അങ്ങനെ അവർ ബാലമുരളീകൃഷ്ണയുടെ അരികിലെത്തി; അയ്യപ്പനെ ഉണർത്തുന്നത് ഇവരുടെ പാട്ട്; ആ നാദം വീണ്ടെടുത്തത് യേശുദാസ്

ജയനും വിജയനും ചേർന്നെഴുതി ഈണം പകർന്ന ‘ശ്രീശബരീശാ ദീനദയാലാ...’ എന്ന ഗാനം ജയചന്ദ്രനും ‘ദർശനം പുണ്യദർശനം...’ എന്ന പാട്ട് യേശുദാസും പാടി. ശബരിമല നടതുറക്കുമ്പോൾ ഇപ്പോഴും കേൾപ്പിക്കുന്നത് പ്രസിദ്ധമായ ‘ശ്രീകോവിൽ നട തുറന്നു...’ പാട്ടാണ്. ‘സ്വാമി അയ്യപ്പനി’ൽ യേശുദാസിനെക്കൊണ്ടു ജി. ദേവരാജൻ ‘ഹരിവരാസനം..’ പാടിപ്പിക്കുന്നതിനു 4 വർഷം മുൻപ് ഈ പാട്ട് ജയവിജയ ചേർന്നു പാടി റെക്കോർഡ് ചെയ്തിരുന്നു.

∙ ഇരട്ടകൾ അയ്യപ്പൻമാരെ സംഗീതക്കടലിൽ ആറാടിക്കും 

പതിവായി പന്തളത്തു നിന്നുള്ള തിരുവാഭരണ ഘോഷയാത്ര ശബരിമല സന്നിധാനത്തേക്ക് എത്തിച്ചേരുന്ന വേളയിൽ  ജയനും വിജയനും അയ്യപ്പൻമാരെ സംഗീതക്കടലിൽ ആറാടിക്കും. ഇവർ രണ്ടു പേരും ചേർന്നു പാടാറുള്ള അയ്യപ്പ ഭക്തി ഗാനങ്ങൾ ലക്ഷക്കണക്കിനു ഭക്തരാണ് കൈകൂപ്പി മനസ്സിലേക്ക് ഏറ്റു വാങ്ങിയിരുന്നത്. ഒന്നും രണ്ടുമല്ല 42 വർഷം ഇവർ ഒരുമിച്ച് ഇതുപോലെ ശബരിമലയിൽ പാടി. പക്ഷേ, 1988 മകരവിളക്ക് ഉത്സവത്തിനു ജയവിജയന്മാരുടെ പാട്ട് സന്നിധാനത്ത് മുഴങ്ങിയില്ല. ആ വർഷം ജനുവരിയിലായിരുന്നു ഇരട്ട സഹോദരൻ വിജയന്റെ മരണം. തൃശ്ശിനാപ്പള്ളിയിൽ കച്ചേരിക്ക് ഇവർ ഒരുമിച്ചുള്ള ട്രെയിൻ യാത്രയിൽ ഹൃദയാഘാതം മൂലമായിരുന്നു വിജയന്റെ വേർപാട്.

ഇരട്ട സഹോദരന്മാരായ ജയനും വിജയനും അര നൂറ്റാണ്ടിലേറെ കർമ മേഖലയിൽ ഒരുമിച്ചായിരുന്നു യാത്ര. ഹൃദയം നിറയെ അയ്യപ്പ ഭക്തിയുമായി നിറഞ്ഞൊഴുകുന്ന പുണ്യ നദിയായ പമ്പയുടെ ഒഴുക്ക് പോലെ. സംഗീതക്കടലിലേക്ക് തുറന്ന സ്വര രാഗങ്ങളുടെ അഴിമുഖം. ജയവിജയന്മാരുടെ ഹൃദയതാളവും മറ്റൊന്നായിരുന്നില്ല.

∙  ജയനെ തിരികെ നൽകി  യേശുദാസ്

ഒരുമിച്ചുള്ള സുഗമമായ ഒഴുക്കിനു തടസ്സം നേരിടുമ്പോൾ ഏതു നദിയും ഒന്നുലയും. ഉൾവലിയും. തീരം തേടും. ജയനും അതു തന്നെ സംഭവിച്ചു. വിജയന്റെ മരണ ശേഷം ഏറെനാൾ സംഗീതത്തിനു അവധി നൽകി. പിന്നെ ‘പുനരുജ്ജീവനം’ ഉണ്ടായത് ഗാനഗന്ധർവൻ യേശുദാസിന്റെ ഇടപെടൽ മൂലമാണ്. പിന്നെ മലയാളിയുടെ മനസ്സിലേക്ക് ഭക്തിയുടെ ‘പമ്പ’ മാത്രമല്ല, നിളയും ഗംഗയും എല്ലാം നിറകവിഞ്ഞ് ഒഴുകി. യേശുദാസിന്റെ നാദധാരയിൽ. ജയന്റെ ഈണം. കവി എസ്.രമേശൻ നായരുടെ വരികൾ. ‘മയിൽപ്പീലി’ എന്ന സംഗീത ആൽബത്തിലൂടെ പുറത്തു വന്ന ‘രാധതൻ പ്രേമത്തോടാണോ കൃഷ്ണാ, അണിവാകച്ചാർത്തിൽ ഞാൻ, ചന്ദനചർച്ചിത, ചെമ്പൈക്കു നാദം, ഗുരുവായൂരപ്പാ നിൻ, ഹരികാംബോജി രാഗം, നീയെന്നെ ഗായകനാക്കി, ഒരു പിടി അവിലുമായി, യമുനയിൽ ഖരഹരപ്രിയ.. തുടങ്ങിയ പാട്ടുകൾ ഇന്നും മലയാളിയുടെ മനസ്സിലുണ്ട്. 

