അന്ന് പൊലിഞ്ഞത് 59 ജീവനുകൾ; ബാക്കിയായത് 130 ആദിവാസികൾ; 5 വർഷത്തിനിപ്പുറവും സർക്കാരും അൻവറും ‘കാണാത്ത’ ദുരിതം

59 ജീവനുകളും ഏതാണ്ടത്രതന്നെ വീടുകളും തുടച്ചെടുത്തു മുത്തപ്പൻകുന്ന് പൊട്ടിയൊഴുകിയ കവളപ്പാറ ഉരുൾപൊട്ടൽ ദുരന്തം മലയാളികളാരും മറന്നിട്ടുണ്ടാവില്ല. ദുരന്തമുണ്ടായ 2019 ഓഗസ്റ്റ് 8ന് തന്നെ, കവളപ്പാറ ഉൾപ്പെടുന്ന അതേ പഞ്ചായത്തിൽ ഒരു ഉരുൾപൊട്ടൽ കൂടി ഉണ്ടായിരുന്നു, തണ്ടൻകല്ല് ആദിവാസി നഗറിൽ. 32 ആദിവാസി കുടുംബങ്ങളാണു വീടുകൾ നശിച്ച്, സകലതും നഷ്ടപ്പെട്ടു ചാലിയാർ കടന്ന് മറുകരയെത്തിയത്. ഏതാനും മാസങ്ങൾക്കകം പുനരധിവസിപ്പിക്കാമെന്ന ഉറപ്പുനൽകി സർക്കാർ അവരെ മുണ്ടേരി വിത്തുകൃഷിത്തോട്ടത്തിന്റെ പൊട്ടിപ്പൊളിഞ്ഞു വീഴാറായ ക്വാർട്ടേഴ്സുകളിൽ താമസിപ്പിച്ചു.

ആ‘താൽക്കാലിക’ താമസവും പുനരധിവാസത്തിനു വേണ്ടിയുള്ള നിരന്തര പോരാട്ടവുമായി ഇന്നും അതേ ക്വാർട്ടേഴ്സുകളിൽ ദുരിതജീവിതം നയിക്കുകയാണ് 130 ആദിവാസികളടങ്ങിയ തണ്ടൻകല്ല് ഊരുകാർ. മുണ്ടക്കൈ, ചൂരൽമല ഉരുൾപൊട്ടലുണ്ടായി ഒരു മാസം തികയുമ്പോഴേക്കു കോടിക്കണക്കുകളുടെ ‘മെമ്മോറാണ്ടം’ തയാറാക്കാനുണ്ടായ ഉത്സാഹം, ഇത്രകാലമായിട്ടും ദുരന്തത്തിനിരകളായ ആദിവാസികളുടെ പുനരധിവാസത്തിന്റെ കാര്യത്തിൽ സർക്കാരിന് ഇല്ല! ‘സാധാരക്കാർക്കും സാധുക്കൾക്കും വേണ്ടി പ്രവർത്തിക്കാൻ’ പുതിയ കൂട്ടായ്മ പ്രഖ്യാപിച്ചു ജനകീയമുഖം മിനുക്കാനിറങ്ങിയ പി.വി.അൻവർ എംഎൽഎ, സ്വന്തം മണ്ഡലത്തിലെ ഈ സാധുക്കളെ 5 വർഷത്തിനിടെ ഒരുതവണയെങ്കിലും കാണാനെത്തിയിട്ടു പോലുമില്ല!

∙ പോത്തുകല്ലിന്റെ കലണ്ടറിലെ കരിദിനം

2019 ഓഗസ്റ്റ് എട്ടിനാണു മലപ്പുറം ജില്ലയിലെ നിലമ്പൂർ മണ്ഡലത്തിൽ പോത്തുകല്ല് പഞ്ചായത്തിലെ കവളപ്പാറയിൽ വൻ ഉരുൾപൊട്ടലുണ്ടായത്. അതിന്റെ ആഘാതത്തിൽതന്നെയാണു സമീപത്തുതന്നെയുള്ള തണ്ടൻകല്ല് ആദിവാസി നഗർ ഉൾപ്പെടുന്ന വനമേഖലയിലും ഉരുൾ പൊട്ടിയത്. മലയിടിഞ്ഞു കല്ലുകളും മണ്ണും കുത്തിയൊലിച്ചെത്തി. വീടുകളിലെല്ലാം വെള്ളം നിറഞ്ഞു. തണ്ടൻകല്ലിലേക്കുള്ള റോഡ് തകർന്നു. കാടിനെ അറിയുന്നവർ കാട് പിളർന്നെത്തുന്ന ദുരന്തത്തെയും അറിഞ്ഞു; അത് അടുത്തെത്തും മുൻപേ ജീവൻ വാരിപ്പിടിച്ചു കാടിറങ്ങിയതിനാൽ ഒരു ജീവൻ പോലും നഷ്ടമായില്ല.

