മകൻ മരിക്കുമ്പോൾ ജോർജ് കലിഫോർണിയയിൽ ആയിരുന്നു. എല്ലിലെ അർബുദവുമായി ബന്ധപ്പെട്ട ചർച്ചയിൽ പങ്കെടുത്തുകൊണ്ടിരിക്കെയാണ് നാട്ടിൽ നിന്ന് ആ മരണവാർത്ത എത്തുന്നത്. ഹൃദയം പിടിച്ചുലയ്ക്കുന്ന ആ വാർത്ത കേട്ടിട്ടും ജോർജ് സംയമനം നഷ്ടപ്പെടുത്താതെ ചർച്ച തുടർന്നു. ഒടുവിൽ ചർച്ച കഴിഞ്ഞ ശേഷമാണ് തന്റെ മകൻ ശ്വാസകോശസംബന്ധമായ അസുഖത്തെത്തുടർന്ന് മരിച്ചുപോയെന്ന് അദ്ദേഹം സഹപ്രവർത്തകരോട് വെളിപ്പെടുത്തുന്നത്. മകന്റെ മരണവാർത്ത കേട്ടിട്ടും ദുഃഖം കടിച്ചുപിടിച്ച് ജോലി തുടർന്നത് എങ്ങനെയെന്ന് സഹപ്രവർത്തകർ അദ്ഭുതപ്പെട്ടപ്പോൾ, ദൈവീക സമാധാനം കൊണ്ടാണ് താൻ ദുഃഖം മറികടക്കുന്നത് എന്നായിരുന്നു അദ്ദേഹത്തിന്റെ മറുപടി. 

മരണം സംബന്ധിച്ച് കൂടുതൽ വിവരങ്ങൾ അറിയാൻ ജോർജ് അന്നു വൈകുന്നേരം നാട്ടിലേക്ക് ട്രങ്ക് കോൾ ബുക്ക് ചെയ്തു. അത്താഴത്തിനു മുൻപ് ടെലിഫോൺ ഓപറേറ്ററെ വിളിച്ച് ഒന്നുകൂടി ഓർമപ്പെടുത്തുകയും ചെയ്തു. പക്ഷേ, വീട്ടിലേക്ക് ബുക്ക് ചെയ്ത ആ കോൾ വഴി തെറ്റിയെത്തിയത് വേറെ ഒരാൾക്കാണ്. ജീവിതപ്രതിസന്ധികൾ മൂലം മനസ്സുമടുത്ത ഒരു ‘അജ്ഞാതൻ’ ആയിരുന്നു അങ്ങേത്തലയ്ക്കൽ. മകന്റെ മരണവാർത്തയിൽ ഉലഞ്ഞുപോയിരുന്ന ജോർജ് അന്ന് ആ വ്യക്തിയോട് ഏറെ നേരം സംസാരിച്ചു, പ്രതിസന്ധികളെ മറികടക്കാൻ കഴിയുമെന്ന് തന്റെ ജീവിതം ചൂണ്ടിക്കാണിച്ച് ഓർമപ്പെടുത്തി. കടുത്ത നിരാശയിലൂടെ കടന്നുപോകുമ്പോഴും മറ്റുള്ളവരുടെ സങ്കടങ്ങൾക്ക് ചെവി കൊടുക്കാൻ ജോർജ് അതിനകം പഠിച്ചിരുന്നു. ആകെ ഉലഞ്ഞുപോയ ആ രാത്രി വഴിതെറ്റിയെത്തിയ ആ കോൾ ഒരർഥത്തിൽ ജോർജിന് ജീവിതത്തിലേക്ക് നീട്ടിയ പിടിവള്ളിയായിരുന്നു.

