പലിശ കുറയ്ക്കുമെന്ന് യുഎസ്; ഇന്ത്യയുടെ റിസർവ് ബാങ്കോ? ഇക്കുറി നമ്മുടെ 'ചാലക്കുടിക്കാരന്' പിന്തുണ കൂടുമോ?

∙ കുറഞ്ഞും കൂടിയും പലിശനിരക്ക്

കോവിഡ് മഹാമാരി ലോകത്തെയാകെ പിടിച്ചുകുലുക്കുന്നതിന് തൊട്ടുമുമ്പും അതിനുശേഷവും പലിശനിരക്കിൽ വൻ കയറ്റിറക്കങ്ങൾക്കാണ് രാജ്യാന്തര തലത്തിലെന്ന പോലെ ഇന്ത്യയും സാക്ഷിയായത്. റിസ‍ർവ് ബാങ്കിന്റെ അടിസ്ഥാന പലിശനിരക്കായ റിപ്പോ (Repo rate) ആണ് ബാങ്കുകൾ വിതരണം ചെയ്യുന്ന വായ്പകളുടെ പലിശനിരക്ക് നിർണയത്തിന്റെ മുഖ്യഘടകം. റിസർവ് ബാങ്കിൽ നിന്ന് വാണിജ്യ ബാങ്കുകൾ വാങ്ങുന്ന വായ്പയുടെ നിരക്കാണിത്. റിപ്പോ കൂടുകയും കുറയുകയും ചെയ്യുന്നതിന് ആനുപാതികമായി ബാങ്കുകൾ ഉപയോക്താക്കൾക്ക് നൽകുന്ന വായ്പയുടെ പലിശയും പരിഷ്കരിക്കും.

കോവിഡിന് മുമ്പ്, 2018ൽ 6 ശതമാനത്തിന് മുകളിലായിരുന്നു റിപ്പോ നിരക്ക്. 2019 ഫെബ്രുവരിയിൽ പണനയ നിർണയ സമിതി റിപ്പോ നിരക്ക് 6.25 ശതമാനത്തിൽ നിന്ന് 6 ശതമാനമായി കുറച്ചു. തുടർന്ന്, ആ വർഷം ഒക്ടോബർ വരെയുള്ള ഓരോ യോഗത്തിലും പലിശ കുറഞ്ഞു. ഒക്ടോബറിൽ നിരക്ക് 5.15 ശതമാനത്തിലെത്തി. കോവിഡും ലോക്ക്ഡൗണും മൂലം പ്രതിസന്ധിയിലായ വാണിജ്യ, വ്യവസായ ലോകത്തിനും പൊതുജനത്തിനും സാമ്പത്തികാശ്വാസം പകരാനുള്ള നടപടികളുടെ ഭാഗമായി, 2020 മാർച്ചിൽ പ്രത്യേക യോഗം ചേർന്ന് എംപിസി റിപ്പോനിരക്ക് ഒറ്റയടിക്ക് 0.75 ശതമാനം കുറച്ച് 4.40 ശതമാനമാക്കി.

മേയിൽ നിരക്ക് 4 ശതമാനത്തിലേക്കും കുറച്ചു. രണ്ടുവർഷം പിന്നീട് റിപ്പോനിരക്കിൽ റിസർവ് ബാങ്ക് തൊട്ടില്ല. 2022 മേയിൽ റിപ്പോ നിരക്ക് റിസർവ് ബാങ്ക് 0.40 ശതമാനം കൂട്ടി 4.40 ശതമാനമാക്കി. തുടർന്ന്, 2023 ഫെബ്രുവരി വരെ തുടർച്ചയായി ഓരോ യോഗത്തിലും എംപിസി പലിശനിരക്ക് ഉയർത്തി, 6.50 ശതമാനത്തിലെത്തിച്ചു. പിന്നീടിതുവരെ ഇതിൽ മാറ്റം വരുത്തിയിട്ടില്ല.

∙ റിപ്പോ നിങ്ങളെ ബാധിക്കുന്നതെങ്ങനെ?

റിപ്പോ നിരക്ക് മാറുന്നത് അനുസരിച്ച് നിങ്ങളുടെ ഇഎംഐ ബാധ്യത കുറയുകയോ കൂടുകയോ ചെയ്യുമെന്ന് പറഞ്ഞല്ലോ. അതെങ്ങനെ എന്ന് നോക്കാം. ഉദാഹരണത്തിന്, എസ്ബിഐയിൽ നിന്ന് നിങ്ങളൊരു ഭവന വായ്പ എടുത്തിട്ടുണ്ടെന്ന് കരുതുക. 25 ലക്ഷം രൂപയുടെ വായ്പ 20 വർഷ തിരിച്ചടവ് കാലാവധിയിൽ 9 ശതമാനം പലിശയ്ക്കാണ് എടുത്തത് എന്നിരിക്കട്ടെ. അതായത് 22,493 രൂപയായിരിക്കും നിങ്ങളുടെ ഇഎംഐ. മൊത്തം പലിശ ബാധ്യത 28.98 ലക്ഷം രൂപയും. നിങ്ങൾ ബാങ്കിന് 20 വർഷംകൊണ്ട് ആകെ തിരിച്ചടയ്ക്കുന്ന തുക 53.98 ലക്ഷം രൂപയുമായിരിക്കും.

