ജോലിയില്ല, പത്തൊൻപതുകാരിയുടെ പ്രതിദിന ‘സമ്പാദ്യം’ 1.3 കോടി! അംബാനി– അദാനി പട്ടികയിലെ ‘കൗമാര കോടീശ്വരി’

∙ പെൺപടയിലെ മുൻനിരക്കാർ

ലോകത്തെ ഏറ്റവും ധനിക എന്ന പദവി തുടർച്ചയായ നാലാം വർഷവും നിലനിർത്തിയിരിക്കുകയാണ് എഴുപതുകാരിയായ ഫ്രഞ്ചുകാരി ഫ്രാൻസ്വാ ബെറ്റൻകോ മയേഴ്സ് ആണ്. ലൊറിയാൽ ഗ്രൂപ്പ് വൈസ് ചെയർപഴ്സനായ അവർ 9950 കോടി ഡോളർ (8.2 ലക്ഷം കോടി രൂപ) ആസ്തിയോടെ ലോക റാങ്കിങ്ങിൽ പതിനഞ്ചാമതാണ്. ലോക ശതകോടീശ്വരിമാരിൽ രണ്ടാം സ്ഥാനത്തുള്ള ആലിസ് വാൾട്ടൻ അമേരിക്കയിലെ ഏറ്റവും സമ്പത്തുള്ള വനിതയാണ്. വാൾമാർട്ട് സ്ഥാപകൻ സാം വാൾട്ടന്റെ ഏക മകളായ അവർ ലോക റാങ്കിങ്ങിൽ 21–ാം സ്ഥാനത്താണ്. എഴുപത്തിനാലുകാരിയായ അവർ വാൾമാർട്ട് ഓഹരികളിലൂടെ നേടിയ ആസ്തി 7230 കോടി ഡോളറാണ് (6 ലക്ഷം കോടി രൂപ). യുഎസ് പൗരയായ ജൂലിയ കോക്ക് ലോക ധനികകളിൽ മൂന്നാമതാണ്. അറുപത്തിരണ്ടുകാരിയായ അവർ കോക്ക് ഇൻഡസ്ട്രീസിലെ ഓഹരികളിലൂടെ നേടിയ 6430 കോടി ഡോളർ (5.3 ലക്ഷം കോടി രൂപ) സമ്പത്തുമായി ലോക റാങ്കിങ്ങിൽ 23–ാം സ്ഥാനത്തുണ്ട്.

∙ സൂപ്പർ-റിച്ച് ചെറുപ്പക്കാർ

ശതകോടീശ്വരരായ 2781 പേരുടെ ശരാശരി പ്രായം 66 ആണെന്നതിനാൽ, ചെറുപ്പത്തിൽതന്നെ അതിസമ്പന്നരാകുക എന്നത് ചെറിയ കാര്യമല്ലെന്നത് വ്യക്തം. എന്നാൽ, സൂപ്പർ-റിച്ച് എന്ന ആ നേട്ടത്തിലേക്ക് ചെറുപ്രായത്തിൽ തന്നെയെത്തിയ 25 പേരും ഫോബ്സ് പട്ടികയിലുണ്ട്. ആ 25 പേരുടെയും ആകെ ആസ്തി കണക്കാക്കിയാൽ ഏകദേശം 11,000 കോടി ഡോളറാകും (9.1 ലക്ഷം കോടി രൂപ). അവരിൽ ഏറ്റവും പ്രായം കുറഞ്ഞയാൾ ലിവിയയാണെന്ന് നേരത്തേ പറഞ്ഞല്ലോ. 2 മാസം മാത്രം പ്രായക്കൂടുതലുള്ള ഇറ്റാലിയൻ കൗമാരക്കാരൻ ക്ലിമെന്റെ ഡെൽ വെക്കിയോയിൽ നിന്നാണ് ലിവിയ ആ പദവി നേടിയെടുത്തത്. 

