∙ വയലാറിന്റെയും ഗിരീഷ് പുത്തഞ്ചേരിയുടെയുമൊക്കെ ചില പാട്ടുകളിൽ ദ്വയാർഥ പ്രയോഗങ്ങൾ ഒരുപാട് വന്നിട്ടുണ്ട്. പക്ഷേ കേൾക്കുമ്പോൾ പ്രേക്ഷകർക്ക് അരോചകത്വമൊന്നും തോന്നില്ല. അത്രത്തോളം കാവ്യഭംഗിയോടെയാണ് അതെല്ലാം എഴുതപ്പെട്ടിരിക്കുന്നത്. ഇപ്പോൾ സമൂഹമാധ്യമങ്ങൾ സജീവമായതോടെ അത്തരം ചില വരികൾ പ്രത്യേകമായി എടുത്തുകാണിച്ച് മോശപ്പെട്ട രീതിയിൽ പലരും വ്യാഖ്യാനിക്കുന്നു. ശരിക്കും പാട്ടിലെ ദ്വയാർഥ പ്രയോഗങ്ങൾ നല്ലതോ മോശമോ? 

കാവ്യഭംഗിയിൽ പൊതിഞ്ഞുവച്ച പാട്ടുകളിലെ അത്തരം പ്രയോഗങ്ങളെ മനസ്സിലാക്കാനുള്ള കഴിവൊന്നും എനിക്കില്ല. അത്തരം പാട്ടുകൾ ഞാന്‍ പാടിയിട്ടുമുണ്ട്. പക്ഷേ എനിക്കുണ്ടായ ഒരു അനുഭവം ഞാൻ പറയാം. തമിഴിലെ ഒരു പ്രശസ്തനായ ഗാനരചയിതാവ്,  പേര് പറയുന്നതു ശരിയല്ലാത്തതുകൊണ്ട് ഞാൻ പറയുന്നില്ല. അദ്ദേഹം എഴുതിയ ഒരു പാട്ട് പാടാൻ ഞാൻ പോയി. വരികളെഴുതി ഈണം പഠിച്ച ശേഷം അതിലെ ഒരു വരി പാടാൻ സ്ത്രീ എന്ന നിലയിൽ വലിയ സങ്കോചം തോന്നി. അതു മാത്രമൊന്നു മാറ്റി തരാൻ പറയാമോ എന്നു ഞാൻ സംഗീതസംവിധായകനോടു ചോദിച്ചു. അദ്ദേഹം അക്കാര്യം ഗാനരചയിതാവിന്റെ മുന്നിൽ അവതരിപ്പിച്ചപ്പോൾ അദ്ദേഹത്തിന് അത് ഇഷ്ടപ്പെട്ടില്ല. അങ്ങനെ സംഗീതസംവിധായകൻ ഈ പ്രശ്നത്തിന്റെ നടുവിലായിപ്പോയി. റെക്കോർഡിങ് വേറൊരു ദിവസത്തേക്കു മാറ്റാമെന്ന് അദ്ദേഹം പറഞ്ഞതുപ്രകാരം ഞാൻ മടങ്ങിപ്പോയി. അതിനു ശേഷം ഒരു ദിവസം രാജാ സർ എന്നെ വിളിച്ചു, എന്നിട്ട് "നിന്റെ ജോലി പാടുക എന്നുള്ളതാണ്. ഗാനരചയിതാവിന്റെ ജോലി എഴുതുക എന്നുള്ളതാണ്. സിനിമയിലെ സാഹര്യത്തിനനുസരിച്ചാണ് അത്തരം പ്രയോഗങ്ങൾ നടത്തുന്നത്. അല്ലാതെ അദ്ദേഹത്തിനു സ്വകാര്യമായ സുഖമോ സന്തോഷമോ കിട്ടാനല്ല. അതുകൊണ്ട് മറ്റുള്ളവരുടെ ജോലിയിൽ തലയിടരുത്" എന്ന് എന്നോടു പറഞ്ഞു. അതിനു ശേഷം ഞാൻ മറ്റൊന്നിലും ഇടപെട്ടിട്ടില്ല. 

∙ എഴുത്തും സംഗീതവും ആലാപനവും ഒരുപോലെ മികച്ചതാകുമ്പോഴേ പാട്ട് ഹിറ്റാകൂ. അങ്ങനെയെങ്കിൽ പാട്ടിന്റെ യഥാർഥ അവകാശി ആരാണ്? 

