വിഷു ബംപർ അടിച്ച വിശ്വംഭരൻ എവിടെ? വീട്ടിൽ കയറാൻ പറ്റാത്ത അവസ്ഥ; അവർ പറഞ്ഞു: ചേട്ടൻ പണം തന്നാൽ മതി

രണ്ടു മൂന്നു ദിവസം കഴിഞ്ഞപ്പോഴേക്കും കത്തുകളുടെ വരവ് തുടങ്ങി. വീട്ടുപേരും സ്ഥലവുമെല്ലാം വാർത്തകളിലുണ്ടായിരുന്നല്ലോ. അങ്ങനെ മേൽവിലാസം ഒപ്പിച്ചാണ് കത്തെഴുതുന്നത്. ആവശ്യമൊക്കെ നേരത്തേ പറഞ്ഞതു തന്നെ. ഇതുവരെ 250ൽ കൂടുതൽ കത്തുകൾ ലഭിച്ചു. പോസ്റ്റ്മാൻ വീട്ടിലെ നിത്യസന്ദർശകനായി’’– വിശ്വംഭരൻ ചിരിക്കുന്നു. ബിസിനസിൽ പണം നിക്ഷേപിക്കണമെന്ന ആവശ്യവുമായാണ് വേറെ ചിലർ വരുന്നത്. ‘‘ചേട്ടൻ ഒന്നുമറിയേണ്ട, പണം മുടക്കിയാൽ മാത്രം മതി. ബിസിനസെല്ലാം ‍ഞങ്ങൾ ചെയ്തോളാം. മാസാമാസം ലാഭമങ്ങോട്ടു തരും’’ എന്നാണു വാഗ്ദാനം. അറിയാത്ത ബിസിനസ് ചെയ്തു പണം കളയാൻ താൽപര്യമില്ലാത്തതിനാൽ അവർക്കും പിടികൊടുത്തിട്ടില്ല.

∙ ആദ്യം 4 വീടുവയ്ക്കണം, പിന്നെ സഹായം

ലോട്ടറിയടിച്ച പണം ഇതുവരെ കയ്യിൽ കിട്ടിയിട്ടില്ല. രണ്ടു മാസം കഴിയുമെന്നാണ് ഉദ്യോഗസ്ഥർ അറിയിച്ചതെന്നു വിശ്വംഭരൻ പറയുന്നു. ‘‘പണം കിട്ടിയാൽ പഴവീടുള്ള കുടുംബവീട് പുതുക്കിപ്പണിയണം. പിന്നെ സഹോദരിക്കും അവരുടെ 2 മക്കൾക്കും വീടു വച്ചു കൊടുക്കണം. അങ്ങനെ 4 വീടിന്റെ പണിയാണ് ആദ്യം ചെയ്യാനുള്ളത്. പിന്നെ 2 മക്കൾക്കും അർഹമായതു കൊടുക്കണം. അവരാണല്ലോ സമ്മാനത്തിന്റെ അവകാശികൾ. ഞാൻ അനുഭവിച്ച കഷ്ടപ്പാടുകളൊന്നും എന്റെ മക്കൾ അനുഭവിക്കരുതെന്നു നിർബന്ധമുണ്ട്. വീടു വയ്ക്കാൻ സഹായം തേടി വരുന്നവരോടൊക്കെ ഞാൻ പറയുന്നത്, ആദ്യം ഞാൻ വീടു വയ്ക്കട്ടെ എന്നാണ്. 20 വർഷം സിആർപിഎഫിൽ ജോലി ചെയ്ത സമ്പാദ്യം കൊണ്ടു ഹരിപ്പാട് സ്ഥലം വാങ്ങി വീടു വച്ചിട്ടുണ്ട്. പക്ഷേ കുടുംബവീട്ടിലാണ് കൂടുതലും താമസം. ആർക്കും സഹായം ചെയ്യില്ല എന്നൊന്നുമില്ല. അയൽവാസികളിൽ മോശം സ്ഥിതിയിൽ ചിലരുണ്ട്. അവരെ സഹായിക്കണം–വിശ്വംഭരൻ പറയുന്നു.

∙ വെളിപ്പെടുത്തിയത് ഒളിച്ചിരിക്കാൻ പറ്റാത്തതിനാൽ

25 കോടി രൂപയുടെ ഓണം ബംപർ ലോട്ടറിയടിച്ച തിരുവനന്തപുരത്തെ ഓട്ടോ ഡ്രൈവർ ബി.അനൂപ് പണം ചോദിച്ചെത്തുന്നവരെക്കൊണ്ടു പൊറുതിമുട്ടി ഒളിവുജീവിതം നയിക്കേണ്ടി വന്നത് രണ്ടു വർഷം മുൻപാണ്. സ്വന്തം വീട്ടിൽ കഴിയാനും പുറത്തിറങ്ങാനും പറ്റാതെ ബന്ധുവീടുകളിൽ ഒളിച്ചുതാമസിക്കേണ്ടി വന്ന അനൂപിന്റെ കഥ പുറത്തു വന്നതോടെ പിന്നീടുള്ള പല ബംപർ നറുക്കെടുപ്പുകളിലെയും വിജയികൾ പേരു വെളിപ്പെടുത്താൻ മടിച്ചു. വിഷു ബംപർ നറുക്കെടുപ്പിൽ ആദ്യദിനം ഏജന്റിനെ കണ്ടെത്തിയിട്ടും വിജയിയെ കണ്ടെത്താൻ കഴിയാതിരുന്നതോടെ പേരു വെളിപ്പെടുത്താൻ തയാറാകാത്ത വിജയിയാകും എന്നാണ് എല്ലാവരും കരുതിയത്. എന്നാൽ എല്ലാവരെയും ഞെട്ടിച്ച് വിശ്വംഭരൻ പിറ്റേന്നു മാധ്യമങ്ങൾക്കു മുന്നിലെത്തി.

‘‘രാജ്യത്തിന്റെ അതിർത്തികൾ വരെ സഞ്ചരിച്ചിട്ടുള്ള എനിക്ക് പണം എന്തു ചെയ്യണമെന്നു നന്നായറിയാം.’’ എന്ന് ആത്മവിശ്വാസത്തോടെ ക്യാമറ നോക്കി ചിരിച്ചു. പക്ഷേ, ഒളിച്ചിരിക്കാൻ പറ്റാത്തതുകൊണ്ടാണു താനാണു വിജയിയെന്നു വെളിപ്പെടുത്തേണ്ടി വന്നതെന്ന്  വിശ്വംഭരൻ പറയുന്നു. ടിക്കറ്റ് വിറ്റ സ്ത്രീയെ തലേ ദിവസം തന്നെ തിരിച്ചറിഞ്ഞിരുന്നു. അവർ 10 ടിക്കറ്റാണ് ആകെ വിറ്റത്. ടിക്കറ്റ് വാങ്ങിയ ഓരോരുത്തരായി കണ്ടെത്തി സമ്മാനം അടിച്ചോ എന്ന് ഉറപ്പുവരുത്താനും  തുടങ്ങി. വിജയിയെ എളുപ്പത്തിൽ കണ്ടെത്താനാകുമെന്ന് ഉറപ്പായതോടെയാണ്, ഞാനാണു വിജയിയെന്നു പരസ്യമായി പ്രഖ്യാപിച്ചത്.