ഹിറ്റ്ലറുടെ ബങ്കറിനു മുകളിൽ പാർക്കിങ് ഗ്രൗണ്ട്! 38.9 ലക്ഷം പേർക്ക് ജോലി നൽകാൻ ജർമനി; ഇവിടെ നിങ്ങൾ അതിഥി തൊഴിലാളികൾ അല്ല

‘‘വർക്ക് ഇൻ പ്രോഗ്രസ്...’’ ജർമൻ വിദേശകാര്യ മന്ത്രാലയത്തിൽ അറ്റകുറ്റപ്പണി നടന്നു കൊണ്ടിരിക്കുന്ന കോൺഫറൻസ് ഹാൾ ചൂണ്ടിക്കാട്ടി ജെൻസ് വാഗ്നർ പറഞ്ഞു. ‘ജർമൻ കുടിയേറ്റ പദ്ധതികളുടെ ഇപ്പോഴത്തെ പുരോഗതി ചോദിച്ചാൽ ഞങ്ങളുടെ മറുപടി ഇതായിരിക്കും. തൊഴിലിനും വിദ്യാഭ്യാസത്തിനുമായി ഇവിടെ എത്തുന്ന വിദേശ പൗരന്മാരെ ആകർഷിക്കുന്നതിനാണ് ഈ കുടിയേറ്റ പദ്ധതികൾ, അവ പുരോഗതിയിലാണ്, ജെൻസ് വാഗ്നർ പറഞ്ഞു നിർത്തി. വിദേശ മന്ത്രാലയത്തിലെ കൾച്ചർ ആൻഡ് മീഡിയ റിലേഷൻസ് വിഭാഗം ഡപ്യൂട്ടി ഹെഡാണ് വാഗ്നർ. 

കോവിഡിന് ശേഷമാണ് വിദേശ രാജ്യങ്ങളിലേക്കുള്ള കുടിയേറ്റം വ്യാപകമായി തുടങ്ങിയത്. തൊഴിലും വിദ്യാഭ്യാസവും തേടി വരുന്നവരെ ആകർഷിക്കാനായി വിവിധ പദ്ധതികൾ വിദേശ രാജ്യങ്ങളും ആരംഭിച്ചു. ആരോഗ്യ മേഖലയിലെ ജോലികൾക്കായിരുന്നു മുൻതൂക്കം. കാനഡ, യുകെ, യുഎസ് തുടങ്ങിയ രാജ്യങ്ങൾ കുടിയേറ്റക്കാർക്കായി വാതിലുകൾ തുറന്നിട്ടു. രാജ്യങ്ങൾ തമ്മിലുള്ള ഈ മത്സരത്തിൽ ജർമനി എന്നും ഒരുപടി മുന്നിലാണ്. ജർമനിയിലെ ജീവിതവും പഠനവും തൊഴിലും വ്യത്യസ്തമാണ്. അതേസമയം എളുപ്പമല്ലതാനും. ജർമൻ ഭാഷ പഠിക്കണമെന്നതു പോലുള്ള നിബന്ധനകൾ അപ്പോഴും തുടർന്നു. വിദേശ രാജ്യങ്ങളിൽ ജിവിതം തേടുന്നവരിൽ എക്കാലവും മുന്നിലാണ് കേരളം. വിദേശ സ്വപ്നത്തിൽ ജർമനി എന്നും ‘കളർഫുള്ളും’. പക്ഷേ, ജർമനിയും മാറുകയാണ്. 

അതിനു കാരണം കുടിയേറ്റത്തോടുള്ള ജർമനിയുടെ കാഴ്ചപ്പാടും സമീപനവുമാണ്. കുടിയേറ്റ പദ്ധതിയെ ജർമനി ഇങ്ങനെയാണ് നിർവചിക്കുന്നത്. ‘മൈഗ്രേഷൻ ഇന്നവേഷൻ പദ്ധതി’. കുടിയേറ്റവും അതുവഴി ലഭിക്കുന്ന നവീകരണവും. കൂടുതൽ വ്യക്തമായി പറഞ്ഞാൽ, വികസിത രാജ്യം എന്ന നിലയിൽ വ്യവസായ മേഖലയിൽ അടക്കം തങ്ങളുടെ മികവിനു കാരണം വിവിധ രാജ്യങ്ങളിൽനിന്നു വരുന്നവരുടെ കഴിവും വൈദഗ്ധ്യവുമാണെന്ന് ജർമനി കരുതുന്നു. മാത്രമല്ല ജർമനി തേടുന്നത് സ്ഥിര താമസക്കാരെയാണ്. ജർമനി നിങ്ങളെ വിളിക്കുന്നത് വിരുന്നുകാരായിട്ടല്ല, വീട്ടുകാരായിട്ടാണ്. പഠിക്കാം, തൊഴിൽ തേടാം പിന്നീടുള്ള കാലം ജർമനിയിൽ ജീവിക്കാം. ജർമനിക്ക് നിങ്ങളെ ആവശ്യമുണ്ട്, നാട്ടുകാരനായിട്ട്. 

