പടമില്ലാ കാലത്ത് സഹായിച്ച എസ്‌പിബിക്കും നോട്ടിസ്: ‘എന്റെ പാട്ട് പാടരുത്’: ഇളയരാജ കോപ്പിയടിയെന്ന് സഹോദരൻ: വിവാദശ്രുതികളേറെ

ഇസൈ ജ്ഞാനി ഇളയരാജയുടെ പാട്ടുകൾ കാട്ടു തേൻ പോലെയാണെന്ന് തമിഴ് മക്കൾ പറയും. പഴകും തോറും മാധുര്യം കൂടുന്ന ഈണങ്ങൾ. എഴുപതുകളിലും എൺപതുകളിലും രാജ ഈണമിട്ട പാട്ടുകൾ ഇന്നും സംഗീത പ്രേമികളുടെ മനസ്സിൽ സൂപ്പർ ഹിറ്റായി ഓടിക്കൊണ്ടിരിക്കുന്നതും അതുകൊണ്ടുതന്നെ. എന്നാൽ, 40 വർഷം മുൻപ് രാജ ഈണമിട്ടൊരു പാട്ട് വിവാദത്തിന്റെ അപശ്രുതിയോടെ തമിഴകമാകെ ചർച്ച ചെയ്യുകയാണിപ്പോൾ. കാലത്തെ അതിജീവിക്കുന്ന അതിന്റെ ഈണമോ ആസ്വാദന ഭംഗിയോ അല്ല ചർച്ചകളുടെ കാതൽ. പാട്ടിന് ഈണമൊരുക്കിയ സംഗീത സംവിധായകൻ ഇളയരാജ, സ്റ്റൈൽ മന്നൻ രജനീകാന്ത് നായകനായ ‘കൂലി’ സിനിമയുടെ അണിയറ പ്രവർത്തകർക്കയച്ച വക്കീൽ നോട്ടിസിനെച്ചൊല്ലിയാണ് ചർച്ചകൾ കൊഴുക്കുന്നത്.

1983ൽ പുറത്തിറങ്ങിയ 'തങ്കമകൻ' എന്ന ചിത്രത്തിലെ ‘വാ വാ പക്കം വാ’ എന്ന പാട്ടാണ് വിവാദത്തിന്റെ വെള്ളിത്തിരയിൽ നിറഞ്ഞോടുന്നത്. എസ്.പി.ബാലസുബ്രഹ്മണ്യവും വാണി ജയറാമും പാടിത്തകർത്ത ഗാനം. രജനീകാന്തിന്റെ പുതിയ സിനിമയായ ‘കൂലിയുടെ’ ടീസറിൽ ഈ ഗാനം ഉപയോഗിച്ചിരുന്നു. തമിഴ് സംഗീത ലോകത്തെ പുതിയ സെൻസേഷൻ അനിരുദ്ധ് രവിചന്ദറാണ് ചിത്രത്തിന്റെ സംഗീത സംവിധായകൻ. അനുമതിയില്ലാതെ ഗാനമുപയോഗിച്ചതിലൂടെ പകർപ്പവകാശ നിയമം ലംഘിച്ചുവെന്ന് ചൂണ്ടിക്കാട്ടിയാണ് ഇളയരാജ നോട്ടിസ് അയച്ചിരിക്കുന്നത്.

കേരളത്തിലെയും തമിഴ്നാട്ടിലെയും തിരയിൽ തരംഗം തീർത്ത ‘മഞ്ഞുമ്മൽ ബോയ്സിന്റെ’ അണിയറ പ്രവർത്തകരാണു രാജയുടെ കോപത്തിന് ഏറ്റവും ഒടുവിൽ പാത്രമായിരിക്കുന്നത്. സിനിമയിൽ ‘കൺമണീ അൻപോടു കാതലൻ’ എന്ന പാട്ട് അനുമതിയില്ലാതെ ഉപയോഗിച്ചുവെന്നാണ് ആരോപണം. ‘ഗുണ’ എന്ന ചിത്രത്തിൽ ഇളയരാജ സംഗീത സംവിധാനം നിർവഹിച്ച ഈ പാട്ട് അദ്ദേഹത്തിന്റെ എക്കാലത്തെയും വലിയ ഹിറ്റുകളിലൊന്നാണ്. ഇത്തരത്തിൽ  തമിഴകത്തിന്റെ സ്റ്റൈൽ മന്നനും അനിരുദ്ധും മലയാള സിനിമാ പ്രവർത്തകരും ഒരു വശത്ത്, ഇസൈ ജ്ഞാനി മറുവശത്ത്.. ഈ നേര്‍ക്കുനേർ പോരാട്ടം തുടരുമ്പോൾ, ഇളയരാജ കൊളുത്തി വിട്ട പഴയ ചില വിവാദ കൊടുങ്കാറ്റുകളും ചർച്ചയിലേക്കു വരികയാണ്. 

