പരിശീലനത്തിന് രക്തവും പല്ലും; തെലങ്കാനയിൽ പറന്നെത്തി മായയും മർഫിയും; തുരങ്കത്തിൽ കണ്ടു ആ വിരൽ; കാട്ടിൽ കണ്ടത് മറഞ്ഞുകിടന്ന മൃതദേഹം!

വടക്കഞ്ചേരി ഭാഗത്തുനിന്ന് തുടങ്ങിയ തിരച്ചിലില്‍ പീച്ചി സ്‌റ്റേഷന്‍ പരിധിയില്‍നിന്നാണ് മൃതദേഹങ്ങള്‍ കണ്ടെത്തിയത്. ഇതിനു പുറമേ ആലപ്പുഴ മണ്ണഞ്ചേരിയില്‍ സുഭദ്ര എന്ന സ്ത്രീയെ കൊന്നു കുഴിച്ചിട്ട സംഭവത്തിലും മൃതദേഹം കണ്ടെത്തിയത് മായയും മര്‍ഫിയും ചേര്‍ന്നാണ്. വയനാട് മുണ്ടക്കൈ, ചൂരല്‍മല ദുരന്തസമയത്ത് മണ്ണിനടിയില്‍പെട്ട 24 മൃതദേഹങ്ങള്‍ കണ്ടെത്തിയത് മായയും മര്‍ഫിയും ചേര്‍ന്നാണ്. 2020ല്‍ പെട്ടിമുടി ദുരന്തത്തില്‍ എട്ട് മൃതദേഹങ്ങളും 2021ല്‍ കൊക്കയാറില്‍ ദുരന്തമുണ്ടായപ്പോള്‍ അവിടെയെത്തി 5 മൃതദേഹങ്ങളും കണ്ടെത്തിയിരുന്നു.

∙ ‘ആറു മീറ്റർ ആഴം; ആ അനുഭവം ഇതാദ്യം’

ഏതു പ്രതികൂല സാഹചര്യത്തിലും മൃതദേഹങ്ങള്‍ കണ്ടെത്താന്‍ വിദഗ്ധപരിശീലനമാണ് മായയ്ക്കും മര്‍ഫിക്കും നല്‍കിയിരിക്കുന്നതെന്ന് ഹവില്‍ദാര്‍ പ്രഭാത് പറയുന്നു. തെലങ്കാനയില്‍ എന്‍ഡിആര്‍എഫ് ഒരു നായയെ ആദ്യം കൊണ്ടുവന്നെങ്കിലും ഫലമുണ്ടായില്ല. ആളും ബഹളവുമൊക്കെ കണ്ട് നായയ്ക്ക് തിരച്ചില്‍ നടത്താന്‍ കഴിഞ്ഞിരുന്നില്ല. പിന്നീടാണ് കേരളത്തില്‍നിന്ന് നായ്ക്കളെ എത്തിക്കാന്‍ തീരുമാനിച്ചത്. ബോറിങ് മെഷീന്‍ ഉള്‍പ്പെടെ തുരങ്കത്തില്‍ കുടുങ്ങിക്കിടക്കുന്നതിനാല്‍ ഏറെ ദുഷ്‌കരമാണ് രക്ഷാപ്രവര്‍ത്തനമെന്നും പ്രഭാതിന്റെ വാക്കുകൾ.

‘‘കുഴിക്കാനും മറ്റും ഒരു തരത്തിലുള്ള ഉപകരണങ്ങളും ഉപയോഗിക്കാന്‍ കഴിയില്ല. കൂടുതല്‍ മണ്ണിടിച്ചിലിന് അതു കാരണമാകും. റെയില്‍വേ ഉദ്യോഗസ്ഥരും കോള്‍ മൈന്‍ റെസ്‌ക്യൂ ടീം, എന്‍ഡിആര്‍എഫ്, എസ്ഡിആര്‍എഫ് സംഘങ്ങളും രംഗത്തുണ്ട്. 14 കിലോമീറ്ററോളം ലോക്കോയില്‍ നായ്ക്കളുമായി അകത്തേക്കു പോയതിനു ശേഷമാണ് തിരച്ചില്‍ നടത്തുന്നത്. എവിടെ കുഴിക്കണമെന്നോ തിരച്ചില്‍ നടത്തണമെന്നോ അറിയാത്ത അവസ്ഥയിലാണ് അവരുണ്ടായിരുന്നത്. എക്‌സ്–റേ മെഷീനും ജിപിആര്‍എസും എത്തിച്ച് പരിശോധിച്ചെങ്കിലും കാര്യമുണ്ടായില്ല. നമ്മള്‍ നായ്ക്കളെ എത്തിച്ച് മൃതദേഹമുണ്ടെന്ന് സംശയിക്കുന്ന സ്ഥലങ്ങള്‍ മാര്‍ക്ക് ചെയ്തു കൊടുക്കുകയാണ് ചെയ്തത്.