∙ കുട്ടികൾ കുറച്ചു മതിയെന്ന് യുവാക്കൾ! 38.9 ലക്ഷം പേർക്ക് തൊഴിലോ? 

‘‘ഞങ്ങൾ ഇമിഗ്രേഷൻ കൺട്രി അതായത് കുടിയേറ്റരാജ്യമായി മാറുകയാണ്’’. ഫെഡറൽ ഏജൻസി ഫോർ സിവിൽ എജ്യുക്കേഷൻ പ്രതിനിധി ഫ്രാങ്ക് ബർഗഡോർഫർ പറഞ്ഞു. ‘‘വ്യവസായ മേഖലയും തൊഴിൽ മേഖലയും കടുത്ത ക്ഷാമം നേരിടുകയാണ്. ജർമനിയുടെ സാമ്പത്തിക മേഖലയുടെ ആണിക്കല്ല് വ്യവസായ മേഖലയാണ്. വ്യവസായ മേഖല യുഎസിൽനിന്നും ചൈനയിൽനിന്നുമുള്ള കടുത്ത മത്സരം നേരിടുകയാണ്. വ്യവസായ മേഖലയിൽ മാത്രം വർഷം വൈദഗ്ധ്യമുള്ള മേഖലകളിലെ തൊഴിലാളികളുടെ ക്ഷാമം നാലു ലക്ഷമാണ്. തൊഴിൽ മേഖലയിലെ ഈ പ്രതിസന്ധി ഉൽപാദനത്തെയും ബാധിക്കുന്നു. ഉൽപാദനം കുറഞ്ഞാൽ സാമ്പത്തിക രംഗം തകരും. അതിനാൽ തൊഴിലാളികളെ ലഭിക്കാൻ വ്യാവസായിക മേഖലയിൽ നിന്നു കടുത്ത സമ്മർദമുണ്ട്. ഈ പ്രതിസന്ധി പരിഹരിക്കാൻ പെൻഷൻ പ്രായം വർധിപ്പിക്കുന്നതു പോലും ആലോചിച്ചു. അടുത്ത വഴി മറ്റു രാജ്യങ്ങളിൽ നിന്നുള്ള കുടിയേറ്റക്കാരെ തേടുകയാണ്’’. ഫ്രാങ്ക് പറഞ്ഞു.

ഈ പ്രതിസന്ധി പെട്ടെന്ന് ഉണ്ടായതല്ല. അതിനാൽ പരിഹരിക്കലും എളുപ്പമല്ല, ഫ്രാങ്ക് തുടർന്നു. ‘‘പല കാരണങ്ങളാൽ ജർമനിയിലെ ജനസംഖ്യ കുറഞ്ഞു വരികയാണ്. കുട്ടികൾക്ക് ജന്മം നൽകാൻ സ്ത്രീകൾക്കു മടി. കണക്കുകൾ അനുസരിച്ച് ഒരു സ്ത്രീക്ക് രണ്ടു കുട്ടികൾ എന്ന തോതിൽ ജനസംഖ്യ വേണം. എന്നാൽ നിലവിൽ സ്ത്രീ–കുട്ടി അനുപാതം 1.5 മാത്രമാണ്. എൻജിനീയറിങ്ങാണ് ഞങ്ങളുടെ മികവ്. എന്നാൽ വിദ്യാഭ്യാസ മേഖലയിൽ എൻജിനീയറിങ് ശാസ്ത്ര മേഖലയിലേക്ക് വിദ്യാർഥികൾ എത്തുന്നില്ല. പകരം സാമൂഹിക ശാസ്ത്രവും മറ്റ് മാനവിക വിഷയങ്ങളും പഠിക്കാനാണ് ജർമൻ വിദ്യാർഥികൾക്ക് ഇഷ്ടം. ഈ പ്രതിസന്ധിക്ക് ആക്കം കൂട്ടുന്നത് മറ്റൊന്നാണ്. ജീവിത ദൈർഘ്യം ഉയർന്നതോടെ പ്രായമായവരെ സംരക്ഷിക്കാനുള്ള ആളുകളും കുറയുന്നു, ഫ്രാങ്ക് പറഞ്ഞു. 