റെയ്-ബാൻ, വോഗ് ഐവേർ തുടങ്ങിയ പ്രമുഖ ബ്രാൻഡുകളുടെ ഉടമസ്ഥരായ ബഹുരാഷ്ട്ര കണ്ണട കമ്പനി എസ്സിലോർലക്സോട്ടിക്കയുടെ മുൻ ചെയർമാൻ ലിയനാർദോ ഡെൽ വെക്കിയോയുടെ മകനാണ് ക്ലിമെന്റെ. അച്ഛൻ മരണപ്പെട്ടതോടെ വന്നുചേർന്ന പാരമ്പര്യസ്വത്തും ഓഹരികളും പതിനെട്ടാം വയസ്സിൽ ക്ലിമെന്റെയെ 2022ലെ ഏറ്റവും പ്രായം കുറഞ്ഞ ശതകോടീശ്വരനാക്കിയിരുന്നു. നിലവിൽ ഏറ്റവും പ്രായം കുറഞ്ഞ രണ്ടാമത്തെ കോടീശ്വരനായ ക്ലിമെന്റെയുടെ ആസ്തി 470 കോടി ഡോളറാണ് (39,000 കോടി രൂപ). അദ്ദേഹത്തിന്റെ സഹോദരന്മാരായ ഇരുപത്തിയെട്ടുകാരൻ ലിയനാർദോ മരിയ, ഇരുപത്തിരണ്ടുകാരൻ ലൂക്ക എന്നിവരും അത്രതന്നെ ആസ്തിയോടെ പട്ടികയിൽ ഇടംനേടിയിട്ടുണ്ട്.

അതിസമ്പന്നരായ ചെറുപ്പക്കാരുടെ കൂട്ടത്തിൽ ഏറ്റവും ‘മൂത്തത്’ സ്നാപ്ചാറ്റ് സഹസ്ഥാപകനും സിഇഒയും യുഎസ് പൗരനുമായ മുപ്പത്തിമൂന്നുകാരൻ ഈവൻ സപീഗലാണ്. 310 കോടി ഡോളറാണ് (25,000 കോടി രൂപ) അദ്ദേഹത്തിന്റെ ആസ്തി. ലിവിയയുടെ സഹോദരിയും ആർക്കിടെക്റ്റുമായ 26 വയസ്സുകാരി ഡോറ വോയ്റ്റ് ഡി അസിസും പട്ടികയിലുണ്ട്. ലിവിയയ്ക്കുള്ളതു പോലെ, ഡബ്ലുഇജിയിൽ 3.1% ഓഹരിയുള്ള ഡോറയുടെയും ആസ്തി 9100 കോടി രൂപയാണ്. ശ്രദ്ധേയമായൊരു വസ്തുത, ചെറുപ്പക്കാരായ ധനികരുടെ പട്ടികയിൽ ഇക്കുറി ഇടംനേടിയവരിൽ മിക്കവരും പാരമ്പര്യസ്വത്തിലൂടെയാണ് ആ സ്ഥാനം കൈവരിച്ചതെന്നതാണ്. കഴിഞ്ഞ 15 വർഷത്തിനിടെ ഇതാദ്യമാണ് 30 വയസ്സിൽ താഴെയുള്ള ശതകോടീശ്വരരിൽ ഒരാൾ പോലും സ്വപ്രയത്നത്താലല്ലാതെ ആ നേട്ടത്തിലെത്തുന്നത്.

യൂറോപ്പിൽ നിന്നുള്ളവരാണ് യുവധനികരിൽ കൂടുതലും, 15 പേർ (60%). ബാക്കിയുള്ളവർ യുഎസ്, ബ്രസീൽ, ദക്ഷിണ കൊറിയ, ഹോങ്കോങ്, ജപ്പാൻ എന്നിവിടങ്ങളിൽ നിന്നുള്ളവരാണ്. ഹോങ്കോങ്ങിൽ നിന്നുള്ള ചെറുപ്പക്കാരായ ശതകോടീശ്വരരെല്ലാം പാരമ്പര്യസ്വത്തിലൂടെ ആ നേട്ടത്തിലെത്തിയപ്പോൾ യുഎസിൽ നിന്നുള്ള യുവ ശതകോടീശ്വരരെല്ലാം തങ്ങളുടെ സാമ്രാജ്യം സ്വപ്രയത്നത്താൽ കെട്ടിപ്പടുത്തവരാണ്.  