∙ കണ്ണുകളിൽ നവതി തിളക്കം 

ജയന്റെ  ചിരിയിൽ ഇപ്പോൾ നവതിയിലെത്തിയതിന്റെ തിളക്കം. കൺകോണുകളിലും കവിൾത്തടങ്ങളിലും ചുളിവു നിറയുന്നൊരു സൗഹൃദച്ചിരി. ഇതു തലമുറകൾക്കു സംഗീത വെളിച്ചം പകർന്ന മുഖശ്രീ!. സംഗീതജ്ഞൻ കെ.ജി.ജയൻ (ജയവിജയ). പൊതു പരിപാടികൾ ഒഴിവാക്കി ഏറ്റവും അടുത്ത ബന്ധുക്കളുടെ സാന്നിധ്യത്തിലായിരുന്നു നവതി ആഘോഷം. 

കാരാപ്പുഴ ഗവൺമെന്റ് എൽപി സ്കൂളിലെ അധ്യാപക ജോലി രാജിവച്ചാണ് സംഗീത വഴിയിലേക്ക് പൂർണമായും ജയൻ ചുവടുവച്ചത്. ശ്രീനാരായണ ഗുരുവിന്റെ ശിഷ്യനും സഹചാരിയുമായിരുന്ന നട്ടാശേരിയിൽ കടമ്പൂത്തറ മഠത്തിൽ വൈദികാചാര്യ കെ.ഗോപാലൻ തന്ത്രിയുടെയും പി.കെ. നാരായണിയമ്മയുടെയും മകനാണ്. ഭാര്യ: പരേതയായ വി.കെ.സരോജിനി. (മുൻ സ്‌കൂൾ അധ്യാപിക). മക്കൾ: ബിജു കെ.ജയൻ, നടൻ മനോജ് കെ. ജയൻ. മരുമക്കൾ: പ്രിയ ബിജു, ആശ മനോജ്.

∙ ബിച്ചുവിന്റെ  ഡയറിയിലെ പാട്ട് ഹിറ്റാക്കി

നിറകുടം സിനിമയിലെ സൂപ്പർ ഹിറ്റായ ‘നക്ഷത്രദീപങ്ങൾ തിളങ്ങി ..’ എന്ന പാട്ട് പിറന്നതിനു പിന്നിൽ ഒരു കഥയുണ്ട്. ബിച്ചുതിരുമലയും ജയനും മദ്രാസിൽ താമസിക്കുന്ന കാലം. ഒരു ദിവസം ക്ഷേത്ര ദർശനത്തിനു പോയ അവസരത്തിൽ ബിച്ചു തന്റെ ഡയറി ജയന്റെ അടുത്ത് മറന്നുവച്ച് പോയി. ഡയറിയിൽ കുറിച്ചിട്ട ഈ  പാട്ട് ജയന്റെ ശ്രദ്ധയിൽപ്പെട്ടു. ബിച്ചു ക്ഷേത്ര ദർശനം കഴിഞ്ഞ് മടങ്ങിയെത്തിയപ്പോൾ ഈണം നൽകി പാടി കേൾപ്പിച്ചു.  

‘നക്ഷത്രദീപങ്ങൾ തിളങ്ങി’ (നിറകുടം), ‘ഹൃദയം ദേവാലയം’ ( തെരുവുഗീതം ), ‘കണ്ണാടിയമ്മാ ഉൻ ഇദയം’.. (പാദപൂജ), ‘ഇരൈവനുക്കും പെയരേ വൈയ്ത്താന് ഒരു മനിതൻ ഇങ്കേ’.. ( ഷൺമുഖപ്രിയ) തുടങ്ങി മലയാളം, തമിഴ് ചലച്ചിത്ര മേഖലകളിൽ ഒട്ടേറെ ഹിറ്റുകൾ. ‘ഭാഗപ്പിരിവൈ’ എന്ന തമിഴ് ചിത്രം ‘നിറകുടം’ എന്ന പേരിൽ മലയാളത്തിൽ ചിത്രീകരിച്ചപ്പോൾ അതിൽ ഈ പാട്ട് ഉൾപ്പെടുത്തി. സിനിമയിൽ നവരാത്രിമണ്ഡപത്തിൽ സംഗീത കച്ചേരി അവതരിപ്പിക്കുന്ന ഭാഗം അഭിനയിച്ചത് യേശുദാസാണ്.