‘ലിവ് ഇൻ ജർമനി’, ‘ജർമനിയിൽ പഠനവും തൊഴിലും’ ഒരുപക്ഷേ കേരളത്തിലെ വിവിധ നഗരങ്ങളിൽ ഈ ബോർഡുകൾ നിങ്ങളും കണ്ടിരിക്കാം. വിദേശ രാജ്യങ്ങളിൽ കുടിയേറ്റം സുഗമമാക്കുന്നതിന് നിരവധി ഏജൻസികൾ കേരളത്തിലും പ്രവർത്തിക്കുന്നു. ഈ കുടിയേറ്റക്കാരെ സ്വീകരിക്കുന്നതിനായി വിദേശ രാജ്യങ്ങളിലും സർക്കാർ തലത്തിൽ വരെ പദ്ധതികൾ നടക്കുന്നുണ്ട്. മറ്റൊരു തരത്തിൽ പറഞ്ഞാൽ മികച്ച കുടിയേറ്റക്കാരെ ലഭിക്കാൻ യുഎസ്, കാനഡ, യൂറോപ്യൻ രാജ്യങ്ങൾ തമ്മിൽ മത്സരവും നടക്കുന്നുണ്ട്. കാരണം ഈ രാജ്യങ്ങള്‍ക്ക് കുടിയേറ്റം നിലനിൽപിന്റെ പ്രശ്നമാണ്. രണ്ടു തരം മേഖലയിലേക്കാണ് കുടിയേറ്റം. വ്യവസായ മേഖല വിദഗ്ധരായ എൻജിനീയർ, ഡോക്ടർ, ഐടി വിദഗ്ധർ തുടങ്ങിയവരെ തേടുമ്പോൾ ആരോഗ്യസേവന മേഖലയും അനുബന്ധ മേഖലയും തേടുന്നത് നഴ്സ്, കെയർ ഗിവർ പോലുള്ള തൊഴിലാളികളെയാണ്. 

ജർമനിയുടെ പ്രതിസന്ധി മറ്റൊന്നാണ്. 2035 എത്തുമ്പോഴേക്കും 38.9 ലക്ഷം ഒഴിവുകളാണ് ജർമനിക്ക് നികത്തേണ്ടത്. പ്രതിവർഷം നാലു ലക്ഷം പേരെങ്കിലും കുടിയേറിയില്ലെങ്കിൽ ജർമനിയുടെ സാമ്പത്തിക സാമൂഹിക സ്ഥിതി തകിടം മറിയും. ജർമനിയുടെ ഈ പ്രതിസന്ധി ഇന്ത്യയ്ക്കും പ്രത്യേകിച്ച് കേരളത്തിനും അവസരമാണെന്നു മാത്രം. ഈ അവസരം പ്രയോജനപ്പെടുത്താനുള്ള മത്സരത്തിൽ നമുക്കൊപ്പം യുക്രൈയ്നിൽ നിന്നുള്ള അഭയാർഥികൾ മുതൽ ശ്രീലങ്ക വരെയുള്ള രാജ്യങ്ങളുണ്ട്. ഇന്ത്യയ്ക്ക് കടുത്ത ഭീഷണി ഉയർത്തുന്നത് ചൈനയും. എല്ലാ വർഷവും ചൈനയിൽ നിന്ന് 25,000 പേർ ജർമനിയിൽ എത്തുന്നു. രണ്ടാംസ്ഥാനത്ത് ഇന്ത്യ ആയിരുന്നു. 2023ൽ ഇന്ത്യയും ചൈനയ്ക്ക് ഒപ്പം എത്തി.

