‘പാവപ്പെട്ടവന്റെ’ രോഗമല്ല, ആർക്കും വരാം; അഞ്ചിലൊരാൾക്ക് അണുബാധ; 2025ൽ കേരളം തോൽപിക്കുമോ ക്ഷയത്തെ?

ഇതൊക്കെ ക്ഷയരോഗത്തിനു കാര്യമായ ചികിത്സയില്ലാതിരുന്ന പണ്ടത്തെ കഥയല്ലേയെന്നു പറഞ്ഞു വായനക്കാർക്ക് ഇനി പറയുന്നതു വായിക്കാതെ കടന്നു പോകാം. പക്ഷേ, നമുക്കു ചുറ്റുമുള്ള ക്ഷയ രോഗാണുക്കളെ കാണാതിരിക്കരുത്. 2023ൽ സംസ്ഥാനത്തു ക്ഷയരോഗം ബാധിച്ചത് 21,967 പേർക്കാണ്. മരണം ഏകദേശം 2000. രാജ്യത്ത് ഓരോ 3 മിനിറ്റിലും 2 പേർ ടിബി രോഗം മൂലം മരിക്കുന്നുവെന്നാണു കണക്ക്. മുക്കിലും മൂലയിലും സൗജന്യമായി ടിബി ചികിത്സ ലഭ്യമാകുന്ന കാലത്താണിതെന്ന് ഓർക്കുമ്പോൾ അറിയാതെയെങ്കിലും ഒന്നു ഞെട്ടണം!.  

∙ പാവപ്പെട്ടവന്റെ രോഗമല്ല!

പണ്ടുകാലത്തു ക്ഷയരോഗത്തെ കുറിച്ചു പൊതുവേ പറഞ്ഞിരുന്നതു പാവപ്പെട്ടവന്റെ അസുഖമെന്നായിരുന്നു. അന്ന് അത് ഒട്ടൊക്കെ ശരിയുമായിരുന്നു. കാരണം സാമ്പത്തികമായി പിന്നാക്കം നിൽക്കുന്ന ജനവിഭാഗങ്ങളിലായിരുന്നു ക്ഷയരോഗം കൂടുതലായി കണ്ടുവന്നിരുന്നത്. എന്നാൽ‌ ഇപ്പോഴത് അങ്ങനെയല്ല. ജീവിതശൈലി രോഗങ്ങൾ വ്യാപകമായ ഈ കാലത്ത് രോഗപ്രതിരോധ ശേഷി കുറഞ്ഞ ആർക്കും ക്ഷയരോഗം വരാം. അതിനുള്ള സാധ്യത എപ്പോഴും കൂടെയുണ്ടെന്നതാണു യാഥാർഥ്യം.

സംസ്ഥാനത്ത് അഞ്ചിൽ ഒരാൾക്ക് ക്ഷയരോഗത്തിന്റെ അണുബാധയുണ്ടെന്നതാണു വസ്തുത. തിരുവനന്തപുരം ജില്ലയിൽ നടന്ന പഠനത്തിൽ പരിശോധന നടത്തിയവരിൽ 20% പേർക്ക് ടിബി അണുബാധയുണ്ടെന്നാണു കണ്ടെത്തിയത്. ടിബി അണുബാധയുള്ള എല്ലാവർക്കും ക്ഷയരോഗമുണ്ടാകണമെന്നില്ല. എന്നാൽ ഇവരിൽ രോഗ പ്രതിരോധ ശേഷി കുറവാണെങ്കിൽ അതു ക്ഷയരോഗമായി മാറാം. അടുത്ത വർഷത്തിനകം ക്ഷയരോഗത്തിൽ നിന്നു മുക്തി നേടാനാണു സംസ്ഥാനം ലക്ഷ്യമിടുന്നത്. അതായത് ക്ഷയരോഗികളുടെ എണ്ണം 90% കുറയ്ക്കുക. ക്ഷയരോഗം മൂലമുള്ള മരണം 95% കുറയ്ക്കുക. ആ ലക്ഷ്യത്തിലേക്കുള്ള കുതിപ്പിൽ സംസ്ഥാനം മുന്നിലാണെങ്കിലും അത് എത്രയേറെ ബുദ്ധിമുട്ടു നിറഞ്ഞതാണെന്നു നേരത്തേ പറഞ്ഞ പഠന ഫലം വ്യക്തമാക്കുന്നു. 

