പ്രണയ മധുരം മുതൽ ആക്‌ഷന്റെ രോമാഞ്ചം വരെ; ആൺകുട്ടികൾക്ക് ഷോനെൻ, പെൺകുട്ടികൾക്ക് ഷോജോ; എന്താണ് ജപ്പാന്റെ മാംഗയും അനിമെയും?

‘മാംഗയുടെ ഗോഡ്ഫാദർ’ എന്നറിയപ്പെടുന്ന ഒസാമു ടെസുക്ക, 1951ൽ 'ആസ്ട്രോ ബോയ്' കഥാപാത്രം അവതരിപ്പിച്ചതു നാഴികക്കല്ലായി. വിശാലമായ കണ്ണുകളുള്ള കഥാപാത്രങ്ങൾ, സിനിമാറ്റിക് വിഷ്വൽ ടെക്നിക്കുകൾ തുടങ്ങിയ സ്റ്റൈലിസ്റ്റിക് നവീകരണങ്ങളിലൂടെ ടെസുക്ക മാംഗയെ പുതുക്കി. 1951ൽ ബാംബി, 1952ൽ പിനോക്കിയോ തുടങ്ങിയ ഡിസ്നി ചിത്രങ്ങൾ അദ്ദേഹം നേരിട്ടു മാംഗ രൂപത്തിലാക്കി. കുട്ടികൾക്കുള്ള ലഘു കഥകൾ മുതൽ പ്രായപൂർത്തിയായവർക്കുള്ള ആഴമുള്ള കൃതികൾ വരെ സൃഷ്ടിച്ചു. ദൈനംദിന ജീവിതത്തിലും സ്ത്രീകളുടെ അനുഭവത്തിലും ശ്രദ്ധ കേന്ദ്രീകരിച്ച മാച്ചിക്കോ ഹസെഗാവയുടെ ‘സസെയ് സാന്‍’ (1946) തുടങ്ങിയ കൃതികളും ശ്രദ്ധേയമാണ്.

മാംഗ വായിച്ച കുട്ടികളെ പിന്നീടും ആകർഷിച്ചു നിർത്താനാണ് മാഗസിനുകൾ ശ്രമിച്ചത്. വളർന്നു വരുന്ന തലമുറയ്ക്ക് ഇഷ്ടപ്പെടുന്ന തരത്തിലുള്ള കൃതികൾ പുറത്തിറക്കാൻ പരസ്പരം മത്സരിച്ച ‘വീക്‌ലി ഷോനെൻ മാഗസിൻ’, ‘വീക്‌ലി ഷോനെൻ സണ്‍ഡേ’ എന്നീ മാസികകൾ വായനക്കാർക്കു പുതിയ അനുഭവമായി. ബേബി ബൂം തലമുറ കൗമാരത്തിലും മാംഗ വായിച്ചു. 1960കളുടെ അവസാനത്തോടെ മാംഗ സാമൂഹിക മാറ്റത്തിന്റെ ഭാഗമായി. മാംഗ വായിക്കൽ വിദ്യാർഥി പ്രതിഷേധത്തിന്റെയും സ്റ്റേറ്റ്മെന്റായി.

അക്കാലത്തു ഹൈസ്കൂൾ വിദ്യാർഥികളിൽ കുറച്ചു പേർക്കു മാത്രമേ കോളജിൽ പോകാൻ അവസരമുണ്ടായിരുന്നുള്ളൂ. അവരുടെ പ്രശ്നങ്ങൾ കൈകാര്യം ചെയ്യുന്ന, അവരെ പോലെയുള്ള കഥാപാത്രങ്ങളെ അവതരിപ്പിക്കുന്ന മാംഗകൾ ട്രെയിനുകളടക്കമുള്ള പൊതുയിടത്തു വായിക്കുക പതിവായി. ചേരിപ്രദേശത്ത് വളർന്ന നായകന്റെ കഥ പറയുന്ന ‘അഷ്ത നോ ജോ’ അടക്കമുള്ളവ യുവാക്കളുടെ ശബ്ദമായി മാറി. ബേബി ബൂം തലമുറ മധ്യവയസ്സിൽ‌ എത്തിയപ്പോഴേക്കും മാംഗ ജപ്പാന്റെ ജീവിതത്തിന്റെ ഭാഗമായി.