ഇളയരാജയുടെ സംഗീതയാത്രയിലെ ‘സ്വന്തം ബാലുവായിരുന്ന’ എസ്.പി ബാലസുബ്രഹ്മണ്യം മുതൽ സ്വന്തം സഹോദരൻ ഗംഗൈ അമരൻ വരെയുള്ളവരെ ആ വിവാദത്തിന്റെ മറുതലയ്ക്കൽ കാണാം. തേനിയിലെ പണ്ണൈപുരത്ത് നിന്നെത്തി തമിഴ് സിനിമാ സംഗീതത്തിന്റെ തലവര മാറ്റിക്കുറിച്ച ഇളയരാജ 80–ാം വയസ്സിലും വിവാദങ്ങൾക്ക് ഈണം മീട്ടുന്നു. സംഗീതത്തിലെ ‘പെരിയ രാജയായി’ തമിഴകമാകെ കൊണ്ടാടുമ്പോഴും പാട്ടിനു പുറത്തെ ‘സംവിധാനങ്ങൾ’ വിമർശനങ്ങളുടെ മുനയും ഇളയരാജയ്ക്കു നേരെ തിരിച്ചുവിടുന്നു. 

∙തേനിയുടെ രാസയ്യ, ദേവി കുളത്തിന്റെ സഖാവ്...

തേനിക്ക് രാസയ്യയാണ് ഇളയരാജ. ഗ്രാമത്തിലെ ദരിദ്ര ദലിത് കർഷകനായിരുന്ന ഡാനിയൽ രാമസാമിയുടെ മൂന്നാമത്തെ മകൻ. തമിഴ് തോട്ടം തൊഴിലാളികൾ ഏറെയുള്ള ഇടുക്കിയിലെ ദേവികുളത്തും പരിസര പ്രദേശങ്ങളിലും ഇളയരാജയുടെ മേൽവിലാസം മറ്റൊന്നായിരുന്നു– സഖാവ് പാവലർ വരദരാജന്റെ തമ്പി. തേനിയിലെ ഉൾനാടൻ ഗ്രാമത്തിൽ നിന്ന് തമിഴ് സിനിമാ സംഗീത സാമ്രാജ്യത്തിന്റെ ചക്രവർത്തിപദത്തിലേക്കുള്ള ഇളയരാജയുടെ യാത്ര വിവരിക്കുമ്പോൾ ആദ്യം നന്ദി പറയേണ്ട വ്യക്തികളിലൊരാളാണ് പാവലർ വരദരാജൻ. തമിഴ്നാട്ടിലെ ഉൾനാടൻ ഗ്രാമങ്ങളിലെങ്ങും പാടിയും പറഞ്ഞും കമ്യൂണിസ്റ്റ് ആശയം പ്രചരിപ്പിച്ച സഖാവ്. 

നാലാൾ കൂടുന്ന കവലകളും അങ്ങാടികളുമെല്ലാം അന്ന് വരദരാജനും സംഘത്തിനും അരങ്ങായിരുന്നു. കമ്പത്ത് നടന്ന അത്തരമൊരു പരിപാടിയിലാണ് രാസയ്യ ആദ്യമായി ജനക്കൂട്ടത്തിനു മുന്നിൽ ഹാർമോണിയം കയ്യിലെടുത്തത്. സംഘത്തിലെ പതിവു ഹാർമോണിസ്റ്റും വരദരാജനും തമ്മിൽ ഒന്നും രണ്ടും പറഞ്ഞു പിണങ്ങി. പകരം ആളെ അന്വേഷിച്ചു നടക്കുന്നതിനിടെ അമ്മ ചിന്നത്തായ് ആണ് രാസയ്യയുടെ പേര് നിർദേശിച്ചത്. ആദ്യമായി പൊതുവേദിയിൽ പാടിയതിനു പിന്നിലുമുണ്ട് അത്തരമൊരു യാദൃച്ഛികത.

തിരുച്ചിറപ്പള്ളിക്കടുത്ത് പാർട്ടിയുടെ കർഷക സമ്മേളനം നടക്കുന്നു. ആദ്യ ദിവസം വരദരാജന്റെ പാട്ടുണ്ട്. തലേന്നു മുതൽ അദ്ദേഹത്തിന് നിർത്താതെ പനി. വരില്ലെന്നറിയിച്ചിട്ടും സംഘാടകർ വണ്ടിയുമായി തേനിയിലെ ഗ്രാമത്തിലെത്തി. പനിച്ചു വിറച്ചു നിൽക്കുന്ന വരദരാജന് അന്നും വഴി പറഞ്ഞു കൊടുത്തത് അമ്മ ചിന്നത്തായിയാണ്. രാസയ്യ തന്നെയായിരുന്നു ആ വഴി. പരിപാടി തുടങ്ങിവച്ചത് വരദരാജന്റെ പാട്ടിലാണ്. തുടർന്ന് രാസയ്യ മൈക്ക് കയ്യിലെടുത്തു. പിന്നെ അതു താഴെവയ്ക്കാൻ ജനം സമ്മതിച്ചില്ല. 

