സിൽവർ ലൈനിൽ ജനങ്ങൾക്കൊപ്പം! മരത്തിന് പേരിട്ട മന്ത്രി, തെലങ്കാനയിൽ പാർട്ടിയുടെ പോരാളി; കാനത്തിന്റെ ഈ ശിഷ്യൻ വ്യത്യസ്തനാണ്

‘കല്ലല്ല, മണ്ണല്ല, മരമല്ല കാട്...’ ബോട്ടിലിരുന്ന് കൈയിൽ കിട്ടിയ കടലാസിൽ ബിനോയ് വിശ്വം എഴുതിത്തുടങ്ങി. പോസ്റ്ററുകളിൽ കാണുന്ന വടിവൊത്ത അക്ഷരം. ഇടയ്ക്ക് എഴുത്തു നിർത്തും, ചുറ്റുമുള്ള വനത്തിലേക്ക് നോക്കും. ഒടുവിൽ കാടിന്റെയും പ്രകൃതിയുടെയും പ്രാധാന്യം കാതലായ ഒരു കവിതയായി ആ എഴുത്ത് അവസാനിച്ചു. അന്ന് വി.എസ്.അച്യുതാനന്ദൻ സർക്കാരിൽ വനം മന്ത്രിയാണ് ബിനോയ് വിശ്വം. വനത്തിന്റെ പ്രാധാന്യത്തെ കുറിച്ച് കൂടുതൽ ബോധവൽക്കരിക്കുന്നതിനാകണം എംഎൽഎമാർക്കായി തേക്കടി മുല്ലക്കുടിയിൽ ഏകദിന ക്യാംപ് സംഘടിപ്പിച്ചു.

ആ യാത്ര എംഎൽഎമാർക്ക് പുത്തൻ അനുഭവമായിരുന്നു. ക്യാംപ് കൈമാറിയ അറിവാകും മടക്കയാത്രയിൽ കവിതയായി മാറിയത്. വനംമന്ത്രി സ്ഥാനം ഏറ്റെടുത്ത ബിനോയ് തന്റെ ഓഫിസിന്റെ പശ്ചാത്തലത്തിൽ കാടിന്റെ ചിത്രം പതിച്ചാണ് പ്രവർത്തനം ആരംഭിച്ചത്. ഈ വ്യത്യസ്തതയാണ് ബിനോയ് എന്ന പൊതുപ്രവർത്തകന്റെ ചിഹ്നം. പറയാനുള്ളത് തുറന്നു പറയുന്ന ബിനോയ് നിലപാടുകളിൽ വെള്ളം ചേർക്കില്ല. ആ കാർക്കശ്യം ഇനി സിപിഐയുടെ നിലപാടുകളിലും പ്രതിഫലിക്കുമെന്നു കരുതാം.

സാധാരണ രാഷ്ട്രീയക്കാരെ പോലെ വെള്ളയോ ഒറ്റ നിറത്തിലോ ഉള്ളോ വസ്ത്രങ്ങളല്ല ബിനോയ് ധരിക്കാറുള്ളത്. അദ്ദേഹത്തിന്റെ കുപ്പായങ്ങൾ ഏതാള്‍ക്കൂട്ടത്തിനിടയിലും എപ്പോഴും തല ഉയർത്തി നിൽക്കും. ‘മികച്ച ജീവിതം’ അത് ആരുടെയും കുത്തകയല്ല, എല്ലാവർക്കും അത് ലഭ്യമാകണം എന്ന അദ്ദേഹത്തിന്റെ ആദർശത്തിന്റെ ഭാഗമായാണ് ഇത്തരത്തിലുള്ള വസ്ത്രങ്ങൾ തിരഞ്ഞെടുക്കാറുള്ളതെന്നാണ് അടുപ്പക്കാർ പറയുന്നത്. തനിക്ക് ചുറ്റുമുള്ളവരും അദ്ദേഹത്തെപോലെ വസ്ത്രം ധരിക്കുന്നത് നന്നായിരിക്കും എന്ന അഭിപ്രായവും ബിനോയ് വിശ്വത്തിനുണ്ടെന്നാണ് അവർ പറയുന്നത്.

