നൂറടി മുതൽ കൈവെള്ളയിൽ ഒതുങ്ങുന്നതു വരെയുള്ള ‘കുതിര’കൾ; വലിയവനും ചെറിയവനും ഒന്നാകുന്ന കുത്തിയോട്ടം; ഇത് ചെട്ടികുളങ്ങരയുടെ കഥ

കുതിരമൂട്ടിൽ കഞ്ഞിക്കൊപ്പം മുതിര വിളമ്പുന്നതിലുമുണ്ട് കാര്യം. പയർവർഗങ്ങളിൽ ഏറ്റവുമധികം പോഷകസംപുഷ്ടമാണ് മുതിര. അത് ഫോസ്ഫറസിന്റെ കലവറയാണ്.  വിളർച്ച മാറാൻ പണ്ട് വൈദ്യന്മാ‍ർ പറഞ്ഞിരുന്നത് മുതിരച്ചാറ്  കഴിക്കാനാണ്. മുതിരപ്പുഴുക്കിൽ എരിവിന് കുരുമുളകാണ് ചേർക്കുന്നത്. അതും ഔഷധമാണ്. തേരും കുതിരയും വലിക്കുന്നത് വളരെയേറെ കഠിനാധ്വാനമുള്ള ജോലിയായതിനാൽ മുതിരപ്പുഴുക്ക് കഞ്ഞിയിൽ ഉൾപ്പെടുത്തിയത് അതിന്റെ ഔഷധഗുണം കണക്കിലെടുത്താവാം എന്നും പറയപ്പെടുന്നു.

∙ കുത്തിയോട്ടങ്ങളുടെ നാട്

അഭീഷ്ടം സാധിച്ച ഭക്തർ ദേവിയെ പ്രീതിപ്പെടുത്താൻ കുത്തിയോട്ടം വഴിപാട് നടത്തുന്നു. സാധാരണ ശിവരാത്രിക്കാണ് കെട്ടുകാഴ്ചയുടെയും കുത്തിയോട്ടത്തിന്റെയും ആരംഭം. ഇത്തവണ കുംഭഭരണിക്കു ശേഷമാണ് ശിവരാത്രി വരുന്നതെന്നതിനാൽ ശിവരാത്രിക്ക് മുൻപുള്ള തിരുവോണം നാളിൽ  കെട്ടുകാഴ്ചയുടെയും കുത്തിയോട്ടത്തിന്റെയും തുടക്കം കുറിച്ചു.  അന്നു മുതൽ രേവതി നാൾ വരെയുള്ള ദിവസങ്ങളിൽ വഴിപാടുകാരന്റെ വീട്ടിലാണ് കുത്തിയോട്ടം നടത്തുന്നത്. 

പല കുത്തിയോട്ടപ്പാട്ടുകളും വ്യത്യസ്ത പുരാണകഥകളെ അടിസ്ഥാനമാക്കിയുള്ളതാണ്. എന്നാൽ കുത്തിയോട്ടപ്പാട്ടുകൾ ദേവീസ്തുതികൾ തന്നെയാണ്. കുത്തിയോട്ടപ്പാട്ടുകൾക്ക് 4 പാദവും  കുമ്മിയും നിർബന്ധമാണ്. ‘തന്നന്നാ താനന്നാ’ എന്നും മറ്റുമുള്ള വായ്ത്താരിയെയാണ് താനവട്ടം എന്നു പറയുന്നത്. ‘തന്നന്നാ–താനന്നാ’ എന്നു തുടങ്ങി 8 താളഭേദങ്ങളാണ് കുത്തിയോട്ടപ്പാട്ടുകളിൽ പൊതുവേയുള്ളത്.

തന്നന്നാ–താനന്നാ–തന്നാനായ്– തനേ
താനന്നാ–താനന്നെ–തന്നാനാ–
തന്നന്നാ–താനന്നാ–തന്നാനായ്– തനേ
താനന്ന–താനന്ന–തന്നാനാ
എന്നതാണ് കുത്തിയോട്ടപ്പാട്ടുകളിൽ ഒന്നാം പാദത്തിന്റെ താനവട്ടം.

ഭക്തജനപ്രിയേ ഭദ്രകാളീ ശിവേ
നിത്യകല്യാണീ നിഖിലേശ്വരീ
കാർത്തികേ ഭാർഗവീ ചെട്ടികുളങ്ങര
വാഴും ഭഗതി പാഹിപാഹി
മൂർത്തിത്രയത്തിനു മൂലമായ് ബ്രഹ്മമായ്
പേർത്തും വിലസും പരംപൊരുളേ
…. ഇങ്ങനെ പോവുന്നു കുത്തിയോട്ടപ്പാട്ടുകൾ

ആശാനാണ് കുത്തിയോട്ടത്തിന്റെ പ്രധാനപാട്ടുകാരൻ. രണ്ടോ മൂന്നോ സഹപാട്ടുകാർ ഉണ്ടാവും. 10 മുതൽ 20 പേർവരെ താനവട്ടക്കാരുണ്ട്. പാട്ടിനൊത്ത് ചുവടു  വയ്ക്കാൻ പതിനഞ്ചോ ഇരുപതോ പേരും  ഉണ്ടാവും. കുത്തിയോട്ടപ്പന്തലിൽ ദേവീസ്ഥാനം  അഥവാ മണ്ഡപം നിർമിക്കും. മണ്ഡപത്തിൽ ഭദ്രകാളിയുടെ ചിത്രം വയ്ക്കും. ദേവീസ്ഥാനത്ത് നിത്യവും സന്ധ്യയ്ക്ക് ദീപാരാധന നടക്കും. 