ബാങ്കിലേക്ക് ആകെ തിരിച്ചയ്ക്കുന്ന തുക 53.02 ലക്ഷം രൂപയായും കുറയും. ചെറുതെങ്കിലും ഇഎംഐയിലുണ്ടാകുന്ന കുറവ്, നിങ്ങൾക്ക് ഓരോ മാസവും ആശ്വാസം തന്നെയായിരിക്കും. പക്ഷേ, ഒന്നോർക്കുക. നിങ്ങളുടെ വായ്പയുടെ പലിശ റിപ്പോയ്ക്ക് ആനുപാതികമായി മാറുന്ന ഫ്ലോട്ടിങ് നിരക്കാണെങ്കിൽ മാത്രമേ മാറ്റമുണ്ടാകൂ. അല്ലെങ്കിൽ, വായ്പയുടെ തിരിച്ചടവ് കാലം മുഴുവനോ ബാങ്ക് സ്വന്തം നിലയ്ക്ക് മാറ്റം വരുത്തുന്നത് വരെയോ ഒരേ പലിശനിരക്ക് തന്നെ തുടരും.

∙ പണപ്പെരുപ്പത്തിന്റെ കളി

മുഖ്യ പലിശനിരക്കുകൾ പരിഷ്കരിക്കാൻ പണനയ നിർണയ സമിതി പ്രധാനമായും വിലയിരുത്തുന്നത് ഉപഭോക്തൃവില സൂചിക അടിസ്ഥാനമായുള്ള റീട്ടെയ്ൽ പണപ്പെരുപ്പമാണ്. ഇത് രണ്ട് ശതമാനത്തിനും 6 ശതമാനത്തിനും ഇടയിൽ തുടരുന്നതാണ് ഇന്ത്യൻ സമ്പദ്‍‍വ്യവസ്ഥയ്ക്ക് അഭികാമ്യമെന്ന് റിസർവ് ബാങ്ക് വ്യക്തമാക്കിയിട്ടുണ്ട്. 4 ശതമാനമായി നിയന്ത്രിക്കുകയാണ് എംപിസിയുടെ ലക്ഷ്യവും ദൗത്യവും. 2022ൽ ഉടനീളം ഇത് 6 ശതമാനത്തിന് മുകളിലായിരുന്നു. അതാണ് ആ വർഷം തുടർച്ചയായി റിപ്പോനിരക്ക് കൂട്ടാനും കാരണം. 2023ന്റെ ആദ്യ മാസങ്ങളിൽ പണപ്പെരുപ്പം താഴേക്കിറങ്ങി. ആ വർഷം മേയിൽ പണപ്പെരുപ്പം 4.31 ശതമാനമായിരുന്നു.

എന്നാൽ, ജൂലൈയിൽ 7.44 ശതമാനത്തിലേക്ക് കത്തിക്കയറി. റിസർവ് ബാങ്കിനെ കൂടുതൽ ആശങ്കപ്പെടുത്തിയത് ഭക്ഷ്യവിലപ്പെരുപ്പം (Food Inflation) 11.51 ശതമാനത്തിലേക്ക് കുതിച്ചതായിരുന്നു. കാർഷികോൽപാദനം കുറഞ്ഞതും വിതരണശൃംഖലയിലെ തടസ്സങ്ങളുമാണ് ഭക്ഷ്യോൽപന്നങ്ങളുടെ വില കൂടാനിടയാക്കിയത്. എന്നാൽ, തുടർന്നുള്ള മാസങ്ങളിൽ റീട്ടെയ്ൽ പണപ്പെരുപ്പവും ഭക്ഷ്യവിലപ്പെരുപ്പവും വീണ്ടും കുറഞ്ഞത് ആശ്വാസമായി. 2023 ഓഗസ്റ്റിൽ 6.83 ശതമാനമായിരുന്ന പണപ്പെരുപ്പം സെപ്റ്റംബറിൽ 5.02 ശതമാനമായി. ആ ഓഗസ്റ്റിന് ശേഷം പണപ്പെരുപ്പം 6 ശതമാനത്തിന് മുകളിൽ പിന്നീടെത്തിയിട്ടില്ല. ഇക്കഴിഞ്ഞ മേയിൽ 4.80 ശതമാനമായിരുന്നു. ഭക്ഷ്യവിലപ്പെരുപ്പം പക്ഷേ 8.69 ശതമാനവും. ജൂണിൽ പണപ്പെരുപ്പം 5.08 ശതമാനത്തിലേക്കും ഭക്ഷ്യവിലപ്പെരുപ്പം 9.55 ശതമാനത്തിലേക്കും കൂടി. ഉത്തരേന്ത്യയിലെ മഴക്കെടുതി, വരൾച്ച, വെള്ളപ്പൊക്കം തുടങ്ങിയ വെല്ലുവിളികൾ കൃഷിയെ ബാധിച്ചതാണ് തിരിച്ചടിയായത്.

∙ യുഎസ് പലിശയുടെ ഭാവി

2020 മാർച്ചിൽ വെറും 0-0.25 ശതമാനമായിരുന്നു യുഎസിലെ കേന്ദ്രബാങ്കായ യുഎസ് ഫെഡറൽ റിസർവിന്റെ അടിസ്ഥാന നിരക്ക്. 2022ൽ പണപ്പെരുപ്പം നിയന്ത്രണാതീതമായി കൂടിയതോടെ യുഎസ് ഫെഡും പലിശഭാരം കുത്തനെ ഉയർത്തി. 2022ൽ പണപ്പെരുപ്പം 9.1 ശതമാനമെന്ന ഉയരം തൊട്ടിരുന്നു. 2022 മാർ‌ച്ചിൽ അടിസ്ഥാന പലിശ 0.25-0.50 ശതമാനമാക്കിയ യുഎസ് ഫെഡ്, തുടർന്ന് ഓരോ യോഗത്തിലും 2023 ജൂലൈ വരെ പലിശ കൂട്ടി. അത് ദശാബ്ദത്തിലെ തന്നെ ഉയരമായ 5.25-5.50 ശതമാനത്തിലെത്തിച്ചു.