മസിനഗുഡി വഴിയല്ലാതെയും ഊട്ടിക്കു പോയാലോ: ഇതാ ആ റൂട്ടുകൾ; വഴിയിൽ ആന, മയിൽ, മാൻ, പുലി...: എങ്ങനെ പ്ലാൻ ചെയ്യാം യാത്ര?

പൂജ്യം ഡിഗ്രിയാണ് ഇപ്പോൾ ഊട്ടിയിലെ താപനില. നല്ല മഞ്ഞുവീഴ്ചയുണ്ട്... ഊട്ടിയുടെ പുൽമൈതാനങ്ങളാകെ മഞ്ഞുപുതച്ചുകിടക്കുകയാണ്. ബൊട്ടാണിക്കൽ ഗാർഡൻ, ബോട്ട്ഹൗസ്, എച്ച്എഡിപി മൈതാനം, കുതിരപ്പന്തയ മൈതാനം, റെയിൽവേ സ്റ്റേഷൻ, കാന്തൽ, എച്ച്പിഎഫ്, തലൈക്കുന്ത എന്നിവയെല്ലാം മഞ്ഞിൽപൊതിഞ്ഞു കിടക്കുന്നു. മസിനഗുഡി വഴി മാത്രമല്ല ഏതു വഴി പോയാലും ഊട്ടിയിൽ ‘പൊളി വൈബാ’ണ്. നാട്ടുകാരെല്ലാം പറഞ്ഞും വ്ലോഗിയും മസിനഗുഡി വഴിയുള്ള പാത തിരക്കേറിയെങ്കിലും ഊട്ടിയിലേയ്ക്കു പോകാൻ അതിലുമേറെ സുന്ദരപാതകളുണ്ട്. 

കാടിനെ അറിഞ്ഞ്, കാട്ടാറുകളും യൂക്കാലിപ്റ്റസ് മരങ്ങളും കാഴ്ചയൊരുക്കുന്ന വഴിയിലൂടെയുള്ള യാത്ര. ‘സാന്ദ്രം’ സിനിമയിൽ കൈതപ്രം ദാമോദരൻ നമ്പൂതിരി എഴുതി ജോൺസൺ മാസ്റ്റർ ഈണമിട്ട് ‘കണ്ടല്ലോ പൊൻകുരിശുള്ളൊരു തിരുമലയാറ്റൂർ പള്ളി ’ എന്ന പാട്ടിൽ പറയുന്നതു പോലെ..

∙ ഊട്ടിയിൽ പോകാൻ പലതുണ്ടു വഴി

മൂന്നു സംസ്ഥാനങ്ങളുടെ അതിർത്തിക്കാഴ്ചകളിലേയ്ക്കുള്ള വാതിലാണ് തമിഴ്നാട്ടിലെ ഊട്ടി. അഞ്ചു മുതൽ ഏഴു വരെ വന്യജീവി സങ്കേതങ്ങൾ ഒറ്റയാത്രയിൽ കാണാൻ ഊട്ടി കേന്ദ്രമാക്കി യാത്ര ആസൂത്രണം ചെയ്യാം. കേരളം, കർണാടക, തമിഴ്നാട് സംസ്ഥാനങ്ങളിലായി മുതുമല, ബന്ദിപ്പുർ, മുക്കുരുത്തി, സൈലന്റ് വാലി, സത്യമംഗലം, നാഗർഹോള, വയനാട് വന്യജീവി സങ്കേതങ്ങളാണ് നീലഗിരിക്കുന്നുകളിലും സമീപത്തുമായുള്ളത്. നിലമ്പൂർക്കാടിന്റെ ‘കാതലും’ ആസ്വദിക്കാം. വയനാട്ടിൽനിന്നു തന്നെ മൂന്നു വഴികളുണ്ട് നീലഗിരിയിലേയ്ക്ക്.

