ആദ്യം വിഡിയോ കോൺഫറൻസിങ്ങിൽ വിപ്ലവം; ഇനി ഈ കേരള കമ്പനിയുടെ ലക്ഷ്യം ‘ഐപിഒ’

∙ നേരിടുന്ന വെല്ലുവിളി

എഐ മേഖലയിൽ ആഴത്തിൽ അറിവുകളുള്ള ചെറുപ്പക്കാരെ വേണം. നമ്മുടെ നാട്ടിലെ കോളജുകളിൽ പഠിക്കുന്ന കഴിവുള്ള കുട്ടികൾ ഉണ്ട്, ഇല്ലെന്നല്ല. എന്നാൽ മുൻനിര കോളജുകളിൽ പഠിച്ചിറങ്ങുന്നവരൊക്കെ വിദേശത്ത് ജോലിനേടിപ്പോവും. കഴിവുള്ളവരെ കിട്ടിയാൽ എന്ത് പാക്കേജ് നൽകിയും എടുക്കാൻ തയാറാണ്. ഇന്‍റേണായിട്ടാണ് കുട്ടികളെ എടുക്കുന്നത്. ആ സമയത്ത് 30,000 രൂപ കൊടുക്കും. ജോലി നൽകുമ്പോൾ മികച്ച ശമ്പള പാക്കേജാണ് കൊടുക്കുന്നത്. മത്സരത്തിന്റെ കാര്യത്തിലേക്കു വന്നാൽ നേരിട്ട് എതിരാളികൾ കുറവാണ്. വ്യത്യസ്ത രീതിയിലാണ് മത്സരം വരുക. 

ഇപ്പോൾ ആർമിയിൽ വി–കൺസോൾ അടിസ്ഥാനമായ വിഡിയോ കോൺഫറൻസിങ് സോഫ്റ്റ്‌വെയർ എന്നു പറയുന്നത് യഥാർഥത്തിൽ ആർമിയുടെ സിസ്റ്റത്തിലേക്ക് ഇൻസ്റ്റാൾ ചെയ്യുന്നതാണ്. ഓൺ പ്രിമൈസസ് സൊല്യൂഷൻസ് എന്നാണ് അതിനു പറയുന്നത്. അവരുടെ നെറ്റ്‌വർക്കിനകത്ത് ഇത്തരം സൗകര്യങ്ങൾ ഏർപ്പെടുത്തി നൽകുന്ന കമ്പനികൾ വളരെ കുറവാണ്. സൂം, ഗൂഗിൾ‌പോലുള്ളവ ചെയ്യുന്നില്ല എല്ലാവരും ക്ലൗഡ് ബേസ്ഡ് സൊല്യൂഷൻസാണ് നൽകുന്നത്. എന്നാൽ ടെക്ജൻഷ്യ സേവനം നൽകുന്നിടത്ത് സർക്കാരിന്റെ ഡാറ്റ അവരുടെ കയ്യിൽത്തന്നെയാണ്. അതിന്റെ സുരക്ഷയും ഉണ്ട്. അതേ സമയം പൊതുവായ ആവശ്യങ്ങൾക്ക് ക്ലൗഡിലും സേവനങ്ങൾ നൽകും.

∙ 2028ൽ ഐപിഒ

500 കോടി രൂപയോളം ആണ് ടെക്ജൻഷ്യയുടെ വിപണി‌മൂല്യം. കഴിഞ്ഞ സാമ്പത്തിക വർഷം 8–8.5 കോടി രൂപ ലാഭമുണ്ടായിരുന്നു. ലാഭത്തിന്റെ വലിയ പങ്കും പോവുന്നത് ആർ & ഡി മേഖലയിലേക്കാണ്. ഞങ്ങളൊക്കെ ചെലവാക്കുന്ന സമയത്തിന് ആനുപാതികമായി സാലറിയൊന്നും എടുക്കാറില്ല. 85 ജീവനക്കാരുള്ള കമ്പനിയിൽ 60 ലക്ഷം രൂപയാണ് ഒരു മാസത്തെ ചെലവ്. സീനിയർ ലെവലിലുള്ള ജീവനക്കാർ ഒത്തിരി ത്യാഗങ്ങൾ ചെയ്യുന്നതുകൊണ്ടാണ്, അല്ലെങ്കിൽ ഇത്ര കുറഞ്ഞ ചെലവിൽ ഇത്രയും മികച്ച രീതിയിൽ ആർ & ഡി നടത്തിക്കൊണ്ടുപോവാൻ സാധിക്കില്ല. ആഗോളതലത്തിൽ കമ്പനിയുടെ വളർച്ച മാത്രമാണ് ഇപ്പോൾ ലക്ഷ്യം. ഗവേഷണങ്ങൾക്കു ചെലവഴിക്കുന്ന പണത്തിന്റെ ഫലം താമസിയാതെ കണ്ടുതുടങ്ങും എന്നാണ് പ്രതീക്ഷ. 2028ൽ പ്രാരംഭ ഓഹരി വിൽപന നടത്താനാണ് പദ്ധതി. നിലവിൽ കമ്പനിയുടെ 99% ഓഹരികളും എന്റെ കൈവശമാണ്. ഒരു ശതമാനം വിഹിതം ടെക്ജൻഷ്യയുടെ സഹസ്ഥാപകനായ സുഹൃത്തിന്റെ കൈവശവും. ഐപിഒയ്ക്കു മുന്നോടിയായി ഒരു വിഹിതം ജീവനക്കാർക്കു കൈമാറും. മറ്റു വിശദാംശങ്ങളൊന്നും പറയാറായിട്ടില്ല. എന്തായാലും തയാറെടുപ്പുകൾ ഈ വർഷംതന്നെ തുടങ്ങുകയാണ്. 

