ഉൾക്കടലിൽ മടകൾ താഴ്ന്നു; വിഴിഞ്ഞത്ത് നിറഞ്ഞ് ‘കണവപ്പൊന്ന്’: കീശയിൽ കാശ് നിറയും, വള്ളങ്ങള്‍ക്ക് ഭാഗ്യം ഈ ‘ഫറവോ’

∙ വിളിപ്പേര് ഫറവോ, മിമിക്രിക്കാരൻ...

ഈജിപ്തിലെ ഫറവോമാരുടെ കോട്ടിന്റെ ഡിസൈൻ നിറത്തിനു സമാനമാണ് കല്ലൻ കണവ മീനിന്റെയും നിറമെന്നതിനാൽ ഫറവോ എന്നൊരു വിളിപ്പേരും ഇവയ്ക്കുണ്ട്. ശാസ്ത്രീയ പേര് അക്കാന്തോസെപിയാൺ ഫറോണിസ്. ശരീരത്തിന്റെ അടിവശം വെളുപ്പും പുറം ബ്രൗൺ കലർന്ന വരകളോടുകൂടിയതാണെങ്കിലും പിടിച്ചിട്ടാൽ ശരീരത്തിൽ മഴവിൽ വർണങ്ങൾ വിടരും. ശത്രുക്കളെ വിരട്ടാൻ മഷി പ്രയോഗത്തിനു പുറമേ ‘മിമിക്രി’ കാണിച്ചു രക്ഷപ്പെടുന്നതും ഇതിന്റെ രീതിയാണ്. മറ്റു മത്സ്യങ്ങളുടെ രീതികൾ അനുകരിച്ചു ശത്രുവിന് ആശയക്കുഴപ്പമുണ്ടാക്കി രക്ഷപ്പെടുണ് ആ രീതി. 

∙ എണ്ണാനാകുമത്രേ! 

ബുദ്ധിക്കു പേരു കേട്ടവയാണ് കല്ലൻ കണവകൾ. ഇവയ്ക്ക് എണ്ണാൻ പോലും സാധിക്കുമെന്നാണ് ഗവേഷകർ പറയുന്നത്. ഇതുസംബന്ധിച്ച ഒരു പരീക്ഷണവും ഗവേഷകർ നടത്തിയിരുന്നു. നാലു ചെമ്മീനുള്ള പെട്ടിയും അഞ്ച് ചെമ്മീനുള്ള പെട്ടിയും തമ്മിലുള്ള വ്യത്യാസം ഒരു മാസം പ്രായമുള്ള കല്ലൻ കണവയ്ക്ക് എളുപ്പത്തിൽ മനസ്സിലാക്കാൻ കഴിഞ്ഞെന്നാണ് 2016ൽ നടത്തിയ പഠനം വഴി കണ്ടെത്തിയത്. സുതാര്യമായ ടാങ്കിൽ കണവയ്ക്കുള്ള ഭക്ഷണമായി ചെമ്മീൻ കുഞ്ഞുങ്ങളെയിട്ട്, ആ ടാങ്ക് വെള്ളത്തിലിറക്കിയും എടുത്തു മാറ്റിയുമായിരുന്നു പരീക്ഷണം. തയ്‌വാനിലെ നാഷനൽ സ്വിങ് ഹുവാ സർവകലാശാലയാണ് പഠനം നടത്തിയത്.

∙ സഞ്ചാരം പിന്നിലേക്ക്; ഭക്ഷണം ചെറു മീനുകൾ

കണവ ശ്രേണിയിലെ മറ്റിനങ്ങളെ പോലെ കല്ലൻ കണവയുടെയും സഞ്ചാരം പിന്നിലേക്കാണ്. ശത്രുക്കൾ മുന്നിൽ പെട്ടാൽ മഷി ചീറ്റും..ഇതു കലർന്ന് ആ ഭാഗത്തെ ജലം നിറം മാറി കാഴ്ചമറയുന്ന സ്ഥിതിയിൽ ഇവ രക്ഷപ്പെടുന്നതാണ് രീതി. കൂട്ടമായി സഞ്ചരിക്കുന്നതാണ് ശീലം. ചെറു മത്സ്യങ്ങളെയുൾപ്പെടെ കണ്ണിൽ കണ്ടതെല്ലാം ഭക്ഷണമാക്കും. ജീവി വർഗത്തിലെ ഏറ്റവും കാഴ്ചശക്തിയുള്ളവയാണ് കല്ലൻ കണവകൾ എന്നാണ് പറയപ്പെടുന്നത്. നാട്ടിൽ ഇവയ്ക്ക് അത്ര പ്രിയമില്ലെങ്കിലും കയറ്റുമതി കമ്പോളത്തിൽ ഏറെ ആവശ്യമുള്ള ഇനങ്ങളിൽ പ്രധാനിയാണ്. കട്ടിയുള്ള മാംസമാണ്. ശാസ്ത്രീയ സംസ്കരണങ്ങൾക്കു ശേഷമാകും ഇവ കടൽ കടക്കുക.