ദീപാരാധനയും ഭക്ഷണവും കഴിഞ്ഞ് ചുവടുകാരും ആശാന്മാരും പന്തലിൽ ചുവട് വച്ച് തുടങ്ങുന്നു. എന്നിട്ട് നാല് താനവട്ടം വരെ ചുവട് വയ്ക്കും. ഒന്നാം ദിവസം ആശാന്മാർക്ക് ദക്ഷിണ ഉൾപ്പെടെയുള്ള ചടങ്ങ് നടക്കും. രണ്ടാം ദിവസം മുതൽ ചുവടും പാട്ടും ഇതുപോലെ ആവർത്തിക്കും. രേവതി നാളിൽ പൊലിവ് ചടങ്ങ് ഉണ്ടാവും. (പണം, വസ്ത്രം, വെറ്റില, പൊയില തുടങ്ങിയവ പൊലിവ് തട്ടത്തിൽ സമർപ്പിക്കുന്നതിനെയാണ് പൊലിക്കുക എന്നു പറയുന്നത്). കുത്തിയോട്ടത്തിന് പൊലിവ് പാട്ടുണ്ട്. ഇതിനായി മണ്ഡപത്തിന്റെ മുന്നിൽ പൊലിവ് തട്ടം തയാറാക്കും. പൊലിവ് പാട്ട് പാടുമ്പോൾ പൊലിക്കും. ആദ്യം വീട്ടുകാർ പൊലിക്കുക, കരക്കാർ പൊലിക്കുക, അടുത്ത ബന്ധുക്കൾ പൊലിക്കുക, വരുന്നവർ പൊലിക്കുക ഇങ്ങനെ അതത് ക്രമം കുത്തിയോട്ടക്കാർ അറിയിക്കും.  

അശ്വതി നാളിൽ വിശ്രമമാണ്. അന്ന്‌ ചുവടും പാട്ടുമില്ല. ഭരണിനാളിലോ അശ്വതി നാളിലോ ഏതെങ്കിലും ഒരു ദിവസം ഉച്ചയ്ക്ക് വിഭവസമൃദ്ധമായ കുത്തിയോട്ടസദ്യയുണ്ട്.  ഭരണി നാളിൽ  കുത്തിയോട്ടം നടക്കുന്ന വീട്ടിൽ നിന്ന് ക്ഷേത്രത്തിലേക്ക് താലപ്പൊലിയോടു കൂടിയ ഘോഷയാത്ര ഉണ്ടാവും.  ആഭരണങ്ങൾ സൂക്ഷിക്കുന്നതിനുള്ളത് എന്ന സങ്കൽപത്തിൽ ആമാടപ്പെട്ടി ചുമന്ന് ഒരാൾ ഘോഷയാത്രയെ അനുഗമിക്കും. ഏതു കരയിലെയാണോ കുത്തിയോട്ടം ആ കരയിലെ കുതിരമൂട്ടിൽ ഘോഷയാത്ര എത്തിച്ചേരും. 

കുതിരമൂട്ടിൽ നിന്ന് ക്ഷേത്രത്തിലേക്കാണ് അടുത്ത യാത്ര. ദേവിയുടെ മുന്നിൽ വച്ച്  പാട്ടുപാടി ചുവട് വച്ച് കുത്തിയോട്ടം ഭഗവതിക്ക് സമർപ്പിക്കും. ഘോഷയാത്രാ സംഘം വഴിപാടുകാരന്റെ വീട്ടിൽ നടക്കുന്ന സദ്യയിൽ പങ്കുചേരുന്നതാണ് അടുത്ത ചടങ്ങ്. കുംഭഭരണി കഴിഞ്ഞ്  വെളുപ്പിന് ചെട്ടികുളങ്ങര ക്ഷേത്രത്തിലെ കാഴ്ചക്കണ്ടത്തിൽ നടക്കുന്ന വിശേഷചടങ്ങിന് സാക്ഷ്യം വഹിക്കാൻ മാത്രം ആയിരക്കണക്കിന് ഭക്തർ എത്തും. ഇതാണ് ഭരണി എഴുന്നള്ളത്ത്. 13 കരകളുടെയും കെട്ടുകാഴ്ചകൾ അപ്പോൾ കാഴ്ചക്കണ്ടത്തിൽ ഉണ്ടാകും.