സുന്ദര തായ്‌ലൻഡിനൊരു ‘സുന്ദരി പ്രധാനമന്ത്രി’; കോടികളുടെ ആസ്തി, 21 വമ്പൻ കമ്പനികളിൽ നിക്ഷേപം; വേറെ ലെവലാണ് പയേതുങ്താൻ

∙ രാഷ്ട്രീയത്തിലേക്ക്...

2023 ഒക്ടോബറിൽ ഫിയു തായ് പാർട്ടിയുടെ ഇന്നവേഷൻ ആൻഡ് പബ്ലിക് പാർട്ടിസിപേഷൻ കമ്മിറ്റിയുടെ മേധാവിയായി നിയമിച്ചതോടെയാണ് പയേതുങ്താൻ രാഷ്ട്രീയത്തിൽ സജീവമായത്. പൊതുജനങ്ങളുടെ തായ് രാഷ്ട്രീയത്തോടുള്ള സമീപനത്തെ പുനരുജ്ജീവിപ്പിക്കാനും നവീകരിക്കാനുമുള്ള പാർട്ടി ശ്രമങ്ങളുടെ ഭാഗമായി പയേതുങ്താനിനെ മുൻനിരയിൽ തന്നെ നിർത്തുകയായിരുന്നു. ഇതിന്റെ ഭാഗമായാണ്  ഇപ്പോൾ പ്രധാനമന്ത്രി സ്ഥാനവും നൽകിയത്. ‘‘എനിക്ക് എട്ട് വയസ്സുള്ളപ്പോൾ പിതാവ് രാഷ്ട്രീയത്തിൽ പ്രവേശിച്ചു. അന്നുമുതൽ, എന്റെ ജീവിതവും രാഷ്ട്രീയവുമായി ഇഴചേർന്നിരിക്കുന്നു,’’ എന്നാണ് 2024 മാർച്ചിലെ ഒരു പ്രസംഗത്തിൽ പയേതുങ്താൻ പറഞ്ഞത്.

∙ രാഷ്ട്രീയ വീക്ഷണവും സ്വാധീനവും

പുതുമ, സാങ്കേതികവിദ്യ, യുവാക്കളുമായുള്ള ഇടപഴകൽ എന്നിവയിൽ ശ്രദ്ധ കേന്ദ്രീകരിച്ചുകൊണ്ടാണ് പയേതുങ്താൻ ഷിനവത്ര തായ് രാഷ്ട്രീയത്തിൽ സ്ഥാനം പിടിച്ചെടുത്തത്. രാജ്യത്തെ വരുമാന അസമത്വം പരിഹരിക്കുക, സാമ്പത്തിക വികസനം പ്രോത്സാഹിപ്പിക്കുക, അതിവേഗം മാറിക്കൊണ്ടിരിക്കുന്ന ആഗോള വിപണിയിൽ തായ്‌ലൻഡ് മുന്നേറ്റം തുടരുന്നുവെന്ന് ഉറപ്പാക്കുക എന്നിവ ഉൾപ്പെടുന്നതാണ് അവരുടെ രാഷ്ട്രീയ കാഴ്ചപ്പാട്. ഇതു തന്നെയാണ് ആ രാജ്യത്തെ ഭൂരിഭാഗം യുവാക്കളുടെയും സ്വപ്നവും.

ഷിനവത്ര കുടുംബത്തിലെ അംഗമെന്ന നിലയിൽ തായ് രാഷ്ട്രീയത്തിലെ പ്രധാന വ്യക്തിത്വങ്ങളായിരുന്ന പിതാവിന്റെയും മറ്റു ബന്ധുക്കളുടെയും പാരമ്പര്യം പയേതുങ്താൻ പിന്തുടരുന്നുണ്ട്. ഗ്രാമീണ ദരിദ്രർക്കൊപ്പം നിൽക്കുകയും ദശലക്ഷക്കണക്കിന് തായ്‌ലൻഡുകാരുടെ ജീവിതനിലവാരം മെച്ചപ്പെടുത്താൻ സാമ്പത്തിക നയങ്ങൾക്ക് വേണ്ടി വാദിക്കുകയും ചെയ്യുന്നുണ്ട് ഇവർ. അപ്പോഴും ഒരു പ്രശ്നം വിമർശകർ ചൂണ്ടിക്കാട്ടുന്നു. അഴിമതിയുടേതാണത്. ഷിനവത്ര കുടുംബത്തിനു നേരെ പല സമയത്തും അഴിമതി ആരോപണം ഉന്നയിക്കപ്പെട്ടിട്ടുണ്ട്.

