‘സിസ്റ്റർ വക്കീലിന്റെ’ വെളിപ്പെടുത്തൽ: ‘മത്സരിക്കാൻ പാർട്ടി സമീപിച്ചു, മോദിയുടെ പരിപാടിയിലെ ക്ഷണവും നിരസിച്ചു’

സുപ്രീം കോടതിയിൽ ഒരു മലയാളി കന്യാസ്ത്രീയുണ്ട്. കോടതികളിൽ വിരളമായ ‘സിസ്റ്റർ വക്കീൽ’; ഹൈദരാബാദിലെ സിസ്റ്റേഴ്സ് ഓഫ് സെന്റ് ആൻസ് പ്രൊവിഡൻസിലെ അംഗവും കണ്ണൂർ സ്വദേശിയുമായ ജെസി കുര്യനാണത്. സിസ്റ്റർ ജെസി 19 വർഷമായി സുപ്രീം കോടതിയിൽ പ്രാക്ടീസ് ചെയ്യുന്നു. നേരത്തേ ന്യൂനപക്ഷ വിദ്യാഭ്യാസ സ്ഥാപനങ്ങൾക്കു വേണ്ടിയുള്ള ദേശീയ കമ്മിഷനിൽ അംഗമായിരുന്നു. ഹൈദരാബാദിലെ വിദ്യാഭ്യാസ സ്ഥാപനങ്ങളിൽ പ്രിൻസിപ്പലായിരുന്ന സിസ്റ്റർ ജെസി ബാംഗ്ലൂർ സർവകലാശാലയിൽനിന്ന് 2005ലാണ് നിയമബിരുദം നേടിയത്. കോടതി ജീവനക്കാർക്കിടയിൽ ജെൻഡർ ബോധവൽക്കരണ ക്ലാസുകൾക്കും നേതൃത്വം നൽകി വരുന്നു. ഒട്ടേറെ പുസ്തകങ്ങളും ലേഖനങ്ങളും എഴുതിയിട്ടുണ്ട്. പക്ഷേ ഇപ്പോൾ ഈ പേര് ശ്രദ്ധേയമാകുന്നത് മറ്റൊരു കാരണത്താലാണ്.  

മേയ് 16നു നടക്കുന്ന സുപ്രീം കോടതി ബാർ അസോസിയേഷൻ തിരഞ്ഞെടുപ്പിൽ മത്സരിക്കുന്നുവെന്ന് വ്യക്തമാക്കി ജെസി കുര്യൻ  അഭിഭാഷക സുഹൃത്തുകളുടെ പിന്തുണ തേടിയിരുന്നു. സിസ്റ്റേഴ്സ് ഓഫ് സെന്റ് ആൻസ് പ്രൊവിഡൻസിന്റെ  അനുമതി കാത്തിരുന്ന അവർക്ക് പക്ഷേ നിരാശപ്പെടേണ്ടി വന്നു. കാനോനിക നിയമപ്രകാരം അഭിഭാഷക സംഘടനകളിൽ മത്സരിക്കുന്നതിനു വിലക്കില്ലെങ്കിലും അതിനോട് യോജിക്കുന്നില്ലെന്ന മറുപടി വന്നതോടെ അവർ മത്സരം ഉപേക്ഷിച്ചു. അസോസിയേഷന്റെ നിർവാഹക സമിതിയിൽ ഇക്കുറി 33 ശതമാനം സംവരണം നടപ്പാക്കാൻ നിർദേശിച്ചുകൊണ്ട് സുപ്രീം കോടതിതന്നെ മാറ്റത്തിനു തുടക്കമിടാൻ തീരുമാനിച്ചിരിക്കെയാണ് സിസ്റ്റർ ജെസിയുടെ പിന്മാറ്റം. സുപ്രീം കോടതി ബാർ അസോസിയേഷൻ നിർവാഹ സമിതിയിലേക്കു മത്സരിക്കാൻ തയാറെടുത്തിട്ടും സ്വന്തം പ്രൊവിഡൻസിന്റെ അനുമതി കിട്ടാത്തതിനാൽ പിൻവാങ്ങേണ്ടി വന്ന സിസ്റ്റർ ജെസി അതിന്റെ പശ്ചാത്തലത്തെക്കുറിച്ച് ‘മനോരമ ഓൺലൈൻ പ്രീമിയത്തിൽ’ സംസാരിക്കുന്നു. 

? സുപ്രീം കോടതിയിലെ അഭിഭാഷക ബാറിലെ അംഗങ്ങളുടെ സംഘടനയാണ്  എസ്‌സിബിസി, എന്തുകൊണ്ടാണ് സംഘടനാ ഭാരവാഹിത്വത്തിലേക്ക് മത്സരിക്കാൻ തീരുമാനിച്ചത്

രണ്ടു പതിറ്റാണ്ടോളമായി സുപ്രീം കോടതിയിൽ അഭിഭാഷകയായി പ്രാക്ടീസ് ചെയ്യുന്നു. സീനിയർ അഭിഭാഷകരായ ചിലരടക്കം അസോസിയേഷനിൽ മത്സരിക്കാൻ ആവശ്യപ്പെട്ടു. ബാർ അസോസിയേഷനിലേക്ക് സ്ത്രീകൾ തിരഞ്ഞെടുക്കപ്പെടുന്നില്ലെന്ന ദുരവസ്ഥയുണ്ടെന്നതാണ് പ്രധാന കാരണം. കഴിഞ്ഞ കുറേ നാളുകളായുള്ള ബാർ അസോസിയേഷൻ തിരഞ്ഞെടുപ്പുഫലം പരിശോധിച്ചാൽ ഇക്കാര്യം വ്യക്തമാകും. പലരും മത്സരിക്കുന്നുണ്ട്. എന്നാൽ, ആരും വിജയിക്കുന്നില്ല. സ്ത്രീകളുടെ പ്രശ്നങ്ങൾ പറയാൻ ഒരു പ്രതിനിധിയില്ലാത്ത അവസ്ഥ. ഈ രീതിക്ക് മാറ്റം വരണമെന്ന് ആഗ്രഹിച്ചു. 