രണ്ട് വഴികൾ നേരിട്ടു തമിഴ്നാട്ടിലേയ്ക്കെത്തുന്നതാണെങ്കിൽ കർണാടകയിലെ ഗുണ്ടൽപേട്ടയുടെ മനോഹാരിത ആസ്വദിച്ച് ആ വഴിയും പോകാം. മലപ്പുറത്തുകാർക്ക് ഗൂഡല്ലൂർ വഴി ഊട്ടിലിലെത്തുന്നതാണ് എളുപ്പം.  മസിനഗുഡി വഴി പോകുമ്പോൾ 17 കിലോമീർ അധികം സഞ്ചരിക്കണം പാലക്കാടു നിന്നു മേട്ടുപ്പാളയം വഴി ചുരം കയറി കൂനൂർ വഴി ഊട്ടിയിലെത്താം. ഇനിയുമുണ്ടൊരു മനോഹരമായ വഴി. അട്ടപ്പാടി  മുള്ളി, ഗെദ്ദ, മ‍ഞ്ചൂർ വഴിയുള്ള ഊട്ടി യാത്ര. അവലാൻ‍ഞ്ചി, എമറാൾഡ് തുടങ്ങിയ വിനോദസഞ്ചാരകേന്ദ്രങ്ങൾ ഈ റൂട്ടിലാണ്. പക്ഷേ, ഈ പാതയിലൂടെയുള്ള യാത്ര തമിഴ്നാട് വനംവകുപ്പ് നിരോധിച്ചിരിക്കുകയാണ്.

∙ വയനാടു കണ്ട്, കർണാടകം വഴി ഊട്ടി

ചിലപ്പോൾ പുലിയെ കാണാം, ചിലപ്പോൾ കടുവയേയും... ഉറപ്പായും മാനിനെയും ആനകളെയും കാണാം.. മയിലുകളുടെയും കാട്ടുപോത്തിന്റെയും കാര്യമാണെങ്കിൽ പിന്നെ പറയാനില്ല.  മൂന്നു സംസ്ഥാനങ്ങളിലെ വന്യജീവി സങ്കേതങ്ങൾ വഴിയുള്ള റൂട്ടാണ് വയനാട് നിന്നു ഗുണ്ടൽപേട്ട വഴി ഊട്ടിയിലേയ്ക്ക്. അതാണ് ഈ പറയുന്ന മസിനഗുഡി വഴിയുള്ള ഊട്ടി യാത്ര. നമ്മുടെ താമരശ്ശേരി ചുരം കടന്നു വയനാട്ടിലെത്തിയാൽ നേരെ ബത്തേരിയിലേയ്ക്കു പോകാം. ബത്തേരിയിൽ നിന്നു വയനാട് വന്യജീവി സങ്കേതത്തിന്റെ ഭാഗമായ മുത്തങ്ങ വന്യജീവി സങ്കേതത്തിലേയ്ക്ക് 14 കിലോമീറ്റർ മാത്രമേയുള്ളൂ. മുത്തങ്ങയിൽ കേരള വനംവകുപ്പ് ജംഗിൾ സഫാരി ഒരുക്കിയിട്ടുണ്ട്. 

മുത്തങ്ങയിൽനിന്നു കർണാടകയിലെ ഗുണ്ടൽപേട്ടയിലേയ്ക്കുള്ള വനയാത്ര ശരിക്കും കിടിലൻ. വന്യമൃഗങ്ങളെ ഏതു സമയത്തും പാതയോരത്തു കാണാം. വെള്ളം കുടിക്കുന്ന ആനക്കൂട്ടങ്ങൾ പതിവു കാഴ്ച. വന്യജീവികൾക്കു തടസ്സമുണ്ടാകാതിരിക്കാൻ രാത്രി 9 മുതൽ രാവിലെ ആറുവരെ ഇവിടെ രാത്രിയാത്രാനിരോധനമുണ്ട്. അറിയാതെ വന്നാൽ ചെക്ക്പോസ്റ്റിൽ കുടുങ്ങും. ഗുണ്ടൽപേട്ടയിലെത്തിയാൽ വഴിയോരത്തെ പച്ചക്കറിത്തോട്ടങ്ങളും സൂര്യകാന്തിപ്പാടങ്ങളും കാണാം. ഗുണ്ടൽപേട്ടയിൽ നിന്ന് 20 കിലോമീറ്റർ അകലെയാണ് കർണാടകയിലെ ബന്ദിപ്പുർ വന്യജീവി സങ്കേതം. അവിടെനിന്ന് വെറും പത്തു കിലോമീറ്റർ അകലെയാണ് തമിഴ്നാടിന്റെ മുതുമല വന്യജീവി സങ്കേതം. ശരിക്കും കാട്ടിലൂടെയുള്ള യാത്രയാണിത്. ബൈക്കിലായാലും കാറിലായാലും യാത്ര അതിമനോഹരം. ബസ് സർവീസുകളും ഈ പാതയിൽ ഉണ്ട്. അപ്പോൾ നമ്മളിപ്പോൾ മുതുമലയിലാണ്.

