സ്ത്രീകൾക്ക് ക്രൂരമര്‍ദനം; മരിച്ചവരെ വഴിയിലിട്ടു, ഷോക്കടിപ്പിച്ചു; കഴിക്കാൻ ‘പ്ലാസ്റ്റിക് അരി’; ‘ഡോങ്കി റൂട്ടിൽ’ നഷ്ടം 65 ലക്ഷം; കുടിയേറ്റത്തിന്റെ ക്രൂരതകൾ

മെക്സിക്കോ സിറ്റിയിൽ കൊടും പീഡനമാണേറ്റത്. കൂടുതൽ പണം ആവശ്യപ്പെട്ട് ഇലക്ട്രിക്ക് ഷോക്കേൽപിച്ചു. ഇരുമ്പു വടി കൊണ്ട് തുടർച്ചയായി മർദിച്ചു.’ മെക്സിക്കോ അതിർത്തി കടന്നു യുഎസിലെത്തിയ ഉടൻ ബോർഡർ പട്രോളിന്റെ പിടിയിലായി. പക്ഷേ യുഎസ് പൊലീസ് ചോക്ലേറ്റും ആപ്പിളുമൊക്കെ നൽകി– ദുരനുഭവത്തിന്റെ ഭീതിദമായ ഓർമകളിൽ നിന്നു മുക്തനാകാതെ ഖുശ്പ്രീത് പറഞ്ഞു. സ്റ്റോർ കീപ്പർ ജോലിക്കു വേണ്ടി 45 ലക്ഷം രൂപയാണു മനുഷ്യക്കടത്തു സംഘം ഖുശ്പ്രീതിൽ നിന്നു തട്ടിയെടുത്തത്.

∙ അഭയം തേടിയ റോബൻ ഹോൻഡ

യുഎസിലേക്ക് അനധികൃത കുടിയേറ്റത്തിനു ശ്രമിച്ചവരിൽ, ജോലി സ്വപ്നം കണ്ടവർ മാത്രമല്ല ഉള്ളതെന്നു പറയുന്നു ഇരകളിലൊരാളായ ഹരിയാന ഇസ്മയിലാബാദ് സ്വദേശി റോബൻ ഹോൻഡ. അഭയം തേടി യുഎസിലെത്തുകയും തുടർന്നു നിയമപരമായ വഴികളിലൂടെ ജോലിയും പൗരത്വവും നേടുകയുമായിരുന്നു കംപ്യൂട്ടർ സോഫ്റ്റ്‌വെയർ എൻജിനീയറിങ് ഡിപ്ലോമക്കാരനായ റോബന്റെ ലക്ഷ്യം. കൃഷിയിടം വിറ്റുണ്ടാക്കിയ 45 ലക്ഷം രൂപയാണ് ഏജന്റിനു നൽകിയത്. മുംബൈയിൽ നിന്നു ഗയാന, ബ്രസീൽ, കൊളംബിയ, വീണ്ടും ബ്രസീൽ. നദിയിലൂടെ പെറുവിലേക്കു ബോട്ട് യാത്ര. പെറുവിൽ നിന്ന് ഇക്വഡോർ. അവിടെ നിന്നു കൊളംബിയയിലേക്ക്. പിന്നീടൊരു ദ്വീപിലേക്കു ചെറു വിമാനത്തിൽ. ദ്വീപിൽ നിന്നു വീണ്ടും ചെറുവിമാനത്തിൽ പാനമയിലേക്ക്. ഇവിടെ നിന്നു ബോട്ടിൽ നിക്കാരഗ്വയിലേക്ക്. പിന്നീടു ഹോണ്ടുറസ്, ഗ്വാട്ടിമാല, മെക്സിക്കോ വഴി യുഎസിൽ.

2 കുട്ടികളും സ്ത്രീകളുമടക്കം 30 പേരാണു റോബന്റെ സംഘത്തിൽ ഉണ്ടായിരുന്നത്.  പകൽ വെളിച്ചത്തിൽ, മതിലിനു മുകളിലൂടെ ഏണി കയറിയാണു യുഎസിലേക്കു കടന്നതെന്നും മെക്സിക്കോ സിറ്റിയിൽ ഗുണ്ടാ സംഘങ്ങളുടെ ക്രൂരമർദനത്തിനിരയായതായും റോബൻ പറയുന്നു. ‘യുഎസ് അതിർത്തിയിലേക്ക് 16 കിലോമീറ്ററോളം നടക്കുകയായിരുന്നു. യുഎസിലേക്കു കടന്ന്, റോഡിലൂടെ വീണ്ടും നടന്നു. അന്നു തന്നെ ബോർഡർ പട്രോള്‍ സംഘത്തിന്റെ പിടിയിലായി. അപ്പോൾ തന്നെ കയ്യാമം വച്ചു– റോബൻ പറഞ്ഞു. 2024 ജുലൈ 24നു തുടങ്ങിയ യാത്ര യുഎസ് അതിർത്തിയിലെത്തിയത് 2025 ജനുവരി 26ന്. പിടിയിലായ ശേഷം ചിലർക്കു ഭക്ഷണം നിഷേധിക്കപ്പെട്ടതായും റോബൻ പറഞ്ഞു. കൃഷി ഭൂമി വിറ്റാണ്, റോബന്റെ പിതാവ് മൻജിത് സിങ് 45 ലക്ഷം രൂപ ഏജന്റിനു നൽകിയത്.