ക്രിയേറ്റേഴ്സ് എന്നാണ് സംഗീതസംവിധായകരെയും ഗാനരചയിതാക്കളെയും പറയുന്നത്. പക്ഷേ അവർ സൃഷ്ടിക്കുന്ന ഗാനം ജനങ്ങളിലേക്കെത്തിക്കുന്നത് ഒരു ഗായകനോ ഗായികയോ ആണല്ലോ. അപ്പോൾ പാട്ടിൽ അവർക്ക് അവകാശമില്ലെന്നു പറയാൻ പറ്റില്ലെന്ന് മുൻപ് എംഎസ്‌വി സർ (എം.എസ്.വിശ്വനാഥൻ) പറഞ്ഞിട്ടുണ്ട്. ഗായകരുടെ വികാരങ്ങൾ പ്രകടിപ്പിക്കേണ്ടിവരുന്ന പാട്ടുകളും ഉണ്ട്. അതുപക്ഷേ പലപ്പോഴും ഗായകർ സ്വന്തമായി പുറത്തേക്കെടുക്കുന്ന വികാരപ്രകടനങ്ങളാണ്. ആരും പറഞ്ഞുകൊടുത്തിട്ടല്ല. അങ്ങനെ നോക്കുമ്പോൾ തീർച്ചയായും പാട്ടിൽ ഗായകർക്കും അവകാശമുണ്ട്. 

∙ പഴയകാലത്തെ പ്രത്യേകിച്ച് ഒഎൻവിയുടെയും വയലാറിന്റെയുമൊക്കെ പാട്ടുകളിൽ കവിതയുടെ അംശം വളരെ കൂടുതലായി ഉണ്ടായിരുന്നു. എന്നാല്‍ ഇപ്പോഴത്തെ പാട്ടിൽ നിന്ന് കവിത ചോർന്നു പോകുന്നുവെന്നു തോന്നിയിട്ടുണ്ടോ?

ഇപ്പോഴത്തെ എഴുത്തുകാർക്കും കാവ്യഭംഗിയോടെ എഴുതാൻ കഴിവുണ്ട്. ഇല്ലെന്ന് ഒരുതരത്തിലും പറയാൻ പറ്റില്ല. കാവ്യഭംഗിയുള്ള പാട്ടുകൾ ഇപ്പോഴും ഉണ്ട്. പക്ഷേ സിനിമയുടെ സാഹചര്യത്തിനനുസരിച്ചാണല്ലോ പാട്ടുകൾ ഒരുക്കുന്നത്. ഒരുകൂട്ടം ആളുകളുടെ പരിശ്രമത്തിന്റെ ഫലമായാണ് ഒരു സിനിമ ഉണ്ടാകുന്നത്. അതിലപ്പോൾ സാഹചര്യങ്ങൾക്കനുസരിച്ചും വ്യത്യാസങ്ങൾ വരും. ചിലപ്പോഴൊക്കെ ഗാനരചയിതാക്കൾ എഴുത്തിൽ വിട്ടുവീഴ്ചകൾ ചെയ്യേണ്ടതായി വരും. അങ്ങനെയുള്ളപ്പോഴാണ് ഇത്തരം ഗാനങ്ങൾ ഉണ്ടാകുന്നത്. 

∙ പണ്ടുകാലത്തേതിൽ നിന്ന് സാങ്കേതികവിദ്യ ഉപയോഗം പാട്ടിൽ വലിയ രീതിയിൽ വർധിച്ചിട്ടുണ്ട്. മുൻപൊക്കെ യുഗ്മഗാനമാണ് പാടുന്നതെങ്കിൽ റിക്കോർഡിങ് വേളയിൽ രണ്ട് ഗായകരും ഒരുമിച്ചുണ്ടാകും. എന്നാൽ ഇപ്പോൾ അങ്ങനെയല്ല, ഓരോരുത്തരും അവരവരുടെ ഭാഗങ്ങള്‍ പാടിയിട്ടു പോവുകയാണ് പതിവ്. ചിത്ര ഈ രണ്ട് രീതികളും അനുഭവിച്ചിട്ടുണ്ട്. ഇവയിൽ ഏതാണു നല്ലതെന്നു തോന്നിയിട്ടുള്ളത്? 