? മത്സരിക്കാൻ തീരുമാനിച്ച ശേഷം കൈക്കൊണ്ട നടപടികളും നടത്തിയ ഒരുക്കങ്ങളും എന്തെല്ലാമാണ്

മാർച്ച് 2നു തന്നെ മത്സരിക്കാനുള്ള തീരുമാനമെടുത്തിരുന്നു. അതിനു പിന്തുണ ആവശ്യപ്പെട്ട് അഭിഭാഷകരുടെ വാട്സാപ്പ് കൂട്ടായ്മകളിൽ സന്ദേശവും അയച്ചു. അസോസിയേഷനിലേക്കുള്ള നിർവാഹക സമിതി തിരഞ്ഞെടുപ്പിൽ 33% സംവരണം ഏർപ്പെടുത്താൻ ഈയടുത്ത് സുപ്രീം കോടതി നിർദേശിച്ചിരുന്നുവല്ലോ? അതിനു മുൻപുതന്നെ ഈ ആവശ്യവുമായി അസോസിയേഷനിൽ ഞാൻ നിവേദനം നൽകിയിരുന്നതാണ്. പുരുഷമേധാവിത്വം പ്രകടമായി ഉള്ള സംഘടനയാണത്. അതിനു മാറ്റം വേണം. 

? പ്രൊവിഡൻസിന്റെ പിന്തുണയുണ്ടാകുമെന്ന് ഉറപ്പിച്ചിരുന്നോ 

∙ നോക്കൂ, ദീർഘകാലമായി സുപ്രീം കോടതിയിലും മറ്റു പ്രധാന നിയമവേദികളിലും സജീവമായി ഇടപെടുന്ന ഒരാളാണ് ഞാൻ. അപ്പോഴും അടിസ്ഥാനപരമായി ഞാൻ സെക്കന്ദരാബാദിലെ സിസ്റ്റേഴ്സ് ഓഫ് സെന്റ് ആൻസ് പ്രൊവിഡൻസിലെ അംഗമാണ്. ഇതുവരെയുള്ള എന്റെ എല്ലാ പ്രവർത്തനങ്ങളിലും എന്റെ പൊവിഡൻസിൽ നിന്ന് അകമഴിഞ്ഞ പിന്തുണ ലഭിച്ചിരുന്നു. ദേശീയ ന്യൂനപക്ഷ വിദ്യാഭ്യാസ സ്ഥാപനങ്ങൾക്കുള്ള ദേശീയ കമ്മിഷനിൽ നേരത്തേ അംഗമായിരുന്നപ്പോഴും അതേ പിന്തുണ കിട്ടിയതാണ്. ഈ കാര്യത്തിലും അതു തന്നെയാണ് ഞാൻ പ്രതീക്ഷിച്ചത്. 

? അതിനോട് എങ്ങനെ പ്രതികരിച്ചു? അതിനു കാരണമായി കരുതുന്നത് എന്താണ്

നിയമപരമായ വഴികൾ മുന്നിൽ ഉണ്ടെന്ന് അറിയാമായിരുന്നെങ്കിലും നാമനിർദേശ പത്രിക നൽകാനുള്ള സാവകാശം ഉണ്ടായിരുന്നില്ല. അതുകൊണ്ടുതന്നെ ഇക്കുറി തിരഞ്ഞെടുപ്പിൽ മത്സരിക്കാനുള്ള തീരുമാനത്തിൽനിന്നു പിന്മാറുകയാണ് ചെയ്തത്. ഇക്കാര്യം വ്യക്തമാക്കി 8നു ഞങ്ങളുടെ സന്യാസിനിസഭയിലെ ജനറലേറ്റിനു കത്തെഴുതി. ദൈവത്തെ സ്നേഹിക്കാനും മനുഷ്യരെ സേവിക്കാനുമാണ് ആദ്യം കന്യാസ്ത്രീയും പിന്നീട് അഭിഭാഷക ആയതെന്നും അതു തുടരുമെന്നും വ്യക്തമാക്കിയായിരുന്നു മറുപടി കത്ത്. സുപ്രീം കോടതി ബാർ അസോസിയേഷൻ എന്താണെന്ന് മനസ്സിലാക്കുന്നതിലെ അജ്ഞത കൊണ്ടായിരിക്കും ഒരുപക്ഷേ, ജനറലേറ്റ് അവസരം നിഷേധിച്ചത്. അങ്ങനെയെങ്കിൽ അത് എന്താണെന്ന് മനസ്സിലാക്കാൻ എന്നോടു വിശദീകരണം തേടാമായിരുന്നു. അതുണ്ടായില്ല.