∙ കാനത്തിന്റെ പ്രിയ ശിഷ്യൻ, കാനം ഒരുക്കിവച്ച കസേര

കാനം രാജേന്ദ്രൻ എഐവൈഎഫ് കോട്ടയം ജില്ലാ സെക്രട്ടറി ആയിരിക്കുന്ന കാലം മുതലാണ് ബിനോയ് വിശ്വവുമായുള്ള അടുപ്പം തുടങ്ങുന്നത്. അന്നു മുതൽ സ്വന്തം ഗുരു സ്ഥാനീയനായാണ് ബിനോയ് കാനത്തെ കണ്ടിട്ടുള്ളത്. ആ ബന്ധം കാനത്തിന്റെ വേർപാടിൽ പോലും അവസാനിച്ചില്ലെന്നു വേണം പറയാൻ. കാനം രാജേന്ദ്രന്റെ മരണത്തിന് തൊട്ടു പിന്നാലെ ബിനോയ് വിശ്വത്തിന് സിപിഐ സംസ്ഥാന സെക്രട്ടറിയുെട ചുമതല നൽകാൻ പ്രേരിപ്പിച്ച ഒരു പ്രധാനഘടകവും ഒരു ‘കാനം ടച്ച്’ തന്നെയാണ്. ശാരീരിക അവശതകളെത്തുടർന്ന് തനിക്ക് അവധിയിൽ പോകേണ്ടിവന്നാൽ പകരം ചുമതല ബിനോയ് വിശ്വത്തെ തന്നെ ഏൽപ്പിക്കണമെന്ന് പറഞ്ഞുകൊണ്ടുള്ള കത്ത് നേരത്തെ തന്നെ അദ്ദേഹം കേന്ദ്ര നേതൃത്വത്തിന് അയച്ചിരുന്നു.

ഈ കത്തിന്റെ കൂടി ഉറച്ച പിന്തുണയാണ് പാർട്ടിയിൽ ഉയർന്ന ചില അസ്വാരസ്യങ്ങളെയൊക്കെ അതിജീവിച്ച് പാർട്ടി സെക്രട്ടറി കസേരയിൽ ഇരിക്കാൻ ബിനോയ് വിശ്വത്തിന് കരുത്ത് പകർന്നത്. മുൻപ് പല സാഹചര്യങ്ങളിലും ബിനോയ് വിശ്വം എന്ന സഹപ്രവർത്തകന് തണലായി നിന്നിട്ടുള്ളതും കാനം എന്ന വൻമരം തന്നെയാണ്. ബിനോയ് വിശ്വത്തിന്റെ കോൺഗ്രസ് അനുകൂല പരാമർശം പരക്കെ വിമർശിക്കപ്പെട്ടപ്പോഴും ശക്തമായ പിന്തുണയുമായി കാനം ഒപ്പം നിന്നത് ഇതിന്റെ ഏറ്റവും ശ്രദ്ധേയമായ ഉദാഹരണങ്ങളിൽ ഒന്നുമാത്രം.

‘‘മിക്ക സംസ്ഥാനങ്ങളിലും ബിജെപി ശക്തമാണ്. ബിജെപിക്കെതിരെ ഇടതുപക്ഷം ശക്തമായ നിലപാട് എടുത്തു മുന്നോട്ടു പോകുന്നുണ്ട്. കോൺഗ്രസ് ദുർ‍ബലമാകുമ്പോൾ എല്ലായിടത്തും ബദലായി ആ സ്ഥാനത്തേക്കു വരാൻ ഇടതുപക്ഷത്തിനു കഴിയണമെന്നില്ലെന്നു കാനം ചൂണ്ടിക്കാട്ടി. മറ്റു പലരും അവിടേക്കു വന്നേക്കാം. ആ യാഥാർഥ്യമാണു ബിനോയ് വിശ്വം പറഞ്ഞത്. ഈ അഭിപ്രായം കേരളത്തിനു ബാധകമല്ലെന്നും ബിനോയ് വ്യക്തമാക്കിയിട്ടുണ്ട്’ – എന്ന വ്യക്തമായ മറുപടി നൽകിയാണ് എതിർ ശബ്ദങ്ങളെ കാനം നിശബ്ദമാക്കിയത്. എന്നാൽ, അപൂർവം ചില സന്ദർഭങ്ങളില്‍ കാർക്കശ്യക്കാരനായ പാർട്ടി സെക്രട്ടറി ആയി മാറിയിരുന്ന കാനം ബിനോയ് വിശ്വത്തെ ശാസിക്കുന്ന കാഴ്ചകളും ഉണ്ടായിട്ടുണ്ട്.

