∙ അടുക്കള വഴിയിലെ അഖിലിന്റെ കട്ടിൽ, ലക്ഷം തികച്ച റോയൽറ്റി 

എഴുത്ത് എന്താണു നൽകിയതെന്നു ചോദിച്ചാൽ മിക്കവരും പറയുന്നതുപോലെ പേരും പെരുമയും ആത്മസംതൃപ്തിയും സൗഹൃദങ്ങളും ബന്ധങ്ങളുമെന്നു മാത്രം പറഞ്ഞവസാനിപ്പിക്കില്ല അഖിൽ. എഴുത്ത് ഒരു പരിധിവരെ സാമ്പത്തിക സുരക്ഷിതത്വം നൽകിയതും ജീവിതത്തിലെ ചില സ്വപ്നങ്ങൾ നേടിയെടുക്കാൻ സഹായിച്ചതും ഒരു മറ പോലുമില്ലാതെ അഖിൽ തുറന്നു പറയും. വളരെച്ചെറിയ രണ്ടുമുറി വീട്ടിലാണ് അഖിലും അനുജനും അമ്മയും അച്ഛനുമടങ്ങുന്ന കുടുംബം താമസിച്ചിരുന്നത്. ചെറിയ ഹാളിൽ അടുക്കള വാതിലിനോടു ചേർന്നു കട്ടിലിട്ടായിരുന്നു അഖിലിന്റെ കിടപ്പ്. പുസ്തകങ്ങളും എഴുത്തുസാമഗ്രികളും സൂക്ഷിച്ചിരുന്നതുമെല്ലാം അവിടെത്തന്നെ. രാവിലെ അമ്മയെണീറ്റ് അടുക്കളയിലേക്കു പോകണമെങ്കിൽ അഖിൽ എഴുന്നേറ്റ് കട്ടിൽ മാറ്റി വാതിൽ തുറന്നു കൊടുക്കേണ്ട സ്ഥിതി, പകൽ മുഴുവൻ എല്ലുമുറിയെ പണിയെടുത്തു ക്ഷീണിച്ച് എത്തിയ ശേഷം രാത്രിയിലായിരുന്നു അഖിലിന്റെ എഴുത്തും വായനയുമെല്ലാം. അർധരാത്രി കഴിഞ്ഞും അതു നീളും. എഴുത്തെല്ലാം കഴിഞ്ഞ് കിടന്നു കഴിഞ്ഞാൽ പിന്നെ രാവിലെ അടുക്കളവാതിൽ തുറക്കാൻ ഉറക്കം മുറിയും. സാമ്പത്തിക പരാധീനതകൾക്കിടയിൽ പുതിയ വീടിനെപ്പറ്റി ചിന്തിക്കാനേ സാധ്യമല്ലായിരുന്നു. 

∙ ഈ എഴുത്തുകാരൻ ഇന്നും ജെസിബി പണിക്കാരൻ കൂടിയാണ് 

നീലച്ചടയനും തുടർന്ന് അഖിൽ എഴുതിയ 2 പുസ്തകങ്ങളും വായനാസമൂഹം ഏറ്റെടുത്തപ്പോഴാണ് ആ സ്ഥിതിയിൽ ചെറിയ മാറ്റം സംഭവിച്ചു തുടങ്ങിയത്. പുസ്തകത്തിന്റെ പ്രതിഫലം കിട്ടിയപ്പോഴാണ് ആദ്യമായി അക്കൗണ്ടിൽ ഒരു ലക്ഷം രൂപ തികച്ചു വന്നതെന്ന് അഖിൽ പറയുന്നു. അങ്ങനെ വീടു പുതുക്കിപ്പണിയാൻ തീരുമാനിക്കുകയും ഇക്കഴിഞ്ഞ ഡിസംബറിൽ രണ്ടു കിടപ്പുമുറികളും ഹാളും അടുക്കളയുമടങ്ങിയ വീടുപണി പൂർത്തിയാക്കുകയും ചെയ്തു. അമ്മ സ്വരുക്കൂട്ടിവച്ച പൈസയോടൊപ്പം ഇതിന് അഖിലിനെ സഹായിച്ചത് സാഹിത്യമെഴുത്തിൽ നിന്നുള്ള പ്രതിഫലവുമായിരുന്നു. ഇന്ന് അഖിലിന് സ്വന്തമായി മുറിയുണ്ട്. അവിടെ മനോഹരമായി പുസ്തകങ്ങൾ അടുക്കിവച്ച എഴുത്തുമേശയുണ്ട്. ആരെയും ശല്യപ്പെടുത്താതെ, ബുദ്ധിമുട്ടുകളില്ലാതെ എഴുതാനും വായിക്കാനും കഴിയുന്നുണ്ട്. സ്വന്തം പൈസ മുടക്കി പുതിയ ബൈക്കും അഖിൽ വാങ്ങി. ഇതെല്ലാം എഴുത്തു നൽകിയതാണെന്നു തുറന്നു പറയുന്നതിൽ അഖിലിന് ഒരു മടിയുമില്ല. മുൻപ് മാസത്തിൽ എല്ലാ ദിവസവുമെന്നോണം ജെസിബി ഓടിക്കാൻ പോയിരുന്ന അഖിൽ ഇന്ന് പത്തോ പതിനഞ്ചോ ദിവസമേ പണിക്കു പോകുന്നുള്ളൂ. ബാക്കി സമയം മുഴുവൻ എഴുത്തിനും വായനയ്ക്കുമായി നീക്കിവയ്ക്കുന്നു. ജീവിതപ്രാരാബ്ധങ്ങളിൽപ്പെട്ട് ഇതുവരെയുള്ള കാലത്തു നടക്കാതിരുന്ന വായന തിരിച്ചുപിടിക്കണമെന്ന വാശിയിലുമാണ് അഖിൽ. അതു തന്റെ എഴുത്തിനെ നവീകരിക്കുമെന്ന ബോധ്യവുമുണ്ട്. ഇതിനെല്ലാം പശ്ചാത്തലമായി സാമ്പത്തിക സുരക്ഷിതത്വം നൽകാൻ ഒരുപരിധിവരെ എഴുത്തിനു കഴിഞ്ഞുെവന്നും അഖിൽ സാക്ഷ്യപ്പെടുത്തുന്നു. 