∙ ഇടവേളയില്ലാത്ത പരീക്ഷണങ്ങൾ

ഷെറിയുടെ മരണശേഷം ജനിച്ച മൂന്നാമത്തെ കുട്ടിയായിരുന്നു ആനി. മകളായത് കാരണമാവാം ആൺമക്കളെ ബാധിച്ച അപൂർവ ജനിതക രോഗത്തിന്റെ കണികകൾ ആനിയെ വെറുതെ വിട്ടു. വിധിയുടെ പരീക്ഷണകാലഘട്ടത്തിനിടെ ലഭിച്ച സന്തോഷത്തിന്റെ ചെറിയ ഇടവേളയായിരുന്നു അത്. നാലാമത്തെ മകനായി വൈകാതെ റോണി പിറന്നു. ആനിക്കു വേണ്ടിയുള്ള കാത്തിരിപ്പ് വിഫലമാകാഞ്ഞതുപോലെ അടുത്ത കുട്ടിയും രോഗമില്ലാതെ ജനിക്കുമെന്ന പ്രതീക്ഷയിലാണ് ആ കാലവും കടന്നു പോയത്. ആൺകുട്ടിയാണെന്നറിഞ്ഞതോടെ പ്രതീക്ഷയ്ക്കൊപ്പം ആധിയും വളർന്നു. ശ്വാസതടസ്സമുണ്ടാകുന്നുണ്ടോ രോഗലക്ഷണമുണ്ടോ എന്ന് നോക്കി നോക്കി എണ്ണിത്തീർത്ത ദിനങ്ങൾ. പക്ഷേ, പ്രാർഥനകൾ വിഫലമായി. റോണിയുടെ ശ്വാസകോശത്തിനെയും വെറുതെ വിടാൻ ആ രോഗം ഒരുക്കമായിരുന്നില്ല.

റോണിയും അസുഖബാധിതനാണ് എന്നറിഞ്ഞ ദിവസം എങ്ങനെയാണ് കടന്നുപോയതെന്ന് പറയാൻ ജോർജിന് ഇപ്പോഴും വാക്കുകളില്ല. അസുഖബാധിതരായ രണ്ടു മക്കളെയും പറ്റാവുന്നത്രയും കാലം കണ്ണിലെ കൃഷ്ണമണി പോലെ കാക്കുക എന്നതായിരുന്നു പിന്നീട് ജോർജിന്റെയും എലിസബത്തിന്റെയും ലക്ഷ്യം. ശ്വാസോച്ഛാസം ചെയ്യുന്നതിനു വേണ്ടി ലണ്ടനിൽനിന്ന് ഇറക്കുമതി ചെയ്ത ഇലക്ട്രോണിക് ഉപകരണത്തിന്റെ സഹായത്തോടെ ജോണിയുടെയും റോണിയുടെയും ആരോഗ്യസ്ഥിതി കുറച്ചൊക്കെ മെച്ചപ്പെട്ടു.

പക്ഷേ, മരുന്നില്ലാത്ത ആ രോഗം മക്കൾ വളരുന്നതിനനുസരിച്ച് വളർന്നുകൊണ്ടേയിരുന്നു. ഒടുവിൽ 22–ാം വയസ്സിൽ റോണി മരിച്ചു. ആദ്യ മകനായ ജോണി പക്ഷേ അപ്പോഴും ജീവിതത്തോടുള്ള പോരാട്ടം തുടരുകയായിരുന്നു. എത്രകാലം ജീവിക്കും എന്ന് ഒരുറപ്പും ഡോക്ടർമാർ നൽകാതിരുന്ന ജോണിയെ മാതാപിതാക്കളുടെ ഇച്ഛാശക്തി 32 വയസ്സുവരെ കൊണ്ടെത്തിച്ചു. പക്ഷേ, അതിനിടെ രണ്ട് സഹോദരങ്ങളുടെയും പിന്നെ നിഴലായി കൂടെ നിന്ന അമ്മയുടെയും മരണത്തിന്റെ വേദന കൂടി താങ്ങേണ്ടി വന്നു ജോണിക്ക്.