∙ ഇഎംഎസ് ചോദിച്ചു. വരദരാജൻ എവിടെ?

‘പാവലർ ബ്രദേഴ്സ്’ എന്നറിയപ്പെട്ടിരുന്ന വരദരാജന്റെയും സംഘത്തിന്റെയും കേളി ലോകമറിയുന്നതിൽ കേരളത്തിന്റെ ആദ്യ മുഖ്യമന്ത്രി ഇഎംഎസ് നമ്പൂതിരിപ്പാടിനും ചെറിയൊരു പങ്കുണ്ട്. കേരള രൂപീകരണത്തിനു ശേഷമുള്ള ആദ്യ ഉപതിരഞ്ഞെടുപ്പ് നടക്കുന്നത് 1958ൽ ദേവികുളത്താണ്. ബാലറ്റിലൂടെ ആദ്യമായി അധികാരത്തിലെത്തിയ കമ്യൂണിസ്റ്റ് പാർട്ടിക്കു മുന്നിലെ ആദ്യ ബലപരീക്ഷണം. റോസമ്മ പുന്നൂസായിരുന്നു കമ്യൂണിസ്റ്റ് പാർട്ടി സ്ഥാനാർഥി. ബി.കെ.നായർ കോൺഗ്രസിനു വേണ്ടി കളത്തിൽ. പെരുംതലൈവർ കാമരാജും സാക്ഷാൽ ഇന്ദിരാഗാന്ധിയും കോൺഗ്രസിനു വേണ്ടി പ്രചാരണത്തിനിറങ്ങി. ജ്യോതി ബസുവും എസ്.എ.ഡാങ്കെയും എംജിആറുമെല്ലാം റോസമ്മ പുന്നൂസിനു വേണ്ടിയും കളത്തിലിറങ്ങി.

കമ്യൂണിസ്റ്റ് പാർട്ടി പ്രചാരണത്തിലെ സൂപ്പർ ഹിറ്റ് ഐറ്റം പക്ഷേ, പാവലർ ബ്രദേഴ്സിന്റെ പാട്ടും പറച്ചിലുമായിരുന്നു. കഥയും ഗാനവും ആക്ഷേപഹാസ്യവും കൂട്ടിക്കലർത്തി വരദരാജനും സംഘവും അവതരിപ്പിച്ച പരിപാടികൾക്കായി ജനം തടിച്ചു കൂടി. വോട്ടെണ്ണിയപ്പോൾ റോസമ്മ പുന്നൂസ് 7089 വോട്ടിന് ജയിച്ചു. വിജയാഘോഷം നടന്നത് മൂന്നാറിലാണ്. വേദിയിലെത്തി പ്രസംഗിക്കാനെഴുന്നേറ്റ ഇഎംഎസ് ചോദിച്ചു– എവിടെ പാവലർ വരദരാജൻ?. സദസ്സിന്റെ മൂലയിലിരിക്കുകയായിരുന്ന വരദരാജനെ ഇഎംഎസ് വേദിയിൽ വിളിച്ചിരുന്നു. കേരള ‘മുതലമച്ചറുടെ’ ആദരവ് നേടിയ വരദരാജന്റെ കീർത്തി തമിഴകമെങ്ങും പ്രചരിച്ചു. 

വരദരാജനെ പാർട്ടിയിലേക്കു കൊണ്ടുവന്ന, സ്വാതന്ത്ര്യ സമര സേനാനിയും തമിഴ്നാട്ടിലെ പാർട്ടി സ്ഥാപകനുമായ ഐ.മായാണ്ടി ഭാരതി പറഞ്ഞു.‘ഇതാണ് സഖാവിന്റെ വഴി. ഒരു ട്രൂപ്പ് തുടങ്ങണം. കമ്യൂണിസ്റ്റ് പോരാട്ട ഇതിഹാസങ്ങൾ നാടെങ്ങും പാടിപ്പറയണം’. എട്ടു വർഷത്തോളം വരദരാജന്റെ നേതൃത്വത്തിൽ ഭാസ്കറും ഇളയരാജയും ഗംഗൈ അമരനും ഉൾപ്പെടുന്ന പാവലർ ബ്രദേഴ്സ് തമിഴ്നാട്ടിലെ മുക്കിലും മൂലയിലും കറങ്ങി നടന്നു. കമ്യൂണിസ്റ്റ് വീര ചരിതങ്ങൾ പാടിപ്പറഞ്ഞു. വരദരാജൻ പിന്നെയും പാട്ടും പാർട്ടിയുമായി ഗ്രാമങ്ങൾ തോറും അലഞ്ഞു. അവസാനകാലത്ത് സിപിഎമ്മുമായി തെറ്റിപ്പിരിഞ്ഞ് ഡിഎംകെയിൽ ചേർന്നു.