കേരളത്തിൽ സ്ഥലംവാങ്ങി വീട് വയ്ക്കാൻ പോവുകയാണോ? നിയമം അറിഞ്ഞില്ലെങ്കിൽ ‘മാൻഡ്രേക്’ പ്രതിമ കിട്ടിയ അവസ്ഥയാകും

∙ തീരദേശ നിയന്ത്രണ നിയമം അഥവാ സിആർഇസെഡ്

രാജ്യത്തെ കടലും കടലിനോട് ചേർന്ന ജലാശങ്ങളും അതിരിടുന്ന തീരപ്രദേശങ്ങൾ സംരക്ഷിക്കുന്നതിനായി കൊണ്ടുവന്ന നിയമമാണ് തീരദേശ സംരക്ഷണ നിയമം. കടൽത്തീരത്ത് 500 മീറ്റർ മുതൽ, കടലിൽ ചേരുന്ന കായൽ- പുഴകൾ തുടങ്ങിയവയോട് ചേർന്ന ഭൂമികളിൽ പ്രാദേശിക പ്രത്യേകതകൾക്കനുസരിച്ച് 50 മീറ്റർ വരെയും നിർമാണപ്രവർത്തനങ്ങൾക്ക് നിയന്ത്രണമോ നിരോധനമോ ഉണ്ടാകാം. നോക്കിയും കണ്ടും വാങ്ങിയില്ലെങ്കിൽ ‘വാട്ടർ ഫ്രണ്ട് വില്ല’യൊക്കെ മനക്കോട്ടയിൽ മാത്രമൊതുങ്ങും.

ഒരു ഉദാഹരണം പറയാം: വിശാലമായ കായലിനോട് ചേർന്ന് വശംകെട്ടി സംരക്ഷിക്കപ്പെട്ട 20 സെന്റ് സ്ഥലം വാങ്ങി എന്നുകരുതുക. അതൊരു സമചതുരമാണെങ്കിൽ ഏതാണ്ട് 28.5 മീ നീളവും വീതിയും കാണും. അവിടെ സിആർഇസെഡ് പരിധി 50 മീറ്റർ ആണെങ്കിൽ ഈ ഇരുപത് സെന്റിന്റെ 28.5 മീറ്ററും കഴിഞ്ഞ് പിന്നെയൊരു 21.5 മീറ്റർ കായലിൽനിന്നും വിട്ടുമാത്രമേ കെട്ടിടം നിർമിക്കാൻ പറ്റൂ. ഒടുവിൽ, ‘ജാംഗോ ഞാൻ പെട്ടൂ’ എന്നും പറഞ്ഞിരിക്കേണ്ടിവരും.

∙ നെൽവയൽ തണ്ണീർത്തട സംരക്ഷണ നിയമം 2008 

സത്യത്തിൽ ഇവനാണ് ‘ഭൂമിയുടെ ജാതകമെഴുതുന്നത്’ എന്നുപറയാം. ജ്യോതിഷത്തിൽ ‘ലഗ്നം’ എന്നു പറയുംപോലെയാണ് ഭൂമിയുടെ തരം. നെൽവയൽ തണ്ണീർത്തട സംരക്ഷണ നിയമത്തിൽ ഡേറ്റ ബാങ്ക് എന്ന് വിളിക്കുന്ന ഭീകരനുണ്ട്. ആളെ എളുപ്പത്തിൽ പരിചയപ്പെടുത്തിയാൽ 2008ൽ നിയമം വരുന്നതിനും പത്ത് വർഷം മുൻപ് അതായത് 1998 വരെയും കൃഷി ചെയ്തിരുന്നതോ അല്ലെങ്കിൽ  കൃഷിയോഗ്യമായതോ ആയ ഭൂമികളുടെ റജിസ്റ്റർ ആണ് ഡേറ്റ ബാങ്ക്.

ഭൂമി ഡേറ്റ ബാങ്കിൽ പെട്ടതാണെങ്കിൽ 'വാങ്ങിയവൻ പെട്ടു' അത്രതന്നെ.. 2008ന് ശേഷം ഡേറ്റ ബാങ്കിൽ ഉൾപ്പെട്ട നിലം / വെറ്റ്‌ലാൻഡ് ഭൂമി വാങ്ങുന്നവർക്ക് കെട്ടിട നിർമാണത്തിന് യാതൊരു ഇളവുമില്ല. ഇനി 'ഡേറ്റ ബാങ്കിൽ ഇല്ല' എന്നാൽ റവന്യൂ രേഖകളിൽ നിലം / വെറ്റ്‌ലാൻഡ് ആണ് തരമെങ്കിൽ ലഗ്നാൽ പറ്റില്ലെങ്കിലും ചന്ദ്രാൽ ഒന്ന് ചിന്തിച്ചാൽ പരിഹാരം കാണാം. എന്നുവച്ചാൽ ഡേറ്റ ബാങ്കിൽ പെടാത്ത നിലം ഭൂമികളിൽ പരമാവധി 10 സെന്റ്  ഉപയോഗപ്പെടുത്തി 1290 ചതുരശ്ര അടിയുള്ള ഒരു വീട് നിർമിക്കാം. എന്നാൽ അതിൽ കൂടുതൽ വേണമെങ്കിൽ ‘ഉച്ചാടനവും ആവാഹനവുമൊക്കെ’ വേണ്ടി വരും. അതായത് ഡേറ്റ ബാങ്കിൽ ഉൾപ്പെടാത്ത ഭൂമികൾ സർക്കാരിലേക്ക് ന്യായവിലയുടെ 10% അടവാക്കി തരം മാറ്റാം. ഇത്തരം പ്ലോട്ടിലും പക്ഷേ 3000 ചതുരശ്ര അടി കെട്ടിടമേ പറ്റൂ. അധികമുള്ള ഓരോ ചതുരശ്ര അടിക്കും 100 രൂപ കണക്കിൽ അധികമായി അടയ്ക്കണം.