∙ ചെറുപട്ടണങ്ങളിൽ വലിയ സാധ്യത

ഐടി‌രംഗത്ത് കേരളത്തിലെ ചെറുപട്ടണങ്ങളിലെ സാധ്യതകളെ രണ്ടു രീതിയിൽ വിലയിരുത്താം. ഒന്ന്, ഞങ്ങൾ ആർ & ഡിയിൽ മാത്രം ശ്രദ്ധകേന്ദ്രീകരിച്ചാണ് 2020വരെ നിന്നിരുന്നത്. ഒരു ഓഫിസ്പോലും വേണമെന്നില്ലായിരുന്നു. എന്നാൽ ഇപ്പോൾ ബിസിനസിൽ നേരിട്ട് ഇടപെടാൻതുടങ്ങി. കൊച്ചി ഇൻഫോപാർക്കിൽ പ്രവർത്തിക്കുന്ന ഓഫിസിലേക്കാവും ഇനി പുതിയ നിയമനങ്ങളൊക്കെ. ചെറുപ്പക്കാർക്കും വലിയ നഗരങ്ങളാണ് താൽപര്യം. ഭാവിയിൽ ബംഗളൂരുവിലും ഡൽഹിയിലുമൊക്കെ ഓഫിസ് തുറക്കാനും പദ്ധതിയുണ്ട്. 

ഇനി എന്താണ് ചെറുനഗരങ്ങളുടെ സാധ്യത എന്നു നോക്കാം. ചെലവു വളരെ കുറവാണ്. 2000ൽ ഒക്കെ ഇന്ത്യയിലേക്ക് സോഫ്റ്റ്‌വെയർ ഡെവലപ്മെന്റ് അല്ലാതെ, സേവനമേഖലയിൽ ഒത്തിരി ഔട്ട്സോഴ്സിങ് ബിസിനസുകൾ വരുന്നുണ്ടായിരുന്നു. ഇപ്പോൾ സമാന സേവനങ്ങൾ കുറഞ്ഞ ചെലവിൽ ചെയ്യാൻ വിയറ്റ്നാം, ഫിലിപ്പൈൻസ് തുടങ്ങി കിഴക്കൻ മേഖലയിലെ ചെറിയ രാജ്യങ്ങൾ തയാറാണ്. ഇന്ത്യൻ കമ്പനികൾക്ക് കുറഞ്ഞ നിരക്കിൽ ബിസിനസ് പിടിക്കാൻ ശമ്പളം കുറയ്ക്കേണ്ടിവരും. ഈ സമയം ജീവനക്കാരെ നഗരങ്ങളിൽനിന്നു കണ്ടെത്താൻ ബുദ്ധിമുട്ടാണ്. അതുകൊണ്ടാണ് കമ്പനികൾ, പ്രത്യകിച്ച് സർവീസ് മേഖലയിലുള്ളവ ചെറുപട്ടണങ്ങൾ നോക്കുന്നത്. 100–150 പേരുടെ സെന്ററുകളൊക്കെ ആലപ്പുഴപോലുള്ളിടത്ത് വളരെ എളുപ്പത്തിൽ നടത്തിക്കൊണ്ടുപോവാം. അതുകൊണ്ട് കേരളത്തിന്റെ ശ്രമങ്ങൾ ശരിയായ ദിശയിലാണ്.