എന്നാൽ ഏറ്റവും മികച്ചതെന്ന വിശേഷണം ആപേക്ഷികമാണ്. ഓരോ തലമുറയ്ക്കും അവസാനമില്ലാത്ത തർക്കത്തിൽ മുഴുകാവുന്ന വിഷയം. മഹാന്മാരായ കളിക്കാർ ഓരോ കാലഘട്ടത്തിലേയും ചരിത്രത്തിന്റെ, സമൂഹസ്ഥിതിയുടെ, രാഷ്ട്രീയത്തിന്റെ, വിപണിയുടെ, സാങ്കേതികതയുടെ, സമ്പദ് വ്യവസ്ഥയുടെ, സൗന്ദര്യബോധത്തിന്റെ സൃഷ്ടിയാണ്. കാലങ്ങളെ താരതമ്യം ചെയ്ത് അവരുടെ മഹത്വം അളക്കുക എളുപ്പമല്ല. പക്ഷേ ഒന്നുറപ്പിക്കാം. റോജർ ഫെഡററെ പോലെ അയാൾ മാത്രം. കളത്തിലെയും കണക്കിലെയും മേധാവിത്തം മാത്രമല്ല അയാളെ വേറിട്ടു നിർത്തുന്നത്. അയാൾ കളിച്ച രീതിയാണ്, അതിന്റെ സൗന്ദര്യമാണ്.

കരുത്തുറ്റ സെർവിനും കൃത്യതയുള്ള വോളിക്കും അകമ്പടിയായി വരുന്ന മൃദുസ്പർശം, കലാചാതുര്യം. സെർവ് ആൻഡ് വോളിയുടെ പ്രയോക്താക്കളായിരുന്ന ഒരു സുവർണ തലമുറയുടെ സ്മൃതി ഉണർത്തുന്ന ബാക്ക്ഹാൻഡിന്റേയും ഫോർഹാൻഡിന്റേയും പ്രഭാവം. എതിരാളികൾ ബേസ് ലൈനിൽ വേരുറപ്പിച്ച്, കൈക്കരുത്തിനാൽ യാന്ത്രികമായി പന്തടിക്കുമ്പോൾ ഫെഡറർ കളം നിറഞ്ഞു കളിച്ച് മോഹന ചിത്രങ്ങൾ വരച്ചു.

പവർ ടെന്നിസ് പ്രയോഗിക്കുന്ന വൈരികൾ എന്തിനും പോന്ന പോരാളികളായിരുന്നു. പക്ഷേ ഓരോ ഷോട്ടിനും അവരുണ്ടാക്കുന്ന ഹുങ്കാരം ഇതെന്തോ അധ്വാനമുള്ള പണിയാണെന്ന വിചാരം കാണിയിൽ ഉണ്ടാക്കും. പക്ഷേ ഫെഡറർ മന്ദമാരുതനെ പോലെ സൗമ്യൻ, സുസ്മേര വദനൻ. അയാളും അധ്വാനിക്കുന്നുണ്ടെന്ന് നമുക്കറിയാം. പക്ഷേ അങ്ങനെയൊരു തോന്നൽ ഉണ്ടാകാത്ത വിധം അയാൾ ആത്മമേധാവിത്വം നേടിക്കഴിഞ്ഞു.

ഓരോ സാഹചര്യത്തിനും വേണ്ട കൃത്യമായ പദചലനങ്ങൾ, സർജന്റെ കൃത്യതയുള്ള വോളി, പാസിങ് ഷോട്ട്. ചിത്രകാരന്റെ ബ്രഷ് സ്ട്രോക്കുകൾ പോലെയുള്ള ഡ്രോപ്പ് ഷോട്ട്, പ്ലേസ്മെന്റ്. സാഹചര്യത്തോട് ഏറ്റവും കാര്യക്ഷമമായി പ്രതികരിക്കാൻ സജ്ജമായ ശരീരം, അക്ഷോഭ്യമായ മനസ്സ്, തോൽവിയിലും കൈ വിടാത്ത മാന്യത. സെർവിന്റെ കരുത്തും കൃത്യതയും 4 എയ്സ് പായിച്ച് ഒരൊറ്റ മിനിറ്റിനുള്ളിൽ ഒരു ഗെയിം നേടാൻ അയാളെ പ്രാപ്തനാക്കുന്നു.