ഇന്ത്യക്കാരായ ഏറ്റവും പ്രായം കുറഞ്ഞ ശതകോടീശ്വരന്മാർ സ്വപ്രയത്നത്താൽ ഈ നേട്ടത്തിലെത്തിയ സെറോദ സ്ഥാപകരായ സഹോദരങ്ങൾ നിതിൻ കാമത്ത് (39,000 കോടി രൂപ), നിഖിൽ കാമത്ത് (31,000 കോടി രൂപ), ഫ്ലിപ്കാർട് സ്ഥാപകരായ ബിന്നി ബൻസാൽ (11,000 കോടി രൂപ), സച്ചിൻ ബൻസാൽ (10,000 കോടി രൂപ) എന്നിവരാണ്. എന്നാൽ 33 വയസ്സിനു മുകളിലുള്ള ഇവർ നാലും ലോകത്തെ ഏറ്റവും പ്രായം കുറഞ്ഞ കോടീശ്വരരായ 25 പേരുടെ പട്ടികയിലില്ല. അതിസമ്പന്നരായ ഒട്ടേറെ യുവാക്കളെ പരിചയപ്പെട്ട സ്ഥിതിക്ക് ലോക ശതകോടീശ്വര പട്ടികയിലെ ഏറ്റവും പ്രായം കൂടിയയാളെ കൂടി അറിഞ്ഞിരിക്കാം, 102 വയസ്സുകാരനായ യുഎസ് പൗരൻ ജോർജ് ജോസഫ്. മെർക്കുറി ജനറൽ എന്ന ഇൻഷുറൻസ് കമ്പനിയുടെ സ്ഥാപകനായ അദ്ദേഹത്തിന്റെ നിലവിലെ ആസ്തി 180 കോടി ഡോളറാണ് (15,000 കോടി രൂപ).

∙ സമ്പന്നതയുടെ കൊടുമുടിയിൽ

ലോക ശതകോടീശ്വരരുടെ ആകെ ആസ്തിയിൽ കഴിഞ്ഞ വർഷത്തേക്കാൾ 166 ലക്ഷം കോടി രൂപയുടെ വർധനയുണ്ട്. 2005ലെ ലോക ശതകോടീശ്വരരുടെ ആകെ ആസ്തി, ഇപ്രാവശ്യത്തെ വർധനയോട് അടുത്തുനിൽക്കുന്ന തുകയായിരുന്നു (183 ലക്ഷം കോടി രൂപ) എന്നതാണ് രസകരമായൊരു വസ്തുത. ഏകദേശം 1185 ലക്ഷം കോടി രൂപയാണ് ഇക്കൊല്ലത്തെ 2781 ശതകോടീശ്വരരുടെ ആകെ ആസ്തി. അതിൽ 14% സമ്പത്തുമുള്ളത്, അക്കൂട്ടത്തിൽ നിന്ന് 10,000 കോടി ഡോളർ (8.3 ലക്ഷം കോടി രൂപ) ക്ലബിൽ ഇടംനേടിയ 14 പേരുടെ പക്കലാണ്. പട്ടികയിൽ ഒന്നാം സ്ഥാനത്തെത്തിയ എഴുപത്തിയഞ്ചുകാരനായ ബെർണാർഡ് അർനോൾഡ് (23,300 കോടി ഡോളർ - 19.4 ലക്ഷം കോടി രൂപ) ലൂയി വിറ്റോൺ, സെഫോറ തുടങ്ങിയ എഴുപത്തിയഞ്ചിലേറെ ആഡംബര ബ്രാൻഡുകളുടെ ഉടമസ്ഥരായ ഫ്രഞ്ച് കമ്പനി എൽവിഎംഎച്ചിന്റെ ചെയർമാനും സിഇഒയുമാണ്. ടോപ് 5ലെ മറ്റ് നാലു പേരും യുഎസ് പൗരന്മാരാണ്.