തിരക്കേറിയ ജനക്കൂട്ടത്തിനു നടുവിലും ശാന്തമായി സഹകരിക്കാനാണ് ഇത്തരം പരിശീലനം. എന്നാൽ വിദേശത്തു കാര്യക്ഷമതയ്ക്കാണ് മുൻതൂക്കം. ഇതു കൂടുതൽ അന്വേഷണ മികവിന് ഇടവരുത്തുമെന്നാണ് പറയുന്നത്. കൃത്യമായ പരിശീലനത്തിലൂടെ മികവു നേടുന്ന ട്രാക്കർ വിഭാഗം ഡോഗുകൾ പൊലീസിന്റെ വലംകൈയാണ്. കൊലപാതകം, മോഷണം എന്നിവ നടക്കുന്ന സമയങ്ങളിൽ നിർണായക തുമ്പ് കണ്ടെത്തി നൽകുന്നത് ട്രാക്കർ ഡോഗാണ്. 

∙ മൂന്നു പരീക്ഷകൾ കടക്കണം

പൊലീസ് സേനയിലെത്താൻ കഴിവു തെളിയിച്ച് എത്തേണ്ട വിഭാഗമാണ് നായകൾ. പരിശീലന ഘട്ടത്തിൽ മൂന്നു ശാരീരിക പരീക്ഷകൾ പാസായാൽ മാത്രമേ ‘പൊലീസ് നായ’യായി മാറൂ. കടുത്ത ശാരീരിക–മാനസിക പരിശീലനത്തിലൂടെയാണ് നായകളെ യോഗ്യരാക്കുന്നത്. നന്നായി പരിശീലനം ലഭിച്ച നായകൾ ജോലി ആസ്വദിച്ചു ചെയ്യും. പരിശീലനത്തിനു പുറമേ ട്രെയിനർമാരുടെയും ഹാൻഡ്‌ലർമാരുടെയും (നായകളുടെ ഡ്യൂട്ടി ചുമതലയുള്ള പൊലീസുകാർ) ഇടപെടലും ജോലിയെ സ്വാധീനിക്കുന്നു. ഭക്ഷണമായും വാക്കുകളായും നായകൾക്ക് ഇവർ പ്രോത്സാഹനം നൽകും. പല നിറങ്ങളിലുള്ള പന്താണ് മറ്റൊരു വഴി. തട്ടിക്കളിക്കാൻ പന്ത് നൽകുമെന്നു മനസ്സിലായാൽ നായ ദൗത്യം ആത്മാർഥയോടെ പൂർത്തിയാക്കും. എല്ലാം മനസ്സിലാക്കാനുള്ള കഴിവ് ഇത്തരം നായകൾക്കുണ്ട്. പെൺനായകളെയാണ് കൂടുതലും പരിശീലിപ്പിക്കുന്നത്.

ഡോഗ് സ്ക്വാഡിലെ നായകളും ഹാൻഡ്‌ലർമാരും തമ്മിലുള്ള ഹൃദയബന്ധം ഊഷ്മളമാണ്. നായയുടെ ഓരോ ശ്വാസതാളവും അറിയാൻ ട്രെയ്നർമാർക്കും ഹാൻഡ്‌ലർമാർക്കും കഴിയുന്നു. ഇരയെ തിരിച്ചറിഞ്ഞാൽ ഏമാനെ അറിയിക്കുന്ന രീതി പ്രത്യേകതയുള്ളതാണ്. ഇരയുടെ നേരെ നോക്കി കുരച്ചും ഇമ വെട്ടാതെ മുഖത്തേക്കു നോക്കിയിരുന്നും യജമാനനു സിഗ്നൽ നൽകും. പൊതുജനത്തിന് പലപ്പോഴും ഭാഷ മനസ്സിലാകില്ല. ചില നായകൾ പ്രത്യേക ശബ്ദം പുറപ്പെടുവിക്കും. തന്റെ മുന്നിലുള്ളതാണ് നിങ്ങൾ അന്വേഷിക്കുന്ന പ്രതി എന്നാകും ഭാവം.

