‘നീതി നടപ്പാക്കാനുള്ള ഒരു നിമിഷവും പാഴാക്കില്ല’; സുപ്രീം കോടതിക്ക് ഇനി ‘ചന്ദ്രാസ്തമയ’ കാലം, ‘ക്യാപ്റ്റന്റെ’ ശരികളേറെ, പഴികളും

വാദങ്ങൾ അതീവശ്രദ്ധയോടെയും ക്ഷമയോടെയും കേൾക്കുകയും കൃത്യമായ ചോദ്യങ്ങൾ ഉന്നയിക്കുകയും അഭിഭാഷകരുടെ വലുപ്പച്ചെറുപ്പമോ കേസുകളുടെ പ്രധാന്യമോ പരിഗണിക്കാതെ ‘ന്യായാധിപനായി’ പെരുമാറുന്നതായിരുന്നു അദ്ദേഹത്തിന്റെ ശൈലി. 

∙ കെട്ടിക്കിടന്ന കേസുകൾ 

കേസുകൾ തീർപ്പാക്കുന്നതിൽ പ്രത്യേക ഉത്സാഹം കാട്ടിയ ആളാണ് ചീഫ് ജസ്റ്റിസ് ചന്ദ്രചൂഡ്. ദീർഘകാലമായി തീർപ്പാകാതെ കിടന്ന കേസുകൾക്കായി ബെഞ്ച് രൂപീകരിക്കാനും പതിറ്റാണ്ടുകൾ പഴയ ഭരണഘടനാ റഫറൻസുകൾക്കായി വിശാല ബെഞ്ചുകളെ മുന്നിൽ നിന്നു നയിച്ചുമെല്ലാം ചീഫ് ജസ്റ്റിസ് ക്രിയാത്മക ശ്രമങ്ങൾ നടത്തി. അഭിഭാഷക ബാറിനെ സഹകരിപ്പിച്ചു ലോക് അദാലത്തും പുതുമയുള്ളതായി. എന്നാൽ, നാഷനൽ ജുഡീഷ്യൽ ഡേറ്റ ഗ്രിഡിലെ കണക്കുകൾ പ്രകാരം, സുപ്രീം കോടതിയിൽ ഇപ്പോഴുള്ളത് എക്കാലത്തെയും വലിയ കേസ് പെരുപ്പമാണ്. ഓഗസ്റ്റ് വരെയുള്ള കണക്കുകൾ പ്രകാരം 82,989 കേസുകളാണ് സുപ്രീം കോടതിയിൽ തീർപ്പാകാതെയുള്ളത്. ചീഫ് ജസ്റ്റിസ് ചുമതലയേൽക്കുമ്പോൾ 62,000ൽ പരം കേസുകളെ ഉണ്ടായിരുന്നുള്ളൂവെന്നും ഇതു വലിയ തോതിൽ വർധിച്ചുവെന്നും ചീഫ് ജസ്റ്റിസിനു വിമർശനം കേൾക്കേണ്ടി വന്നു. 

ബാർ അസോസിയേഷന്റെ യാത്രയയപ്പില്‍ ഈ വിമർശനത്തിന് അദ്ദേഹം വിശദീകരണം നൽകി. പദവിയിലെത്തിയ സമയത്തു കേസ് നമ്പർ നൽകാത്ത ഒട്ടേറെ കേസുകൾ സുപ്രീം കോടതി റജിസ്ട്രാറുടെ ഫയലുകളിലുണ്ടായിരുന്നുവെന്നും കോടതിയിലെത്തുന്ന ഒരു കേസിനു പോലും നമ്പർ ലഭിക്കാതെ പോകരുതെന്നതിനാൽ നേരത്തേ മുതൽ അവഗണിക്കപ്പെട്ടു ഫയലിലുറങ്ങിയ കേസുകളെയും ഔദ്യോഗിക കേസ് ലിസ്റ്റിന്റെ ഭാഗമാക്കിയെന്നും അദ്ദേഹം വ്യക്തമാക്കി. ഇതാണ് കേസുകളുടെ എണ്ണത്തിൽ വർധനയുണ്ടായെന്ന തോന്നലിനു കാരണമെന്നും അദ്ദേഹം പറഞ്ഞു. 

∙ വേറെയും ഏറെ മാറ്റങ്ങൾ 

ജെൻഡർ വിരുദ്ധ പരാമർശങ്ങൾക്കുൾപ്പെടെ ഒട്ടേറെ പഴഞ്ചൻ രീതികളിൽ വലിയ തിരുത്തിന് സുപ്രീം കോടതി ശ്രമിച്ചതും ജസ്റ്റിസ് ചന്ദ്രചൂഡിന്റെ കാലത്താണ്. കോടതി ഭാഷയിൽ ഉപയോഗിക്കപ്പെടുന്ന പഴഞ്ചൻ പരാമർശങ്ങളെയും മുൻവിധിയോടെയുള്ള ധാരണകളെയും പൊളിച്ചെഴുതാൻ 2023ൽ കൈപ്പുസ്തകം ഇറക്കി. രാജ്യത്തെ സാധാരണ കോടതികളെ കീഴ്ക്കോടതികൾ എന്നു വിളിക്കരുതെന്ന് വിലക്കി. പകരം, വിചാരണക്കോടതികളെന്നോ മുൻസിഫ്, സെഷൻസ് കോടതികളെന്നോ എല്ലാം പദവിക്കനുസരിച്ചു വിളിക്കാൻ നിർദേശിച്ചു. 

