എന്താണ് ലൈംഗിക അവയവം? 91.2% കുട്ടികളുടെ മറുപടി കേട്ട് ഞെട്ടി; 'ആ ദിവസങ്ങളെ' കുറിച്ചും ഇല്ല ശരിയായ അറിവ്

ആർത്തവ ശുചിത്വവുമായി ബന്ധപ്പെട്ടു പ്രവർത്തിക്കുന്ന ഏജൻസിയാണ് ‘ദ് മെൻസ്ട്ര്വൽ ഹൈജീൻ അലയൻസ് ഓഫ് ഇന്ത്യ’. ഇവർ അടുത്തിടെ ഒരു കണക്ക് പുറത്തുവിട്ടു. ഇന്ത്യയിൽ 33.6 കോടി വനിതകൾ ആർത്തവവുമായി ബന്ധപ്പെട്ട് സാനിറ്ററി നാപ്കിനുകൾ ഉപയോഗിക്കുന്നുണ്ട്. അതിന്റെ എണ്ണം മാസത്തിൽ 100 കോടി വരും. വർഷത്തിൽ 1230 കോടി എണ്ണവും! ഇതിൽനിന്നു വ്യക്തമാണ് ഇന്ത്യയിൽ സാനിറ്ററി നാപ്കിൻ വിപണി എത്രകോടി മൂല്യമുള്ളതാണെന്ന്. കച്ചവടക്കാർക്ക് ഈ മൂല്യം കൃത്യമായറിയാം. അതിനാൽത്തന്നെ പലതരം ബ്രാൻഡുകൾ ഓരോ വർഷവും വിപണിയിലെത്തുന്നുണ്ട്. അതിന്റെ പരസ്യങ്ങളും നമുക്കു മുന്നിലെത്തുന്നു. എന്നാൽ ആ പരസ്യം കാണുന്ന എത്ര കുട്ടികൾക്കറിയാം എന്താണ് ആർത്തവമെന്ന്?ഇതിനെപ്പറ്റി കേരളത്തിൽ നടത്തിയ ഒരു സർവേയിൽനിന്നു ലഭിച്ച വിവരങ്ങൾ അമ്പരപ്പിക്കുന്നതാണ്.

ഹൈസ്‍കൂൾ, ഹയർസെക്കൻഡറി വിദ്യാർഥികളിൽ ആർത്തവം എന്തെന്ന് അറിയാവുന്നത് 4.6 ശതമാനം വിദ്യാർഥികൾക്കു മാത്രമാണെന്നാണ് സർവേ റിപ്പോർട്ട്. പൊതുവിദ്യാഭ്യാസ വകുപ്പും തിരുവനന്തപുരം ജില്ലാഭരണകൂടവും കനൽ എന്ന എൻജിഒ സംഘടനയും ചേർന്ന് തിരുവനന്തപുരം ജില്ലയിലെ 90 സ്കൂളുകളിലെ 9500 വിദ്യാർഥികളിൽ നടത്തിയ പഠനത്തിലാണ് ഞെട്ടിപ്പിക്കുന്ന വിവരം. ചോദ്യാവലിയിലെ, ആർത്തവം എന്നാൽ എന്തെന്ന ചോദ്യത്തിന് ‘പെൺകുട്ടികൾക്ക് മാസത്തിൽ വരുന്ന ഒരു ഇത്’ എന്നാണ് ഭൂരിപക്ഷം വിദ്യാർഥികളും ഉത്തരം നൽകിയത്. പെൺകുട്ടികളേക്കാൾ ആൺകുട്ടികൾക്ക് ആർത്തവത്തെപ്പറ്റി അറിയാമെന്നതും കൗതുകം. സർവേയിൽ പങ്കെടുത്ത 3.8 ശതമാനം പേർക്കാണ് ആർത്തവം എന്തെന്ന് അറിയാവുന്നത്. എന്നാൽ ആൺകുട്ടികളിൽ 5.2 ശതമാനം പേർക്കും ആർത്തവത്തെപ്പറ്റി അറിയാം.

‘ആരാണ് കുട്ടി’ എന്ന ചോദ്യത്തിനു കൃത്യമായ ഉത്തരം നൽ‌കിയത് 13.5 ശതമാനം വിദ്യാർഥികൾ. സെക്സും ജെൻഡറും തമ്മിലുളള വ്യത്യാസം എന്താണെന്ന ചോദ്യത്തിന് ശരിയുത്തരം രേഖപ്പെടുത്തിയത് 2.6 ശതമാനം പേർ മാത്രം. പോക്സോ ആക്ടിനെപ്പറ്റി സർവേയിൽ പങ്കെടുത്ത 25.28 ശതമാനം വിദ്യാർഥികൾ‌ക്ക് അറിയാം. ലൈംഗിക അവയവങ്ങളെപ്പറ്റി ധാരണയുള്ളത് 10.2 ശതമാനം പേർക്കാണ്. ആരാണ് കുട്ടി എന്ന ചോദ്യത്തിന് കൃത്യമായ ഉത്തരം നൽ‌കിയത് 21.05 ശതമാനം വിദ്യാർഥികൾ മാത്രമാണ്. മനുഷ്യശരീരത്തിലെ ഏറ്റവും വലിയ ലൈംഗിക അവയവം ഏതാണ്, എന്താണ് ലിംഗ സ്വത്വം, ടോക്സിക് ബന്ധങ്ങൾ എന്നാൽ എന്താണ്, പോക്സോ കേസ് എന്നാൽ‌ എന്ത് എന്നൊക്കെയായിരുന്നു സർവേയിലെ മറ്റ് ചോദ്യങ്ങൾ. എന്തായാലും വിവാദങ്ങളൊന്നുമില്ലാതെ സർവേ നടന്നു. ലൈംഗിക വിദ്യാഭ്യാസം കുട്ടികൾക്കു വേണോ എന്ന ചോദ്യത്തിന്മേൽ ഇപ്പോഴും കുലംകഷമായി ചർച്ച നടത്തുന്നവരാണ് മലയാളികൾ. അത്തരം വിദ്യാഭ്യാസത്തിന്റെ ആവശ്യകതയിലേക്കു വിരൽ ചൂണ്ടുന്നതുകൂടിയായി സർവേ റിപ്പോർട്ട്. സർവേയിലെ പ്രധാന കണ്ടെത്തലുകൾ താഴെ ഗ്രാഫിക്സിലൂടെ അറിയാം: