യുട്യൂബ് വരുമാനം 6000 കോടി, ആരാധകർക്ക് ജെറ്റും ഫ്ലാറ്റും കാറും ക്യാഷും...; ഒടുവിൽ കുരുക്കായി ലൈംഗികപീഡന ‘ഗെയിം ഷോ’

യുട്യൂബിൽ പിന്തുണയ്ക്കുന്നവരുടെ എണ്ണവും കൂടി. അതോടെ പുതിയ ആശയങ്ങളുമായി ബീസ്റ്റ് രംഗത്തെത്തി. ആളുകൾക്ക് ആഡംബര സമ്മാനങ്ങള്‍ നൽകി അത് ചിത്രീകരിക്കുന്നതായിരുന്നു പിന്നീടുള്ള പല വിഡിയോകളിലും ജയിംസ് ചെയ്തത്. തന്റെ ചുറ്റിലുമുള്ളവർക്ക് ക്യാഷ് പ്രൈസുകളും ഗാഡ്ജറ്റുകളും മറ്റും നൽകുന്നതിൽനിന്നായിരുന്നു തുടക്കം. 2018 ആയതോടെ ഭവനരഹിതരുടെ അഭയകേന്ദ്രത്തിലേക്ക് ഒരു ലക്ഷം ഡോളർ മൂല്യമുള്ള ഉൽപന്നങ്ങൾ സംഭാവന ചെയുന്ന തലത്തിലേക്ക് ജയിംസ് വളർന്നു.

പണം നൽകുന്ന രീതിയിൽതന്നെ പല പരീക്ഷണങ്ങളും ജയിംസ് നടത്തി. ഒരു വിഡിയോയിൽ ജയിംസ് ഒരു ഡ്രോണിൽ നിന്ന് 20,000 ഡോളർ വലിച്ചെറിയുന്നുണ്ട്. മറ്റൊരു വിഡിയോയിൽ പീത്‌‌സ ഡെലിവർ ചെയ്യുന്ന വ്യക്തിക്ക് ജയിംസ് നൽകിയ ടിപ്പ്, അയാൾ ഡെലിവർ ചെയ്യാനായി വന്ന വീടാണ്. ഇങ്ങനെ അധികമാരും പ്രതീക്ഷിക്കാത്ത കോണ്ടന്‍റുകൾ വ്യത്യസ്തമായ രീതിയിൽ നൽകിയതോടെ സംഗതി ഹിറ്റായി. വേറിട്ട ചിന്തയും അതോടൊപ്പം എന്തു റിസ്കും എടുക്കാൻ തയാറായ മനസ്സുമാണ് തന്റെ വിജയരഹസ്യമെന്നും ജയിംസ് അവകാശപ്പെട്ടിരുന്നു.

∙ ജീവകാരുണ്യമോ ബിസിനസോ?

ജയിംസ് നൽകുന്ന കാറുകളും ഫ്ലാറ്റുകളും വീടുകളും പോലുള്ള സമ്മാനങ്ങൾക്ക് വേണ്ട തുക കണ്ടെത്തുന്നത് വിവിധ ബ്രാൻഡുകളുമായുള്ള കരാറുകളിലൂടെയും പരസ്യ വരുമാനവും വഴിയാണ്. അതായത് ബിസിനസ് താൽപര്യങ്ങളോടെയാണ് ജയിംസ് വിഡിയോ ചെയ്യുന്നതെന്ന് വ്യക്തം. ആദ്യ വിഡിയോകളിൽനിന്ന് ലഭിച്ച ചെറിയ തുകകൾ കൂടുതൽ അഭിലഷണീയമായ വിഡിയോ നിർമിക്കുന്നതിനായി വീണ്ടും നിക്ഷേപിച്ചു, ഇത് വലിയ വരുമാനം നേടുന്നതിനായി സഹായിച്ചു. 