∙ മസിനഗുഡി വഴി ഊട്ടിയിലേയ്ക്ക്

കർണാകയിൽനിന്നു വരുമ്പോൾ തമിഴ്നാട്ടിലെ മുതുമല വന്യജീവി സങ്കേതത്തിന്റെ കവാടം കക്കനഹള്ളയാണ്. ഇവിടെനിന്ന് തൈപ്പക്കാട്. അവിടെനിന്നാണു  മസിനഗുഡിയിലേയ്ക്കു തിരിയേണ്ടത്. മസിനഗുഡിയിൽനിന്നു 36 ഹെയർപിൻ വളവുകളുള്ള കല്ലട്ടിചുരം കടന്നാണ് ഊട്ടിയിലെത്തേണ്ടത്. തെപ്പക്കാട്ടുനിന്ന് ഇടത്തേക്കാണു മസിനഗുഡി. ഏഴരക്കിലോമീറ്റർ. തെപ്പക്കാടും ജംഗിൾ സഫാരിക്കു സൗകര്യമുള്ള ഗംഭീര വനമാണ്. ഇവിടെയാണ് തെപ്പക്കാട് ആനപ്പന്തി. ഓസ്കർ പുരസ്കാരം ലഭിച്ച ‘ദി എലിഫന്റ് വിസ്പറേഴ്സ്’ എന്ന ഹ്രസ്വചിത്രത്തിലൂടെ പ്രശസ്തമായ സ്ഥലം. 

തെപ്പക്കാട്ടുനിന്ന് മസിനഗുഡിയിലേയ്ക്കുള്ള യാത്ര കിടിലമാണ്. മസിനഗുഡി പിന്നിട്ടാൽ പിന്നെ വിജനമെന്നുതന്നെ പറയാവുന്ന വനപാതയാണ്. അവിടെനിന്നങ്ങോട്ട് 30 കിലോമീറ്ററോളം 36 ഹെയർപിൻ വളവുകൾ കയറിയുള്ള ഊട്ടി യാത്രയാണ്. വലിയ തിരിവുകളും ഇറക്കവുമുള്ള റോഡായതിനാൽ ഊട്ടിയിൽനിന്ന് മസിനഗുഡിയിലേയ്ക്ക് ഈ റോഡ് വഴി വിനോദസഞ്ചാരികളെ പോകാൻ അനുവദിക്കില്ല. മസിനഗുഡി വഴിയുള്ള ഊട്ടി യാത്ര മനോഹരമാണെന്നത് ട്രെൻഡായതോടെ പക്ഷേ ഈ പാതയിൽ ഇപ്പോൾ വല്ലാത്ത തിരക്കാണ്. 

