∙ കുറ്റപത്രത്തിൽ പേരില്ല!

ട്രംപിനെതിരെയുള്ള കുറ്റവും ശിക്ഷയും സ്റ്റോമി ഡാനിയേലിനു പണം നൽകിയതുമായി ബന്ധപ്പെട്ട് മാത്രമുള്ളതാണ്. രതിചിത്ര നടിക്ക് പണം നൽകിയ കേസിൽ ട്രംപിനെ കുറ്റക്കാരനെന്നു വിധിച്ച മൻഹാറ്റൻ‌ കോടതിയുടെ കുറ്റപത്രത്തിൽ കാരൻ മക്ദൂഗലിന്റെ പേര് രേഖപ്പെടുത്തിയിട്ടുമില്ല. എന്നാൽ കോടതി രേഖകളിൽ ഇവരുടെ ഇടപാടുകളെക്കുറിച്ചും അത് പുറത്തു പറയാതിരിക്കാൻ നടത്തിയ ഇടപെടുലകളെ കുറിച്ചും വ്യക്തമാക്കിയിട്ടുണ്ട്. ഡിസ്ട്രിക്ട് അറ്റോർണിയുടെ രേഖകളിൽ ഉൾപ്പെട്ടിരിക്കുന്ന ഈ വിവരങ്ങൾ കേസിന്റെ പശ്ചാത്തല വിവരമായാണ് നൽകിയിരിക്കുന്നത്.

ട്രംപിനെതിരെ പട നയിക്കണമെന്ന് കാരൻ ഒരിക്കലും വിചാരിച്ചിട്ടില്ല എന്നു വേണം ഇതിൽനിന്ന് മനസ്സിലാക്കാൻ. കാരണം അവരെപ്പോഴും ആ ബന്ധം തീർത്തും പ്രണയാർദ്രവും ഉഭയസമ്മതപ്രകാരമുള്ളതുമാണെന്നാണു വ്യക്തമാക്കിയിട്ടുള്ളത്. കാരനുമായുള്ള ബന്ധം നിഷേധിച്ചിരുന്നെങ്കിലും അത് പുറത്തുവരരുതെന്നും തന്റെ രാഷ്ട്രീയ ഭാവി തകരരുതെന്നുമുള്ള ചിന്ത ട്രംപിന് ഉണ്ടായിരുന്നു. 2016ൽ പ്രസിഡന്റ് തിരഞ്ഞെടുപ്പിന് തൊട്ടുമുൻപ് ദ് നാഷനൽ എൻക്വയറർ എന്ന ടാബ്ലോയ്ഡ് മക്ദൂഗലുമായി ഒരു കരാറിൽ ഏർപ്പെട്ടു. മക്ദൂഗലിന്റെ ജീവിതകഥയും ട്രംപുമായുള്ള ബന്ധത്തെ കുറിച്ചുള്ള വിവരങ്ങളും തങ്ങൾക്കായി എക്സ്ക്ലുസീവായി എഴുതണം എന്നതായിരുന്നു കരാർ. ഒന്നര ലക്ഷം ഡോളറിനാണ് അന്ന് കരാർ ഒപ്പിട്ടത്. 

അതോടെ പൊതുവേദിയിൽ ട്രംപുമായുള്ള ബന്ധത്തെ കുറച്ച് സംസാരിക്കുന്നതിൽനിന്ന് കാരൻ വിലക്കപ്പെട്ടു. കാരനെ സംബന്ധിച്ചുള്ള ലേഖനങ്ങൾ പിന്നീട് നാളുകളോളം ആരും പ്രസിദ്ധീകരിച്ചതുമില്ല. ഇപ്പോൾ ട്രംപിന്റെ അറസ്റ്റാണ് വീണ്ടും അവരെ വിവാദത്തിന്റെ വെള്ളിവെളിച്ചത്തിലേക്കു കൊണ്ടുവന്നത്. ട്രംപിന്റെ വിജയത്തിനായുള്ള ക്യാംപെയ്നിന്റെ ഭാഗമായിരുന്നു കാരനുമായുള്ള ‘നാഷനൽ എൻക്വയററി’ന്റെ ‘ഡീൽ’ എന്നാണു വിലയിരുത്തപ്പെടുന്നത്. ട്രംപിന്റെ പ്രതിച്ഛായ തകർക്കുന്ന പ്രചരണങ്ങളുടെ വാ മൂടിക്കെടുന്ന ദൗത്യത്തിന്റെ ഭാഗമായിരുന്നു, പ്രസിദ്ധീകരണ അവകാശം കൈക്കലാക്കിയുള്ള ഈ നാടകമെന്നാണ് അറ്റോണിയുടെ രേഖകളിലും പരാമർശിച്ചിരിക്കുന്നത്. 

∙ എ360– ട്രംപ് ഡീൽ!