രാജ്യത്തെ മറ്റു സംസ്ഥാനങ്ങളെ അപേക്ഷിച്ചു ക്ഷയരോഗത്തെ പ്രതിരോധിക്കുന്നതിൽ മുന്നിൽ നിൽക്കുന്നതു കേരളമാണ്. രാജ്യത്ത് ക്ഷയരോഗ ബാധിതരുടെ എണ്ണം കുറവുള്ള സംസ്ഥാനങ്ങളിലൊന്നാണു കേരളം. ക്ഷയരോഗ നിയന്ത്രണ രംഗത്തെ സംസ്ഥാനത്തിന്റെ മികവിനു ദേശീയ തലത്തിൽ പലവട്ടം അംഗീകാരം ലഭിച്ചിട്ടുമുണ്ട്. പക്ഷേ, പൂർണമായും ക്ഷയരോഗം നിർമാർജനം ചെയ്യുകയെന്ന ലക്ഷ്യത്തിലേക്കെത്താൻ കേരളം ഇനിയും ഏറെ ദൂരം സഞ്ചരിക്കാനുണ്ട്. ഇപ്പോഴും പ്രതിവർഷം 20,000– 22,000 ക്ഷയരോഗികൾ സംസ്ഥാനത്തു പുതുതായി ഉണ്ടാകുന്നുണ്ട്. എറണാകുളം ജില്ലയിൽ പ്രതിമാസം കണ്ടെത്തുന്നത് 180– 200 പുതിയ കേസുകളാണ്. അതായത് പ്രതിവർഷം ഒരു ജില്ലയിൽ മാത്രം. 2,200 മുതൽ 2,400 കേസുകൾ.

കേരളത്തെക്കാൾ ക്ഷയരോഗികളുടെ എണ്ണം കുറവുള്ള സംസ്ഥാനങ്ങൾ പട്ടികയിലുണ്ടാകാം. എന്നാൽ ഒരു ലക്ഷം പേരിൽ എത്രപേർക്കു ക്ഷയരോഗ ബാധ എന്ന തോതു പരിശോധിക്കുമ്പോൾ രാജ്യത്തെ സംസ്ഥാനങ്ങളിൽ കേരളമാണു പട്ടികയിൽ ഏറ്റവും പിന്നിൽ. അതായത് ക്ഷയരോഗത്തിനെതിരെയുള്ള കേരളത്തിന്റെ പോരാട്ടം ഒരു പരിധി വരെ വിജയമാണെന്നു വ്യക്തം. സംസ്ഥാനത്ത് ഒരു ലക്ഷം പേരിൽ 67 പേർക്കു മാത്രമാണു ക്ഷയ രോഗം റിപ്പോർട്ട് ചെയ്യുന്നത്. രാജ്യതലസ്ഥാനമായ ഡൽഹിയാണ് ഏറ്റവും മുന്നിൽ– ഒരുലക്ഷത്തിൽ 546 പേർക്കാണു ഡൽഹിയിൽ ക്ഷയരോഗ ബാധയുള്ളത്.

∙ എന്താണ് ക്ഷയരോഗം?

‘മൈകോബാക്ടീരിയം ട്യൂബർകുലോസിസ്’ എന്ന ബാക്ടീരിയയാണ് ക്ഷയരോഗത്തിനു കാരണം. ശ്വാസകോശത്തെയാണു പ്രധാനമായും ബാധിക്കുക. ബാക്ടീരിയ ശ്വാസകോശത്തിൽ കടന്നു നമ്മുടെ കോശങ്ങളെ നശിപ്പിക്കുകയും മരണത്തിലേക്കു നയിക്കുകയുമാണു രോഗത്തിന്റെ രീതി. പൊതുവേ ബാക്ടീരിയ ശരീരത്തിൽ പ്രവേശിക്കുന്നതോടെ നമ്മുടെ പ്രതിരോധ ശേഷി ഉണരുകയും ബാക്ടീരിയകളെ നശിപ്പിക്കുകയും ചെയ്യും. എന്നാൽ നമ്മുടെ പ്രതിരോധശേഷിയെ മറികടന്ന് ചില ബാക്ടീരിയകൾ ശ്വാസകോശത്തിൽ ജീവിക്കുകയും പെരുകുകയും ചെയ്യും. ഇവ അപ്പോഴൊന്നും രോഗമുണ്ടാക്കില്ല. എപ്പോഴെങ്കിലും നമ്മുടെ രോഗപ്രതിരോധ ശേഷി കുറയുമ്പോൾ ബാക്ടീരിയകൾ ആക്രമണം ശക്തമാക്കും. നമ്മളെ കീഴ്പ്പെടുത്തും. ചിലപ്പോൾ മരണത്തിലേക്കു നയിക്കും.