ഒരുമിച്ചു നിന്നു പാടിയിരുന്ന രീതിയാണ് എനിക്കിഷ്ടം. കൂടെ പാടുന്നയാളുടെ പാട്ടു കേട്ട് നമുക്കും സ്വയം പുതുക്കലിന് അവസരം ലഭിക്കും. ഇപ്പോൾ പക്ഷേ അങ്ങനെയല്ല. സഹഗായകൻ അല്ലെങ്കിൽ ഗായിക പാടിയ കാര്യം ഭാവനയില്‍ കണ്ടുവേണം പാടാൻ. പിന്നെ സാങ്കേതികവിദ്യ വളർന്നപ്പോള്‍ ‌കാര്യങ്ങൾ കുറേക്കൂടി എളുപ്പമായിട്ടുണ്ട്. വീട്ടിലിരുന്നു തന്നെ റിക്കോർഡ് ചെയ്ത് അയച്ചു കൊടുക്കാം. പ്രത്യേകിച്ച് കോവിഡ് കാലത്തൊക്കെ അങ്ങനെ പല പാട്ടുകളും പാടിയിട്ടുണ്ട്. സാങ്കേതികവിദ്യ വളർന്നത് ചില സമയത്ത് നല്ലതു തന്നെയാണെന്നു തോന്നാറുണ്ട്. പിന്നെ പാടാൻ അറിയാത്തവർക്കും പാടാം എന്നൊരു എളുപ്പവഴി ഉണ്ടായതു തന്നെ സാങ്കേതികവിദ്യ വികസിച്ചതോടെയാണ്. പണ്ട് അങ്ങനെ പറ്റില്ലായിരുന്നു.  

∙ ആഹാരകാര്യത്തിൽ പ്രത്യേക ചിട്ടകളുണ്ടായിരിക്കുമല്ലോ? യേശുദാസ് ആണ് അക്കാര്യത്തിൽ കൂടുതൽ നിബന്ധനകൾ വയ്ക്കാറുള്ളത്. എസ്പിബി ഇതിനു നേർവിപരീതമാണ്. അങ്ങനെ നോക്കുകയാണെങ്കിൽ ആഹാരശൈലിയിലെ, ജീവിതശൈലിയിലെ ചിട്ടകൾ ശരിക്കും അനിവാര്യമാണോ ഗായകർക്ക്?

ഓരോരുത്തരുടെയും ശരീരപ്രകൃതത്തിനനുസരിച്ചായിരിക്കും അതൊക്കെ. ദാസേട്ടന്റെ (കെ.ജെ.യേശുദാസ്) കൂടെ സംഗീതപരിപാടികൾക്കും മറ്റുമായി പോകുമ്പോൾ തൊണ്ടയ്ക്കു പ്രശ്നമുണ്ടാകുമെന്നു പറഞ്ഞ് പല ആഹാര സാധനങ്ങളും അദ്ദേഹം കഴിക്കാൻ സമ്മതിക്കില്ല. ദാസേട്ടന്റെ ശരീരം തണുപ്പ് കൂടിയ പ്രകൃതത്തിലുള്ളതാണ്. എന്റേത് ചൂടും. അദ്ദേഹം തണുപ്പില്ലാത്തതും ചൂട് ഇല്ലാത്തതുമായ വെള്ളമാണ് കുടിക്കുന്നത്. ഞാൻ എപ്പോഴും ചൂടുവെള്ളം കയ്യിൽ കരുതും. എസ്പിബി സർ തണുത്ത വെള്ളം  കുടിക്കും. അദ്ദേഹം ഇഷ്ടമുള്ള എല്ലാ ആഹാരവും കഴിക്കു‌മായിരുന്നു. ഞാൻ കൂടുതൽ ശ്രദ്ധിക്കുന്നതു കാണുമ്പോൾ അദ്ദേഹം പറയാറുണ്ട്, ഒരുപാട് കരുതലെടുത്താൽ പെട്ടെന്ന് അസുഖങ്ങൾ വരുമെന്ന്. ശരിയാണ്, എനിക്കു പെട്ടെന്ന് അസുഖം വരാറുണ്ട്. അതൊക്കെ ഓരോരുത്തരുടെ ശീലവും ശരീരപ്രക‍ൃതവുമനുസരിച്ചിരിക്കും. പിന്നെ എത്രയോക്കെ ശ്രദ്ധിച്ചാലും പാടുക എന്നുള്ളത് ഒരു അനുഗ്രഹമാണ്. കാണികൾ പണം മുടക്കി ടിക്കറ്റ് എടുത്ത് സംഗീതം കേൾക്കാൻ വരുന്നതാണല്ലോ. അപ്പോൾ അവർക്കു വേണ്ടി കുറച്ചൊക്കെ ത്യാഗം സഹിക്കാമെന്നാണ് ഞാൻ കരുതുന്നത്. 

