കേരളത്തില്‍ കൊടുംചൂട് കുറയും, ഇതാണ് കാരണം; ലാ നിനയും ‘ഐഒഡി’യും ഒരുമിച്ചാൽ ആശങ്ക

കേരളത്തോട് ചേർന്നു കിടക്കുന്ന തെക്കു കിഴക്കൻ അറബിക്കടലിലെ താപനിലയും 1.5–2 ഡിഗ്രി വരെ കൂടി നിൽക്കുകയാണ്. അത് കടൽക്കാറ്റിനേയും പ്രാദേശിക വായു ചംക്രമണത്തേയുമൊക്കെ ബാധിക്കും. ഇങ്ങനെത്തെ കുറേ ഘടകങ്ങൾ വന്നതു കൊണ്ട് നമ്മുടെ വേനൽക്കാലം ഒന്നര മാസം മുൻപേ തുടങ്ങി. ഫെബ്രുവരിയിൽ സ്വതവേ വലിയ മഴ കിട്ടാറില്ല. അപ്പോൾ തന്നെ ചൂടു കൂടിത്തുടങ്ങി. വനമേഖലയിലുൾപ്പെടെ സംരക്ഷിക്കപ്പെടുന്ന മണ്ണിന്റെ ഉപരിതലത്തിലെ ജലവും മണ്ണിലെ ഈർപ്പവുമെല്ലാം ഫെബ്രുവരി ആയപ്പോൾ തന്നെ ആവിയായിപ്പോയി. 

ഇതിന്റെയൊക്കെ പ്രത്യാഘാതം എന്നു പറയുന്നത് വളരെ വലുതാണ്. എന്നാൽ നമുക്ക് കാലാവസ്ഥാ വ്യതിയാനം അല്ലെങ്കിൽ ദുരന്തം എന്നതൊക്കെ മറ്റു ചില മാനദണ്ഡങ്ങൾ വച്ചാണ് കണക്കാക്കാറുള്ളത്. പത്തു നാനൂറു പേരു മരിക്കുകയും കോടിക്കണക്കിന് രൂപ നഷ്ടമുണ്ടാവുകയും ചെയ്താൽ മാത്രമേ അത് ദുരന്തമായി നാം കണക്കാക്കൂ. അതുകൊണ്ടു തന്നെ 2018ലെ പ്രളയമാണ് കാലാവസ്ഥാ ദുരന്തത്തിന്റെ കാര്യത്തിൽ നമ്മുടെ ബെഞ്ച് മാർക്ക്. എന്നാൽ 2015–16 മുതൽ വരൾച്ചാ പ്രശ്നങ്ങളും ഹീറ്റ് വേവുമെല്ലാം അനുഭവിക്കുന്നുണ്ട്. 2017ൽ ഓഖി ദുരന്തമുണ്ടായി. ഒട്ടേറെ മത്സ്യത്തൊഴിലാളികൾക്ക് ജീവൻ നഷ്ടമായി. പക്ഷേ 2018 പോലെ അതു നാം ചർച്ച ചെയ്തില്ല.

ഈ വർഷം തെക്കു കിഴക്കൻ അറബിക്കടൽ ചൂടായി കിടക്കുന്നതുകൊണ്ട് ഈ മേഖലയിൽ മത്സ്യലഭ്യത തീരെ കുറവായിരുന്നു. നമ്മുടെ പരമ്പരാഗത മത്സ്യത്തൊഴിലാളികൾക്ക് ഏറ്റവും കൂടുതൽ വറുതിയുണ്ടായ വർഷമാണിത്. 2016ലെ എൽ നിനോയെ തുടർന്നായിരുന്നു മുൻപ് ഇങ്ങനെ സംഭവിച്ചത്. ബോട്ടുകൾ കടലിലേക്കു പോയാലും മത്സ്യലഭ്യത ഇല്ലാത്തതുകൊണ്ട് തൊഴിലാളികള്‍ക്ക് അത് മുതലാകുന്നില്ല. അതുകൊണ്ട് ഇത് ജീവനോപാധിയുമായി കൂടി ബന്ധപ്പെട്ട പ്രശ്നമാണ്. 