∙ മക്കൾക്കായി എല്ലാം മാറ്റി വച്ച എലിസബത്ത്

സുവോളജിയിൽ ബിരുദാനന്തര ബിരുദം നേടിയ എലിസബത്ത് തിരുവല്ല മാർത്തോമ കോളജിലും പിന്നീട് മുംബൈ വിൽസൺ കോളജിലും അധ്യാപികയായിരുന്നു. പക്ഷേ, മക്കളുടെ അപൂർവ ജനിതക രോഗം ക്ലാസ്മുറിയിലെ ഒരുപാട് കുട്ടികളിൽനിന്ന് മക്കളുടെ മാത്രമായി എലിസബത്തിനെ ചുരുക്കി. കൂടുതൽ കരുതലും പരിചരണവും ആവശ്യമുള്ള മക്കൾക്കൊപ്പം ഉണ്ടാവുകയാണ് തന്റെ ആദ്യ പരിഗണനയെന്നത് എലിസബത്ത് ഒറ്റയ്ക്ക് എടുത്ത തീരുമാനമായിരുന്നു. മക്കളും സംഗീതവും ആയിരുന്നു എലിസബത്തിന്റെ സന്തോഷങ്ങൾ. ജോലിയുമായി ലോകത്തിന്റെ പല ഭാഗങ്ങളിലേക്ക് ജോർജ് പോയപ്പോഴും മക്കളുടെ നിഴലായി എലിസബത്ത് ഒപ്പം നിന്നു. ഒപ്പമുണ്ടാവുക മാത്രമല്ല, രോഗത്തിന് ഒന്നും ചെയ്യാനാവില്ലെന്ന് അവരെ പറഞ്ഞു പഠിപ്പിക്കുക കൂടി ചെയ്തു. 

പക്ഷേ, രണ്ട് മക്കളുടെ മരണത്തിനു ശേഷം വിധി വീണ്ടുമെത്തിയത് എലിസബത്തിനെ കൂട്ടിക്കൊണ്ടുപോകാനായിരുന്നു. നീണ്ട കാലം മക്കൾക്കായി ഉറക്കമൊഴിച്ച എലിസബത്തിന്റെ മരണത്തോടെ ആ വീടുതന്നെ ഉറങ്ങിപ്പോയി. ഭാര്യയുടെ മരണത്തോടെ അൻപത്തൊമ്പതാം വയസിൽ ന്യൂക്ലിയർ മെഡിസിൻ മേഖലയിലെ ജോലി ഉപേക്ഷിച്ച് ജോർജ് മകൻ ജോണിക്ക് കാവലായി എത്തി. മുംബൈ ഭാഭാ ആണവ ഗവേഷണ സെൻററിൽ ശാസ്ത്രജ്ഞനായി തുടക്കമിട്ട് ലോസ്ആഞ്ചലസിലെ ബേ ഹാർബർ ആശുപത്രിയിൽ വൈദ്യ ശാസ്ത്രത്തിൽ ആണവോർജത്തിന്റെ സാധ്യത കണ്ടുപിടിക്കുകയും പിന്നീട് ലോകാരോഗ്യ സംഘടനയിൽ കൺസൽറ്റന്റ് ആകുകയും വരെ നീണ്ട ജോലി അങ്ങനെ അവസാനിച്ചു. എലിസബത്തിന് തൊട്ടു പിന്നാലെ ജോണിയും ലോകത്തോടു വിട പറഞ്ഞു. 

∙ കരുത്തായത് വിശ്വാസവും ഹാസ്യവും

ജീവിതത്തെ ശിഥിലമാക്കാൻ കെൽപ്പുള്ള ദുരന്തങ്ങൾ ആഞ്ഞടിച്ചപ്പോഴും കണ്ണീരണിഞ്ഞ മറ്റു ജീവിതങ്ങൾക്ക് തന്നിലൂടെ എങ്ങനെ സാന്ത്വനം പകരാം എന്നായിരുന്നു ജോർജിന്റെ ചിന്ത. അത് നിറവേറ്റിയതാവട്ടെ ഫലിതത്തെ കൂട്ടു പിടിച്ചും. തമാശകൾ പറഞ്ഞും എഴുതിയും മറ്റുള്ളവർക്കൊപ്പം സ്നേഹം പങ്കുവച്ചും സംസാരിച്ചും അദ്ദേഹം സമയം ചെലവഴിച്ചു. അനേകം പുസ്തകങ്ങൾ രചിച്ചു. അതിലൊന്നാണ് 'ചിരിയും അൽപം കാര്യവും'. അനുദിന ജീവിതത്തിൽ നാം കാണുന്ന രംഗങ്ങളിലെ വൈരുധ്യങ്ങളുടെ പൊരുളുകൾ നർമത്തിൽ ചാലിച്ച് രചിച്ചിട്ടുള്ളതാണ് ജോർജിന്റെ പുസ്തകങ്ങൾ.