തീർന്നില്ല, ഭൂപതിവ് പട്ടയ ഭൂമി, പ്ലാന്റേഷൻ അഥവാ തോട്ടഭൂമി, മിച്ചഭൂമി, മൈനർ ഉടമസ്ഥത നിലനിൽക്കുന്ന ഭൂമി തുടങ്ങി ചെറുമൂർത്തികളും അനവധിയാണ്. അത്ര വ്യാപകമായി കാണപ്പെടുന്നതല്ലെങ്കിലും ഈ ഇനങ്ങളും ശല്യം ചെയ്താൽ പരിഹാരത്തിന് കുറേ സമയമെടുക്കും. ഇപ്പറഞ്ഞതൊക്കെയും റവന്യു വകുപ്പുമായി ബന്ധപ്പെട്ടതാണെങ്കിൽ അടുത്തത് തദ്ദേശ സ്വയംഭരണ വകുപ്പിന്റെ നിയന്ത്രണങ്ങളാണ്. ഭൂമി വിഭജിച്ച് വിൽപന നടത്തുന്നതിന് തദ്ദേശ സ്ഥാപനങ്ങളുടെ അനുമതി വേണം എന്നൊരു നിബന്ധന ഉള്ളതായി പലർക്കും അറിയില്ല. 

ആദ്യകാലത്തൊന്നും ഇത് വലിയ പ്രശ്നമല്ലെങ്കിലും ഇക്കാലത്ത് വഴിയുടെ വീതി, ഡ്രെയിനേജ് തുടങ്ങിയ വിഷയങ്ങളിലെ പ്ലോട്ടുടമകൾ തമ്മിലെ തർക്കങ്ങൾ വർധിച്ചു വരുമ്പോൾ നിയമം പരിപാലിക്കേണ്ട ആവശ്യകത ബോധ്യപ്പെടുന്നുണ്ട്. അങ്ങനെയാണ് ഭൂമിയുടെ വിൽപന കെട്ടിടനിർമാണം എന്നിവയുടെ തർക്കങ്ങൾക്ക് പരിഹാരം കാണാനായി 2016ൽ കേന്ദ്രസർക്കാർ റിയൽ എസ്റ്റേറ്റ് റെഗുലേറ്ററി ആക്ട് കൊണ്ടു വന്നത്. അതുപ്രകാരം കേരള റിയൽ എസ്റ്റേറ്റ് റെഗുലേറ്ററി അതോറിറ്റി, തിരുവനന്തപുരം കേന്ദ്രമായി രൂപീകരിച്ചിട്ടുണ്ട്. നിയമപ്രകാരം 500m2ൽ (പന്ത്രണ്ടര സെന്റ്) കൂടുതൽ ഭൂമിയുടെ വികസനവും എട്ടിൽ കൂടുതൽ പ്ലോട്ടായുള്ള വിഭജനങ്ങളും റിയൽ എസ്റ്റേറ്റ് റെഗുലേറ്ററി അതോറിറ്റിയിൽ രജിസ്റ്റർ ചെയ്തിരിക്കണം. പൊതുജനങ്ങൾക്ക്  RERA യുടെ വെബ്‌സൈറ്റിൽ (http://rera.kerala.gov.ir) നിന്നും അംഗീകൃത ഡവലപ്പർമാർ, അംഗീകൃത പ്രൊജക്ടുകൾ എന്നിവ സൗജന്യമായി പരിശോധിച്ച് ബോധ്യപ്പെടാവുന്നതാണ്. 

ഇത്രയൊക്കെ വായിച്ചിട്ടും ‘പിന്നേ പത്ത് സെന്റ് സ്ഥലം വാങ്ങാൻ ഇതൊക്കെ നോക്കാൻ പോവല്ലേ, ഒന്ന് പോടാ വേ’ എന്നാണെങ്കിൽ ഒന്നേ പറയാനുള്ളൂ: ‘അറിയാത്ത പിള്ള ചൊറിയുമ്പോൾ അറിയും’.

(നിയമ പ്രകാരമുള്ള മുന്നറിയിപ്പ് - ഏക്കർ, സെന്റ് അളവുകൾ അളവുതൂക്ക നിയമപ്രകാരം ഇന്ത്യയിൽ നിരോധിക്കപ്പെട്ടതാണ്.)

(ലേഖകൻ തദ്ദേശ സ്വയംഭരണ വകുപ്പിൽ ഓവർസിയറാണ്)