അധ്യാപകന് രാത്രി ഫുഡ് ഡെലിവറി, ഹോട്ടലിൽ വെയ്റ്റർ...: സർക്കാർ കാണുന്നില്ലേ ഇവരുടെ ദുരിതം!

മഹസ് (ശരിയായ പേരല്ല) ജോലിക്കു കയറിയിട്ട് രണ്ടുവർഷമായി. ദിവസവേതന അടിസ്ഥാനത്തിലാണു മഹസ്സിനു ശമ്പളം ലഭിക്കേണ്ടത്. 2021 നവംബർ 8നു ശേഷമുള്ള ഒഴിവുകളിലേക്കുള്ള നിയമനമായതിനാലാണു ദിവസവേതനം നൽകാൻ കോടതി ഉത്തരവിട്ടത്. എന്നാൽ, ജോലിയെല്ലാം സ്ഥിരനിയമനാംഗീകാരമുള്ള അധ്യാപകർക്കു തുല്യമാണ്. അതുകൊണ്ടുതന്നെ, അവധിദിവസങ്ങളിലും മറ്റും ജോലിക്കെത്തണം. എന്നാൽ, ആ ദിവസങ്ങളിൽ ശമ്പളം കിട്ടുമോ? ഇല്ലേയില്ല! 

കൃഷ്ണനാഥിനാകട്ടെ (ശരിയായ പേരല്ല) ജോലിക്കു കയറിയ അന്നു മുതലുള്ള ശമ്പളം കിട്ടാനുണ്ട്. 2021ൽ ജോലിക്കു കയറിയ പലർക്കും ദിവസവേതനാടിസ്ഥാനത്തിൽ ചിലപ്പോഴെങ്കിലും വേതനം കിട്ടിയപ്പോൾ കൃഷ്ണനാഥിന് ഒരിക്കൽപോലും ചെയ്ത ജോലിക്കുള്ള വേതനം കിട്ടിയില്ല. ഭക്ഷണം വീടുകളിലെത്തിച്ചുകൊടുക്കുന്ന ഓൺലൈൻ പ്ലാറ്റ്ഫോമുകൾക്കു വേണ്ടി രാത്രികാലത്ത് ഡെലിവറി ബോയ് ആയി ഈ അധ്യാപകൻ പോകും. പിന്നെ, ഓൺലൈനായി ചെറിയ തോതിൽ വസ്ത്രക്കച്ചവടവും. സ്കൂൾ ജോലി കഴിഞ്ഞിട്ടുള്ള സമയത്തേ ഇത്തരം ജോലികൾ ചെയ്യാനാകൂ എന്നതിനാൽ വലിയ വരുമാനമൊന്നും കിട്ടില്ല. പക്ഷേ, വരുമാനമൊന്നും ഇല്ലാതിരിക്കുന്നതിനേക്കാളും ഭേദമല്ലേ ഇത്തരം ജോലികൾ എന്നാണു കൃഷ്ണനാഥിന്റെ ചോദ്യം. 

സ്കൂളിൽ എഫ്ടിഎമ്മായി ജോലി കിട്ടിയപ്പോൾ കാസർകോട്ടെ വ്യാപാരമെല്ലാം അവസാനിപ്പിച്ചു തൃശൂരിൽ വന്നു സ്ഥിരതാമസമാക്കിയതാണ് രാഗേഷ് (ശരിയായ പേരല്ല). സർക്കാർ ജോലിയുടെ സുരക്ഷിതത്വം നോക്കി ഉള്ള ബിസിനസ് വേണ്ടെന്നുവച്ച രാഗേഷിനും തിരിച്ചടിയായതു നിയമനപ്രശ്നം തന്നെ. 2022ൽ ജോലിക്കു കയറിയെങ്കിലും ഇതുവരെ ശമ്പളം കിട്ടിയിട്ടില്ല. ഉപജീവനത്തിനായി ആദ്യം കപ്പലണ്ടി മിഠായിയുടെ വിതരണമായിരുന്നു നടത്തിയിരുന്നത്. എന്നാൽ, അതുകൊണ്ടും ജീവിതം മുന്നോട്ടുപോകില്ലെന്നു വന്നതോടെ പതിയ ഹോട്ടലിൽ ജോലിക്കു കയറി. ഇപ്പോൾ, സ്കൂൾ വിട്ടാൽ കുട്ടികളേക്കാൾ വേഗത്തിലാണു രാഗേഷിന്റെ ഓട്ടം. ഹോട്ടലിൽ വെയ്റ്റർ‍ ആയാണു ജോലി. എത്ര നേരത്തെ എത്താമോ അത്രയും മണിക്കൂർ ജോലി ചെയ്യാം. അൽപം പണം കൂടുതലും സമ്പാദിക്കാം.