∙ ഇപ്പോഴും സ്റ്റേജിൽ കയറുമ്പോൾ പേടി തോന്നാറുണ്ട് ചിത്രയ്ക്ക്. ഇത്രയേറെ ഇരുത്തം വന്ന ഗായികയ്ക്കു സ്റ്റേജ് ഫിയർ ഉണ്ടെങ്കിൽ ഇപ്പോഴത്തെ ഗായകരുടെ കാര്യം എന്തായിരിക്കും?

സ്റ്റേജിൽ പാടുമ്പോൾ ഇപ്പോഴും പേടിയുണ്ട്. പ്രായമാകുന്തോറും ആ പേടി കൂടിക്കൂടി വരുന്നു. വേദിയിൽ പാടിത്തുടങ്ങി രണ്ട്, മൂന്ന് ഗാനങ്ങള്‍ കഴിയുന്നതുവരെ വലിയ ടെൻഷനാണ്. തൊണ്ടയ്ക്കു പ്രശ്നങ്ങളൊന്നുമുണ്ടാകാതെ നോക്കണം, ശബ്ദം നമ്മളോടു സഹകരിക്കണം. അങ്ങനെ പല കാര്യങ്ങളുണ്ട്. പൊടിയോ പുകയോ തുടങ്ങി നിസ്സാരമായ എന്തെങ്കിലും മതി തൊണ്ടയ്ക്ക് അസ്വസ്ഥത ഉണ്ടാകാൻ. പിന്നെ പാടുമ്പോൾ പ്രേക്ഷകരിൽ നിന്ന്  അനുകൂലമായ പ്രതികരണങ്ങൾ കിട്ടിയില്ലെങ്കിലും ടെൻഷനാണ്. പക്ഷേ പുതു തലമുറയിലെ ഗായകർക്ക് ഇത്തരം പ്രശ്നങ്ങളൊന്നും ഇല്ലെന്നു തോന്നുന്നു. അവർക്ക് വലിയ ആത്മവിശ്വാസമാണ്. റിയാലിറ്റി ഷോയിലും മറ്റും പാടിയ പരിചയസമ്പത്തുണ്ടാകും അവര്‍ക്ക്. മാത്രവുമല്ല, അവർക്കൊക്കെ കൃത്യമായ പരിശീലനവും കിട്ടിയിട്ടുണ്ട്. എനിക്കൊക്കെ ഓമനക്കുട്ടി ടീച്ചറിൽ നിന്നുള്ള പാഠങ്ങൾ മാത്രമേ ഉണ്ടായിരുന്നുള്ളു. പിന്നെ, ദാസേട്ടൻ, എസ്പിബി സർ തുടങ്ങിയ ഇതിഹാസ ഗായകർക്കൊപ്പം പാടാൻ അവസരം ലഭിച്ചതു വലിയ ഭാഗ്യമാണ്. അവരിൽ നിന്നും കുറേ കാര്യങ്ങൾ കണ്ടും കേട്ടും പഠിക്കാൻ സാധിച്ചു. 

∙ സങ്കടങ്ങളിൽ നിന്നു കരകയറ്റിയത് സംഗീതമാണോ? 

സങ്കടങ്ങളിൽ നിന്നൊരു മോചനമില്ല. അതൊന്നും ഒരിക്കലും മറക്കാനും പറ്റില്ല. പക്ഷേ എനിക്ക് തുടർന്നു ജീവിച്ചേ പറ്റൂ. സംഗീതം എന്നൊരു മേഖലയിൽ എന്നെ കൊണ്ടെത്തിച്ചതിനു ഞാൻ ദൈവത്തോടു നന്ദി പറയുന്നു. എന്റെ സന്തോഷത്തിലും സങ്കടത്തിലും വീഴ്ചകളിലുമെല്ലാം കൂടെ നിന്നവരാണ് മലയാളികൾ. അതിനു ഞാൻ എന്നും കടപ്പെട്ടിരിക്കുന്നു. എല്ലാവരുടെയും സ്നേഹവും പ്രാർഥനയും, അന്ത്യശ്വാസം വലിക്കുന്നതുവരെ എനിക്കൊപ്പമുണ്ടായിരിക്കണമെന്നാണ് ഞാൻ ആഗ്രഹിക്കുന്നത്.  

English Summary: Singer KS Chithra Talks on Life, Music and Career As She Turns 60