ഖാസികുന്നുകളിൽ തട്ടിത്തകരുന്ന മേഘങ്ങൾ; ഡിസംബറിൽ കുടിവെള്ളമില്ലാത്ത ചിറാപുഞ്ചി; ഈ മഴ കേരളവും സൂക്ഷിക്കണം!

ഏറ്റവും കൂടുതൽ മഴ കിട്ടുന്ന ചിറാപുഞ്ചിയിൽ എന്തുകൊണ്ട് വേനൽ കഠിനമാകുന്നു. തീവ്രമഴയും പ്രളയഭീതിയും നേരിടുന്ന കേരളത്തിന് ഇതിൽ നിന്ന് എന്തെങ്കിലും പഠിക്കാനുണ്ടോ? ഇന്ത്യൻ കാലാവസ്ഥാ വകുപ്പിന് 150 വർഷം തികയുന്ന വേളയിൽ ചിറാപുഞ്ചിയുടെ മാറുന്ന മഴക്കണക്കുകളിലൂടെ ഒരു സഞ്ചാരം. ഒരിടത്ത് ഒരിടത്ത് ഒരിക്കൽ ഒരു ചിറാപുഞ്ചി ഉണ്ടായിരുന്നു. ഇന്ന് അവിടെ മഴമാത്രമേയുള്ളൂ, മണ്ണും മനുഷ്യരുമില്ല എന്നു സിലബസ് തിരുത്തേണ്ടി വരുമോ എന്ന ചോദ്യത്തിനാണ് കാലം ഉത്തരം തേടുന്നത്. മഴ മാലപ്പടക്കം പൊട്ടിക്കുന്ന ചിറാപുഞ്ചിക്കു മേൽ ഉരുണ്ടുകൂടുന്നതു പുതിയ കുറെ യാഥാർഥ്യങ്ങളാണ്.

ഒത്തിരി മഴ നല്ലതാണോ? ഇടിമുഴക്കം പോലെ ചോദ്യം. അല്ല എന്നു ചിറാപുഞ്ചിയുടെ അനുഭവം. മണ്ണും പച്ചപ്പും മാത്രമല്ല, ചരിത്രവും സംസ്കാരവും ഒലിച്ചുപോവുകയാണ്. ലോകത്തിലെ ഏറ്റവും നനഞ്ഞു കുതിർന്ന പ്രദേശത്ത് മേയ് മുതൽ ജൂലൈ വരെയാണു മഴക്കാലം. പിന്നെ ഇടവിട്ടു മാത്രം. ഡിസംബറിൽ ഉമിയം നദി ഉൾപ്പെടെ എല്ലാം വറ്റും. ഇത്തിരിമാത്രം പെയ്യുന്ന രാജസ്ഥാനിൽ വേനൽക്കാലത്ത് ഇതിലേറെയാണു പ്രതിശീർഷ ജലലഭ്യത.

∙ ചിറാപുഞ്ചിയിൽ നിന്ന് കേരളത്തിന് എന്തെങ്കിലും പഠിക്കാനുണ്ടോ?

ചിറാപുഞ്ചിയിൽ ജല–കാർഷിക ഗവേഷകനായിരുന്ന, കോഴിക്കോട് ജലവിഭവ വികസന കേന്ദ്രം മേധാവി ഡോ. മനോജ് പി. സാമുവൽ പറയുന്നു – ചിറാപുഞ്ചിയിൽ നിന്ന് കേരളത്തിന് പഠിക്കാൻ ഒട്ടേറെയുണ്ട്. പ്രശ്നങ്ങൾക്ക് സമാനതകളുമുണ്ട്. കേരളത്തിൽ പെയ്യുന്ന മഴയുടെ 7 മടങ്ങാണ് ചിറാപുഞ്ചിയിൽ പെയ്യുന്നത്. അവിടെ വല്ലതും ബാക്കിയുണ്ടാവുമോ എന്നാണ് മനോജിന്റെ മറുചോദ്യം. 1974 ലെ 2276.32 സെന്റീമീറ്റർ ഇന്നും വാർഷികമഴയിലെ ലോക റെക്കോർഡ് ആണ്. ഇവിടുത്തെ ഏറ്റവും കുറഞ്ഞ വാർഷിക വർഷപാതമായ 695 സെന്റീമീറ്റർ പോലും (1978) കേരളത്തിലെ മഴയുടെ ഇരട്ടിയിലേറെ. കഴിഞ്ഞ വർഷം 1303 സെന്റീമീറ്റർ. ഈ വർഷം ഇതുവരെ 846 സെന്റീമീറ്റർ. 

