ഞായറാഴ്ച മാത്രം തുറക്കുന്ന ദേവാലയം, വഴിപാടും പ്രസാദവും പുസ്തകം, പോകാം അറിവിന്റെ തീർഥയാത്രയ്ക്ക്

അറിവിനെ വണങ്ങുന്ന, ഗ്രന്ഥപ്രതിഷ്ഠയുള്ള, പുരോഹിതനില്ലാത്ത, വഴിപാടും പ്രസാദവും പുസ്തകങ്ങളായ ഒരു ദേവാലയം. മതങ്ങൾക്ക് അതീതമായ അവിടെ ആർക്കും പ്രവേശിക്കാം, അറിവിനെ ആരാധിക്കാം, ഗ്രന്ഥപ്രതിഷ്ഠയ്ക്കു മുൻപിൽ വണങ്ങാം. കണ്ണൂർ ചെറുപുഴയിലെ പ്രാപ്പൊയിൽ കക്കോടാണ് നവപുരം മതാതീത ദേവാലയം എന്ന ഈ വ്യത്യസ്തമായ ദേവാലയം സ്ഥിതിചെയ്യുന്നത്. ‘വിജ്ഞാനമാണ് ദൈവം, വിശാല ചിന്തയും വിചിന്തനബോധവുമാണ് മതം, വിനയമാർന്ന വിവേകമാണ് വഴി’- മനസ്സിൽ കുറിച്ചിടേണ്ട മൂന്ന് വാചകങ്ങൾ ഇവിടെ കൊത്തി വച്ചിരിക്കുന്നു. കവിയും ഗ്രന്ഥകാരനും ചെറുപുഴ പീയെൻസ് കോളജ് പ്രിൻസിപ്പലുമായ പ്രാപ്പൊയിൽ നാരായണനാണ് ഈ ദേവാലയത്തിന്റെ സ്ഥാപകൻ. ഈ ദേവാലയത്തിലേക്ക് ആർക്കും കടന്നുവരാമെന്നും അറിവിനെ ആരാധിക്കാമെന്നും നാരായണൻ പറയുന്നു.

∙ ആരാധന അറിവിനോട്

ആർക്കും എപ്പോഴും വന്ന് അറിവിനെ ആരാധിക്കാൻ പറ്റുന്ന ഒരു ദേവാലയമാണിത്. ഏതു മതത്തിൽപ്പെട്ടവർക്കും ഏതു ലിംഗത്തിൽപ്പെട്ടവർക്കും ഇവിടേക്കു വരാം. ഗ്രന്ഥമാണ് പ്രതിഷ്ഠ. ജ്ഞാനത്തിന്റെ മൂർത്തീഭാവമെന്ന രീതിയിലാണു ഗ്രന്ഥം പ്രതിഷ്ഠിച്ചിരിക്കുന്നത്. അതൊരു പ്രതീകം മാത്രമാണ്. വഴിപാടായി സ്വീകരിക്കുന്നതും പ്രസാദമായി കൊടുക്കുന്നതും പുസ്തകങ്ങളാണ്. വിദ്യാരംഭത്തോട് അനുബന്ധിച്ച് കുട്ടികളെ എഴുത്തിനിരുത്തും. പുസ്തക പ്രകാശനങ്ങൾ, കലാപരിപാടികൾ, സെമിനാറുകൾ തുടങ്ങിയവ ഇവിടെ നടത്താറുണ്ട്. വരുന്ന ആളുകൾക്ക് താമസിക്കാൻ ചെറിയ മൂന്നു വീടുകളും കലാപരിപാടികൾ നടത്താൻ സ്റ്റേജും ചെറിയ ഭക്ഷണശാലയും സെമിനാർ ഹാളുമുണ്ട്.

സ്വതന്ത്ര ചിന്തകർക്കും മതാതീത ദേവാലയത്തിലേക്കു പ്രവേശനമുണ്ട്. സ്വതന്ത്ര ചിന്തയിൽ അധിഷ്ഠിതമായ കാര്യങ്ങളും ഇവിടെ ചർച്ച ചെയ്യും. തങ്ങൾ മാത്രമാണു ശരിയെന്ന ശാഠ്യമില്ല. വ്യത്യസ്തങ്ങളായ ശരികളെ ഒരേപോലെ സ്വീകരിക്കാനും സംവദിക്കാനും പറ്റിയ ഒരിടം എന്ന നിലയിലാണ് ഇവിടം രൂപപ്പെടുത്തിയിരിക്കുന്നത്.

∙ ഗ്രന്ഥപ്രതിഷ്ഠ

2021 മാർച്ചിലായിരുന്നു ക്ഷേത്രത്തിന് തറക്കല്ലിട്ടത്. ഒക്ടോബറിൽ ഒരു ചെറിയ കെട്ടിടമുണ്ടാക്കി ആളുകൾക്ക് പ്രവേശനത്തിനായി തുറന്നു കൊടുത്തു. പ്രവേശനക്കെട്ടിടം പുസ്തകാലയമാണ്. അതിനെ ദേവാലയം എന്ന് വിളിക്കുന്നു. അവിടെനിന്നു പടികൾ കയറി ചെല്ലുന്നിടത്താണു ഗ്രന്ഥപ്രതിഷ്ഠ. 30 അടി ഉയരമുള്ള ഒറ്റക്കല്ലിനു മുകളിലാണ് പ്രതിഷ്ഠ. അതിൽ വിജ്ഞാനമാണ് ദൈവം, വിശാല ചിന്തയും വിചിന്തനബോധവുമാണ് മതം, വിനയമാർന്ന വിവേകമാണ് വഴി- എന്നീ മൂന്ന് ദർശനങ്ങൾ ആലേഖനം ചെയ്തിട്ടുണ്ട്.

അയ്യായിരത്തോളം പുസ്തകങ്ങൾ നിലവിൽ ലൈബ്രറിയിലുണ്ട്. എല്ലാത്തരം വായനയെയും പ്രോത്സാഹിപ്പിക്കുന്നുണ്ട്. പള്ളിയിൽനിന്നു ബൈബിളും മുസ്‍ലിം പള്ളിയിൽനിന്ന് ഖുർആനും ക്ഷേത്രത്തിൽനിന്നു ഗീതയും സമ്മാനമായി ലഭിച്ചിട്ടുണ്ട്. ചെറുശ്ശേരിയുടെ പ്രതിഷ്ഠയുമുണ്ട് ഇവിടെ. ഇതിന്റെ  ഭാഗമായി ഒരു പ്രസാധനാലയമുണ്ട്– ചെറുശ്ശേരി പ്രസാധനാലയം. ചെറുശ്ശേരി ഗ്രാമമുണ്ടാക്കാനുള്ള ശ്രമത്തിലാണ് ഇപ്പോൾ. ചെറുശ്ശേരിഗ്രാമമെന്ന് ഇവിടം ഇപ്പോൾത്തന്നെ അറിയപ്പെട്ടു തുടങ്ങി.