∙ കോൺഗ്രസ് ഇല്ലാതെ എന്തു പ്രതിപക്ഷം, സത്യപ്രതിജ്ഞയ്ക്ക് ആർഭാടം വേണോ

പൊതു പ്രവർത്തകൻ, ജനപ്രതിനിധി എന്നീ നിലകളിലെല്ലാം രാജ്യത്തു നടക്കുന്ന പല കാര്യങ്ങളിലും സ്വന്തം അഭിപ്രായം വെട്ടിത്തുറന്ന് പ്രകടിപ്പിക്കാൻ മടിയില്ലാത്ത നേതാവാണ് ബിനോയ് വിശ്വം. അത് ചിലപ്പോഴെല്ലാം ഇടത് മുന്നണിയിൽ തന്നെ അസ്വാരസ്യങ്ങൾക്ക് വഴിവച്ചിട്ടുമുണ്ട്. പ്രാദേശിക പാർട്ടികളുമായി ചേർന്ന് ഇടതുപക്ഷത്തിനു മാത്രമേ ബദൽ രൂപീകരിക്കാൻ കഴിയൂ എന്നായിരുന്നു മുഖ്യമന്ത്രി പിണറായി വിജയന്റെ നിരീക്ഷണമെങ്കിൽ രാജ്യത്താകെ സ്വാധീനമുള്ള മതനിരപേക്ഷ പാർട്ടി എന്ന നിലയിൽ ബിജെപി വിരുദ്ധ ബദലിൽ കോൺഗ്രസിനു സ്ഥാനമുണ്ടെന്നായിരുന്നു ബിനോയ് വിശ്വത്തിന്റെ നിലപാട്.

ഈ നിലപാട് വ്യക്തമാക്കിയത് വലിയ വിവാദങ്ങൾക്ക് തിരികൊളുത്തുകയും ചെയ്തിരുന്നു. എന്നാൽ, അദ്ദേഹം തന്റെ നിലപാടിൽ ഉറച്ചു നിൽക്കുകതന്നെ ചെയ്തു. ഗവർണർ പദവി വേണ്ടന്ന സിപിഎമ്മിന്റെ പ്രഖ്യാപിത നയത്തിന്റെ പ്രത്യക്ഷ മുഖമായി പലപ്പോഴും മുന്നിൽ നിന്നിട്ടുള്ളതും ബിനോയ് വിശ്വം തന്നെയാണ്. ഗവർണർ പദവി റദ്ദാക്കണമെന്നാവശ്യപ്പെട്ടുള്ള സ്വകാര്യ ബിൽ രാജ്യസഭയിൽ അവതരിപ്പിക്കാൻ നോട്ടിസ് നൽകിയതും ബിനോയ് വിശ്വം തന്നെയാണ്. ജനങ്ങൾ തിരഞ്ഞെടുക്കുന്ന സർക്കാരിന്റെ പ്രവർത്തനങ്ങളിൽ ഇടപെടാൻ ഗവർണർക്ക് അധികാരം നൽകരുതെന്നതെന്നായിരുന്നു നോട്ടിസിലെ പ്രധാന ആവശ്യങ്ങളിലൊന്ന്.

പാർലമെന്റിൽ 33% വനിതാ സംവരണത്തിനുള്ള ബിൽ പാസാക്കാൻ മുന്നോട്ടു വരുന്നത് ബിജെപി ആയാൽപ്പോലും അവരെ സിപിഐ പിന്തുണയ്ക്കുമെന്ന് പരസ്യമായി നിലപാടെടുത്ത ആളാണ് ബിനോയ് വിശ്വം. 8 വർത്തോളം വെളിച്ചം കാണാതിരുന്ന വനിതാബിൽ രാജ്യ പുരോഗതിക്ക് എത്രത്തോളം ആവശ്യമാണെന്ന് വ്യക്തമാക്കുന്നതായിരുന്നു അദ്ദേഹത്തിന്റെ നിലപാട്. കേരളത്തില്‍ വനം മന്ത്രി ആയിരുന്നതിനാൽ തന്നെ വനത്തോടും ആദിവാസികളോടും കേന്ദ്രസർക്കാർ മുഖം തിരിക്കുന്നതിനെതിരെയും ബിനോയ് ശക്തമായി നിലപാട് വ്യക്തമാക്കിയിട്ടുണ്ട്.

തൃക്കാക്കര ഉപതിരഞ്ഞെടുപ്പ് ഫലം എൽഡിഎഫിന് എതിരായപ്പോഴും ബിനോയ് വിശ്വം കൈക്കൊണ്ട നിലപാട് വളരെ ശ്രദ്ധനേടിയിരുന്നു. സിൽവർലൈൻ ഉൾപ്പെടെയുള്ള സിപിഎം വികസന നയത്തോടുള്ള അദ്ദേഹത്തിന്റെ പ്രതികരണം ഇങ്ങനെയായിരുന്നു, ‘ജനങ്ങളെ വിശ്വാസത്തിലെടുത്തുള്ള  വികസന നയം വേണം. ജനവിധിയാണ് ഏറ്റവും വലുത്.’ ഏറ്റവും വലിയ അധികാര പദവിയെക്കാൾ വലുത് ജനങ്ങളുടെ തീരുമാനമാണെന്ന ബോധ്യം ഇടതുമുന്നണിയെ തുടർന്നും നയിക്കും. തെലങ്കാനയിൽ കോൺഗ്രസിനൊപ്പം നിന്നാണ് സിപിഐ ഇത്തവണ തിരഞ്ഞെടുപ്പിനെ നേരിട്ടത്. മത്സരിച്ച ഏക മണ്ഡലത്തിൽ വിജയിക്കുകയും ചെയ്തു.