‘എൽദോസ് വരുന്നതു ഞങ്ങൾ കണ്ടിരുന്നു'; കത്തുന്ന വിളക്കുകൾ ഊരിമാറ്റി ഉദ്യോഗസ്ഥർ; ഇതോടെ നഷ്ടമായി ആ വിശ്വാസവും!

∙ ഇരു ഭാഗത്തും കാട്, നടുവിൽ അരുവി

ആറരയോടെ ഉരുളൻതണ്ണിയിൽ എത്തിയ എൽദോസ് കുറച്ചു നേരം അവിടെ ചെലവഴിച്ച ശേഷം വീട്ടിലേക്ക് പോകാൻ ഓട്ടോ അന്വേഷിച്ചിരുന്നു. എന്നാൽ സ്ഥലത്തുള്ള പെട്രോൾ പമ്പ് 2 ദിവസമായി അടഞ്ഞുകിടന്നതിനാൽ മിക്ക ഓട്ടോകളിലും ആവശ്യത്തിന് ഇന്ധനം ഉണ്ടായിരുന്നില്ല. അതിനാൽ മിക്കവരും സന്ധ്യയോടെ ഓട്ടം അവസാനിപ്പിച്ചിരുന്നു. മാത്രമല്ല, വൈകിട്ട് 6 മണിയോടെ തന്നെ മിക്കവരും വീട്ടിൽ കയറുന്നതാണ് ഇവിടുത്തെ പതിവ്. കാരണം, വഴിയിൽ മിക്കവരും ആനയെ കാണാറുണ്ട്. അത്യാവശ്യം വന്നാൽ വാഹനങ്ങളിൽ മാത്രം യാത്ര ചെയ്യും.

ഇതുവരെയും ഇവിടെ ആരെയും ആന ഉപദ്രവിച്ച ചരിത്രവുമില്ല. പക്ഷേ എൽദോസിന്റെ സംഭവത്തോടെ നാട്ടുകാർക്ക് ആ വിശ്വാസം നഷ്ടമായി. എൽദോസിനെ ആന ആക്രമിച്ച സ്ഥലത്തിന്റെ ഇടതുഭാഗം അരുവിയാണ്. ആന ഇടയ്ക്ക് വെള്ളം കുടിക്കാറുള്ള സ്ഥലം. അവിടെ നിന്ന് റോഡ് മുറിച്ചുകടന്ന് മുകളില്‍, നാട്ടുകാർ  മുക്ക്മല എന്നു വിളിക്കുന്ന  മലയടിവാരത്തേക്ക് പോകുന്നതാണ് ആനകളുടെ പതിവ്. ഒട്ടേറെ വീടുകളുള്ള പ്രദേശമാണിത്.

2 ആനകളാണ് സാധാരണയായി ഇവിടെ ചുറ്റിത്തിരിയുന്നതെന്നാണ് 43 വർഷമായി ഇവിടെ താമസിക്കുന്ന തൊടിയിൽ ടി.യു. പൗലോസ് പറയുന്നത്. ആക്രമണം ഉണ്ടാകുന്നതിന് കുറച്ചു മുൻപ് താനും എൽദോസിന്റെ ഒരു ബന്ധുവും അതുവഴി സ്കൂട്ടറിൽ കടന്നുപോന്നിരുന്നു. ആറുമണിയൊക്കെ കഴിഞ്ഞപ്പോൾ തന്നെ സ്ഥലത്ത് ആനയുടെ സാന്നിധ്യം ഉണ്ടായിരുന്നതായി തങ്ങൾ വനംവകുപ്പ് അധികൃതരെ അറിയിച്ചിരുന്നെന്ന് നാട്ടുകാർ പറയുന്നുണ്ട്. വൈകിയെത്തുമ്പോൾ വാഹനം കിട്ടിയില്ലെങ്കിൽ പലരും വനംവകുപ്പ് ഉദ്യോഗസ്ഥരെ ആശ്രയിക്കാറുമുണ്ട്.