2021ൽ, ജയിംസിന്‍റെ വരുമാനത്തിന്‍റെ പകുതിയിൽ താഴെ (45 ശതമാനം) വീണ്ടും സ്വന്തം ചാനലിൽ നിക്ഷേപിച്ചതായി റിപ്പോർട്ടുണ്ട്. അതേസമയം, ജയിംസ് ജീവകാരുണ്യമാണ് നടത്തുന്നതും അതല്ല ബിസിനസാണെന്നും അഭിപ്രായപ്പെടുന്നവരുണ്ട്. നേത്രസംരക്ഷണ സംഘടനയുടെ സഹായത്തോടെ നിരവധി ആളുകള്‍ക്ക് തിമിര ശസ്ത്രക്രിയ നടത്തിയതായി ഒരു വിഡിയോ ജയിംസ് പങ്കുവച്ചിരുന്നു. ഇതിനെ പലരും വിമർശിച്ചെങ്കിലും ശസ്ത്രക്രിയ നടത്തിയ ഡോക്ടർ പറഞ്ഞത് നിരവധി രോഗികൾക്ക് പ്രയോജനം ലഭിച്ചത് ജയിംസ് നടത്തിയ ഇടപെടൽ കാരണമാണെന്നായിരുന്നു.

ഒരു റസ്റ്ററന്റിലെ ജീവനക്കാരിക്ക് ധാരാളം ലോഗോകൾ പതിച്ച ഒരു പുതിയ കാർ സമ്മാനമായി നൽകിയ വിഡിയോ വൻ വിമർശനമാണ് ക്ഷണിച്ചു വരുത്തിയത്. നാണംകെട്ട പബ്ലിസിറ്റി സ്റ്റണ്ടെന്നായിരുന്നു ആക്ഷേപം. ‘‘ആളുകളെ സഹായിക്കുന്നത് ഞാൻ ആത്മാർഥമായി ആസ്വദിക്കുന്നു. ഞാൻ വളരെ നല്ല മനുഷ്യനാണ്. വെറുതെ പറയുന്നതല്ല. ഞാൻ എല്ലായ്പ്പോഴും നല്ല മനുഷ്യനായിരുന്നു’’ – എന്നാണ് 2018ൽ പങ്കുവച്ച ഒരു വിഡിയോയിൽ പറഞ്ഞത്. വിമർശനങ്ങളെല്ലാം ജയിംസ് ശ്രദ്ധിക്കുന്നുണ്ടെന്നു ചുരുക്കം.

∙ വിവാദ ബർഗറുകൾ

യുട്യൂബിൽനിന്ന് ലഭിക്കുന്നതിന് പുറമേ മറ്റ് വരുമാന മാർഗങ്ങളും ജയിംസ് പരീക്ഷിച്ചിരുന്നു. 2020ൽ ‘മിസ്റ്റർ ബീസ്റ്റ്’ എന്ന പേരിൽ ബർഗർ വിൽപന ആരംഭിച്ചു. വെർച്വൽ ഡൈനിങ് എന്ന അമേരിക്കന്‍ കമ്പനിയുമായി സഹകരിച്ച് ആരംഭിച്ച പദ്ധതി തുടക്കത്തിൽ ഹിറ്റായിരുന്നു. വെർച്വൽ ഡൈനിങ് ആയിരുന്നു ബർഗറുകൾ വിപണിയിലെത്തിച്ചത്. ബർഗറിന്റെ വിപണനത്തിനു വേണ്ടി തന്റെ പ്രശസ്തി കൃത്യമായി ഉപയോഗപ്പെടുത്തുകയും ചെയ്തു ജയിംസ്. ന്യൂജഴ്‌സിയിലെ അമേരിക്കൻ ഡ്രീം മാളിൽ ആദ്യത്തെ മിസ്റ്റർ ബീസ്റ്റ് ബർഗർ സ്റ്റോർ ഉദ്ഘാടനം ചെയ്തപ്പോൾ പതിനായിരത്തിലേറെ ആളുകളാണ് എത്തിയത്. 