ഒത്ത എതിരാളി ഒപ്പം പിടിക്കുമ്പോൾ നീണ്ടു പോകുന്ന ഗെയിമുകൾ, വീണ്ടും വീണ്ടും കുരുങ്ങുന്ന ഡ്യൂസ്, അനന്തമായ റാലികൾ - അവസാനം നെറ്റിലേക്ക് ഓടിക്കയറി ഒരു ഡ്രോപ്പ് ഷോട്ട്, അല്ലെങ്കിൽ ടോപ് സ്പിൻ, അതുമല്ലെങ്കിൽ പിന്തിരിഞ്ഞു നിന്ന് കാലുകളുടെ ഇടയിലൂടെ പായിക്കുന്ന വിന്നർ! സിംഫണി നിയന്ത്രിക്കുന്ന ഓർക്കെസ്ട്ര കണ്ടക്ടറെ പോലെ, സ്ഥലകാലാതീതനായ ഫെഡറർ. ഹൃദയം തുടിക്കുന്ന, മനസ്സ് താളം തുള്ളുന, സമയം നിശ്ചലമാകുന്ന നിമിഷം. നിങ്ങളിലെ ടെന്നിസ് പ്രേമി ജീവിക്കുന്നത് ഈ നിമിഷത്തിനായി.

സാധ്യമായതിന്റെ അതിർവര നിരന്തരം മാറ്റിവരച്ച പ്രതിഭയാണ് ഫെഡറർ. ആ ഗണത്തിൽപെട്ടവർ സ്വയമെന്നതിൽ ഉപരി, അപരനേയും പ്രചോദിപ്പിക്കും - കളത്തിനകത്തും പുറത്തും. അങ്ങനെ വളർന്നു വന്ന ഒരു തലമുറ ചാംപ്യന് വെല്ലുവിളിയായി. എതിരാളികളെ അപ്രസക്തരാക്കി കുതിച്ചുകയറിയ 5 വർഷത്തിനു ശേഷം (2003-2008) ഫെഡററിനു ചേർന്ന ഒത്ത എതിരാളികൾ എത്തി. ചാംപ്യൻ മികവിന്റെ മലയിറങ്ങുന്നു, അവർ കയറുന്നു. അവർ മൂവരും ചേർന്ന് ടെന്നിസ് ചരിത്രത്തിലെ ഏറ്റവും മഹത്തായ ഒരധ്യായം രചിച്ചു. പക്ഷേ റോജർ ഫെഡററിന്റെ അമാനുഷികത നഷ്ടമായി.

പ്രഫഷനൽ ടെന്നിസിൽ ഇതാദ്യമായി അയാൾ ചോദ്യം ചെയ്യപ്പെട്ടു. നിർണായകമായ 5 സെറ്റ് കളികൾ ജയിക്കാനുള്ള ശാരീരിക ക്ഷമതയും മനക്കരുത്തും അയാൾക്കില്ല പോലും! ടൈം മാഗസിന് നൽകിയ ഒരു അഭിമുഖത്തിൽ ഫെഡറർ പറഞ്ഞു: 'ഞാൻ തോൽക്കുമ്പോൾ കഠിനാധ്വാനം ചെയ്തില്ലെന്നു കാണികൾ പഴിക്കും. ജയിക്കുമ്പോൾ പറയും - എന്തെളുപ്പം! ബാല്യം മുതൽ ഞാനിതു കേൾക്കുന്നു. എല്ലാ കളിയിലും ഞാൻ ഏറ്റവും മികച്ചത് നൽകും. പക്ഷേ ഞാൻ വെട്ടി വിയർക്കണം, ഷോട്ട് കളിക്കുമ്പോൾ ഞാനെന്തോ വേദന അനുഭവിക്കുന്ന പോലെ തോന്നണം എന്നാണെങ്കിൽ ക്ഷമിക്കുക, എനിക്കത് സാധ്യമല്ല.'

20 ഗ്രാൻ‌സ്‌ലാം കിരീടം, നൂറിലധികം എടിപി കിരീടങ്ങൾ, 369 ഗ്രാൻ‌സ്‌ലാം മത്സര വിജയം, 1250 സിംഗിൾസ് മത്സര വിജയം, 5 വർഷം ലോക ഒന്നാം നമ്പർ, ഏറ്റവും പ്രായം കൂടിയ ഒന്നാമൻ - എന്നിങ്ങനെ മാനം തൊട്ടു നിൽക്കുന്ന ഒരാൾക്ക്‌ മനക്കരുത്തില്ല, അയാൾ കഠിനാധ്വാനം ചെയ്യുന്നില്ല! ആ വാദം അവിടെ പൊളിയുന്നു.