∙ ആൺകുട്ടികൾക്കു ഷോനെൻ, പെൺകുട്ടികൾക്കു ഷോജോ 

1950നും 1969നും ഇടയിൽ വായനക്കാരുടെ എണ്ണം വർധിച്ചതോടെയാണ് മാർക്കറ്റിങ് സൗകര്യത്തിനായി മാംഗയെ പല വിഭാഗങ്ങളായി വിഭജിച്ചത്. ആൺകുട്ടികളെ ലക്ഷ്യം വച്ചുള്ള ഷോനെൻ, പെൺകുട്ടികൾക്കായി സമർപ്പിച്ച ഷോജോ എന്നിവയാണു പ്രധാനം. ഇവയെ പ്രായത്തിനനുസരിച്ച് ഉപവിഭാഗങ്ങളായി വിഭജിച്ചിട്ടുണ്ട്.

ഷോനെൻ (Shonen): 18 വയസ്സ് വരെയുള്ള ആൺകുട്ടികൾക്കു വേണ്ടിയുള്ളവ. ആക്‌ഷൻ, സാഹസിക കഥകൾക്കു മുൻതൂക്കം. നാറൂറ്റോ, ഡ്രാഗൺബോൾ എന്നിവ ഉദാഹരണം. 

സെയ്നൻ (Seinen): മുതിർന്ന പുരുഷന്മാർക്കു വേണ്ടിയുള്ളത്. ആഴമുള്ള ദാർശനിക വശങ്ങളും ആശയങ്ങളും ഉൾക്കൊള്ളുന്നവ. സ്പോർട്സ്, സാങ്കേതികവിദ്യ, പ്രണയം, ലൈംഗികത തുടങ്ങിയ വിഷയങ്ങളിലാണു കഥകള്‍.

ഷോജോ (Shojo): 18 വയസ്സ് വരെയുള്ള പെൺകുട്ടികൾക്കു വേണ്ടിയുള്ളത്. പ്രണയം, ഫാന്റസി, വ്യക്തിത്വ വികസനം എന്നിവയാണു മുഖ്യം.

ജോസെയ് (Josei): മുതിർന്ന സ്ത്രീകൾക്കുള്ളത്. സാമൂഹ്യ സാഹചര്യത്തെ പ്രതിഫലിപ്പിക്കുന്ന കഥകളിൽ സ്ത്രീയുടെ കാഴ്ചപ്പാടിൽനിന്ന് കാര്യങ്ങളെ നോക്കിക്കാണുന്നു.

∙ എന്താണ് മാംഗയെ വ്യത്യസ്തമാക്കുന്നത്?

വിഷയ വൈവിധ്യമാണു മാംഗയുടെ ഏറ്റവും വലിയ ആകർഷണം. പ്രണയത്തിന്റെ മധുരം മുതൽ ആക്‌ഷൻ സീനുകളുടെ രോമാഞ്ചം വരെ, ഫാന്റസി ലോകങ്ങളിലെ അദ്ഭുതം മുതൽ സയൻസ് ഫിക്‌ഷന്റെ സങ്കീർണത വരെ. ആർട്ട് സ്റ്റൈൽ മറ്റൊരു പ്രത്യേകതയാണ്. വിശദമായ പശ്ചാത്തലങ്ങൾ, എക്സ്പ്രഷനുകൾ നിറഞ്ഞ മുഖഭാവങ്ങൾ, ഡൈനമിക് ആക്‌ഷൻ സീനുകൾ എന്നിവ മാംഗയുടെ കഥാപാത്രങ്ങളെയും കഥകളെയും ജീവസ്സുറ്റതാക്കുന്നു. സാഹിത്യപരമായ പ്രാധാന്യവും മാംഗ നേടിയെടുത്തിട്ടുണ്ട്. ജാപ്പനീസ് സമൂഹത്തിന്റെ മൂല്യങ്ങൾ, പാരമ്പര്യങ്ങൾ, സമകാലിക പ്രശ്നങ്ങൾ എന്നിവയെ പ്രതിഫലിപ്പിക്കുന്ന മാംഗ, സംസ്കാരത്തിന്റെ അവിഭാജ്യ ഘടകമാണ്. ജപ്പാനിലെ യുവതലമുറയ്ക്ക് അവരുടെ സ്വപ്നങ്ങളും ആശയങ്ങളും പ്രകടിപ്പിക്കാനുള്ള മാധ്യമമാണ്. ഭാഷയും സാഹിത്യവും പ്രചരിപ്പിക്കുന്നതിലും പ്രധാന പങ്കുണ്ട്.

