കോവിഡ് വ്യാപനത്തിന് ശേഷം അദ്ദേഹം രാത്രിസമയങ്ങളിൽ വരുമ്പോൾ ഭക്ഷണമായി കഞ്ഞിയും പയറും കരുതുന്ന പതിവുണ്ടായിരുന്നു. ഇത്തരത്തിൽ ഒരു ദിവസം അദ്ദേഹം എത്താൽ പുലർച്ചെ 3 മണിയായി. വന്നപ്പോഴേ ചോദിച്ചു, ‘‘നിങ്ങൾ എനിക്കുവേണ്ടി കഷ്ടപ്പെട്ട് ഭക്ഷണം തയാറാക്കി വച്ചിട്ടുണ്ടല്ലേ? നിങ്ങളുടെ അധ്വാനവും തയാറാക്കിയ ഭക്ഷണവും വെറുതേയാകണ്ട, അതിങ്ങ് എടുത്തേക്കൂ’’. ആ ഭക്ഷണം മുഴുവൻ കഴിച്ച ശേഷമാണ് അദ്ദേഹം ഉറങ്ങാൻ പോയത്.

∙ മുടങ്ങരുത്, ഒരു ചായയും ദിനപത്രവും

കിടക്കുന്നത് എത്ര വൈകിയാണെങ്കിലും പുലർച്ചെ അഞ്ചിന് വിളിച്ചുണർത്തണമെന്നത് അദ്ദേഹത്തിന് നിർബന്ധമായിരുന്നു. ഉറക്കം എഴുന്നേറ്റാൽ 10 മിനിറ്റിനുള്ളിൽ തന്നെ പ്രാഥമിക കർമങ്ങൾ എല്ലാം പൂർത്തിയാക്കിയിട്ടുണ്ടാകും. പിന്നെ നിർബന്ധമുള്ളത് 2 കാര്യങ്ങളാണ്. ഒരു ചായ, ഒപ്പം ദിനപത്രവും. കുടുംബത്തോടൊപ്പമാണ് വരാറുള്ളതെങ്കിൽ പത്രവായന ഹാളിലേക്ക് മാറ്റും. ഉറങ്ങുന്ന മറ്റുള്ളവർക്ക് ശല്യമാകരുതെന്ന അദ്ദേഹത്തിന്റെ നിർബന്ധമായിരുന്നു അതിനു കാരണം. 

രാത്രി വൈകി എത്തുമ്പോഴും മറ്റാരെയും ശല്യപ്പെടുത്തുകയോ ഉണർത്തുകയോ ചെയ്യാതെയാണ് അദ്ദേഹം മുറിയിലേക്ക് പോയിരുന്നതും. ഇവിടെയെത്തിയാൽ സുരക്ഷാ ഉദ്യോഗസ്ഥരെ പോലും മടക്കി അയയ്ക്കുമായിരുന്നു. അത്രത്തോളം സമാധാനത്തോടെയാണ് അദ്ദേഹം ഇവിടെ സമയം ചെലവഴിച്ചിട്ടുള്ളത്. ഇനി അദ്ദേഹം ഇവിടേക്ക് വരില്ലെന്ന് വിശ്വസിക്കാനാകുന്നില്ല. കഴിഞ്ഞ 4 വർഷത്തിനിടെ ഞങ്ങളുടെ ഈ കുടുംബത്തിലെ ഏറ്റവും പ്രധാനപ്പെട്ട രണ്ടു കാരണവൻമാരെയാണ് നഷ്ടമായത്. ഞങ്ങൾക്ക് താങ്ങാവുന്നതിലും അപ്പുറമാണ് ഈ വിയോഗങ്ങൾ. – ഗെസ്റ്റ് ഹൗസ് ജീവനക്കാർ പറയുന്നു.

∙ ആരും കാണാത്തത് കാണുന്ന നായകൻ

പതിവുപോലെ പുലർച്ചെ ഉമ്മൻചാണ്ടി നാട്ടകം ഗെസ്റ്റ് ഹൗസിന്റെ ചുവന്ന പടവുകൾ ഇറങ്ങി ഓദ്യോഗിക വാഹനത്തിലേക്ക് കയറാന്‍ തുടങ്ങുന്നു. ഗാർഡ് ഓഫ് ഓണർ നൽകിയ പൊലീസുകാരുടെയും കൂടെയുണ്ടായിരുന്ന മറ്റാരുടെയും ശ്രദ്ധ പതിഞ്ഞില്ലെങ്കിലും ഉമ്മന്‍ ചാണ്ടിയുടെ കണ്ണിൽ അത് പതിഞ്ഞു. സാധാരണ ഗതിയിൽ ഉന്നത ഉദ്യോഗസ്ഥരോ, രാഷ്ട്രീയ നേതാക്കൻമാരോ മാത്രമാണ് ഉമ്മൻ ചാണ്ടിയെ കാണാനായി നാട്ടകം ഗെസ്റ്റ് ഹൗസിലേക്ക് എത്താറുള്ളത്. എന്നാൽ അതിൽനിന്നെല്ലാം വ്യത്യസ്ഥമായി ഗെസ്റ്റ് ഹൗസ് പരിസരത്ത് ഒതുക്കി നിർത്തിയിരുന്ന ഓട്ടോറിക്ഷയിലേക്കും അതിന് സമീപം നിന്ന സ്ത്രീയിലേക്കുമാണ് അദ്ദേഹത്തിന്റെ കണ്ണെത്തിയത്. 