അന്നു പക്ഷേ ഫോറസ്റ്റുകാരുടെ ജീപ്പിലും ഇന്ധനം ഉണ്ടായിരുന്നില്ലെന്ന് നാട്ടുകാർ പറയുന്നു. മൂവാറ്റുപുഴയിലെ ലാബിൽ ജോലി ചെയ്യുന്ന ശ്രീദേവി ഒരു വയസ്സുള്ള മകൻ താമറിനൊപ്പമാണ് രാവിലെ യാത്ര തുടങ്ങുന്നത്. മകനെ ഡേകെയറിലാക്കി വൈകിട്ട് ആറരയുടെ ബസ്സിൽ തിരികെ എത്തുമ്പോൾ ഉരുളൻതണ്ണിയിൽ കാത്തുനിൽക്കാറുള്ള ഭർത്താവിനൊപ്പമാണ് വീട്ടിലേക്ക് പോകുന്നത്. ‘‘ഞങ്ങൾ ബൈക്കിൽ വരുമ്പോൾ എൽദോസ് നടന്നു വരുന്നതു കണ്ടിരുന്നു. അപ്പോൾ ഏകദേശം ഏഴു മണി ആയിട്ടുണ്ടാവും.  അധിക സമയം കഴിയുന്നതിന് മുൻപ് തന്നെ അപകട വാർത്തയും കേട്ടു.’’ – ശ്രീദേവി പറയുന്നു. അതായത് കൈക്കുഞ്ഞുമായി തങ്ങൾ കടന്നുപോന്നപ്പോഴും അവിടെ ആനയുടെ സാന്നിധ്യം ഉണ്ടായിരുന്നു എന്ന് ഉൾക്കിടലത്തോടെ മാത്രമേ ഓർക്കാനാകു എന്ന് ശ്രീദേവി പറയുന്നു.

∙ വഴിവിളക്കില്ല, ആനയ്ക്ക് ശല്യമാകും, ഇപ്പോൾ കെടാതെ വെളിച്ചം

ഫോറസ്റ്റ് പട്രോളിങ് സ്റ്റേഷനിൽ നിന്ന് ഉരുൾതണ്ണിയിൽ നാട്ടുകാർ ‌താമസിക്കുന്ന ഒന്നര കിലോമീറ്ററോളം ദൂരം ഒരു തെരുവ് വിളക്കുപോലുമില്ല. ആറു മണിയാകുമ്പോൾ തന്നെ ഇരുൾ മൂടുന്ന കാടിനകത്തെ വഴിയിലൂടെ മൊബൈൽ ഫോണിലെ ടോർച്ചിന്റെ വെളിച്ചത്തിലാണ് ജനങ്ങൾ നടക്കുന്നത്. ഒരു വിളക്ക് ഉണ്ടായിരുന്നെങ്കിൽ ആന നിൽക്കുന്നത് എൽദോസിന് കാണാൻ കഴിഞ്ഞേനെ എന്ന് സുഹൃത്തുക്കളും പറയുന്നു. തിങ്കളാഴ്ച രാത്രി എൽദോസിന്റെ മരണമറിഞ്ഞ് തടിച്ചുകൂടിയ ജനം പ്രതിഷേധിച്ചതും മൊബൈൽ വെളിച്ചത്തിലാണ്.

പിന്നീടാണ് അധികാരികൾ എൽദോസ് മരിച്ചു കിടന്ന സ്ഥലത്തിന് സമീപത്ത്  ഒരു വിളക്ക്  സ്ഥാപിച്ചത്. കലക്ടറും എംഎൽഎമാരും ജനങ്ങളെ ശാന്തരാക്കാൻ ചർച്ചകൾ നടത്തിയതും ഈ ലൈറ്റിന്റെ വെളിച്ചത്തിലാണ്. ചൊവ്വാഴ്ച പകൽ മുഴുവൻ അത് തെളിഞ്ഞുകിടക്കുകയും ചെയ്തു. ആർക്കും ഗുണമില്ലാതെ. വന്യമൃഗങ്ങളുടെ സ്വൈര്യവിഹാരത്തിന് വെളിച്ചം തടസമാകും എന്നതിനാലാണ് ഇവിടങ്ങളിലെ വഴിവിളക്കുകൾ‍ എടുത്തു മാറ്റിയതെന്ന് ജനങ്ങൾ ആക്ഷേപിക്കുന്നു. ഫെൻസിങ്ങിനും ട്രെഞ്ചിനുമൊപ്പം കലക്ടറോട് ജനങ്ങൾ‍ ആവശ്യപ്പെട്ടതും തങ്ങള്‍ നടക്കുന്ന വഴിയിൽ ഒരു വിളക്ക് സ്ഥാപിച്ചു തരാനാണ്.