∙ ആധിപത്യത്തിനായി വെല്ലുവിളി

ഏകദേശം 100 ഇനം കല്ലൻ കണവകളുണ്ടെന്നാണ് ജീവശാസ്ത്രലോകം കണ്ടെത്തിയിട്ടുള്ളത്. അക്കൂട്ടത്തിൽ 2.5 മുതൽ 90 സെന്റീമീറ്റർ വരെ നീളമുള്ളവയുണ്ട്. എല്ലാ ഇനങ്ങൾക്കും എട്ട് ചെറുകൈകളും രണ്ട് നീളമുള്ള കൈകളുമുണ്ട്. കൈകളിലെ ‘സക്കർ ഭാഗം’ ഉപയോഗിച്ചാണ് ഇര പിടിത്തം. ദൂരത്തു കൂടി പോകുന്ന ഇരകളെ വരെ എത്തിപ്പിടിക്കുന്ന രീതിയുണ്ട്. ഇണചേരൽ കാലത്ത് ആധിപത്യത്തിനു വേണ്ടി ആൺ കല്ലൻ കണവകൾ പരസ്പരം വെല്ലുവിളിക്കുമത്രേ. രണ്ടിലൊരാൾ പിന്തിരിയും വരെ ഭീഷണി തുടരും. ഒടുവിൽ വിജയിക്കുന്ന വലിയ കല്ലൻ കണവ ഇണകളുമായി ചേരും. മുട്ടയിടുന്നത് വരെ ആൺ കല്ലൻ കണവ പെണ്ണിനെ കാക്കുന്നതാണ് ഇവയുടെ രീതി. 100 മുതൽ 300 വരെ മുട്ടകളിടും. 

∙ വിഴിഞ്ഞത്തു വിരിയിച്ച മുട്ടകൾ

വിഴിഞ്ഞത്തെ കേന്ദ്ര സമുദ്ര മത്സ്യ ഗവേഷണ കേന്ദ്രത്തിൽ വർഷങ്ങൾക്കു മുൻപ് കൃത്രിമ പ്രജനനത്തിലൂടെ കല്ലൻ കണവയുടെ മുട്ടകൾ വിരിയിച്ചെടുത്തിരുന്നു. ഹീമോഗ്ലോബിന് പകരം ഓക്‌സിജൻ എത്തിക്കുന്നതിന് ചെമ്പ് അടങ്ങിയ പ്രോട്ടീൻ ഹീമോസയാനിൻ ഉപയോഗിക്കുന്നതിനാൽ ഇവയുടെ രക്തത്തിന് പച്ച- നീല നിറമാണ്. ഇവർക്ക് 3 ഹൃദയങ്ങളുണ്ട്. മൂന്നിന്റെയും ധർമം രക്തം ശരീരത്തിൽ എല്ലായിടവും എത്തിക്കുക എന്നതും. ഒരു കല്ലൻ കണവയുടെ ശരാശരി ആയുസ്സ് രണ്ടു വർഷം. ചില കിഴക്കൻ ഏഷ്യൻ രാജ്യങ്ങളിൽ ഉണക്കിയ കല്ലൻ കണവ മത്സ്യം ജനപ്രിയ ലഘുഭക്ഷണമാണ്. ഈ മത്സ്യത്തിന്റെ സൂപ്പ് തയ്‌വാനിലെ ഏറ്റവും പ്രധാനപ്പെട്ട ‘സിഗ്നേച്ചർ’ വിഭവങ്ങളിലൊന്നാണ്.