∙ ലോകം കീഴടക്കിയ ക്ലാസിക്കുകൾ 

1. വൺ പീസ് (One Piece): എയ്ച്ചിറോ ഒഡ എഴുതിയ ഈ സീരീസ് ലോകത്തിലെ ഏറ്റവും ജനപ്രിയമായ മാംഗയാണ്. മങ്കി ഡി.ലുഫ്ഫിയുടെ നേതൃത്വത്തിൽ പൈറേറ്റ് ക്രൂവിന്റെ സാഹസികതകൾ പറയുന്നു. ‘വൺ പീസ്’ എന്ന നിധിക്കായുള്ള തിരച്ചിലാണ് ഇതിവൃത്തം.

2. നാറൂറ്റോ (Naruto): മസാഷി കിഷിമോട്ടോയുടെ സീരീസ് നിന്നാ എന്ന യുവ നിൻജയുടെ കഥയാണ്. തന്റെ ഗ്രാമത്തിന്റെ നേതാവായ ഹോക്കേജ് ആകാൻ സ്വപ്നം കാണുന്ന നാറൂറ്റോ ഉസുമാക്കിയാണു നായകൻ.

3. ഡ്രാഗൺ ബോൾ (Dragon Ball): അകിര തൊരിയാമയുടെ ഈ സീരീസിന്റെ ഇതിവൃത്തം സോൺ ഗോക്കുവിന്റെ സാഹസികതകളാണ്.

4. അറ്റാക്ക് ഓൺ ടൈറ്റൻ (Attack on Titan): ഹജിമെ ഇസായാമയുടെ ഈ സീരീസ് ഏറ്റവും ജനപ്രിയമായ ഡാർക്ക് ഫാന്റസിയാണ്. ടൈറ്റൻ എന്ന ഭീമാകാര ജീവികളിൽനിന്ന് മനുഷ്യരെ രക്ഷിക്കാനുള്ള പോരാട്ടമാണ് കഥാതന്തു.

5. ഡെത്ത് നോട്ട് (Death Note): ത്സുഗുമി ഓബയുടെ ഈ സീരീസ് ജനപ്രിയമായ സൈക്കോളജിക്കൽ ത്രില്ലറാണ്. ലൈറ്റ് യഗാമി എന്ന യുവാവിനു ഡെത്ത് നോട്ട് എന്ന നോട്ട്ബുക്ക് കിട്ടുന്നു. അതിൽ ഒരാളുടെ പേര് എഴുതിയാൽ അയാൾ മരിക്കും. അധാർമികരെന്നു താൻ കരുതുന്ന വ്യക്തികളെ കൂട്ടക്കൊല ചെയ്യാനും കുറ്റകൃത്യങ്ങളില്ലാത്ത സമൂഹം സൃഷ്ടിക്കാനും ഡെത്ത് നോട്ട് ഉപയോഗിക്കാനുള്ള ലൈറ്റിന്റെ ശ്രമങ്ങളെ ചുറ്റിപ്പറ്റിയാണു പരമ്പര.

∙ മാംഗയും അനിമെയും തമ്മിലെന്ത്? 

അനിമെയാണു മാംഗ എന്നു പൊതുവായ തെറ്റിധാരണയുണ്ട്. ജാപ്പനീസ് ശൈലിയിലുള്ള 2ഡി ആനിമേഷന്‍ സിനിമ, വെബ് സീരീസ് വിഭാഗത്തെയാണ് അനിമെ എന്ന് സൂചിപ്പിക്കുന്നത്. ഗ്രാഫിക് നോവല്‍ രൂപത്തിലുള്ള മാംഗ പലപ്പോഴും അനിമെ സിനിമകളായും വരാറുണ്ട്. ലോകത്തെ കീഴടക്കിയ സാംസ്കാരിക വിപ്ലവമാണ് ഇന്ന് മാംഗ. ഡിജിറ്റലായി പുറത്തിറക്കുന്ന വെബ് മാംഗയും തരംഗമാണ്.

ഇമേജ് ഹോസ്റ്റിങ് വെബ്‌സൈറ്റുകൾ വഴി ആർക്കും അവരുടെ കൃതികളിൽ നിന്നുള്ള പേജുകൾ അപ്‌ലോഡ് ചെയ്യാൻ കഴിയും. ജപ്പാനിലെ ക്യോട്ടോ സെയ്ക യൂണിവേഴ്സിറ്റി 2000 മുതൽ മാംഗയിൽ പഠന കോഴ്‌സ് നടത്തുന്നുണ്ട്. ജപ്പാനിലെ ഒട്ടേറെ സർവകലാശാലകളിലും വൊക്കേഷണൽ സ്കൂളുകളിലും പാഠ്യപദ്ധതിയുടെ ഭാഗമാണ്.