∙ അപ്പോഴും കെടാതെ മൊബൈൽ, ചിന്നിച്ചിതറി എൽദോസ്

നല്ലതണ്ണിയിൽ ഓട്ടോറിക്ഷ ഓടിക്കുന്ന ചെറുതോണി മണിയാറംകുടി നിതിൻ തങ്കച്ചന്‍ എട്ടുമണിയോടെ നാട്ടുകാരുടെ അടുത്തുനിന്ന് കവലയിലേക്ക് തിരിച്ചു പോകാൻ തുടങ്ങുമ്പോഴാണ് കുഞ്ഞുമോൻ എന്ന മറ്റൊരു ഓട്ടോക്കാരൻ വെപ്രാളപ്പെട്ട് ഓടിച്ചു വരുന്നത്. വഴിക്ക് ആനയുണ്ടെന്നും കഷ്ടപ്പെട്ടാണ് താൻ തിരിച്ചു  എടുത്തു പോന്നതെന്നും കുഞ്ഞുമോൻ പറഞ്ഞതോടെ അവിടെയുള്ള 3 ഓട്ടോറിക്ഷാക്കാർ ഒരുമിച്ച് പോകാൻ തീരുമാനിച്ചു. കു‍ഞ്ഞുമോൻ വേഗത്തിൽ ഓടിച്ചു പോയെന്ന് നിതിൻ പറയുന്നു.

ആക്രമണം നടന്ന ഇടത്തേക്ക് ചെല്ലുമ്പോഴാണ് ഓട്ടോയുടെ വെളിച്ചത്തിൽ തറയിൽ നിറയെ രക്തം കിടക്കുന്നത് കണ്ടത്. അതിനടുത്തായി അപ്പോഴും ഒരു മൊബൈൽ ഫോണിലെ ടോർച്ച് പ്രകാശിച്ചു കിടന്നിരുന്നു. സമീപത്തായി ചിന്നിച്ചിതറിയ നിലയിൽ മൃതദേഹവും. ഉടൻ തന്നെ ആ മൊബൈലുമെടുത്ത് വനംവകുപ്പ് അധികൃതരുടെ അടുത്തെത്തി അവരെയും കൂട്ടി അപകട സ്ഥലത്തേക്ക് തിരികെയെത്തുകയായിരുന്നു നിതിൻ.  കഴിഞ്ഞ ആഴ്ച രണ്ടു ദിവസം പുലർച്ചെ 2 മണിയോടെ ആനയിറങ്ങി വാഴ ഉൾപ്പെടെയുള്ള കൃഷികൾ എല്ലാം നശിപ്പിച്ചിരുന്നു.

∙ കിടക്കുന്നത് വീടിനു ചുറ്റും വെളിച്ചമിട്ട്; ആന, കുരങ്ങൻ, മലയണ്ണാന്‍, കേഴ...

ആന മാത്രമല്ല, കുരങ്ങന്റെയും മ്ളാവിന്റെയും മലയണ്ണാന്റെയുമൊക്കെ നിരന്തര ശല്യമാണ് ഇവിടെയെന്ന് പ്രദേശവാസികളായ കൊളമ്പേക്കാട് വീട്ടിൽ ഷൈമിയും കോടിയാട്ട് വീട്ടിൽ ജാൻസിയും പറയുന്നത്. തെങ്ങിലടക്കം കുരങ്ങന്മാരുടെ വിളയാട്ടമാണ്. മ്ളാവ് കൊക്കോ അടക്കം ഭക്ഷിക്കുന്നു. പല മരങ്ങളുടേയും വേരുകൾ പൊളിച്ചു തിന്നുന്നു.