മാര്‍ക്ക് ചെയ്ത സ്ഥലത്തുനിന്ന് ഏതാണ്ട് ആറു മീറ്ററിലധികം താഴ്ചയിലാണ് മൃതദേഹം കണ്ടത്. അത്രത്തോളം താഴെയുള്ള മൃതദേഹം കണ്ടെത്താന്‍ നായ്ക്കള്‍ക്കു കഴിയുമെന്ന് അറിയുന്നത് ആദ്യമായാണ്. മുന്‍പ് വയനാട്ടിലും മറ്റും നാല് മീറ്റര്‍ താഴെയുള്ള മൃതദേഹം കണ്ടെത്തിയിരുന്നു. തുരങ്കത്തില്‍ കൂടുതല്‍ സ്ഥലങ്ങള്‍ നായ്ക്കള്‍ തിരിച്ചറിഞ്ഞു മാര്‍ക്ക് ചെയ്‌തെങ്കിലും കുഴിക്കാന്‍ കഴിയാത്ത സാഹചര്യമാണുള്ളത്. മണ്ണിടിയാനുള്ള സാധ്യതയുള്ളതിനാല്‍ അധികൃതര്‍ ചര്‍ച്ച ചെയ്തു തീരുമാനിക്കും.’’- പ്രഭാത് പറയുന്നു.

∙ പരിശീലനം എങ്ങനെ?

നായ്ക്കള്‍ക്കു മൂന്നു മാസം പ്രായമുള്ളപ്പോഴാണ് പരിശീലനം നല്‍കിത്തുടങ്ങുന്നത്. ‘‘ആദ്യ മൂന്നു മാസം അനുസരണ പരിശീലിപ്പിക്കും. പിന്നീടുള്ള ആറു മാസമാണ് മൃതദേഹങ്ങള്‍ മണത്തു തിരിച്ചറിയാണുള്ള പരിശീലനം നല്‍കുക. ശരീര ഭാഗങ്ങള്‍ കിട്ടാന്‍ സാധ്യതയില്ലാത്തതിനാല്‍ രക്തവും പല്ലുകളും ഉപയോഗിച്ചാണ് ഗന്ധം പരിചയപ്പെടുത്തുന്നത്. ആ പരിശീലനം കുറച്ചു നാള്‍ പിന്നിടുമ്പോള്‍ സ്യൂഡോസെന്റ് എന്ന വിലപിടിപ്പുള്ള രാസവസ്തുക്കള്‍ ഉപയോഗിക്കും. അഴുകിയ മനുഷ്യശരീരത്തിന്റെ ഗന്ധമാണതിനുള്ളത്. മൂത്രത്തിന്റെയും ശുക്ലത്തിന്റെയും ഗന്ധമുള്ളവയും ഉപയോഗിക്കും. മനുഷ്യര്‍ക്ക് അതു മണത്തു നോക്കിയാല്‍ ഒന്നും അറിയാന്‍ കഴിയില്ല. പക്ഷേ ഈച്ചകള്‍ക്കും നായ്ക്കള്‍ക്കുമൊക്കെ അതു തിരിച്ചറിയാന്‍ കഴിയും.

കുറച്ചു കഴിയുമ്പോള്‍ തങ്ങളുടെ ജോലിയെക്കുറിച്ച് നായ്ക്കള്‍ക്കും മനസിലാകും. ഡ്യൂട്ടി തുടങ്ങിയാല്‍ അതു മാത്രമാവും അവയുടെ ശ്രദ്ധ. ചുറ്റിലും ആളുകള്‍ ഉണ്ടോ എന്നോ ഉപകരണങ്ങള്‍ പ്രവര്‍ത്തിക്കുന്നുണ്ടോ എന്നൊന്നും അവര്‍ ശ്രദ്ധിക്കില്ല. തെലങ്കാനയില്‍ നമ്മുടെ നായ്ക്കള്‍ ബഹളങ്ങള്‍ക്കും ഉപകരണങ്ങള്‍ക്കും നടുവില്‍ യാതൊരു ഭയവുമില്ലാതെ തിരച്ചില്‍ നടത്തിയത് അവരെ അദ്ഭുതപ്പെടുത്തി. വെള്ളത്തിനടിയില്‍ കിടക്കുന്ന മൃതദേഹങ്ങളാണെങ്കിലും നായ്ക്കള്‍ തിരിച്ചറിയും’’– പ്രഭാത് പറയുന്നു.

∙ എങ്ങനെ തുടങ്ങി, എവിടെയെത്തി?

2018ല്‍ പ്രളയകാലത്ത് നിരവധി പേരെ മണ്ണിനടിയിലും മറ്റും കാണാതായ സമയത്താണ് ഇത്തരത്തിലൊരു കഡാവര്‍ ഡോഗ് സ്‌ക്വാഡ് ആരംഭിക്കുന്നതിനെക്കുറിച്ച് കേരളാ പൊലീസ് ആലോചിച്ചത്. ഡിജിപി ആയിരുന്ന ലോക്‌നാഥ് ബെഹ്‌റയാണ് 2020ല്‍ പദ്ധതി ആവിഷ്‌കരിച്ചത്. ആകെ 15 നായ്ക്കളാണ് അന്നു പരിശീലനത്തിന് ഉണ്ടായിരുന്നത്. അതില്‍ രണ്ട് ബെല്‍ജിയം മലിനോയിസിന് കഡാവര്‍ ട്രെയിനിങ് നല്‍കുകയായിരുന്നു. ഏതു കാലാവസ്ഥയും തരണം ചെയ്യും, പെട്ടെന്നൊന്നും ക്ഷീണിക്കില്ല എന്നതൊക്കെയാണ് ബെല്‍ജിയം മലിനോയിസിന്റെ ഗുണം. ഇപ്പോള്‍ തെലങ്കാനയ്ക്കു കൊണ്ടുപോയപ്പോഴും കൂട് പോലും വേണ്ടിവന്നില്ല. നമ്മുടെ കാലിന്റെ അടുത്ത് കിടന്നോളും. ആര്‍ക്കും ബുദ്ധിമുട്ടുണ്ടാകില്ല.