ഹൈക്കോടതി ഡിവിഷൻ ബെഞ്ച് പുറപ്പെടുവിച്ച 13-03- 2023 ലെയും തുടർന്നുവന്ന കോടതി അലക്ഷ്യ കേസുകളിലെയും ഉത്തരവുകൾ അനുസരിച്ച് 18-11-2018 മുതൽ 8-11-2021 വരെയുള്ള ഒഴിവുകളിൽ നിയമിതാരായ ജീവനക്കാർക്കു താൽക്കാലിക അംഗീകാരം അനുവദിക്കുന്നതിനു വ്യവസ്ഥ ഉണ്ടായിരുന്നതാണ്. വാർഷിക ഇൻക്രിമെന്റുകൾ അനുവദിക്കുന്നതിനും പ്രൊബേഷൻ ഡിക്ലയർ ചെയ്യുന്നതിനും മാത്രമാണു വിലക്കുണ്ടായിരുന്നത്. നിയമന അംഗീകാരത്തോടൊപ്പം അതുവരെയുള്ള ശമ്പളം ഉൾപ്പെടെയുള്ള എല്ലാ സാമ്പത്തിക ആനുകൂല്യങ്ങളും നൽകേണ്ടതാണെന്നും കോടതി നിർദേശിച്ചിരുന്നു. എന്നിട്ടും വിദ്യാഭ്യാസ ഓഫിസർമാർ ജീവനക്കാരെ വട്ടംകറക്കി. 

ഒടുവിൽ സർക്കാരിനു വീണ്ടും ഉത്തരവ് ഇറക്കേണ്ടി വന്നു. PEN അനുവദിക്കുന്നതിനും പിഎഫിൽ അംഗത്വം നൽകുന്നതിനുമുള്ള നടപടികൾ എത്രയും വേഗം പൂർത്തിയാക്കണമെന്നായിരുന്നു നിർദേശം. എന്നാൽ, ഇതുവരെയും അതു പാലിക്കപ്പെട്ടിട്ടില്ല. നിയമനം അംഗീകരിച്ച തീയതി മുതൽ പിഎഫിൽ നിക്ഷേപിക്കേണ്ടിയിരുന്ന തുകയ്ക്കു നിലവിൽ പ്രതിവർഷം 9 % നിരക്കിൽ ലഭിക്കേണ്ടുന്ന പലിശ ഉൾപ്പെടെ ജീവനക്കാർക്കു നഷ്ടമാകുന്ന സ്ഥിതിയാണ് ഇപ്പോൾ. 

പിഎഫ് തുക അഞ്ചു വർഷം കഴിഞ്ഞു മാത്രമേ പിൻവലിക്കാനാകൂ എന്ന നയത്തോടെയാണു സർക്കാർ പിഎഫ് തുടങ്ങാൻ വിദ്യാഭ്യാസ ഓഫിസർമാർക്കു നിർദേശം നൽകിയിട്ടുള്ളത് എന്നതു മറ്റൊരു ക്രൂരതയാണ്. 

മെഡിസെപ്പ്, സ്പെഷൽ ലീവ് എന്നീ ആനുകൂല്യങ്ങൾ‍ കിട്ടാത്ത ഇവരെ സംബന്ധിച്ചിടത്തോളം വലിയൊരു ആശ്വാസമാകുമായിരുന്ന പിഎഫ് തുകയാണ് കയ്യിൽ കിട്ടാൻ നാളേറെ കാത്തിരിക്കേണ്ടി വരുന്നത്. ശമ്പള കുടിശ്ശികയുമായി ബന്ധപ്പെട്ട മറ്റു ചില കേസുകളിൽ ശമ്പള കുടിശ്ശിക കാലതാമസമില്ലാതെ നൽകണമെന്നായിരുന്നു ഹൈക്കോടതി വിധി. പക്ഷേ, ആ കേസുകളിലും സർക്കാർ സുപ്രീം കോടതിയിൽ അപ്പീലിനു പോയിട്ടുണ്ട്. ഇതു ഭിന്നശേഷി സംവരണവുമായി ബന്ധപ്പെട്ടു നിയമനം അംഗീകരിക്കപ്പെടുന്ന അധ്യാപകരെയും ദോഷകരമായി ബാധിച്ചേക്കും. അതിനാൽ, സുപ്രീം കോടതിയുടെ പരിഗണനയിലുള്ള കേസിൽ ചില അധ്യാപകരും കക്ഷി ചേർന്നിട്ടുണ്ട്. 

പിഎഫ് അക്കൗണ്ട് ആരംഭിക്കുന്നതിലെ തടസ്സങ്ങൾ സംബന്ധിച്ച പ്രതിസന്ധിയോടൊപ്പം സമാനമായ പ്രശ്നം SLI, GIS, MEDISEP പദ്ധതികളിൽ അംഗത്വം ലഭ്യമാക്കുന്നതിലും തുടരുകയാണ്. MEDISEP പദ്ധതിയുടെ ഭാഗമായി പ്രതിമാസം 500 രൂപവീതം ശമ്പളത്തിൽനിന്ന് ഈടാക്കുന്നുണ്ടെങ്കിലും ആനുകൂല്യങ്ങൾ ലഭ്യമാകുന്നില്ലെന്നു ജീവനക്കാർ ചൂണ്ടിക്കാട്ടുന്നു. മെഡിക്കൽ ഇൻഷുറൻസ് ഉൾപ്പെടെയുള്ള ആനുകൂല്യങ്ങൾ മുടങ്ങുന്നതിനാൽ ചികിത്സയ്ക്കും മറ്റുമായി വലിയ ബുദ്ധിമുട്ടാണ് ഉദ്യോഗസ്ഥർ നേരിടുന്നത്.