‘അണ്ടകീമ’ കഴിച്ചപ്പോൾ തോന്നി, ഇങ്ങനെയും ഭക്ഷണമോ! തേടി കണ്ടുപിടിച്ച ‘ ഡബിൾ ഹാഫ് ചാ’; ആ ചവർപ്പ് രുചി മാത്രം പേടിപ്പിച്ചു

ഒഡീഷയിലെ പുരിയ്ക്ക് അടുത്തായി ‘ചന്ദൻപുർ’ എന്നൊരു ഗ്രാമമുണ്ട്. അവിടെ മാത്രം ലഭിക്കുന്ന ഒരുഭക്ഷണമാണ് ‘ച്യൂരകദം’. വെള്ള അവലിലേക്ക് പാല്‍ പഞ്ചസാര, ഏലക്ക, ചെന (പാലിൽ നിന്നുണ്ടാക്കുന്ന ഉൽപന്നം) എന്നിവ ചേർത്ത് നന്നായി കുഴച്ചുണ്ടാക്കുന്നതാണ് ഇത്. ‘മാഷ്ഡ് പൊട്ടറ്റോ’ പോലെയുണ്ടാവും കാഴ്ചയിൽ. ഒഡീഷക്കാർക്ക് ഏറ്റവും ഇഷ്ടപ്പെട്ട ഒരു വെജിറ്റേറിയൻ ഭക്ഷണമാണ് ‘ദാൽമ’ (പൊങ്കലും സാമ്പാറും ചേർന്നുള്ള ഒരു വിഭവം പോലെയുള്ളത്). ഈ ച്യൂരകദവും ദാൽമയും ചന്ദൻപുരിലെ ‘പത്മാലയ’ എന്നൊരു ഹോട്ടലിൽ ലഭിക്കും. ഭുവനേശ്വറിൽ നിന്ന് രണ്ടരമണിക്കൂർ സ്കൂട്ടറിൽ യാത്ര ചെയ്ത് ചന്ദൻപുരിൽ പോയി ഈ വിഭവം കഴിച്ചിട്ടുണ്ട്. ച്യൂരകദമിന്റെ മധുരവും ദാൽമയുടെ എരിവും ചേരുമ്പോൾ നല്ല രുചിയാണ്.

∙ ചരിത്രവും കൊൽക്കത്തയിലെ കാത്തിറോളും

രണ്ടുഘടകങ്ങൾ നോക്കിയാണ് ഞാൻ യാത്രകൾ തിരഞ്ഞെടുക്കുന്നത്. ചരിത്രപ്രാധാന്യമുള്ള സ്ഥലങ്ങളോട് എനിക്ക് ഇഷ്ടം കൂടുതലാണ്. വാരാണസി, ലഖ്നൗ, കൊൽക്കത്ത തുടങ്ങിയ നഗരങ്ങൾക്കെല്ലാം ഒരുപാട് നാളത്തെ ചരിത്രം പറയാനുണ്ട്. ഒരുനഗരത്തിന് എത്ര പഴക്കമുണ്ടോ അത്രയും പഴക്കമുള്ള ചെറിയ ചെറിയ ഭക്ഷണശാലകൾ ആ നഗരത്തിലുണ്ടാകും. ഈ കടകൾക്കെല്ലാം സിഗ്നേച്ചറായി ഒരു വിഭവവും കാണും. മനുഷ്യർ നൂറോ നൂറ്റമ്പതോ ഇരുനൂറോ വർഷങ്ങളായി കഴിച്ച് ശീലിച്ച ഭക്ഷണങ്ങൾ നമുക്ക് ഈ കടകളിൽ നിന്ന് ലഭിക്കും. ഒരുപാട് മനുഷ്യരും സംസ്കാരങ്ങളും വന്നുപോയിട്ടുള്ള സ്ഥലങ്ങളാണ് എനിക്കിഷ്ടം.

