പേരിൽ പോലും ഗസൽ മാധുര്യം; ഹൃദയം നിറഞ്ഞു തുളുമ്പിയ കരുണയിൽ നിന്ന് ഉറവകൊണ്ട സംഗീതം; പുതുതലമുറയുടെ വഴികാട്ടി

എന്തായാലും പങ്കജ് ഉധാസിന്റെ ശബ്ദം ഗസൽ പുരണ്ട സിനിമാഗാനങ്ങളായും പിന്നെ തനി ഗസലായും ആസ്വദിച്ചു തുടങ്ങിയ ഒട്ടേറെ പേർ ഗസൽ ലോകത്തെ വിശേഷപ്പെട്ട മറ്റു ശബ്ദങ്ങളിലേക്കു കൂടി ആകൃഷ്ടരാവുകയും അങ്ങനെ തങ്ങൾ പരിചയപ്പെടാതിരുന്ന സംഗീതത്തിന്റെ അമൃതം നുണയുകയും ചെയ്തിട്ടുണ്ട്. ഇതിനു നിമിത്തമായത് പിന്നീട് ഏറെ ജനപ്രിയനായിത്തീർന്ന പങ്കജ് എന്ന സമുഖനാണ്. അദ്ദേഹത്തിന്റെ വിടവാങ്ങൽ സാധാണക്കാരിൽ സാധാരണക്കാരായ അനേകർക്ക് ഹൃദയത്തിൽ വിങ്ങലുണ്ടാക്കുന്നതും ഇതുകൊണ്ടാണ്.

ഗസൽ സംഗീതത്തിന്റെ ലോകത്തിലേക്ക് പുതുശബ്ദങ്ങൾ കടന്നുവരണമെന്ന് ഏറെ ആഗ്രഹിച്ച വ്യക്തിയായിരുന്നു പങ്കജ്. മറ്റു ഗായകരുടെ വഴി മുടക്കുകയും തനിക്കു ശേഷം പ്രളയം വരണമെന്ന് ആഗ്രഹിക്കുകയുമൊക്കെ ചെയ്യുന്ന പാട്ടുകാരുണ്ടെന്ന് പരദൂഷണങ്ങൾ പ്രചരിക്കുന്ന കാലത്താണ് ഈ മനുഷ്യൻ മുംബൈയിൽ വലിയ സംഗീതോത്സവം സംഘടിപ്പിക്കുകയും പുതിയ പാട്ടുകാരെ കണ്ടെത്തി ഇരുത്തം വന്ന ഗായകർക്കൊപ്പം പാടാൻ അവസരം നൽകി അവരെ ആസ്വാദകർക്കു പരിചയപ്പെടുത്തുകയും ചെയ്തത്.

2001ൽ മുംബൈയിൽ അദ്ദേഹം ആരംഭിച്ച ഖസാന എന്ന ഗസൽ സംഗീതോത്സവത്തിൽ എത്രയോ പുതുശബ്ദങ്ങൾക്ക് അവസരം ലഭിച്ചു. പ്രശസ്തരായിക്കഴിഞ്ഞ പലരും അവിടെ വേദി പങ്കിട്ടു. തുടക്കക്കാരുടെ ആൽബങ്ങൾ ഈ വേദിയിൽ വച്ച് പ്രകാശനം ചെയ്തു. ഇങ്ങനെ നടത്തിയ സംഗീതോത്സവത്തിൽ നിന്നു ലഭിച്ച വരുമാനം മുഴുവൻ അർബുദ രോഗികളുടെ ചികിത്സയ്ക്കായി ചെലവഴിച്ചു. തലസീമിയ ബാധിച്ച കുഞ്ഞുങ്ങളുടെ കുടുംബങ്ങൾക്കു നൽകി. തൊണ്ടയിലൂടെ പുറത്തുവന്ന മധുരശബ്ദം ഹൃദയത്തിൽ നിറഞ്ഞു തുളുമ്പിയ കരുണയിലും അനുകമ്പയിലും നിന്ന് ഉറവം കൊണ്ടതാണെന്ന് അങ്ങനെ ഈ ഗായകൻ തെളിയിച്ചു.

കോവിഡ് കാലത്ത് ഗസൽ വേദികൾ ഇല്ലാതായതിൽ ഏറെ വേവലാതി പൂണ്ടിരുന്നു പങ്കജ് ഉധാസ്. ഇന്ത്യയിൽ സിനിമാ പിന്നണി ഗായകരല്ലാത്ത സംഗീതജ്ഞർക്ക് എന്തെങ്കിലും വരുമാനം ലഭിക്കുന്നത് ലൈവ് പരിപാടികളിൽ നിന്നാണ്. അതിനു പകരം എല്ലാം ഓൺലൈനായി മാറിയാൽ ആസ്വാദകരുടെ പ്രതികരണം മുഖാമുഖം കാണാൻ കഴിയില്ലല്ലോ എന്നും അദ്ദേഹം സങ്കടപ്പെട്ടു. ഇന്ത്യയിലെ മാധ്യമങ്ങൾ ബോളിവുഡ് സംഗീതത്തിനും ക്രിക്കറ്റിനും നൽകുന്ന പ്രാധാന്യം സിനിമേതരമായ സംഗീതത്തിനു നൽകുന്നില്ലെന്ന പരാതിയും പങ്കജിനുണ്ടായിരുന്നു. എന്നാൽ മഹാമാരിയുടെ അടച്ചുപൂട്ടൽ കാലം കഴിഞ്ഞ് സംഗീതോത്സവങ്ങൾ വീണ്ടും സജീവമായി. പക്ഷേ പങ്കജിനെ പിന്നീട് രോഗം അലട്ടാൻ തുടങ്ങി. അപ്പോഴും അദ്ദേഹം സംഗീതത്തിൽ മുഴുകി സഹജീവികൾക്കു സാന്ത്വനത്തിന്റെ തലോടലായി.

നാം എന്ന സിനിമയിലെ ചിഠി ആയി ഹേ എന്ന ഗാനമാണല്ലോ പങ്കജിനെയും ജനപ്രിയനാക്കിയത്. പങ്കജ് വിടവാങ്ങുമ്പോൾ ഒരു ഗസൽ ഗായകൻ മാത്രമല്ല നമ്മെ വിട്ടുപിരിയുന്നത്. ഗസൽ സംഗീതത്തെ സാധാരണക്കാരിലേക്കെത്തിച്ച കരുണാമയനായ കലാകാരനാണ്. വെറും കലാകാരനല്ല, മനുഷ്യസ്‌നേഹം സംഗീതത്തെ കൂടുതൽ ഇമ്പമുള്ളതാക്കുമെന്നു പഠിപ്പിച്ച കലാകാരൻ.

ദീവാരോം സെ മിൽകർ രോന അഛ ലഗ്താ ഹെ...
ഹം ബി പാഗൽ ഹോ ജായേംഗേ ഐസ ലഗ്താ ഹെ...