പനി പോലെ ചികിത്സ ആവശ്യമായ രോഗം; മലയാളികളെ രക്ഷിച്ചവരിൽ ദീപികയും; ആ നല്ല മാറ്റത്തിൽ നമ്മുടെ കോഴിക്കോടും

∙ മാറ്റത്തിന്റെ കണക്കുമായി ‘ജസ്റ്റ് ഡയൽ’ 

ലോക്കൽ സേർച് എൻജിനായ ‘ജസ്റ്റ് ഡയൽ’ അടുത്തിടെ ഒരു കണക്ക് പുറത്തുവിട്ടു. സൈക്കോളജിസ്റ്റുകളെ ഓൺലൈനായി തിരയുന്നവരുടെ എണ്ണത്തെ കുറിച്ചായിരുന്നു അത്. തിരച്ചിലിൽ രാജ്യമാകമാനം വലിയ വർധനയാണ് 2024ൽ ഉണ്ടായത്. സൈക്കോളജിസ്റ്റുകളെ ഓൺലൈനായി തിരയുന്നവരുടെ എണ്ണത്തിൽ വലിയ വർധനയുണ്ടെന്നാണ് ജസ്റ്റ് ഡയൽ കണക്കുകളിലൂടെ പറയുന്നത്. 2023നെ അപേക്ഷിച്ച് ‘ഹെൽത്ത് കെയർ’ റിലേറ്റഡ് തിരച്ചിലുകളിൽ വലിയ വർധനയാണുണ്ടായിരിക്കുന്നത്. 2024 ജനുവരി മുതൽ ഒക്ടോബർ വരെയുള്ള കണക്കുകളാണിത്. 23 ശതമാനമാണ് വളർച്ച. മനഃശാസ്ത്രജ്ഞർക്കായി രാജ്യവ്യാപകമായി ഓണ്‍ലൈനിൽ നടന്ന തിരച്ചിലിൽ 41% വർധനയാണ് ഇക്കാലയളവിൽ രേഖപ്പെടുത്തിയിരിക്കുന്നത്. കൊൽക്കത്ത, മുംബൈ, കോഴിക്കോട് തുടങ്ങിയ നഗരങ്ങളിൽ യഥാക്രമം 43%, 36%, 29% എന്നിങ്ങനെയാണ് തിരച്ചിൽ. 

മാനസിക വെല്ലുവിളികളോട് പുലർത്തിയിരുന്ന ‘സ്റ്റിഗ്മ’ അഥവാ ‘അതൊരു മോശം കാര്യമല്ലേ എന്ന തോന്നൽ’ കുറഞ്ഞുവരുന്നതായും അത്തരം രോഗങ്ങൾക്ക് സഹായം തേടുന്നവരുടെ എണ്ണത്തിൽ വലിയ വർധനയുണ്ടെന്നും മെഡിക്കൽ പ്രഫഷനലുകള്‍ പറയുന്നു. സമൂഹത്തിന്റെ മാനസിക ആരോഗ്യം ശരിയായ ദിശയിൽ മുന്നോട്ടു പോകുന്നുവെന്നതിന്റെ തെളിവായി ഈ മാറ്റത്തെ കാണാൻ സാധിക്കും. ശാരീരിക ആരോഗ്യത്തിന് കൊടുക്കുന്ന പ്രാധാന്യത്തിനൊപ്പം മാനസിക ആരോഗ്യത്തിനു പ്രാധാന്യം കൊടുക്കാനും മാനസിക വെല്ലുവിളികളെ അഭിമുഖീകരിക്കാനും ആളുകള്‍ തുടങ്ങിയിരിക്കുന്നു എന്നുവേണം മനസ്സിലാക്കാൻ. അതെ, മാനസിക വെല്ലുവിളികള്‍ക്ക് സഹായം തേടാനും ചികിത്സിക്കാനും വിമുഖത കാട്ടിയിരുന്ന ഒരു സമൂഹം പതിയെ മാറിത്തുടങ്ങിയിരിക്കുന്നു.

∙ സമൂഹമാധ്യമങ്ങൾ എന്തുചെയ്തു?