കാറിലേക്ക് പോകുന്നതിന് പകരം അദ്ദേഹം നേരെ ഓട്ടോറിക്ഷയുടെ സമീപത്തേക്കു ചെന്നു. അപകടത്തിൽ കാൽ മുറിച്ചുമാറ്റേണ്ടിവന്ന ഭർത്താവിനൊപ്പം വന്ന ആ സ്ത്രീയോട് കാര്യങ്ങൾ ചോദിച്ചു മനസ്സിലാക്കി. അവരുടെ പക്കല്‍നിന്ന് വാങ്ങിയ അപേക്ഷയിൽ, എന്തോ എഴുതി തിരികെ നൽകി. ‘‘നിരാശയോടെ ഓട്ടോറിക്ഷയ്ക്കു സമീപം പകച്ചു നിന്ന ആ സ്ത്രീയുടെ മുഖത്ത് അന്നു കണ്ട സന്തോഷം വാക്കുകളില്‍ പറഞ്ഞറിയിക്കാനാകില്ല. ജീവിതത്തിലെ ഏറ്റവും മനോഹരമായ കാഴ്ചകളിൽ ഒന്നായി അത് എന്നും എന്റെയൊപ്പം ഉണ്ടാകും’’– ഗെസ്റ്റ് ഹൗസ് ജീവനക്കാരനായ കെ.അനിൽ കുമാർ പറയുന്നു.

∙ ഗെസ്റ്റ് ഹൗസിനു സമ്മാനം

നാട്ടകം ഗെസ്റ്റ് ഹൗസിലെ സ്ഥിരം താമസക്കാരായിരുന്ന ഉമ്മൻ ചാണ്ടിയും കെ.എം. മാണിയും ചേർന്ന് ഈ അതിഥി മന്ദിരത്തിന് ഒരു സമ്മാനം നൽകിയിട്ടുണ്ട്. ഉമ്മൻ ചാണ്ടി മുഖ്യമന്ത്രിയും കെ.എം.മാണി ധനമന്ത്രിയും ആയിരിക്കുന്ന കാലത്താണ് ഗെസ്റ്റ് ഹൗസിനോട് ചേർന്ന് 100 പേരെ ഉൾക്കൊള്ളാനാകുന്ന കോൺഫറൻസ് ഹാൾ നിർമിക്കാൻ തുക അനുവദിച്ചത്. കോവിഡും മറ്റു ചില പ്രതിസന്ധികളെയും തുടർന്ന് ഇടക്കാലത്ത് ഈ കെട്ടിടത്തിന്റെ നിർമാണം മുടങ്ങിയിരുന്നു. എന്നാൽ ഇപ്പോൾ ‘ആ രണ്ട് വിശിഷ്ട അതിഥികളുടെയും’ സ്മാരകമായി ഗെസ്റ്റ് ഹൗസ് പരിസരത്ത് ആ കെട്ടിടം തലയുയർത്തി നിൽക്കുന്നുണ്ട്. 

∙ ഡേവിയുടെ ബംഗ്ലാവ്, ദിവാന്റെ കവല വഴി 

ആലപ്പുഴയിലെ ഒരു കയർ ഫാക്ടറിയുടെ മാനേജരായി കേരളത്തിലെത്തിയ ഡി.എച്ച്.ഡേവി എന്ന ബ്രിട്ടിഷുകാരൻ, ജോലിയിൽനിന്ന് വിരമിച്ചതിനു ശേഷമുള്ള ജീവിതത്തിനായി പണികഴിപ്പിച്ച ബംഗ്ലാവാണ് ഇന്നത്തെ അതിഥി മന്ദിരം. നാട്ടകം മണിപ്പുഴയ്ക്കു സമീപം ഉപ്പായിക്കാട് എന്ന് അറിയപ്പെടുന്ന സ്ഥലത്തെ 8.5 ഏക്കറിലാണ് ഈ മന്ദിരം സ്ഥിതി ചെയ്യുന്നത്. 1925ൽ ആരംഭിച്ച കെട്ടിട നിർമാണം പൂർത്തീകരിക്കാൻ മൂന്നു വർഷമെടുത്തു. ദിവാൻ സർ സി.പി. രാമസ്വാമി അയ്യർ ഉൾപ്പെടെ ഒട്ടേറെ പ്രമുഖർ ഡേവിയുടെ വിരുന്നുകാരായി ഇവിടെ എത്തിയിരുന്നു. ഇത്തരത്തില്‍ ദിവാന്റെ വരവിനെത്തുടർന്നാണ് ബംഗ്ലാവിനോട് ചേർന്നുള്ള സ്ഥലത്തിന് ദിവാൻ കവല എന്ന പേരു തന്നെ ലഭിച്ചത്. 

ഡേവിയുടെ മരണ ശേഷം ബ്രിട്ടനിൽ ഉണ്ടായിരുന്ന അനന്തരാവകാശികൾ ബംഗ്ലാവും മറ്റ് സ്ഥാവരജംഗമ വസ്ത്തുക്കളും 42,000 രൂപ വില നിശ്ചയിച്ച് തിരുവിതാംകൂർ മഹാരാജാവിന് കൈമാറി. തുടർന്ന് അന്നത്തെ ഭരണാധികാരികള്‍ ഈ ബംഗ്ലാവിനെ ഔദ്യോഗിക അതിഥി മന്ദിരമാക്കി മാറ്റുകയായിരുന്നു. സ്വാതന്ത്ര്യം ലഭിച്ചതിനു ശേഷം അധികാരത്തില്‍ വന്ന വിവിധ സർക്കാരുകളും ഈ കെട്ടിടത്തെ അതിഥി മന്ദിരമായി നിലനിർത്തുകയും ചെയ്തു.

English Summary: Nattakom, Kerala's Political Guest House: How it Connected with Oommen Chandy?