∙ ‘സ്ഥിരവരുമാനം കിട്ടിയപ്പോൾ എഴുത്ത് മോഹം വീണ്ടും തലപൊക്കി’

അമ്മ പുഷ്പവല്ലി ചുമടെടുക്കാൻ പോയാണ് അഖിലിനെയും അനുജൻ അജിലിനെയും പഠിപ്പിച്ചിരുന്നത്. രണ്ടറ്റവും കൂട്ടിമുട്ടിക്കാൻ പ്രയാസപ്പെട്ടിരുന്ന അക്കാലത്ത് അമ്മയ്ക്ക് ഇനിയും ബുദ്ധിമുട്ടാകേണ്ട എന്നും അനുജന്റെ വിദ്യാഭ്യാസം മുടങ്ങേണ്ട എന്നും കരുതിയാണ് അഖിൽ പ്ലസ് ടു കഴിഞ്ഞപ്പോൾ വിദ്യാഭ്യാസം അവസാനിപ്പിച്ചതും പണിക്കു പോയിത്തുടങ്ങിയതും. അനുജൻ ഇപ്പോൾ ഡിഗ്രി പൂർത്തിയാക്കിയ ശേഷം തിരുവനന്തപുരത്ത് ഗ്രാഫിക് ഡിസൈനിങ് പഠിക്കുന്നു. ഏഴാം ക്ലാസിൽ പഠിക്കുമ്പോഴേ എഴുത്തുകാരൻ ആകണമെന്ന മോഹം ഉള്ളിലുറച്ചിരുന്നെങ്കിലും ജീവിതസാഹചര്യങ്ങൾ യാതൊരുവിധ പ്രോൽസാഹനവും നൽകാത്തതിനാൽ മോഹം ഉള്ളിലടക്കി ജീവിക്കുകയായിരുന്നു അഖിൽ. ചെറുപ്രായത്തിലേ പത്രവിതരണക്കാരനായും മറ്റു ജോലികൾ ചെയ്തും വീട്ടിലെ കടുത്ത ദാരിദ്ര്യം ലഘൂകരിക്കാൻ തനിക്കു കഴിയുംവിധം പരിശ്രമിച്ചിരുന്ന അഖിലിന് അപ്പോൾ എഴുത്ത് വലിയ ആർഭാടമായിരുന്നു. പിന്നീടു ജെസിബി ഡ്രൈവറായി മാറുകയും സ്ഥിരമായി വരുമാനം ലഭിച്ചുതുടങ്ങുകയും ചെയ്തപ്പോഴാണ് തന്റെ ഉള്ളിലെ എഴുതാനുള്ള കനൽ അഖിൽ ഊതിത്തെളിച്ചതും നീലച്ചടയൻ എന്ന ഹിറ്റ് പുസ്തകം സംഭവിക്കുന്നതും. പിന്നീട് അഖിലിന് തിരിഞ്ഞുനോക്കേണ്ടി വന്നിട്ടില്ല. സിംഹത്തിന്റെ കഥ, താരാകാന്തൻ എന്നീ രണ്ടു നോവലുകൾക്കു ശേഷം തന്റെ ദേശം പശ്ചാത്തലമായി വരുന്ന അടുത്ത നോവലിന്റെ പണിപ്പുരയിലാണ് അഖിലിപ്പോൾ. ചില പുസ്തകങ്ങൾ സിനിമയാക്കാനുള്ള ചർച്ചകളും നടക്കുന്നു.