∙ ചിറാപുഞ്ചിയിലെ മഴ ബംഗ്ലദേശിന്റെ എക്കൽ

ബംഗ്ലദേശിന്റെ ദുഖമാണ് ചിറാപുഞ്ചി. അതേ സമയം, ചിറാപുഞ്ചിയുടെ വരദാനമാണ് സിൽഹത്തിന് അപ്പുറമുള്ള ബംഗ്ലദേശ് താഴ്‌വര. ഹൈറേഞ്ചിലെ മണ്ണ് കുട്ടനാട്ടിൽ എക്കലായി എത്തും പോലെ ചിറാപുഞ്ചിയിൽ പെയ്യുന്ന മഴയത്രയും താഴെ ബംഗ്ലദേശ് താഴ്‌വരയെ ഫലഭൂയിഷ്ടമാക്കും. ചിറാപുഞ്ചിയിൽ പെരുമഴ പെയ്താൽ ബ്രഹ്മപുത്രയും മേഘ്നയും കരകവിഞ്ഞ് ബംഗ്ലദേശിൽ പ്രളയം ഉറപ്പാണ്. നമ്മുടെ 2018 പോലെ ബംഗ്ലദേശിനെ മുക്കിയ 1988ലെ പ്രളയം ചിറാപുഞ്ചിയുടെ ക്ഷോഭമായിരുന്നു. ബംഗാൾ ഉൾക്കടലിൽ നിന്ന് ഉയർന്ന് ധാക്കയ്ക്ക് മുകളിലൂടെ വീശുന്ന നീരാവിക്കാറ്റാണ് ഖാസി മലകളെ ലോകത്തിന്റെ മഴത്തട്ടാക്കുന്നത്.

∙ മഴയിൽ പുഴ കലങ്ങിച്ചുവന്നാൽ പിന്നാലെ മരുഭൂവൽക്കരണം

മണ്ണ് കലങ്ങിച്ചുവക്കുന്ന പുഴ കേരളത്തിലും മേഘാലയത്തിലുമാണ് ഏറ്റവുമധികം കാണാനാവുക. മരുഭൂവൽക്കരണത്തിന്റെ ആദ്യ സൂചന. കേരളത്തിനു മഴ വെല്ലുവിളി ഉയർത്തി തുടങ്ങുന്നത് തോട്ടങ്ങളുടെ വരവോടെയാണ്. വനത്തിലെ ഇടതൂർന്ന ഇലകളിൽ തട്ടി പെയ്തിരുന്ന മഴ നേരെ മണ്ണിലേക്ക്. മഴയിൽ മുറിവേറ്റ ഭൂമി പൊടിയാൻ തുടങ്ങി. ഖാസി കുന്നുകളിലേക്ക് 19–ാം നൂറ്റാണ്ടിൽ ബ്രിട്ടീഷുകാർ വന്നു തുടങ്ങിയതോടെ അവിടെ സ്വാഭാവിക വനങ്ങൾ പുൽമേടുകൾക്കു വഴിമാറി. കാവുകളും ഒറ്റപ്പെട്ട വനങ്ങളുമായി ബന്ധപ്പെട്ട ആരാധനാ സമ്പ്രദായം ഖാസികുന്നുകളിലും നിലനിന്നിരുന്നു എന്നാണ് ചരിത്രം.

∙ വലുപ്പമേറി മഴത്തുള്ളികൾ; ബോംബ് ആക്രമണമായി മഴ

പർവത ജന്യ (ഓറോഗ്രഫിക്) മഴയാണ് മേഘാലയത്തിലേതെന്ന് ചിറാപുഞ്ചിയെപ്പറ്റി പുസ്തകം എഴുതിയ ബിനു കെ.ജോൺ പറയുന്നു. കേരളത്തിലേത് മൺസൂൺ മഴയും. ഖാസികുന്നുകളിൽ തട്ടിത്തകരുന്ന മേഘങ്ങളാണ് പർവതജന്യ മഴയ്ക്കു കളമൊരുക്കുന്നത്. കാവുകളും വനങ്ങളും മഴയെ മണ്ണിലേക്ക് താഴ്ത്തി. കുളങ്ങളും അരുവികളും ജലത്തിനു തങ്ങാൻ തടമൊരുക്കി.

വലുപ്പം കൂടിയ മഴത്തുള്ളികളുടെ ബോംബാക്രമണത്തിൽ സോഹ്റ– ചിറാപുഞ്ചി പ്രദേശം ഇന്ന് മണ്ണൊലിച്ച് അതിവേഗം പാറക്കെട്ടായി മാറുന്നു. മഴക്കാലത്തും വേനലിലും ഈ ഉരുളൻ കല്ലുകളും പാറകളും താഴേക്കു വീഴുന്ന സ്ഥിതി. ഉരുണ്ടു വരുന്ന കല്ലുകളെ (ഷൂട്ടിങ് സ്റ്റോൺ) സൂക്ഷിക്കണം എന്നൊരു മുന്നറിയിപ്പു ബോർഡ് മേഘാലയത്തിലും കേരളത്തിന്റെ മലയോരങ്ങളിലും വയ്ക്കേണ്ട സ്ഥിതിയാണ്.

∙ മണ്ണ് ഒരു ജീവിയാണ്; മറക്കരുത് മണ്ണുമര്യാദ

മണ്ണ് വികാരവും തുടിപ്പുകളുമുള്ള ഒരു ജീവിയാണെന്നും അതു നമ്മുടെ പൂർവികരുടെ വറ്റാത്ത വാത്സല്യമാണെന്നുമുള്ള തിരിച്ചറിവ് ഇന്ന് മേഘാലയത്തിലെ ആദിസമൂഹങ്ങൾക്കിടയിൽ നിന്ന് ഒലിച്ചുപോയിരിക്കുന്നു. മണ്ണുമര്യാദകളെല്ലാം കൈമോശം വന്നവരാണ് ആധുനിക മലയാളികളും. ടിപ്പറിൽ കയറ്റി കച്ചവടം ചെയ്യാനുള്ള വസ്തു മാത്രമാണ് ഇന്ന് മണ്ണ്. കാലിൽ ഇതുവരെ മണ്ണു പറ്റാത്ത എത്രയോ പേർ നമുക്കിടയിലുണ്ട്.