∙ പന്നിയുടെ ജ‍ഡം കണ്ടെത്തി പരിശീലനം

നായകൾ അടക്കം പല മൃഗങ്ങൾക്കും മണമറിയാനുള്ള കഴിവു മനുഷ്യരേക്കാൾ അനേക ഇരട്ടിയാണ്. മണം തിരിച്ചറിയാനുള്ള 30 കോടി ഘ്രാണതന്തുക്കൾ (ഓൾഫാക്ടറി സെൻസർ) നായകളുടെ മൂക്കിനുള്ളിലുണ്ട്. മനുഷ്യരിൽ അത് 60 ലക്ഷം മാത്രം. മണങ്ങളെ വിശകലനം ചെയ്യാനുള്ള തലച്ചോറിന്റെ ശേഷിയും മനുഷ്യരേക്കാൾ 40 ഇരട്ടിയാണു നായകളുടേത്. നിർജീവമായ മനുഷ്യശരീരം 480 തരം വ്യത്യസ്ത ഗന്ധങ്ങൾ പുറപ്പെടുവിക്കുമെന്നാണു ബ്രിട്ടനിലെ ഹഡേഴ്സ്ഫീൽഡ് സർവകലാശാല നടത്തിയ പഠനങ്ങളിൽ തെളിഞ്ഞത്. മരണം സംഭവിക്കുന്നതോടെ വിഘടിച്ചു വായുവിൽ ലയിക്കുന്ന ജൈവകണങ്ങളാണ് ഇത്തരം ഗന്ധങ്ങൾക്കു കാരണം.

മനുഷ്യരിലുള്ള ജൈവകണങ്ങളെല്ലാം അതേപടി പന്നികളിലുണ്ട്. അതിനും പുറമേ 320 തരം ജൈവിക ഘടകങ്ങൾ കൂടി അവയിലുണ്ട്. ബാക്ടീരിയയുടെ പ്രവർത്തനത്തിലൂടെ ഈ ജൈവകണങ്ങൾ വിഘടിക്കുമ്പോഴുണ്ടാകുന്ന രൂക്ഷഗന്ധം മനുഷ്യർക്കും തിരിച്ചറിയാൻ കഴിയും. എന്നാൽ മണ്ണിനടിയിലും മഞ്ഞുപാളിക്കടിയിലും അകപ്പെട്ട മനുഷ്യരുടെ മൃതദേഹങ്ങളിൽ നിന്നു നേരിയതോതിൽ പുറത്തുവരുന്ന ഗന്ധങ്ങൾ അറിയാൻ പരിശീലനം ലഭിച്ച നായകൾ തന്നെ വേണം. പന്നിയുടെ ജഡം മണ്ണിനടിയിൽ കുഴിച്ചിട്ടാണ് ഇത്തരം നായ്ക്കളെ പരിശീലിപ്പിക്കുന്നത്.

∙ സ്ഥാനക്കയറ്റമില്ലാത്ത ‘സേവനം’

പൊലീസിൽ സ്ഥാനക്കയറ്റം ലഭിക്കാത്ത ഏക വിഭാഗമാണ് നായകൾ. എട്ടു വയസ്സുവരെയാണ് സർവീസ് കാലാവധി. സർവീസ് ഏറുന്നതനുസരിച്ച് ഹെഡ് കോൺസ്റ്റബിൾ, എസ്ഐ ഇങ്ങനെ ഗ്രേഡ് മാറ്റമുണ്ടാകുമെന്നു ചില പ്രചാരണങ്ങളുണ്ട്. അതു തെറ്റാണ്. എട്ടു വർഷമാകുന്നതോടെ സർവീസ് കാലാവധി തീരും. പിന്നീടു പൊലീസ് റെസ്ക്യൂ കേന്ദ്രങ്ങളിൽ സംരക്ഷണം നൽകും. സംസ്ഥാനത്തെ ഡോഗ് സ്ക്വാഡിലെ മികച്ച നായയെ കണ്ടെത്തുന്നതിനു മീറ്റ് നടത്താറുണ്ട്. പല വിഭാഗങ്ങളിലായാണു മത്സരം. വിജയിക്കുന്നവർക്കു മെഡലുകൾ ലഭിക്കും. ഇവരിൽ മികച്ച പ്രകടനം കാഴ്ച വയ്ക്കുന്ന നായകൾ സംസ്ഥാനത്തെ പ്രതിനിധീകരിച്ച് ഓൾ ഇന്ത്യ ഡ്യൂട്ടി മീറ്റിൽ പങ്കെടുക്കും.

∙ വിരമിച്ചാൽ വെറുതെയിരിപ്പോ?