∙ അതിജീവനവും പ്രശ്നമാണ്

കേരളത്തിൽ 2023ൽ മൺസൂൺ മഴ 34% കുറവായിരുന്നു. എന്നാൽ വടക്കു കിഴക്കൻ മൺസൂൺ (തുലാവർഷം) 24 ശതമാനം കൂടുതൽ കിട്ടി. കാസർകോടും കണ്ണൂരും മലപ്പുറവും പാലക്കാടുമൊക്കെ കുറഞ്ഞ അളവിലാണ് തുലാവർഷം ലഭിച്ചത്. മധ്യകേരളം തൊട്ട് വടക്കോട്ടുള്ള ജില്ലകളുടെ കാര്യത്തില്‍ ഈ വർഷം ജലലഭ്യതയുടെ കാര്യത്തില്‍ വളരെ രൂക്ഷമായ അവസ്ഥയാണുള്ളത്. മത്സ്യത്തൊഴിലാളികളെ പോലെ കൃഷിക്കാരുടെ കാര്യത്തിലും മോശം അവസ്ഥയാണ്. പാലക്കാട്ടൊക്കെ മാർച്ചിൽ വിളഞ്ഞ് കൊയ്യേണ്ട നെല്ല് കരിഞ്ഞുണങ്ങിയതു മൂലം തീവച്ചു നശിപ്പിച്ചു കളയേണ്ട അവസ്ഥയിൽ എത്തി. വയനാട്ടിൽ കഴിഞ്ഞ നാലു മാസമായി മഴയേ കിട്ടിയിരുന്നില്ല. വയനാട്, പാലക്കാട്, ഇടുക്കി ജില്ലകളിലാണ് കേരളത്തിലെ കാർഷിക മേഖല കുറച്ചെങ്കിലും മെച്ചപ്പെട്ടു നില്‍ക്കുന്നത്. ഇടുക്കി ഒഴിച്ച് രണ്ടിടത്തും അതുപോലെ കാസർകോ‍‍ട്, കണ്ണൂർ ജില്ലകളിലെല്ലാം ജലദൗർലഭ്യം അതിശക്തമാണ്. 

ഇതു മാത്രമല്ല, മനുഷ്യ–വന്യമൃഗ സംഘർഷവും ഇതിന്റെ ഭാഗമാണ്. വേനൽക്കാലത്തിന്റെ മൂർധന്യത്തിലാണ് വനത്തിനുള്ളിൽ‍ വെള്ളവും ഭക്ഷണ ദൗര്‍ലഭ്യവും ഒക്കെ നേരിടുന്ന അവസ്ഥയിൽ വന്യമൃഗങ്ങൾ പൊതുവെ നാട്ടിലേക്ക് വരാറുള്ളത്. വരൾച്ച കാടിനെയും ആ രീതിയിൽ ബാധിച്ചിട്ടുണ്ട്. ടൂറിസം മേഖലയേയും ഇത് ബാധിച്ചിട്ടുണ്ട്. അങ്ങനെ പ്രത്യാഘാതങ്ങൾ എല്ലാ മേഖലയേയും ബാധിക്കുന്നുണ്ട്. 

ഹീറ്റ് വേവുമായി ബന്ധപ്പെട്ട് മനുഷ്യരുടെ ആരോഗ്യത്തിനും കാര്യമായ പ്രശ്നങ്ങളുണ്ടാകുന്നുണ്ട്. അതിൽ അസമത്വത്തിന്റേതായ ഘടകവും ഉണ്ട്. ആഫ്രിക്ക, തെക്കേ അമേരിക്ക, ഇന്ത്യ, ഫിലിപ്പീൻസ്, മറ്റ് ദക്ഷിണേഷ്യൻ രാജ്യങ്ങളെയൊക്കെയാണ് ഏറ്റവും കൂടുതൽ അത് ബാധിക്കുന്നത്. ഹീറ്റ് വേവ് വലിയ തോതിൽ മാനസികാരോഗ്യത്തെയും ബാധിക്കുന്നുണ്ട്. അത് നേരിടുന്നവരുടെ എണ്ണവും വർധിച്ചു വരുന്നു. പുറത്തു ജോലി ചെയ്യുന്നവരുടെ കാര്യത്തിലും ഇതു തന്നെ അവസ്ഥ.

