പുട്ടും കടലയും പപ്പടവും പഴവും ‘കോംബോ’ ഇനി പഴങ്കഥ! പുട്ടും പോട്ടിയും കഴിച്ചിട്ടുണ്ടോ? തുളസിപ്പുട്ടോ?

∙ ന്യൂജെൻ പുട്ട് മുതൽ തനി നാടൻ വരെ

അരിപ്പൊടിയിൽ വെള്ളം തളിച്ച് തളിച്ച് ഉപ്പുനീരും ചേർത്ത് നനച്ചെടുക്കുന്ന പുട്ട്പൊടി, കുറ്റിയിൽ തേങ്ങാപീരയും ചേര്‍ത്ത് നിറയ്ക്കുമ്പോൾ ചില്ല് ഇടാൻ മറന്നാൽ പിന്നെ ഇടിയപ്പത്തിന് കുഴയ്ക്കേണ്ടി വരും. പുട്ട് ഉണ്ടാക്കുമ്പോൾ ആദ്യം പുട്ടു കുറ്റിയിൽ ചില്ല് ഇടാൻ മറക്കരുത്. എത്ര ശ്രദ്ധയോടെ പുട്ടിന് നനച്ചാലും പുഴുങ്ങി വരുമ്പോൾ ചിലപ്പാൾ മനസ്സിൽ വിദ്വേഷമുള്ളവർക്ക് നേരെ എറിയാൻ പരുവമാകും. മുറു മുറെയിരിക്കും. ഒട്ടും മയം കാണില്ലെന്ന് ചുരുക്കം. പരുവത്തിന് നനച്ച് മുളംങ്കുറ്റിയിൽ ആവിയിൽ വെന്തുവേവുന്ന പുട്ടിനോളം രുചിവരില്ല ന്യൂജെൻ പുട്ടിന്. മടിയന്മാര്‍ക്ക് എളുപ്പപണിയായി പുട്ട് അര ഗ്ലാസ് വെള്ളത്തിൽ നനച്ചെടുക്കാമെന്നും ഒട്ടും വെള്ളമില്ലാതെ പുട്ട് ഉണ്ടാക്കാമെന്നുമൊക്കെ പരസ്യങ്ങളുള്ള ഈസി പുട്ട്പൊടികൾ വിപണിയിൽ ലഭ്യമാണ്. എങ്കിലും പരമ്പരാഗത രുചിക്കൂട്ടിൽ പാകമായതിനോളം വരില്ല മറ്റൊന്നും.

∙ പുട്ടാണ് ഇവിടെ സൂപ്പർ താരം

പുട്ടും താറാവ് റോസ്റ്റും വിളമ്പുന്ന നിരവധി രുചിയിടങ്ങൾ കേരളത്തിലുണ്ട്. പറവൂർ ചാത്തനാട് കായലരികത്ത് കാറ്റേറ്റ് നല്ല സ്വാദോടെ പുട്ടും പരിപ്പും പപ്പടവും താറാമുട്ടക്കറിയും ചേർത്ത് ഒരു പിടിപിടിയ്ക്കാം. ബോർഡോ പേരോ ഒന്നുമില്ലാത്ത നായരേട്ടന്റെ പുട്ടകടയുണ്ട് ഇവിടെ. വൈകുന്നേരം നാലുമണിക്കാണ് കട തുറക്കുന്നത്. രുചിയറിഞ്ഞ് എത്തുന്നവരാണ് കൂടുതലും. ആസാധ്യ രുചിയെന്ന് കഴിച്ചവർ സാക്ഷ്യപ്പെടുത്തുന്നു. പുട്ടിനൊപ്പം വിളമ്പുന്ന കറികളാണ് ഇവിടുത്തെ പുട്ടിനെ സ്പെഷലാക്കുന്നത്.

∙ പുട്ടും ബീഫും സ്റ്റ്യൂവും 

നാവിൽ കൊതിയൂറുന്ന രുചിമേളങ്ങളുമായാണ് എറണാകുളം വടുതലയിലെ പുട്ടുകടയുള്ളത്. വിഭവങ്ങള്‍ ഒരുപാട് ഇല്ലെങ്കിലും നാടന്‍ പുട്ടും ബീഫ് സ്റ്റ്യൂവും പോട്ടിയും കിട്ടുന്ന ഈ കടയിലെ തിരക്കു കണ്ടാല്‍ ആരായാലും അന്ധാളിച്ചു പോകും. കടയുടെ നടത്തിപ്പുക്കാരനായ ജോർജ ചേട്ടൻ തന്നെയാണ് പുട്ടുകടയിലെ പ്രധാന ഷെഫും. പുട്ടും ബീഫും സ്റ്റ്യൂവും പോട്ടിയുമാണ് ഇവിടുത്തെ പ്രധാന ആകര്‍ഷണം. പ്രത്യക സൈന്‍ ബോര്‍ഡോ അല്ലെങ്കില്‍ പുട്ടുകട എന്ന് എഴുതി വച്ചൊരു ബോര്‍ഡോ ഈ ചെറിയ ഹോട്ടലിന് ഇല്ല എന്നുള്ളതാണ് കൗതുകം. 