∙ അധികാരം വീണ്ടെടുക്കാൻ പുതിയ നീക്കം

രാഷ്ട്രീയത്തില്‍ എത്തിയതു മുതൽ ഫിയു തായ് പാർട്ടി ഏതു ദിശയിൽ നീങ്ങണമെന്ന തന്ത്രം രൂപപ്പെടുത്തുന്നതിൽ പയേതുങ്താൻ സജീവമാണ്. 2023ലെ പൊതുതിരഞ്ഞെടുപ്പിൽ പാർട്ടിക്കു വേണ്ടി കാര്യമായി പ്രവർത്തിച്ചു. വർഷങ്ങളോളം സൈനിക പിന്തുണയോടെ നടന്ന ഭരണത്തിന് ശേഷം ഫിയു തായ് പാർട്ടി അധികാരം വീണ്ടെടുക്കാൻ ലക്ഷ്യമിട്ടായിരുന്നു പ്രവർത്തനം. പയേതുങ്താനിന്റെ ചെറുപ്പവും രാഷ്ട്രീയത്തിലെ താരതമ്യേനയുള്ള പരിചയക്കുറവും വിമർശകർ എടുത്തു പറഞ്ഞെങ്കിലും അവരുടെ ഊർജം, യുവ വോട്ടർമാരെ കൂടെ നിർത്താനുള്ള കഴിവ് എന്നിവ പ്രശംസിക്കപ്പെട്ടു. പയേതുങ്താനിന്റെ നേതൃശൈലി പിതാവിന്റേതിൽനിന്നു വ്യത്യസ്‌തവുമാണ്. സമവായത്തിൽ കാര്യമായി വിശ്വസിച്ചിരുന്നില്ല പിതാവ്. എന്നാൽ സമവായം കെട്ടിപ്പടുക്കുന്നതിലും പാർട്ടിയുടെ പ്രതിച്ഛായ നവീകരിക്കുന്നതിലും ശ്രദ്ധ കേന്ദ്രീകരിച്ച് കൂടുതൽ ജാഗ്രത പുലർത്തി പ്രവർത്തിക്കാനാണ് പയേതുങ്താൻ ശ്രമിക്കുന്നത്.

∙ എളുപ്പമാകില്ല ഭരണം

ഷിനവത്ര കുടുംബത്തെ പിന്തുണയ്ക്കുന്നവർക്കിടയിൽ കുടുംബ ഭരണ തുടർച്ചയുടെ പ്രതീകമായാണ് പയേതുങ്താൻ പ്രധാനമന്ത്രിയാകുന്നത്. കൂടുതൽ ജനകീയമായ മികച്ച ഭരണമാണ് അവർ പ്രതീക്ഷിക്കുന്നതും. എന്നാൽ, സൈന്യവുമായും രാഷ്ട്രീയരംഗത്തും ഷിനവത്ര കുടുംബം നടത്തുന്ന സംഘർഷത്തിന്റെ ചരിത്രം കണക്കിലെടുക്കുമ്പോൾ പയേതുങ്താനിന്റെ ഉയർച്ച കൂടുതൽ രാഷ്ട്രീയ അസ്ഥിരതയിലേക്ക് രാജ്യത്തെ നയിച്ചേക്കുമെന്ന ആശങ്കയുമുണ്ട്.

∙ വെല്ലുവിളികളും ഭാവി സാധ്യതകളും

രാഷ്ട്രീയത്തിൽ വൻ പ്രതീക്ഷകളുമായി മുന്നിട്ടിറങ്ങിയ പയേതുങ്താനിനു മുന്നിൽ ഒട്ടേറെ വെല്ലുവിളികളുമുണ്ട്. നിലവിൽ തായ്‌ലൻഡിന്റെ രാഷ്ട്രീയ പരിതസ്ഥിതി വളരെ ധ്രുവീകരിക്കപ്പെട്ട നിലയിലാണ്. നഗരത്തിലെ മധ്യവർഗവും ഗ്രാമങ്ങളിലെ സാമ്പത്തികമായി പിന്നാക്കം നിൽക്കുന്നവരും തമ്മിലുള്ള ആഴത്തിലുള്ള വിഭജനമാണ് ഒരു പ്രശ്നം. അതുപോലെ ജനാധിപത്യ അനുകൂല ശക്തികളും സൈനിക പിന്തുണയുള്ള സംഘങ്ങളും തമ്മിൽ വലിയ സംഘർഷവും അകൽച്ചയും നിലനിൽക്കുന്നുണ്ട്. വോട്ടർമാരിലെ ഒരു പ്രധാന ഭാഗം ഷിനവത്ര രാഷ്ട്രീയത്തെ പിന്തുണയ്ക്കുമ്പോൾ തന്റെ കുടുംബത്തിന്റെ രാഷ്ട്രീയ പാരമ്പര്യവുമായി ബന്ധപ്പെട്ട വിവാദങ്ങളിൽ നിന്ന് സ്വയം അകന്നുനിൽക്കുക എന്നത് പയേതുങ്താനിനു മുന്നിലുള്ള പ്രധാന വെല്ലുവിളിയാണ്.