∙ കേരളം എന്ന താപത്തുരുത്ത് 

‘അർബൻ ഹീറ്റ് ഐലൻഡ് എഫക്ട്’ എന്നൊരു കാര്യമുണ്ട്. ഇപ്പോൾ കേരളത്തെ മുഴുവൻ വലിയൊരു നഗരമായി കണക്കാക്കാൻ സാധിക്കും. നഗരങ്ങളും ഗ്രാമങ്ങളും തമ്മിലുള്ള കാര്യമായ അന്തരമില്ലാത്ത സ്ഥിതിയാണിപ്പോൾ. വികസനത്തിന്റെ ഭാഗമായുള്ള കെട്ടിടങ്ങളുടെയും റോ‍ഡുകളുടെയുമൊക്കെ നിർമാണം കൂടുതലും നടക്കുന്നത് നഗരമേഖലകളിലാണ്. ഗ്രാമീണ മേഖലകളെ അപേക്ഷിച്ച് നഗര മേഖലകളിൽ ചൂട് കൂടുതലായി തങ്ങിനിൽക്കും. ഹൈവേകൾ അടക്കം കേരളത്തിൽ ഇപ്പോൾ നടന്നുകൊണ്ടിരിക്കുന്ന നിർമാണ പ്രവർത്തനങ്ങൾ‍ ഓർക്കുക. അങ്ങനെ കേരളം മുഴുവന്‍ ഒരു താപത്തുരുത്തായി മാറും. ഇങ്ങനെ അനേകം ഘടകങ്ങൾ കാലാവസ്ഥയുമായി ബന്ധപ്പെട്ട് കേരളത്തിൽ സംഭവിക്കുന്നുണ്ട്. 

അതേസമയം, എല്‍ നിനോ പ്രതിഭാസം മാറി ന്യൂട്രൽ ആകുന്നത് മഴയുടെ കാര്യത്തില്‍ നല്ലതാണ്. മേയ് പകുതിയൊക്കെ ആവുന്നതോടെ മഴ കിട്ടിത്തുടങ്ങുകയും ചൂട് കുറയുകയും ചെയ്യും. എൽ നിനോ മാറി ലാ നിന ആകുന്നത് കുറച്ചു വൈകിയാൽ തന്നെ മഴയ്ക്ക് അനുകൂലമായ സാഹചര്യം ഉണ്ടാവും. എങ്കിലും ഓഗസ്റ്റ് ആവുന്നതോടെ ലാ നിന പൂർണമായി വരാവുന്ന സാഹചര്യമുണ്ട്. ലാ നിനയ്ക്കൊപ്പം മൺസൂണിന്റെ രണ്ടാം പകുതിയിൽ പൊസിറ്റീവ് ഐഒഡിയും (ഇന്ത്യൻ ഓഷ്യൻ ഡൈപോൾ) കൂടി വരാമെന്ന പ്രവചനമുണ്ട്. 2019ൽ ഐഒഡി സംഭവിച്ചിരുന്നു. പടിഞ്ഞാറൻ അറബിക്കടലിൽ കിഴക്കൻ ഇന്ത്യൻ മഹാസമുദ്രത്തേക്കാൾ കുറച്ച് ചൂട് കൂടുന്ന അവസ്ഥയാണിത്. എൽ നിനോ പ്രതിഭാസത്തിന്റെ ഒരു ചെറിയ പതിപ്പ് എന്നു പറയാം. ഇതുമൂലം പെനിസുലാർ, പടിഞ്ഞാറൻ തീരങ്ങളിലൊക്കെ മഴയ്ക്ക് കാരണമാകാം. വളരെ കുറഞ്ഞ സമയത്തിനുള്ളിൽ ശക്തിയേറിയ മഴ പെയ്യുകയാണ് ഇതുമൂലം സംഭവിക്കുക.