മൂലമറ്റം ജലവൈദ്യുത നിലയത്തിൽ ഉൽപാദിപ്പിക്കുന്ന വൈദ്യുതി എങ്ങനെയാണ് കണ്ണടച്ചു തുറക്കും മുൻപ് കേരളം മുഴുവൻ എത്തുന്നത്? ആദ്യകാലത്ത് എല്ലാവരെയും അമ്പരിപ്പിച്ചതാണ് വൈദ്യുതിയുടെ ഈ യാത്ര. എന്നാൽ വൈദ്യുതി പ്രവാഹത്തേക്കാൾ ഇരട്ടി വ്യാപ്തിയാണ് വൈദ്യുതി നിരക്ക് വർധനയ്ക്കുള്ളതെന്ന് എത്ര പേർക്ക് അറിയാം. അടുത്തിടെ കെഎസ്ഇബി വൈദ്യുതി നിരക്ക് വർധിപ്പിച്ചു. ശരാശരി 3% മാത്രമാണ് നിരക്കുവർധനയെന്ന് വൈദ്യുതി റെഗുലേറ്ററി കമ്മിഷന്റെ വിശദീകരണവും പിന്നാലെ വന്നു. മറ്റൊരു തരത്തിൽ പറഞ്ഞാൽ യൂണിറ്റൊന്നിന് 20 പൈസയുടെ വർധന മാത്രം. 

എന്നാൽ നിങ്ങളുടെ കുടുംബ ബജറ്റ് മുതൽ വിവാഹ ചെലവ് വരെ താളം തെറ്റിക്കാൻ ശേഷിയുള്ളതാണ് ഈ 20 പൈസ. 2023 ഏപ്രിൽ 18ന് പത്തു കോടി യൂണിറ്റ് വൈദ്യുതിയാണ് കേരളം 24 മണിക്കൂർ നേരത്തേക്ക് ഉപയോഗിച്ചതെന്ന് ഓർക്കുക. മൊബൈൽ ഫോൺ ചാർജ് ചെയ്യുന്നതു മൂലം സ്കൂൾ ഫീസ് വരെ വൈകാതെ ഉയരുകയും ചെയ്യും. നിത്യോപയോഗ സാധനങ്ങളുടെ വിലക്കയറ്റം മൂലം പൊറുതിമുട്ടിക്കഴിയുന്ന ജനത്തിന് വാസ്തവത്തിൽ നിരക്കു വർധന ഇരുട്ടടിയാകും. 

ഗത്യന്തരമില്ലാതെയാണ് നിരക്കു കൂട്ടിയതെന്ന് സർക്കാരിന് പറയാം. പക്ഷേ ദീർഘകാലാടിസ്ഥാനത്തിൽ നോക്കിയാൽ സംസ്ഥാനത്തിന്റെ വികസന മുരടിപ്പിനും ഇതു വഴിയൊരുക്കും. നിരക്കുവർധന ഒഴിവാക്കാൻ കഴിയില്ല. ഇനിയുള്ള ഏക പോംവഴി ഒരു ‘പഴമൊഴി’യാണ്. ‘കറന്റാണ്, സൂക്ഷിച്ച് ഉപയോഗിച്ചില്ലെങ്കിൽ ഷോക്കടിക്കും’. വൈദ്യുതി നിരക്കുവർധന നിങ്ങളെ എങ്ങനെ ബാധിക്കും? നിരക്കുവര്‍ധനയുടെ ഭാരം കുറയ്ക്കാൻ എന്തു ചെയ്യാനാകും? വീട്ടിൽത്തന്നെ ചില നിയന്ത്രണങ്ങൾ കൊണ്ടുവന്നാൽ എങ്ങനെ നിങ്ങൾക്ക് വൈദ്യുതി ബില്‍ തുക കുറച്ചുകൊണ്ടു വരാനാകും? 

∙ കാര്യങ്ങൾ കെഎസ്ഇബി പറഞ്ഞതു പോലെയല്ല, മാസം 400 രൂപ വരെ കൂടും 

വൈദ്യുതി റെഗുലേറ്ററി കമ്മിഷന്റെ ഭാഷയിൽ പറഞ്ഞാൽ വൈദ്യുതി നിരക്കിലെ വർധന ശരാശരി മൂന്നു ശതമാനം മാത്രമാണ്. പക്ഷേ ഇത് വൈദ്യുതി ബില്ലിൽ വൻ വർധനയായി പ്രതിഫലിക്കും എന്നതാണു യാഥാർഥ്യം. രണ്ടു മാസം കൂടുമ്പോൾ വരുന്ന ബില്ലിൽ 20 രൂപ മുതൽ 400 രൂപ വരെ അധികമായി നൽകേണ്ടിവരും. ഇതിനു പുറമെയാണ് വൈദ്യുതി സർചാർജും ഡ്യൂട്ടിയും. മാസം 200 യൂണിറ്റു വരെ ഉപയോഗിക്കുന്ന വീടുകളിൽ യൂണിറ്റിന് ശരാശരി 20 പൈസ കൂട്ടാനാണ് കമ്മിഷന്റെ നിർദ്ദേശം. 