∙ വയനാട് വഴി ഊട്ടിയിലേയ്ക്ക് 

വയനാട് വഴി ഊട്ടിയിലേയ്ക്കുള്ള പാതകൾ തേയിലത്തോട്ടങ്ങളുടെ മനോഹാരിതകൊണ്ട് പ്രത്യേക അനുഭവമാണ്. കോടമഞ്ഞിൽ പുതച്ച ചെറുവളവുകളും ബ്രിട്ടിഷുകാരുടെ കാലത്തു നിർമിച്ച വീടുകളും ഫാക്ടറികളുമെല്ലാം വഴിയോരത്തു കാണാം. വഴിയോരത്തെ കടകളിൽ നിന്ന് വൈവിധ്യമാർന്ന ചായപ്പൊടികളും കാപ്പിപ്പൊടികളും യൂക്കാലിപ്റ്റസ് തൈലവും പുൽത്തൈലവുമെല്ലാം വാങ്ങാം. ബത്തേരിയിൽ നിന്നു വരുന്നവർ പാട്ടവയൽ ഗൂഡല്ലൂർ വഴിയാണ് ഊട്ടിയിലെത്തേണ്ടത്. കോഴിക്കോട്നിന്നു താമരശ്ശേരി ചുരം കയറി വരുന്നവർക്ക് ചുണ്ടേലിൽനിന്നു മേപ്പാടിയിലെത്തി വടുവഞ്ചാൽ വഴി ഗൂഡല്ലൂരിലെത്തി അവിടെനിന്ന് ഊട്ടിയിലേയ്ക്കു പോകാം.

∙ നിലമ്പൂർ വഴി ഊട്ടിയിലേയ്ക്ക്

നിലമ്പൂർക്കാടിന്റെ മനോഹാരിത കണ്ട് ഗൂഡല്ലൂർ വഴിയും ഊട്ടിയിലേയ്ക്കു പോകാം. ഷൊ‍ർണൂർ –നിലമ്പൂർ റെയിൽപാതയുടെ സൗന്ദര്യവും ആസ്വദിക്കാം. നിലമ്പൂരിൽ നിന്നാണു നാടുകാണിയുടെ തുടക്കം. ആനമറി പിന്നിട്ട് ഒന്നാം വളവിലെത്തുമ്പോൾതന്നെ തണുപ്പായിത്തുടങ്ങും‌. നാടുകാണി വ്യൂ പോയിന്റിൽ നിന്നാൽ പച്ചവിരിച്ച താഴ്‌വരകളും പശ്ചിമഘട്ട മലനിരകളും കാണാം. പിന്നെ, തേൻപാറയും കല്ലളയും തണുപ്പൻചോലയും കടന്നാൽ നാടുകാണി ജംക്‌ഷൻ. നാടുകാണിയിൽനിന്ന് വലത്തേക്കു തിരിഞ്ഞ് 12 കിലോമീറ്റർ പിന്നിട്ടാൽ ഗൂഡല്ലൂരെത്തും. ഇവിടെനിന്ന് ഗൂഡല്ലൂർ വഴിയോ മസിനഗുഡി വഴിയോ ഊട്ടിയിലേയ്ക്കു പോകാം.

∙ ഊട്ടി കണ്ടു പിടിച്ച വഴിയിലൂടെയുള്ള യാത്ര

ഊട്ടിയെന്ന മനോഹര ഭൂമികയെ കണ്ടെത്തിയ പാതയാണ് മേട്ടുപ്പാളയം–ഊട്ടി പാത. തെക്കൻകേരളത്തിൽനിന്നു പോകുന്നവർ കൂടുതൽ പേരും ആശ്രയിക്കുന്നത് ഈ റൂട്ടാണ്. തെക്കേ ഇന്ത്യയിലെ പ്രസിദ്ധമായ സുഖവാസ കേന്ദ്രമായി ലോകഭൂപടത്തിൽ അറിയപ്പെടുന്നതാണ് ഊട്ടി എന്ന പഴയ ഉദകമണ്ഡലം. ഗോത്രവർഗക്കാർ മാത്രം താമസിച്ചിരുന്ന ഈ മലനിരകൾ മലേറിയയും മൂടൽമഞ്ഞും കാരണം വാസയോഗ്യമല്ലായിരുന്നു. കൊടുങ്കാടായിരുന്നു. സമതലമായിരുന്ന മേട്ടുപ്പാളയത്തുനിന്നു നോക്കുമ്പോൾ അങ്ങു ദൂരെക്കാണുന്ന മലകളെപ്പറ്റി ആർക്കും വലിയ ധാരണയൊന്നും ഉണ്ടായിരുന്നില്ല.