∙ പ്രേമിക്കാൻ പേടിച്ച മോനിഷ

നാണംകുണുങ്ങിയായി അച്ഛനു പിറകിൽ നിൽക്കുന്ന പെൺകുട്ടി. കാൽമുട്ടും കഴിഞ്ഞ് നീണ്ടുകിടക്കുന്ന മുടി. വലിയ കണ്ണുകൾ, മനോഹരമായ മന്ദഹാസം. ആദ്യകാഴ്ചയിൽ തന്നെ എംടി അവളിൽ തന്റെ ‘നഖക്ഷതങ്ങളി’ലെ നായികയെ കണ്ടു. അച്ഛൻ ഉണ്ണിക്കും അമ്മ ശ്രീദേവിക്കുമൊപ്പം മദ്രാസിലെ ഹോട്ടലിൽ എത്തിയ മോനിഷയെക്കുറിച്ചാണു എംടി പറയുന്നത്. മകളുടെ പഠിപ്പിനു തടസ്സമാകുന്ന അഭിനയമൊന്നും വേണ്ടെന്ന പക്ഷക്കാരനായിരുന്നു അച്ഛൻ. പക്ഷേ, എംടി വിളിച്ചതിനാൽ അമ്മ ശ്രീദേവിക്കു സമ്മതവും. സംവിധായകൻ ഹരിഹരൻ കഥ പറഞ്ഞുകേൾപ്പിച്ചു. 16 വയസ്സുകാരനും 14 വയസ്സുകാരിയും തമ്മിലുള്ള പ്രണയമായിരുന്നു ഇതിവൃത്തം.

കഥ കേട്ടപ്പോൾ മോനിഷയ്ക്കൊരു സംശയം. ഭയങ്കര പ്രേമരംഗങ്ങളൊക്കെയുണ്ടാകുമോയെന്ന്. ഇല്ലെന്ന് എംടി ഉറപ്പുനൽകി. അങ്ങനെയാണ് മോനിഷ നഖക്ഷതങ്ങളിലൂടെ മലയാളത്തിലേക്ക് വിടർന്ന കണ്ണുകളും മനോഹരമായ മന്ദഹാസവുമായി കടന്നുവന്നത്. ആ വർഷത്തെ മികച്ച നടിക്കുള്ള ദേശീയ അവാർഡ് മോനിഷയ്ക്കായിരുന്നു. നഖക്ഷതങ്ങൾക്കു ശേഷവും എംടിയുടെ ചിത്രങ്ങളിൽ മോനിഷ അഭിനയിച്ചു. പെരുന്തച്ചൻ, കടവ്, വേനൽക്കിനാവുകൾ എന്നീ ചിത്രങ്ങളിൽ.

എംടിയുടെ പെരുന്തച്ചനിലൂടെയാണ് വിനയപ്രസാദ് മലയാളത്തിലെത്തുന്നത്. ഭാർഗവി തമ്പുരാട്ടിയെ കിട്ടാതെ ചിത്രീകരണം മുടങ്ങുന്ന സമയത്താണ് വിനയ പ്രസാദിനെ കണ്ടെത്തുന്നത്. മോനിഷയെയായിരുന്നു രണ്ടുവേഷത്തിലേക്കും ആദ്യം പരിഗണിച്ചിരുന്നത്. എന്നാൽ തമ്പുരാട്ടിയായി വേറെയാളുവേണമെന്നായി. പലരെയും പരിഗണിച്ചു. സ്വർണത്തിൽ കടഞ്ഞെടുത്ത ദേവീവിഗ്രഹം എന്നായിരുന്നു പെരുന്തച്ചനിലെ ഭാർഗവി തമ്പുരാട്ടിയെക്കുറിച്ച് എംടി സംവിധായകൻ അജയനോടു പറഞ്ഞത്. അതുപോലൊരു നടിയെ സംവിധായകനും എംടിയും കണ്ടെത്തിയത് കന്നടത്തിൽ നിന്നുതന്നെ. ബെംഗളൂരുവിലായിരുന്നു വിനയ പ്രസാദ് താമസിച്ചിരുന്നത്. പെരുന്തച്ചന്റെ മനസ്സിളക്കുന്ന സൗന്ദര്യമുള്ള തമ്പുരാട്ടിയായി വിനയ പ്രസാദ് സിനിമയിൽ തിളങ്ങി.