അമേരിക്കയിലെ പ്രധാന മാധ്യമശൃംഖലകളിലൊന്നായ എ360 മീഡിയയാണ് (മുൻ പേര് അമേരിക്കൻ മീഡിയ) ട്രംപിന്റെ ‘നിശബ്ദമാക്കൽ’ പദ്ധതിയുടെ കയ്യാളായി പ്രവർത്തിച്ചതെന്നാണു കരുതപ്പെടുന്നത്. നിരവധി മാഗസിനുകളും, ടാബ്ളോയ്ഡുകളും ഉൾപ്പെടെ പ്രസിദ്ധീകരിക്കുന്നുണ്ട് എ360 മീഡിയ. ഇവരുടെ അധീനതയിലുള്ള നാഷനൽ എൻക്വയറർ ടാബ്ളോയ്ഡിനെ ആ ദൗത്യം ഏൽപിക്കുകയായിരുന്നു. ട്രംപിന്റെ പ്രതിച്ഛായയ്ക്ക് കളങ്കം വരുത്തുന്ന വാർത്തകൾ കണ്ടെത്തി അവ ഇല്ലാതാക്കുക. ട്രംപിനെതിരെയുള്ള ആരോപണങ്ങളും പ്രസിദ്ധീകരണ അവകാശം ‘എക്സ്ക്ലുസീവ് സ്റ്റോറി’ എന്ന നിലയിൽ വാങ്ങി അവ ഒരിക്കലും പ്രസിദ്ധീകരിക്കാതിരിക്കുക. ‘ക്യാച്ച് ആൻഡ് കിൽ’ എന്ന് പേരിട്ടിരിക്കുന്ന ഈ പ്രക്രിയയാണ് നാഷനൽ എൻക്വയറർ കാരൻ വിഷയത്തിൽ പ്രയോഗിച്ചത്. 

‘വുമൺ 1’ എന്ന് കോടതി രേഖകളിൽ പറഞ്ഞിട്ടുള്ള സ്ത്രീക്ക് എ360 മീഡിയ, ഒന്നര ലക്ഷം ഡോളർ നൽകിയെന്നാണ് ന്യൂയോർക്ക് പ്രോസിക്യൂട്ടർ കോടതിയിൽ ആരോപിച്ചത്. അവർ വിവാഹിതനായ പ്രതിയുമായി ശാരീരിക ബന്ധത്തിൽ ഏർപ്പെടുകയും അതു മറ്റാരോടും പങ്കുവയ്ക്കരുത് എന്നു പറഞ്ഞ് പ്രസിദ്ധീകരണ അവകാശം പണം നൽകി കൈപ്പറ്റുകയും ചെയ്തു. രണ്ടു മാഗസിൻ കവർ ഫീച്ചറുകളും ലേഖന പരമ്പരയും അവരുടെ പേരിൽ പ്രസിദ്ധപ്പെടുത്താമെന്നായിരുന്നു കരാറെന്നും പ്രോസിക്യൂട്ടർ കോടതിയിൽ പറഞ്ഞു. 

കരാറിൽ ഏർപ്പെട്ടതോടെ പക്ഷേ ‘എക്സ്ക്ലുസീവ്’ വിവരങ്ങളൊന്നും പുറംലോകം അറിയാതെ പോയി. അതിനിടെ എ360യുടെ ‘മസിൽ ആൻഡ് ഫിറ്റ്നസ് ഹെർസി’ന്റെ കവർചിത്രമായി വരികയും ആരോഗ്യപരിപാലനത്തെ കുറിച്ച് കോളങ്ങൾ എഴുതുകയും ചെയ്തിരുന്നു കാരൻ. ചതി തിരിച്ചറിഞ്ഞതിനു പിന്നാലെ നാഷനൽ എൻക്വയററിനെതിരെ കേസ് ഫയൽ ചെയ്യുകയും തന്റെ ജീവിതകഥ പ്രസിദ്ധീകരിക്കാനുള്ള അവകാശം തിരികെ വാങ്ങുകയും ചെയ്തു. 

2018ൽ കാരന് പണം നൽകിയത്, ഒരു പ്രസിഡന്റ് സ്ഥാനാർഥിയുടെ ക്യാംപെയ്ന്റെ ഭാഗമായി അയാൾക്കെതിരെയുള്ള ആരോപണങ്ങൾ തടയുക എന്ന ലക്ഷ്യത്തോടെയാണെന്ന് എ360 മീഡിയ സമ്മതിച്ചതായി യുഎസ് അറ്റോർണി ഓഫിസ് റിപ്പോർട്ട് ചെയ്തിട്ടുണ്ട്. അപ്പോഴേക്കും ഇത്തരത്തിൽ നിരവധി ആരോപണങ്ങൾ കമ്പനിക്കെതിരെ ഉയർന്നു വന്നു. 2021ൽ യുഎസ് ഫെഡറൽ ഇലക്‌ഷൻ കമ്മിഷൻ, ദി എൻക്വയറർ പണം നൽകി വാർത്ത പ്രസിദ്ധീകരിക്കാത്തതിനാൽ തിരഞ്ഞെടുപ്പ് നിയമങ്ങൾ‌ ലംഘിച്ചെന്നു വിധിയെഴുതി. ഒരു നിയമവിരുദ്ധ ക്യാംപെയ്ന്റെ ഭാഗമായാണ് മക്ദൂഗലിന് പണം നൽകിയതെന്നും കണ്ടെത്തിയതോടെ എൻക്വയററിനു മേൽ 1.87 ലക്ഷം ഡോളർ പിഴയും ചുമത്തി.  