∙ ‘ഹിറ്റ്ലറുടെ ഓർമകൾ ഞങ്ങൾ മണ്ണിട്ടു മൂടിയതിന് കാരണമുണ്ട്’ 

ബെർലിൻ നഗരത്തിലെ ആ പാർക്കിങ് ഗ്രൗണ്ടിന് മുന്നിലെത്തിയപ്പോൾ എല്ലാവരും ഒന്നുനിന്നു. തുടർന്ന് ജർമൻ പ്രതിനിധി സംഘത്തിലെ ഒരാൾ പറഞ്ഞു. ‘‘ഇതു വെറും പാർക്കിങ് ഗ്രൗണ്ട് അല്ല. പക്ഷേ ഇവിടെ പാർക്കിങ് ഗ്രൗണ്ട് മതിയെന്ന് ഞങ്ങൾ തീരുമാനിച്ചതാണ്’’, അദ്ദേഹം തുടർന്നു. എന്താകും ആ പാർക്കിങ് ഗ്രൗണ്ടിന്റെ പ്രത്യേകത? ആ പാർക്കിങ് ഗ്രൗണ്ടിന് അടിയിലായിരുന്നു ഹിറ്റ്ലറുടെ ബങ്കർ. ജർമനിയിൽ ബങ്കർ എന്നല്ല പറയുന്നത്. പകരം ബുങ്കറാണ്. ‘‘ഹിറ്റ്ലറുടെ അന്ത്യം ഇവിടെ ആയിരുന്നു. ഇവിടെ വച്ചാണ് ആത്മഹത്യ ചെയ്തത്. നാത്‌സികളെയും ഹിറ്റ്ലറെയും മഹത്വവൽക്കരിക്കുന്നത് ഞങ്ങൾക്ക് ഇഷ്ടമല്ല. അതു പാടില്ലെന്നാണ് ജർമനിയുടെ പൊതു വികാരം, അതു കൊണ്ട് ബുങ്കർ സ്മാരകമാക്കിയില്ല. വെറുതെ മണ്ണിട്ടു മൂടി. പാർക്കിങ് ഗ്രൗണ്ട് ആക്കി’’. അദ്ദേഹം കൂട്ടിച്ചേർത്തു.

അതേസമയം പൊളിച്ചു നീക്കിയ ബർലിൻ മതിലിന്റെ ഒരു ഭാഗം ഇപ്പോഴും നഗരത്തിൽ നിലനിൽക്കുന്നു. അല്ലെങ്കിൽ നില നിർത്തിയിരിക്കുന്നു. അതിനു താഴെ നാത്‌സി ഭരണ കാലത്തെ സെല്ലുലാർ തടവറകളുടെ തകർന്നടിഞ്ഞ ഭാഗവും കാണാം. ബർലിൻ മതിൽ മിക്ക സ്ഥലങ്ങളിലും പൊളിച്ചു നീക്കി. ചോദിച്ചാൽ ഇതിലൂടെയായിരുന്നു മതിൽ എന്ന് ഓർത്തെടുത്ത് നഗരസവാസികൾ പറയും. ഒന്നാം ലോക മഹായുദ്ധത്തിനു ശേഷം ജർമനിയെ കിഴക്കു ജർമനിയും പടിഞ്ഞാറ് ജർമനിയുമായി വിഭജിച്ച ബർലിൻ മതിൽ ഇന്നും നാട്ടുകാർക്ക് പേക്കിനാവാണ്. ‘ചെക്ക് പോയിന്റ്’ ചാർലി എന്ന സ്ഥലത്ത് യുഎസ് പൊലീസിന്റെ ചെക്കിങ് ഔട്ട് പോസ്റ്റ് ഇപ്പോഴുമുണ്ട്. നാട്ടുകാർക്ക് അങ്ങോട്ടും ഇങ്ങോട്ടും പോകാൻ വീസ വാങ്ങേണ്ടി വന്ന കാലമായിരുന്നു അന്ന്. ചെക്ക് പോയിന്റ് ചാർലി അത് വീണ്ടും ഓർമപ്പെടുത്തുന്നു. ഈ രണ്ടു സ്ഥലങ്ങളും ഇപ്പോൾ വിനോദ സഞ്ചാരികളെ ആകർഷിക്കുന്നുണ്ട്.