കേരളത്തില്‍ കോഴിക്കോടിന് അങ്ങനെയൊരു സംസ്കാരം അവകാശപ്പെടാനുണ്ട്. അറബികളും പോർച്ചുഗീസുകാരും ഇവിടെ വന്നുപോയി. ഇവരുടെയെല്ലാം സംഭാവനയായ പലതും കോഴിക്കോടുണ്ട്. മൈദ എന്ന മാവ് കേരളത്തിൽ ഒരിക്കലും വന്നുപെടാൻ സാധ്യതയില്ലാത്തതാണ്. മലബാർ പൊറോട്ട എന്ന ഭക്ഷണം ഇവിടെ വന്നതു തന്നെ അറബികൾ വന്നുപോയതിനാലാണ്. മലബാർ പൊറോട്ടയിൽ നിന്നാണ് തമിഴ്നാട്ടിൽ കോയിൻ പൊറോട്ടയുണ്ടായത്. പിന്നീട് ഈ പൊറോട്ട ശ്രീലങ്കയിൽ പോയി സിലോൺ പൊറോട്ടയായി പരിണമിക്കുന്നു. ദക്ഷിണേന്ത്യയില്‍ മുഴുവൻ ഈ പൊറോട്ടയുടെ വൈവിധ്യങ്ങൾ വന്നത് അറബികൾ ഇവിടെ കച്ചവടത്തിനു വന്നതിനാലാണ്.

അതുപോലെതന്നെ മുഗുളന്മാരും ഡൽഹി രാജാക്കന്മാരും ഭരിച്ച ഡൽഹിക്കും അതിന്റെതായ ഒരു ഭക്ഷണ സംസ്കാരം ഉണ്ട്. രാജസ്ഥാനിൽ വിവിധകാലഘട്ടങ്ങളിലുണ്ടായ രജപുത്ര രാജാക്കന്മാർ കൊണ്ടുവന്ന വളരെ രസകരമായ ഒരു വെജിറ്റേറിയൻ ഭക്ഷണ സംസ്കാരമുണ്ട്. കൊൽക്കത്തയിൽ ‘കാത്തി റോൾ’ എന്നൊരു വിഭവമുണ്ട്. റുമാലി റൊട്ടിക്കുള്ളിൽ കബാബും കുറെ പച്ചക്കറികളും േചർത്ത് ചുരുട്ടി നൽകും. 

∙ ചുട്ടനീരാളിയും തൊണ്ടയിൽ നിന്നിറങ്ങാത്ത പാനീയവും

കഴിച്ചിട്ട് ഇനി ഒരിക്കലും കഴിക്കില്ല എന്ന് തീരുമാനിച്ച ഒരു ഭക്ഷണം നീരാളിയാണ്. ബാലിയിൽ ഗിലി ട്രവങ്ക് എന്നൊരു ദ്വീപുണ്ട്. അവിടെയൊരു രാത്രി മാർക്കറ്റിൽ നീരാളിയെ കമ്പിയിൽ കോർത്ത് ചുട്ടുതരും. ചുട്ടുതരുമ്പോൾ തന്നെ ഒരു കറുത്ത നിറമാണ്. കാണുമ്പോൾ തന്നെ നമുക്കത് കഴിക്കാനൊരു താൽപര്യം തോന്നില്ല. എന്നിരുന്നാലും ഒന്ന് കഴിച്ചു നോക്കാം എന്ന് ഞാൻ എന്നോടു തന്നെ പറഞ്ഞ് കഴിച്ചു നോക്കിയതാണ്. റബർ ചവയ്ക്കുന്നതുപോലെ തോന്നി. അത് കഴിച്ചപ്പോൾ തന്നെ എനിക്ക് ഭക്ഷ്യവിഷബാധ പിടിക്കുമോ എന്നൊക്കെ സംശയം തോന്നി. ഇനി എന്തായാലും കഴിക്കില്ല. തൊണ്ടയിൽ നിന്നിറങ്ങിപ്പോകാത്തതിനാൽ അവിടെ നിന്ന് കുടിച്ച ചെംചെം, ജാമുൻ എന്നീ പാനീയങ്ങളും ഇനി കുടിക്കില്ലെന്ന് ഉറപ്പിച്ചതാണ്.

നാഗാലാൻഡിൽ പട്ടുനൂൽ പുഴുക്കളെ ഉപയോഗിച്ച് ഒരു ചട്ണിയുണ്ടാക്കും എന്നു കേട്ടിട്ടുണ്ട്. രുചിയറിയണം എന്ന് ഏറ്റവും കൂടുതൽ ആഗ്രഹമുള്ള ഒരു ഭക്ഷണമാണ് അത്. അതുപോലെ തന്നെ ഹരിയാനയിലെ ഭക്ഷണങ്ങൾ കഴിക്കാനും ആഗ്രഹമുണ്ട്. ഒരുപാട് പാലുത്പന്നങ്ങൾ ഉപയോഗിക്കുന്ന ഒരു സംസ്ഥാനമാണ് ഹരിയാന. പിന്നെ ജപ്പാനിൽ പോയി റാമെൻ, തൂശെ ഇതിന്റെയെല്ലാം യഥാർഥ രുചി അറിയണമെന്ന് ആഗ്രഹമുണ്ട്.