സൈക്കോളജിസ്റ്റുകളെ കാണുന്നത് എന്തോ മോശം കാര്യമാണെന്ന പ്രായമായവരുടെ തോന്നലുകൾ വരെ മാറ്റിയതിൽ  സമൂഹമാധ്യമത്തിന് വലിയ പങ്കാണുള്ളത്. ഇതിലെ പ്രധാന കാര്യം മാനസിക വെല്ലുവിളികൾ ലോകത്ത് പലർക്കും ഉള്ളതാണെന്നും തനിക്കുമാത്രമല്ലെന്ന തോന്നൽ ഉണ്ടാക്കാനായി എന്നതുമാണ്.  റിലേഷൻഷിപ്പിലെ ഗ്യാസ്‌ലൈറ്റിങ്, ട്രോമാ ബോണ്ടിങ് ഇവയൊക്കെ സമൂഹത്തിന് പരിചയപ്പെടുത്തിയത് സമൂഹമാധ്യമങ്ങളാണ്. റീലുകൾ ഇക്കാര്യത്തിൽ വലിയ പങ്കാണ് വഹിക്കുന്നത്. ചെറു വിഡിയോകൾക്ക് വലിയൊരു അഭിമുഖത്തിനേക്കാളും ജനമനസ്സിനെ ആഴത്തിൽ സ്പർശിക്കാനാവും. ദീപിക പദുക്കോണിനെ പോലുള്ള വമ്പൻ താരങ്ങൾ വരെ ഡിപ്രഷന്റെ പിടിയിലാണെന്ന് സമൂഹമാധ്യമങ്ങളില്‍ ഏറ്റുപറയുമ്പോൾ, മറ്റുള്ളവർക്ക് അതെല്ലാം ഏറ്റുപറയാനുള്ള വൻ പ്രതിബന്ധങ്ങളാണു തകർന്നടിയുന്നത്.

∙ പിന്തുണയുണ്ട്, കുടുംബത്തിന്റെയും കൂട്ടുകാരുടെയും

മാനസിക വെല്ലുവിളികളോടുള്ള നല്ലമാറ്റത്തിന് സമൂഹമാധ്യമങ്ങളുടെ കടന്നുവരവും സെലിബ്രിറ്റികളുടെ തുറന്നുപറച്ചിലും മാത്രമല്ല കാരണം. സാമൂഹിക വ്യവസ്ഥയിലുള്ള മാറ്റവും പ്രകടമാണ്. മാനസിക വിഷമം നേരിടുന്നവർക്ക് കുടുംബത്തിൽനിന്നും സുഹൃത്തുക്കളിൽനിന്നും വലിയ പിന്തുണ ലഭിക്കുന്നു. മാനസിക വെല്ലുവിളികളുമായി ബന്ധപ്പെട്ട് ആളുകൾക്ക് ഇടയിൽ ഉണ്ടായിരുന്ന തെറ്റിദ്ധാരണകളിൽ വലിയ മാറ്റമാണ് ഉണ്ടായിട്ടുള്ളത്. മെഡിക്കൽ സേവനങ്ങൾ തേടുന്നവരുടെ എണ്ണവും ഇതിനാൽ വർധിക്കുന്നു. മെഡിക്കൽ പ്രഫഷനലുകളുടെ അഭിപ്രായത്തിൽ ഇത് മാനസികാരോഗ്യമുള്ള ഒരു സമൂഹത്തിന്റെ വളർച്ചയുടെ ലക്ഷണം കൂടിയാണ്. 

∙ മനസ്സു തുറക്കുന്നവരുടെ എണ്ണം കൂടി

കോഴിക്കോട്, എറണാകുളം തുടങ്ങിയ നഗരങ്ങളിൽ മാത്രമല്ല ഇന്ന് ചെറിയ സ്ഥലങ്ങളിൽ പോലും കൗൺസലിങ് ചെയ്യാൻ ആളുകളുണ്ട്. മാനസികാരോഗ്യ മേഖലയിലെ പ്രഫഷനലുകളുടെ എണ്ണം ഇത്തരത്തിൽ കൂടിയതിനു കാരണം അവരെ കാണാൻ വരുന്നവരുടെ എണ്ണത്തിലുണ്ടായ വലിയ വർധനയാണ്. ഭ്രാന്ത്, വട്ട് തുടങ്ങിയ വാക്കുകളിലാണ് മുൻപ് മാനസിക ചികിത്സ കുടുങ്ങിക്കിടന്നിരുന്നത്. എന്നാൽ ഇന്നത് മാറി. മുൻപുള്ളതിനേക്കാൾ വിദഗ്ധരെ നേരിട്ടുകാണാൻ ആളുകൾ സന്നദ്ധത പ്രകടിപ്പിക്കുന്നു. പണ്ട് ഡോക്ടർമാരായിരുന്നു ആളുകളെ ചികിത്സയ്ക്കായി റഫർ ചെയ്തിരുന്നത്. എന്നാൽ ഇപ്പോൾ വരുന്നതിൽ 95 ശതമാനം പേരെയും മുൻപ് ചികിത്സ തേടിയവരാണ് റഫർ ചെയ്യുന്നത്. ‘നിനക്ക് ഭ്രാന്താണോടാ’ എന്ന് അപമാനിക്കുന്നതിനു പകരം ‘നമുക്കൊരു കൗണ്‍സലിങ്ങിനു പോയാലോ’ എന്നു പറയുന്ന തലത്തിലേക്ക് സൗഹൃദങ്ങളും ഉയർന്നിരിക്കുന്നു. മാനസികാരോഗ്യ വെല്ലുവിളികളെ അഭിമുഖീകരിക്കുന്നുണ്ടെന്നും അതിന് ചികിത്സ എടുക്കുന്നുണ്ടെന്നും പറയാനുള്ള ആത്മവിശ്വാസം വരെ ആളുകൾക്കുവന്നതുതന്നെ ഇതിനു തെളിവ്.