വിഭവങ്ങളുടെ രുചിയറിഞ്ഞ ഭക്ഷണപ്രിയർ പുട്ടുകടയ്ക്ക് പേരിട്ടു ‘ജോർജേജട്ടന്റ കട’. ജോർജേട്ടന്റ കൈപ്പുണ്യത്തിൽ തയാറാക്കുന്ന ഉരുളന്‍കിഴങ്ങും തേങ്ങാപ്പാലും മസാലകളും ചേർത്ത ബീഫ് സ്റ്റ്യൂവാണ് താരം. ഒപ്പം തേങ്ങാ വറുത്തരച്ച് അതിൽ കുരുമുളകും കറുവാപട്ടയും മസാലക്കൂട്ടുകളും ചേർത്ത് അരച്ചെടുത്ത കൂട്ടിൽ വെന്തു വേവുന്ന പോട്ടിയും. വായിൽ കപ്പലോടുന്ന രുചിയെന്നു പറയാതെ വയ്യ. എറണാകുളം ചിറ്റൂർ റോഡിൽ വടുതല കെ.ആർ ബേക്കറിക്ക് എതിർവശമാണ് ' ജോർജേജട്ടന്റ കട.

∙ ഉണ്ടാക്കിയാലോ, പുട്ടിലെ ഈ വെറൈറ്റികള്‍

∙ കൂർഗ് കടും പുട്ട്

ഒരെണ്ണം കഴിച്ചാൽ വീണ്ടും കഴിച്ചു കൊണ്ടേയിരിക്കും കടും പുട്ട്. പേരു കേൾക്കുമ്പോൾ ഇത്തിരി കൗതുകം തോന്നുമെങ്കിൽ സംഗതി രുചികരമാണ്. ആദ്യമേ ചെയ്യേണ്ടത് കുറച്ച് വെള്ളം തിളയ്ക്കാൻ വയ്ക്കുക. അതിലേക്കു പഞ്ചസാര ചേർത്ത് ഒന്ന് അലിയിച്ചെടുക്കുക, ശേഷം ഉപ്പും പൊടിയരി കുതിർത്തതും അരച്ചെടുത്തു ചേർക്കണം, തരിയോടു കൂടി അരയ്ക്കണം. അരച്ചെടുത്ത പൊടിയരി 4 സ്പൂൺ ചേർത്തു കൊടുക്കാം. അതിനു ശേഷം അതിലേക്കു ചേർക്കേണ്ടതു റവയാണ്. റവ ചേർത്തു കഴിഞ്ഞാൽ പിന്നെ തേങ്ങയും ഏലക്കയും നന്നായി ചതച്ചെടുത്തതും കൂടി ഒപ്പം ചേർത്തു നന്നായി തിളപ്പിച്ച് വേവിച്ചെടുക്കുക. വെന്തുകഴിഞ്ഞാൽ ഇതൊന്നു തണുക്കാൻ വയ്ക്കണം. തണുത്തു കഴിഞ്ഞാൽ ചെറിയ ഉരുളകളാക്കി എടുത്തതിനുശേഷം, ഇഡ്ഡലി പാത്രത്തിൽ വെള്ളം വച്ച് ഇഡ്ഡലി തട്ടുവച്ച് അതിലേക്കു ഓരോ ഉരുളകളും വച്ചുകൊടുത്ത് ആവിയിൽ ഒരു 15 മിനിറ്റ് വേവിച്ചെടുക്കാം. വളരെ രുചികരവും മൃദുവുമാണ് കടും പുട്ട്. (പാചകക്കുറിപ്പ് ആശ രാജനാരായണൻ)

∙ ഉപ്പുമാങ്ങ പുട്ട്

പുട്ടും കടലയും നല്ല കോംബിനേഷനാണ്. മധുരപ്രേമികൾ പഴവും. കൂടാതെ ചക്ക സീസണെങ്കിൽ പുട്ടിൽ പഴുത്ത ചക്ക നിറച്ചും തയാറാക്കാറുണ്ട്. ഇതിൽനിന്ന് വ്യത്യസ്തമായി പുട്ടും മാങ്ങയുമായാലോ? ഗോതമ്പുപൊടിയും ഉപ്പു മാങ്ങ അരിഞ്ഞതും കൂടി മിക്സിയുടെ ചെറിയ ജാറിൽ ഇട്ട് പൾസ്‌ മോഡിൽ അടിച്ചെടുക്കുക. ശേഷം പുട്ടുകുറ്റിയിൽ തേങ്ങയും അടിച്ചെടുത്ത മാവും ഇടകലർത്തി പുട്ട് ഉണ്ടാക്കുക. ഇത് ചൂടാറിയാലും സോഫ്റ്റായിരിക്കും.