ജയിംസിന് മറ്റു മാധ്യമങ്ങളിൽ പരസ്യം ചെയ്യാനുള്ള അവസരം ലഭിക്കുന്നതിന് മുൻപുതന്നെ 10 ലക്ഷത്തിലധികം ബർഗറുകൾ വിറ്റു പോയതായി രാജ്യാന്തര മാധ്യമങ്ങൾ റിപ്പോർട്ട് ചെയ്തു. അതേസമയം, 2023ൽ ജയിംസ് തന്‍റെ ബ്രാൻഡായ മിസ്റ്റർ ബീസ്റ്റ് ബർഗേഴ്സിനെതിരെ രംഗത്ത് വന്നു. വെർച്വൽ ഡൈനിങ് നൽകുന്ന ഭക്ഷണം കഴിക്കാൻ കൊള്ളില്ലെന്നും സ്ഥാപനം അടച്ചുപൂട്ടണമെന്നും ആവശ്യപ്പെട്ടാണ് ജയിംസ് രംഗത്ത് വന്നത്. ഇതു സംബന്ധിച്ച് കോടതിയിൽ കേസും ഫയൽ ചെയ്തു. വേവിക്കാത്ത ബർഗറുകളും കോൾഡ് ഫ്രൈകളും വിറ്റ് വെർച്വൽ ഡൈനിങ് തന്‍റെ പ്രശസ്തിക്ക് ദോഷം വരുത്തിയയെന്നാണ് ജയിംസ് ആരോപിക്കുന്നത്.

∙ ജീവനക്കാരും തള്ളിപ്പറഞ്ഞു

2021ൽ ജയിംസിന്‍റെ ജീവനക്കാർതന്നെ അദ്ദേഹത്തിനെതിരെ രംഗത്തു വന്നു. ‘‘ക്യാമറകൾ അടുത്തില്ലാത്തപ്പോൾ അദ്ദേഹത്തിന്‍റെ സ്വഭാവം മാറും. മോശമായ തൊഴിൽ അന്തരീക്ഷമാണ് ജയിംസ് സൃഷ്ടിക്കുന്നത്’’ എന്ന് അദ്ദേഹത്തിന്റെ ഷൂട്ടിങ് സംഘത്തിലുള്ള 11 പേർ പറഞ്ഞതായി ന്യൂയോർക്ക് ടൈംസ് റിപ്പോർട്ട് ചെയ്തു. 2018 മുതൽ 2019 വരെ ജയിംസിന്‍റെ എഡിറ്ററായ മാറ്റ് ടർണർ, താൻ അനുഭവിച്ച ഏറ്റവും മോശമായ തൊഴിൽ സാഹചര്യത്തിലാണ് ജോലി ചെയ്തിരുന്നതെന്ന് വ്യക്തമാക്കിക്കൊണ്ടുള്ള വിഡിയോ പോസ്റ്റ് ചെയ്തിരുന്നു. 

∙ വളർച്ചയുടെ ‘ഡബിങ്’ രഹസ്യം 

‘ദ് ജോ റോഗൻ എക്‌സ്‌പീര്യൻസ്’ എന്ന പ്രശസ്ത പോഡ്‌കാസ്റ്റിൽ 2022ൽ അതിഥിയായി വന്നപ്പോൾ ജയിംസ് സ്വന്തം വളർച്ചയുടെ രഹസ്യം പങ്കുവച്ചിരുന്നു. ‘‘ഞങ്ങൾ മറ്റ് ഭാഷകളിലേക്കും ഞങ്ങളുടെ വിഡിയോകൾ ഡബ് ചെയ്യുന്നു. ഞങ്ങളുടെ പ്രധാന ചാനലിലെ അതേ വിഡിയോകളാണ് ഇവ, പക്ഷേ അവ ഡബ് ചെയ്ത് വിവർത്തനം ചെയ്ത് സബ്‌ടെറ്റിൽ സഹിതമാണ് അവതരിപ്പിക്കുന്നത്. എന്റെ സ്പാനിഷ് ചാനൽ 2021ൽ അതിവേഗം വളർന്ന ചാനലുകളിലൊന്നായിരുന്നു. ഒരു വർഷത്തിനുള്ളിൽ 3 ലക്ഷം കാഴ്ചക്കാരിൽ നിന്ന് 2.2 കോടിയായി അത് വളർന്നു.’’– ജയിംസ് പറയുന്നു.