∙ ഗ്രെയ്സ്! ആ ഒരൊറ്റ വാക്കു മതി അയാളെ നിർവചിക്കാൻ

അവരോടുള്ള എല്ലാ ബഹുമാനവും നിലനിർത്തി പറയട്ടെ - റോജർ ഫെഡറർ ടെന്നിസ് കളിച്ചത് മറ്റേതോ തലത്തിലാണ്. സ്വർഗീയം എന്നു വിശേഷിപ്പിക്കാവുന്ന ഒരിടം. അവിടേക്ക് ഉയരുക മാത്രമല്ല, ആ മാന്ത്രികതയ്ക്ക് സാക്ഷ്യം വഹിച്ചവരെ അയാൾ അവിടെ കൊണ്ടു പോയി ആനന്ദം അനുഭവിപ്പിക്കുകയും ചെയ്തു. അതിന്റെ ഒരംശമെങ്കിലും തന്നിൽ പകർത്തണമെന്ന് വൈരികൾക്കും കളി കണ്ടവർക്കും തോന്നി - പ്രതിഭ അതിന്റെ ദൗത്യം നിർവഹിച്ചു, സ്വാധീനം ഇനി അനന്തതയിൽ വ്യാപിക്കും. ഫെഡററുടെ എതിരില്ലാവാഴ്ചയുടെ കാലത്ത് അമേരിക്കൻ കഥാകൃത്ത് ഡേവിഡ് ഫോസ്റ്റർ വാലസ് ന്യൂയോർക്ക് ടൈംസിൽ പ്രശസ്തമായ ഒരു ലേഖനം എഴുതിയിരുന്നു (Roger Federer as a religious experience, 2006). കടുത്ത മത്സരമുള്ള കായിക ഇനങ്ങളുടെ ലക്ഷ്യമല്ല സൗന്ദര്യം, വാലസ് വാദിക്കുന്നു; പക്ഷേ കായിക വേദികൾ സൗന്ദര്യം പ്രകടിപ്പിക്കാൻ ഏറ്റവും യോജിച്ച ഇടങ്ങളാണ്.

സൗന്ദര്യമെന്നാൽ രൂപ സൗകുമാര്യം മാത്രമല്ല, ഫെഡറർ പ്രദർശിപ്പിക്കുന്ന സൗന്ദര്യം ശരീര ചലനങ്ങളുടെ, സൂക്ഷ്മ ദർശനത്തിന്റെ, മികവിന്റെ, ധിഷണയുടെ ആകെത്തുകയാണ്. അയാൾ സുന്ദരനും സൗമ്യനുമാണെന്നത് ശിരസ്സിനു ചുറ്റുമുള്ള പ്രകാശവലയത്തിന്റെ മാറ്റു കൂട്ടുന്നു. എന്നാൽ അതു നേടാൻ വലിയ വില നൽകിയിട്ടുണ്ട്. സൗമ്യത പോലും ജന്മസിദ്ധമല്ല, കൗമാരത്തിൽ കലഹപ്രിയനായിരുന്ന റോജർ നല്ല ഗുരുക്കന്മാരുടെ സഹായത്തോടെ, ക്രമേണ മനസ്സിനെ ജയിക്കുകയായിരുന്നു. തേച്ചുമിനുക്കി നിരന്തരം പരിഷ്കരിച്ച കഴിവുകൾ അയാൾ ലാളിത്യത്തിന്റെയും സൗന്ദര്യത്തിന്റെയും പുതപ്പിട്ടു മൂടി. തിരശ്ശീലയ്ക്കു പിന്നിലെ അധ്വാനം നമ്മൾ കണ്ടതേയില്ല, അതായിരുന്നു റോജർ ഫെഡററിന്റെ ഏറ്റവും വലിയ മാജിക്ക്.

ഡേവിഡ് ഫോസ്റ്റർ വാലസ് വിവരിച്ച മതാനുഭവത്തെ ഇങ്ങനെ കാണാം - കളിക്കാരനും കാണിയും ഒന്നാകുന്ന വർത്തമാന നിമിഷത്തിൽ നുരയുന്ന ലഹരിയും അനുഭൂതിയും തീക്ഷ്ണ വികാരവും അതിനു സാക്ഷിയാകുന്നവരെ കാല-ദേശ-ഭാഷാതീതമായി ഒരൊറ്റ ചരടിൽ കോർക്കും. ആ അനുഭവത്തിനു കാരണമായവർ അർധ ദൈവങ്ങളായതിൽ അദ്ഭുതമില്ല.

English Summary: The life and sporting career of tennis star Roger Federer