ഇത്തരത്തിൽ 200 യൂണിറ്റുവരെ ഉപയോഗിക്കുന്ന വീടുകളിൽ പ്രതിമാസം 48 രൂപയുടെ വർധന ഉണ്ടാകും. രണ്ടു മാസത്തെ ആകെ ബിൽ തുകയിൽ ഏകദേശം 100 രൂപയുടെ വർധന. എന്നാൽ എസി ഉപയോഗിക്കുന്ന വീടുകളിൽ പ്രതിമാസം 300 യൂണിറ്റിൽ കൂടുതൽ വൈദ്യുതി ഉപഭോഗം പ്രതീക്ഷിക്കാം. ഇത്തരക്കാർക്ക് 400 രൂപയിലധികം നിരക്കു വർധന ഉണ്ടായേക്കും. അടുത്ത വർഷം ജൂൺ 30 വരെയാണ് ഈ നിരക്കിനു പ്രാബല്യം. പിന്നീടും നിരക്കു വർധന തുടർക്കഥയാകും.

∙ കുടുംബ ബജറ്റ് ഉയരും, അതിനൊപ്പം പ‍ഞ്ചായത്തു ബജറ്റും കൂടും

വൈദ്യുതി നിരക്കു വർധന പ്രത്യക്ഷമായും പരോക്ഷമായും കുടുംബങ്ങളെ ബാധിക്കും. വീട്ടിലെ വൈദ്യുതി ബിൽ ഉയരുമെന്നു മാത്രമല്ല നിത്യോപയോഗ സാധനങ്ങളുടെയും സേവനങ്ങളുടെയും വിലക്കയറ്റം കുടുംബ ബജറ്റിനെ താളം തെറ്റിക്കും. ചെറുകിട-സ്വകാര്യ മേഖലകളിലെ തൊഴിൽനഷ്ടം, തൊഴിലില്ലായ്മ തുടങ്ങിയ സ്ഥിതിവിശേഷങ്ങൾ പ്രതിസന്ധിയുടെ ആക്കം കൂട്ടും. സർക്കാർ ജീവനക്കാർക്ക് ലഭിക്കേണ്ട 18 ശതമാനം ക്ഷാമബത്ത കുടിശികയാണ്. പെൻഷൻകാർക്കാകട്ടെ മൂന്നു വർഷം മുമ്പുള്ള പെൻഷൻ തുകയാണ് ഇപ്പോഴും ലഭിച്ചുകൊണ്ടിരിക്കുന്നതെന്നും ഓർക്കണം. അതിലേക്കാണ് നിരക്കുവർധനയുടെ പ്രഹരം കൂടിയെത്തുന്നത്.

ഗാർഹിക ഉപഭോക്താക്കൾക്കും കൃഷിക്കാർക്കുമാണ് കൂടുതൽ പ്രഹരം. ഇരുവിഭാഗങ്ങൾക്കുമുള്ള വർധന യൂണിറ്റിന് 20 പൈസയാണ്. പക്ഷേ നിരക്കിലുള്ള വർധന രണ്ടു വിഭാഗക്കാർക്കും വ്യത്യസ്തമാണ്. ഇത് യഥാക്രമം 3 ശതമാനവും 6 ശതമാനവും വരും. തെരുവു വിളക്കുകൾക്കുള്ള വൈദ്യുതിക്കും യൂണിറ്റിന് 20 പൈസ കൂടും. വർധന 3.8 ശതമാനം. തദ്ദേശ സ്ഥാപനങ്ങളാണ് തെരുവുവിളക്കുകൾക്കുള്ള വൈദ്യുതി ചാർജ് അടയ്ക്കുന്നത്. വരും വർഷങ്ങളിലെ ബജറ്റുകളിൽ ഇതിനായി കൂടുതൽ തുക നീക്കിവയ്ക്കേണ്ടിവന്നേക്കും.

∙ ഹോട്ടലുകള്‍ വില കൂട്ടും, അരിമാവിന് വരെ വില കൂടി

വൈദ്യുതി നിരക്കു വർധന മൂലമുണ്ടാകുന്ന വിലക്കയറ്റം എല്ലാ മേഖലകളെയും ബാധിക്കും. ചെറിയ പെട്ടിക്കട മുതൽ വൻകിട സ്റ്റാർ ഹോട്ടലുകൾ വരെയുളള സംരംഭങ്ങൾക്ക് ഇതു വിനയാകും. ബേക്കറി നടത്തിപ്പുകാരെയും അരിമാവ് കച്ചവടം പോലുള്ള കുടിൽ വ്യവസായങ്ങളെയും ഇതു പ്രതികൂലമായി ബാധിക്കും. അരി മാവിനു വില വർധിപ്പിക്കാൻ ബാറ്റർ മാനുഫാക്ചറേഴ്സ് അസോസിയേഷൻ തീരുമാനമെടുത്തു കഴിഞ്ഞു. ഉഴുന്ന്, പരിപ്പ്, പയറു വർഗങ്ങൾ മുതലായ പലവ്യഞ്ജനങ്ങൾക്ക് തീപിടിച്ച വിലയാണ്. ഇതിനിടെയാണ് വാണിജ്യ ആവശ്യങ്ങൾക്കുള്ള ഗ്യാസ് സിലിണ്ടറിന്റെ വില വർധിപ്പിച്ചത്. ഹോട്ടൽ ഭക്ഷണത്തിന്റെ വില കയറുമെന്നു മാത്രമല്ല  ചെറുകിട ഹോട്ടലുകൾ അടച്ചുപൂട്ടേണ്ട സ്ഥിതിയും വന്നേക്കും.