സർവീസിൽനിന്നു വിരമിച്ചാൽ തൃശൂർ പൊലീസ് അക്കാദമിയിലെ വിശ്രാന്തി പുനരധിവാസ കേന്ദ്രത്തിലാണ് പൊലീസ് നായകളുടെ താമസം. വെറുതെയിരിപ്പിന്റെ ബോറടി മാറ്റാൻ ടിവി, രാവിലെയും വൈകിട്ടും സ്വിമ്മിങ് പൂളിൽ നീന്തിക്കുളി, പാലും ഇറച്ചിയുമൊക്കെ അടങ്ങുന്ന സമൃദ്ധമായ മെനു, വച്ച‍ുവിളമ്പിത്തരാൻ പരിചാരകർ, താമസിക്കാൻ ഫാനും കുളിമുറിയും ഉൾപ്പെടുന്ന വിശാലമായ മുറി... സർവീസിൽനിന്നു വിരമിക്കുന്ന പൊലീസ് നായകൾ താമസിക്കുന്ന വിശ്രമകേന്ദ്രത്തിലെ കാഴ്ചകളാണിവ. മറ്റു പല സംസ്ഥാനങ്ങളിലും വിരമിക്കുന്ന നായകളെ സന്നദ്ധ സംഘടനകൾക്കു വിട്ടു നൽകാറാണു പതിവെങ്കിലും കേരളം ഇക്കാര്യത്തിൽ വ്യത്യസ്തമാണ്.

20 പൊലീസ് നായകളെ സംരക്ഷിക്കാൻ സൗകര്യമുള്ളതാണ് തൃശൂരിലെ വിശ്രമകേന്ദ്രം. ഓരോരുത്തർക്കും ഫാൻ ഘടിപ്പിച്ച പ്രത്യേക കൂടുകൾ. പരിചരിക്കാൻ ഓരോ പൊലീസ് ഹാൻഡ്‍ലർമാരുമുണ്ട്. കടിച്ചുപിടിച്ചാൽ കുടിവെള്ളം ലഭിക്കുന്ന ഓട്ടോമാറ്റിക് ടാപ്പ്, കൊതുകുശല്യം ഒഴിവാക്കാൻ യന്ത്രവൽക്കൃത സംവിധാനം, പ്രത്യേക ശുചിമുറി എന്നിവയൊക്കെയുണ്ട് കൂടുകളിൽ. ഡോക്ടർമാർ പരിശോധിച്ചശേഷം ഓരോ നായയുടെയും ആരോഗ്യസ്ഥിതി പരിഗണിച്ചാണ് ഭക്ഷണക്രമം തയാറാക്കുന്നത്. ഇറച്ചിയും പാലും ഡോഗ്‌ഫുഡും അടങ്ങുന്ന വിഭവങ്ങൾ തയാറാക്കാൻ പാചകക്കാരുണ്ട്.

∙ മരണത്തിനൊടുവിൽ സൈപ്രസ് മരത്തണലിൽ...

പൊലീസ് നായകൾ മരണമടഞ്ഞാൽ അവരുടെ സംസ്കാരം നടത്താൻ പ്രത്യേക ശ്മശാനമുണ്ട്. തൃശൂർ രാമപുരം പൊലീസ് അക്കാദമിയിലെ വിശ്രാന്തി പുനരധിവാസ കേന്ദ്രത്തിനു സമീപമാണു ശ്മശാനം. ഒപ്പം ഡോഗ് മെമ്മോറിയൽ സെന്ററുമുണ്ട്. 10 കല്ലറ ഉൾപ്പെടുന്നതാണു ശ്മശാനം. ഒരു വർഷം 20 പൊലീസ് നായകളെ വരെ സംസ്കരിക്കാൻ ശ്മശാനത്തിൽ സൗകര്യമുണ്ട്. അർധവൃത്താകൃതിയിലെ കല്ലറകൾക്കു നടുവിലായി അന്തിമോപചാരം അർപ്പിക്കാൻ പ്രത്യേക പ്ലാറ്റ്ഫോമുണ്ട്. കല്ലറകളുടെ മ‍ൂടി ഗ്രാനൈറ്റ് ഉപയോഗിച്ചാണു നിർമിച്ചിട്ടുള്ളത്. ഓരോ കല്ലറകളുടേയും ശിരോഭാഗത്തു നായകളുടെ പേരുവിവരം രേഖപ്പെടുത്താനുള്ള ഫലകമുണ്ടാകും. ഇതിനു സമീപം ഓരോ സൈപ്രസ് വൃക്ഷവും നട്ടുപിടിപ്പിച്ചിട്ടുണ്ട്.