∙ വെറും ആരോപണങ്ങൾ

തനിക്കെതിരെ ഉയരുന്ന ലൈംഗികാരോപണങ്ങളെല്ലാം ശത്രുക്കൾ പടച്ചുവിടുന്നവയാണെന്ന രീതിയിലാണ് ട്രംപിന്റെ നിലപാട്. സ്റ്റോമിയുടെയും കാരന്റെയും വെളിപ്പെടുത്തൽ നിഷേധിച്ച ട്രംപ് തനിക്ക് ഈ സ്ത്രീകളുമായി ശാരീരികബന്ധം ഉണ്ടായിട്ടില്ലെന്നാണു പറയുന്നത്. മൻഹറ്റാൻ കോടതിയിൽ ഒരു മണിക്കൂർ നീണ്ട നടപടിക്രമത്തിനിടെ കുറ്റപത്രത്തിലെ ആരോപണങ്ങളെല്ലാം ട്രംപ് നിഷേധിച്ചു. തെളിവു നശിപ്പിച്ചതിനും രേഖകൾ തിരുത്തിയതിനും ഉൾപ്പെടെ 34 കുറ്റങ്ങളാണു ട്രംപിനെതിരെ ചുമത്തിയിട്ടുള്ളത്. 

ട്രംപിനെതിരായ തെളിവുകൾ രണ്ടു മാസത്തിനകം സമർപ്പിക്കുമെന്നാണു പ്രോസിക്യൂഷൻ അറിയിച്ചത്. 2023 ഓഗസ്റ്റ് 8 വരെ ട്രംപിന് അപ്പീൽ നൽകാം. ഡിസംബർ 4 നാണ് ഈ അപ്പീൽ പരിഗണിക്കുകയെന്നും സ്റ്റേറ്റ് സുപ്രീം കോടതി ജസ്റ്റിസ് യുവാൻ എം. മെർച്ചൻ പറഞ്ഞു. കേസ് ഒതുക്കി എങ്ങനെയും അടുത്ത തിരഞ്ഞെടുപ്പിൽ മത്സരിക്കണമെന്ന മോഹത്തിലാണ് ട്രംപ്. പ്രസിഡന്റ് സ്ഥാനാർഥിയെ കണ്ടെത്താനുള്ള റിപ്പബ്ലിക്കൻ പാർട്ടിയുടെ പ്രൈമറി സീസൺ 2024 ഫെബ്രുവരിയിലാണ് ആരംഭിക്കുക. അതിൽ കയറിപ്പറ്റാൻ ഇനി എതൊക്കെ വഴികളിലൂടെ ട്രംപ് നീങ്ങുമെന്നതും കാണേണ്ടതാണ്. 

അതിനിടയിലാണ് വഴിമുടക്കി സ്റ്റോമി ഡാനിയേലുമായി ബന്ധപ്പെട്ട കേസിന്റെയും കാരന്റെ ആരോപണങ്ങളുടെയും നിൽപ്. കാരനാകട്ടെ, ട്രംപ് കേസുമായി ബന്ധപ്പെട്ടു തനിക്കുണ്ടായ പ്രശസ്തി പരമാവധി മുതലെടുക്കാനുള്ള ശ്രമത്തിലുമാണ്. അതിന്റെ ഭാഗമായി ‘കാമിയോ’ എന്ന വെബ്സൈറ്റിൽ സ്വന്തം ജീവിതം പറയുന്ന വിഡിയോ സീരീസ് തുടങ്ങാനിരിക്കുകയാണ് അവർ. ഇൻസ്റ്റഗ്രാം ഉൾപ്പെടെയുള്ള സമൂഹമാധ്യമങ്ങളിലും സജീവമാണ് കാരൻ. പ്രസിഡന്റ് തിരഞ്ഞെടുപ്പെന്ന കടമ്പ മറികടക്കുകയെന്നത്, ഈ രണ്ടു വനിതകളുടെ ആരോപണങ്ങളുടെ സാന്നിധ്യത്തിൽ ട്രംപിന് അതികഠിനമായിരിക്കുമെന്നത് ഏറെക്കുറെ ഉറപ്പ്.

English Summary: Karen McDougal: Who is this Playboy Magazine Model in Trump's case?