∙ കുട്ടിയോട് മോശമായി പെരുമാറി?

ജൂലൈയിൽ, മിസ്റ്റർ ബീസ്റ്റ് ചാനലിലെ മുൻ സഹ അവതാരികയായിരുന്ന അവാ ക്രിസ് ടൈസൺ പ്രായപൂർത്തിയാകാത്ത കുട്ടിയോട് മോശമായി പെരുമാറിയെന്ന് ആരോപിക്കപ്പെടുന്ന വിവാദത്തിൽ പെട്ടിരുന്നു. ഒരു ഓൺലൈൻ മത്സരത്തിൽ വിജയിച്ചതിനെത്തുടർന്ന് പരിചയപ്പെട്ട 13 വയസ്സുള്ള ബാലനുമായി അന്ന്  20 വയസ്സുള്ള അവാ ക്രിസ്  ബന്ധം പുലർത്തിയിരുന്നതായാണ് ആരോപണം. 16 വയസ്സ് തികയുന്നതുവരെ വർഷങ്ങളോളം ഓൺലൈൻ ഫോറങ്ങളിൽ ഇവർ കുട്ടിയുമായി ആശയവിനിമയം നടത്തിയിരുന്നു.

പ്രായപൂർത്തിയായ ശേഷം കുട്ടി താൻ ഇരയല്ലെന്ന് വ്യക്തമാക്കി രംഗത്തു വന്നിരുന്നെങ്കിലും അവായുടെ ചില സന്ദേശങ്ങൾ ലൈംഗിക ചുവയുള്ളതാണെന്നു സമ്മതിച്ചത് ചർച്ചയായി. ഈ വിവാദത്തെ തുടർന്ന് അവായുടെ നിരവധി വിവാദ പോസ്റ്റുകൾ വീണ്ടും ഉയർന്നുവന്നു. ഇതിൽ ലൈംഗിക പോസുകളിൽ യുവ കഥാപാത്രങ്ങളെ വരയ്ക്കുന്ന ‘ഷാദ്മാൻ’ എന്ന കലാകാരനുമായുള്ള അവായുടെ ഇടപഴകലുകളും ഉൾപ്പെട്ടിരുന്നു.

∙ പ്രതിവർഷം 6000 കോടി!

2024 ആദ്യമാണ് മിസ്റ്റർ ബീസ്റ്റ് താൻ പ്രതിവർഷം 6000 കോടിയോളം രൂപ സമ്പാദിക്കുന്നുണ്ടെന്ന് വെളിപ്പെടുത്തിയത്. പണമിത്ര കിട്ടുന്നുണ്ടെങ്കിലും താൻ സമ്പന്നനല്ലെന്നും ബീസ്റ്റ് പറഞ്ഞുവച്ചു. ഒരു വിഡിയോയിൽ നിന്നോ പോസ്റ്റിൽ നിന്നോ ലഭിക്കുന്നതെല്ലാം അടുത്ത കോണ്ടന്‍റിനോ സമ്മാനത്തിനോ വേണ്ടി നിക്ഷേപിക്കുന്നതാണ് തന്റെ രീതിയെന്നായിരുന്നു അതു സംബന്ധിച്ച് ബീസ്റ്റിന്റെ വാദം. 25 ലക്ഷം ഡോളർ വിലവരുന്ന പ്രൈവറ്റ് ജെറ്റും 20 ലക്ഷം ഡോളർ വില വരുന്ന സ്വകാര്യ ദ്വീപും വരെ തന്റെ വരിക്കാർക്കും മറ്റുമായി ബീസ്റ്റ് സമ്മാനിച്ചിട്ടുണ്ട്. ഇതോടൊപ്പമാണ് ദശലക്ഷക്കണക്കിനു രൂപയുടെ ക്യാഷ്  പ്രൈസുകൾ.