പഞ്ചായത്ത് അധികൃതർ അവരെ മുണ്ടേരി ഗവ.ഹൈസ്കൂളിലെ ദുരിതാശ്വാസ ക്യാംപിലെത്തിച്ചു. കിടപ്പുരോഗിയായ സ്ത്രീ ഉൾപ്പെടുന്ന ഒരു കുടുംബത്തിന് അവരെ പുറത്തെത്തിക്കാൻ കഴിയാത്തതിനാൽ കുടുംബാംഗങ്ങളെല്ലാം തണ്ടൻകല്ലിൽതന്നെ തുടരുന്നതു രക്ഷപ്പെട്ടെത്തിയവർ പറഞ്ഞാണ് അധികൃതർ അറിഞ്ഞത്. സന്ധ്യയോടെ കാടുകയറിയ രക്ഷാപ്രവർത്തകർ രോഗിയെ ചാക്കിൽ പൊതിഞ്ഞു ചുമന്ന്, കയറുകെട്ടി പിടിച്ചിറങ്ങിയാണു കാടിനു പുറത്തെത്തിച്ചത്. ഒരുവശത്തു കുത്തിയൊഴുകുന്ന വെള്ളവും ഇറങ്ങിവരുമ്പോൾ അരികെ കാട്ടാനയും; മറക്കാനാകാത്ത അനുഭവമാണ് ആ രക്ഷാപ്രവർത്തനമെന്നു പഞ്ചായത്തംഗം ഷറഫുന്നീസ ഓർമിക്കുന്നു.

∙ ദുരിതജീവിതത്തിന്റെ തുടക്കം

529 ഹെക്ടർ വനഭൂമി കൃഷിവകുപ്പ് ഏറ്റെടുത്തു കാടു വെട്ടിത്തെളിച്ചു വിത്തുകൃഷിത്തോട്ടം തുടങ്ങിയത് 1980ലാണ്. തെങ്ങ്, കമുക്, കശുമാവ്, ജാതി, മാവ് തുടങ്ങി കർഷകർക്കാവശ്യമായ അത്യുൽപാദന ശേഷിയുള്ള വിത്തുകൾ കൃഷി ഓഫിസ് വഴി വിതരണം ചെയ്യാൻ ലക്ഷ്യമിട്ട്, സർക്കാർ സാഡോ സ്കീമിൽ ഉൾപ്പെടുത്തി സ്ഥാപിച്ചതാണു തോട്ടം. തോട്ടത്തോളം പഴക്കമുണ്ട് ഇവിടുത്തെ ക്വാർട്ടേഴ്സുകൾക്കും. തണ്ടൻകല്ലുകാരെ പാർപ്പിക്കാനായി ക്വാർട്ടേഴ്സുകൾ വൃത്തിയാക്കാനെത്തിയ പഞ്ചായത്ത് അധികൃതർ കണ്ടത്, തേനീച്ചക്കൂടുകൾ തിങ്ങിനിറഞ്ഞതുപോലെ കോട്ടെരുമകൾ നിറഞ്ഞ, പൊളിഞ്ഞിളകിയ, എല്ലാ ഭാഗത്തും ചോർച്ചയുള്ള, നിലംപൊത്താറായ കെട്ടിടങ്ങളാണ്. മരുന്നടിച്ചു കോട്ടെരുമകളെ നശിപ്പിച്ച് മാറാല നീക്കി അടിച്ചുവാരി ദിവസങ്ങൾക്കകം ആദിവാസികളെ ഇവിടെയെത്തിച്ചു.

∙ ഇതിലും ഭേദം വനം

ഓരോ നിമിഷവും വന്യമൃഗങ്ങളെ പേടിച്ചാണു കഴിഞ്ഞതെങ്കിലും തണ്ടൻകല്ല് ആദിവാസി നഗറിൽ വൈദ്യുതിയുണ്ടായിരുന്നു. ടാറിട്ട റോഡും അങ്കണവാടിയും അടിസ്ഥാന സൗകര്യങ്ങളുമുണ്ടായിരുന്നു. അവിടെ സന്തോഷത്തോടെ കഴിഞ്ഞുവന്ന ഒരു സമൂഹം പ്രകൃതിദുരന്തത്തെ അതിജീവിച്ചെത്തിയപ്പോൾ, അധികൃതർ ‘താൽക്കാലിക’മെന്നു വിശ്വസിപ്പിച്ചു കാത്തുവച്ചത് അതിലും വലിയ, അനന്തമായ ദുരിതജീവിതം! ഇടിഞ്ഞുവീഴാറായ ക്വാർട്ടേഴ്സ് കെട്ടിടങ്ങളുടെ മേൽക്കൂരയിൽനിന്നു കോൺക്രീറ്റ് പാളികൾ അടർന്നുവീഴുന്നതു പതിവാണ്. കഴിഞ്ഞ മഴക്കാലത്ത് ഇവിടുത്തെ 11 വയസ്സുകാരിയുടെ ദേഹത്തു കോൺക്രീറ്റ് പാളി അടർന്നുവീണു പരുക്കേറ്റിരുന്നു. പിന്നാലെ ഒരു യുവാവിനും സമാന സംഭവത്തിൽ പരുക്കേറ്റു.