∙ നൃത്തവേദിയിൽനിന്ന് വിനീത്

എംടിയുടെ ഭാര്യ സരസ്വതിയുടെ ‘നൃത്യാലയ’ എന്ന സ്ഥാപനത്തിൽ നൃത്തം പഠിക്കുന്ന വിനീതിനെ നായകനാക്കാൻ എംടി തീരുമാനിച്ചിരുന്നു. രണ്ടുവർഷം സ്കൂൾ യുവജനോത്സവത്തിൽ നൃത്തം ചെയ്ത് ശ്രദ്ധേയനായിരുന്നു വിനീത്. കോഴിക്കോട്ടെ വ്യാപാരിയായ കെ.ടി.രഘുനാഥന്റെ സഹോദരൻ കെ.ടി.രാധാകൃഷ്ണന്റെ മകനാണ് വിനീത്. രാധാകൃഷ്ണൻ തലശ്ശേരിയിലെ പ്രമുഖ വക്കീലാണ്. അമ്മ ഡോ. ശാന്തകുമാരി. പ്രശസ്ത നടി പത്മിനിയെ വിവാഹം കഴിച്ചത് രാധാകൃഷ്ണന്റെ സഹോദരൻ ഡോ. കെ.ടി.രാമചന്ദ്രനാണ്. നൃത്യാലയത്തിലെ വിനീതിന്റെ നടനപാടവം കണ്ടാണ് എംടി നഖക്ഷതങ്ങളിലേക്ക് വിനീതിനെ നായകനായി തീരുമാനിക്കുന്നത്.

നൃത്യാലയയിലെ ഒരു പെൺകുട്ടിയെയായിരുന്നു മോനിഷ ചെയ്ത വേഷം ചെയ്യാൻ ആദ്യം കണ്ടിരുന്നത്. എന്നാൽ കുട്ടിയുടെ മുത്തശ്ശി സമ്മതം കൊടുത്തില്ല. മോനിഷയുടെ നൃത്താരങ്ങേറ്റം നടന്നത് കോഴിക്കോട്ടുവച്ചായിരുന്നു. അതിന്റെയൊരു ബ്രോഷറിൽ മോനിഷയുടെ ചിത്രം കണ്ടിരുന്നു. മോനിഷയുടെ കുടുംബവും എംടിയുമായി നല്ല ബന്ധവും. അങ്ങനെയാണ് ഒടുവിൽ മോനിഷയെ നായികയാക്കാമെന്നു തീരുമാനിക്കുന്നത്. ഈ സമയം മോനിഷ ബംഗളൂരു ബിഷപ്പ് കോട്ടൻ കോൺവെന്റ് സ്കൂളിൽ ഏഴാംക്ലാസ് വിദ്യാർഥിയായിരുന്നു. നടിയും നർത്തകിയുമായ പത്മിനി പ്രിയദർശിനിയുടെ കീഴിൽ നൃത്തം പഠിച്ചുവരികയായിരുന്നു.

ഒരു വടക്കൻ വീരഗാഥയിൽ ഉണ്ണിയാർച്ചയുടെ ചെറുപ്പം അഭിനയിച്ചുകൊണ്ടാണ് ജോമോൾ സിനിമയിലേക്കു വരുന്നത്. എംടിയുടെ തിരക്കഥയിൽ ഹരിഹരൻ സംവിധാനം ചെയ്ത ഈ ചിത്രത്തിനു ശേഷം ‘എന്നു സ്വന്തം ജാനകിക്കുട്ടി’ എന്ന ചിത്രത്തിൽ ജോമോൾ നായികയായി.

∙ കുട്ട്യേടത്തി വിലാസിനി

‘‘വിലാസിനീ, നിനക്ക് നല്ലൊരു വേഷം ഒരുങ്ങുന്നുണ്ട്. നായികയായിട്ട്.’’. നാടകത്തിലെ മേക്കപ്പ്മാൻ രാഘവൻ പറ‍ഞ്ഞപ്പോൾ വിലാസിനി വിശ്വസിച്ചില്ല. തൃശൂരിൽ നിന്നു കോഴിക്കോട്ടെത്തി, നല്ല നാടകനടിയെന്നു പേരെടുത്തു വരുന്ന സമയം. ചില സിനിമകളിൽ ചെറിയ വേഷത്തിൽ മുഖം കാണിക്കാനുള്ള അവസരം ലഭിച്ചിരുന്നു വിലാസിനിക്ക്. എന്നാൽ തന്നെ കാത്തിരിക്കുന്നത് വലിയൊരു വേഷമാണെന്ന് അവർ അറിഞ്ഞിരുന്നില്ല. 

കെ.ടി.രവി സംവിധാനം ചെയ്ത എംഎൽഎ എന്ന നാടകത്തിൽ വിലാസിനി അഭിനയിച്ചു തകർക്കുകയാണ്. കോഴിക്കോട് ടൗൺഹാൾ ആണു വേദി. രാഷ്ട്രീയക്കാർ വഴിപിഴപ്പിച്ച് ഒടുവിൽ ഭ്രാന്തിയായിപ്പോയ പെൺകുട്ടിയുടെ വേഷം. നിറഞ്ഞ കൈയടിയോടെയാണ് സദസ്സ്  ആ നാടകം ഏറ്റുവാങ്ങിയത്. വേഷമെല്ലാം അഴിച്ചുവച്ച് പുറത്തിറങ്ങുമ്പോൾ രണ്ടാൾ വിലാസിനിയെ കാണാൻ വന്നിരിക്കുന്നു.  എം.ടി.വാസുദേവൻ നായരും സംവിധായകൻ പി.എൻ. മേനോനും.