∙ കൊടിയ മർദനമേറ്റ് പാനമ കാട്ടിലൂടെ

ഹരിയാന കർണാൽ ജില്ലയിലെ കൽറോം സ്വദേശി ആകാശ് (20) പറഞ്ഞതും കൊടിയ പീഡനത്തിന്റെ കഥകൾ. പാനമയിലെ കാട്ടിലൂടെ, മർദനമേറ്റ്, ഭക്ഷണമോ വെള്ളമോ ഇല്ലാതെ ഒരാഴ്ചയോളം ആകാശിനു കാൽനട യാത്ര ചെയ്യേണ്ടി വന്നു. 5 പേരെ മാത്രം കൊള്ളുന്ന കാറിൽ, 15 പേരെ കുത്തിനിറച്ചായിരുന്നു യാത്ര. പാനമയിൽ കാട്ടിലൂടെയുള്ള യാത്രയ്ക്കിടെ, വഴിയിൽ മൃതദേഹങ്ങൾ കിടപ്പുണ്ടായിരുന്നു. പാനമ കാട്ടിലൂടെയുള്ള യാത്രയ്ക്കിടെ, രോഗം ബാധിച്ചവരെ വഴിയിൽ ഉപേക്ഷിച്ചു. പണം ചോദിച്ച്, സ്ത്രീകളെയും കുട്ടികളെയും അതിക്രൂരമായി മനുഷ്യക്കടത്തു സംഘം മർദിച്ചു.

പണം കൊടുത്താൽ, അതുപയോഗിച്ച് മനുഷ്യക്കടത്തു സംഘാംഗങ്ങൾ മദ്യപിക്കും. മർദനം തുടരും. പാനമ കാട്ടിൽ, കുന്നു കയറുന്നതിനിടെ 2 പേർ വീണു മരിച്ചു. മൃതദേഹങ്ങൾ അവിടെത്തന്നെ ഉപേക്ഷിച്ചാണു യാത്ര തുടർന്നത്– ആകാശ് പറഞ്ഞു. മെക്സിക്കോയിൽ ഒന്നര മാസത്തോളം താമസിച്ച ശേഷം, ജനുവരി 26ന് ആണ് ആകാശ് അടക്കം 25 പേർ യുഎസിലേക്കു കടന്നത്. ‘മെക്സിക്കോയിൽ വച്ച്, അവർ ഷോക്കടിപ്പിച്ചു. യുഎസ് ബോർഡർ പട്രോള്‍ ക്യാംപിലെ പൊലീസും മർദിച്ചു. ദിവസം ഒരു ആപ്പിളും ചെറിയ കുപ്പിവെള്ളവും മാത്രമായിരുന്നു ഭക്ഷണം.’ ആകാശ് പറഞ്ഞു. കൃഷി ഭൂമി വിറ്റുകിട്ടിയ 65 ലക്ഷം രൂപയാണു സ്റ്റോർ കീപ്പർ വീസയ്ക്കായി ആകാശിന്റെ സഹോദരൻ ശുഭം ലുധിയാനയിലെ മനുഷ്യക്കടത്ത് ഏജന്റിനു നൽകിയത്.

∙ പല സംഘങ്ങൾ, ഒരേ അനുഭവങ്ങൾ

മനുഷ്യക്കടത്ത് സംഘത്തിന്റെ ഇരകളായവർക്കെല്ലാം ഏതാണ്ട് സമാനമായ അനുഭവങ്ങളാണ്. പത്തിലധികം രാജ്യങ്ങളിലൂടെ മെക്സിക്കോയിലെത്തിയതും കാട്ടിലൂടെയുള്ള കാൽനടയാത്രയും ചെറിയ ബോട്ടിലും ചെറു വിമാനങ്ങളിലുമുള്ള അപകടം പിടിച്ച യാത്രകളുമൊക്കെയുണ്ടതിൽ. ഓരോ രാജ്യത്തും ഗുണ്ടാ സംഘങ്ങൾ ഇരകളെ കാത്തിരിപ്പുണ്ടായിരുന്നു. പണം ചോദിച്ച്, അവരെല്ലാം ഇരകളെ തോന്നിയതു പോലെ മർദിച്ചു. പാസ്പോർട്ട് നശിപ്പിച്ചു. വസ്ത്രങ്ങളും മൊബൈൽ ഫോണും ബാഗുകളുമടക്കം വിലപിടിപ്പുള്ളതെല്ലാം കൊള്ളയടിച്ചു. പലരും ഇലക്ട്രിക് ഷോക്കിനു വരെ വിധേയരായി. പണം മാത്രമായിരുന്നു ഗുണ്ടാസംഘങ്ങളുടെ ആവശ്യം. ബോർഡർ പട്രോളിന്റെ പിടിയിലായ ശേഷവും ദുരിതം അവസാനിച്ചില്ല. പലർക്കും പൊലീസ് മർദനമേറ്റു. ആവശ്യത്തിനു ഭക്ഷണവും ലഭിച്ചില്ല.