവും രാഷ്ട്രീയവും രാജാക്കന്മാരും പ്രഭുക്കന്മാരും പോരാളികളും സന്യാസികളും ജന്മികളും കർഷകരും ആ ലഹരി പാനീയത്തിന്റെ വളർച്ചയെ തുണച്ചു, അഥവാ അവരുടെ യാത്രയെ മദ്യം തുണച്ചു. സ്കോച്ച് ആ നാടിന് വെറുമൊരു ലഹരിയല്ല, ജീവന്റെ ജലം തന്നെയാണ്. അവരുടെ ചരിത്രത്തെ, സംസ്കാരത്തെ, സംഗീതത്തെ, നൃത്തത്തെ, സൗഹൃദത്തെ, ഗോത്രസ്മൃതിയെ ഉണർത്തുന്ന ജലം. അതിൽ എത്ര തരമുണ്ട്? ഏതൊക്കെ മേഖലകളാണ് ഉത്തമം? എന്താണ് സ്പിരിറ്റ്? ആൽക്കെമിയുമായി അതിനുള്ള ബന്ധമെന്ത്? രഹസ്യങ്ങൾ ഇനിയും ചുരുളഴിയും.

 

(തുടരും)

 

English Summary: The Origins and History of Scotch Whisky - Part 1