വിദേശ കോടതികളും ജഡ്ജിമാരുമായുള്ള ഊഷ്മള ബന്ധത്തിലും ആശയവിനിമയത്തിലും ചീഫ് ജസ്റ്റിസ് ചന്ദ്രചൂഡിന് വലിയ മുന്നേറ്റമുണ്ടാക്കാൻ കഴിഞ്ഞു. വിദേശ ജഡ്ജിമാർ ചീഫ് ജസ്റ്റിസിന്റെ ബെഞ്ചിൽ ഗെസ്റ്റ് ജഡ്ജിമാരായി നടപടികൾ വീക്ഷിക്കുന്നത് ഒരുഘട്ടത്തിൽ പതിവു കാഴ്ചയായിരുന്നു. നീതിന്യായരംഗത്തെ പ്രമുഖർ മാത്രമല്ല, ജെൻഡർ തുല്യതയുടെ പ്രധാന്യം പറയുന്ന ‘ലാപതാ ലേഡീസ്’ എന്ന ഹിറ്റ് ചിത്രത്തിന്റെ അണിയറ പ്രവർത്തകരും ബോളിവുഡ് നടൻ ആമിർഖാനും വരെ ജസ്റ്റിസ് ചന്ദ്രചൂഡിന്റെ കോടതിമുറിയിലെ അതിഥികളായി. 

∙ കേസുകൾ, വിധിന്യായങ്ങൾ 

സ്വകാര്യത പൗരരുടെ മൗലികാവകാശമെന്നും ആധാർപദ്ധതി സ്വകാര്യതയുടെ ലംഘനമെന്നും ലൈംഗിക ന്യൂനപക്ഷങ്ങൾക്കു ജീവിതാവകാശത്തിൽ മറ്റാരെയുംപോലെ തുല്യതയുണ്ടെന്നും വിധിയെഴുതിയ ആളാണ് ജസ്റ്റിസ് ചന്ദ്രചൂഡ്. സുപ്രീം കോടതിയിലെ ന്യായാധിപ കാലത്ത് ആകെ 1275 ബെഞ്ചുകളുടെ ഭാഗമായ ജസ്റ്റിസ് ചന്ദ്രചൂഡ് 613 വിധിന്യായങ്ങളെഴുതി. അതിൽ 500 എണ്ണവും ചീഫ് ജസ്റ്റിസ് പദവിയിലെത്തുന്നതിനു മുൻപാണ്. 

ഇതിൽ, പൗര– മൗലികാവകാശങ്ങളുമായി ബന്ധപ്പെട്ട കേസുകളിൽ ജസ്റ്റിസ് ചന്ദ്രചൂഡിന്റെ തട്ട് താണു തന്നെയിരിക്കും. ഫീസടയ്ക്കാൻ കഴിയാതെ പോയ വിദ്യാർഥികൾക്ക് പ്രവേശനത്തിനു സവിശേഷാധികാരം ഉപയോഗിച്ചു വിധി പുറപ്പെടുവിച്ചതും പഠിക്കാൻ മിടുക്കരായിട്ടും ഭിന്നശേഷിയുടെ പേരിൽ മാറ്റി നിർത്തപ്പെട്ടവർക്ക് മെഡിക്കൽ പഠനത്തിന് അനുമതി നൽകിയതും ഉൾപ്പെടെ എന്നുമോർക്കുന്ന ഇടപെടലുകൾ അദ്ദേഹത്തിൽ നിന്നുണ്ടായി. എന്നാൽ, ചില കേസുകളിലെങ്കിലും പൂർണനീതി ഉറപ്പാക്കുന്നതിൽ ചീഫ് ജസ്റ്റിസിനു പിഴവു പറ്റിയെന്നു വിശ്വസിക്കുന്നവരുണ്ട്.

മഹാരാഷ്ട്രയിൽ ഉദ്ധവ് താക്കറെയുടെ ഭരണം അവസാനിപ്പിച്ച ഗവർണറുടെ നടപടി തെറ്റെന്നുവിധിച്ചപ്പോൾ തന്നെ ആ തെറ്റിലൂടെ അധികാരം ലഭിച്ച ഷിൻഡെ സർക്കാർ തുടരാൻ അദ്ദേഹം അനുവദിച്ചു. ഇലക്‌ടറൽ ബോണ്ട് പദ്ധതി ഭരണഘടനാവിരുദ്ധമെന്നു പ്രഖ്യാപിച്ച ശേഷവും പദ്ധതിയുടെ നേട്ടം ലഭിച്ചവരെക്കുറിച്ച് അന്വേഷണം വേണ്ടെന്നു വച്ചു. ആ വൈരുധ്യം നീറ്റ് ക്രമക്കേടുമായി ബന്ധപ്പെട്ട കേസിലും തുടർന്നു. വാദത്തിനിടെയും അല്ലാതെയും ക്രമക്കേടും ചോദ്യപേപ്പർ ചോർച്ചയും ഉണ്ടായെന്ന കാര്യം കോടതിക്കു ബോധ്യപ്പെട്ടു. എന്നാൽ, അന്തിമവിധിയിൽ അതു പ്രതിഫലിച്ചില്ല. പൗരത്വ നിയമ ഭേദഗതിക്കെതിരെയുള്ള ഹർജികൾ ഇനിയും തീർപ്പാക്കാതിരിക്കുന്നത്, ആരാധനാസ്ഥല നിയമം ആരാധനാലയങ്ങളുടെ സ്വഭാവം പരിശോധിക്കുന്നതിനു തടസ്സമല്ലെന്ന പരാമർശം തുടങ്ങി വൈരുധ്യങ്ങൾ നിറഞ്ഞ ഇടപെടലുകൾ വേറെയുമുണ്ട്.