ആനകളുടെ പല കഴിവുകളും ആർക്കും അറിയില്ലെന്നതാണു സത്യം. അതിലൊന്നാണു പരസ്പരം ആശയവിനിമയം നടത്താനുള്ള കഴിവ്. 30 കിലോമീറ്റർ അകലെയുള്ള കൂട്ടാനകളുമായി സംവദിക്കാൻ ആനകൾക്കു കഴിയുമെന്ന് കണ്ടെത്തിയിട്ടുണ്ടെന്ന് ഏഷ്യ ബയോഡൈവേഴ്സിറ്റി ബോർഡ് ശാസ്ത്രജ്ഞൻ ഡോ. പി.എസ്. ഈസ പറയുന്നു. ‘‘ഇതു സംബന്ധിച്ച നിരവധി പഠനങ്ങളും ലഭ്യമാണ്. ഹ്രസ്വ തരംഗങ്ങളിലാണ് ആനകൾ പരസ്പരം സംവദിക്കുന്നത്. മരങ്ങൾക്കിടയിലൂടെ തരംഗങ്ങൾക്ക് കടന്നു പോകാനും കഴിയും’’– ഡോ. ഈസ പറഞ്ഞു. 

പൂച്ച പതുങ്ങുംപോലെ എന്നാണ് എല്ലാവരും പറയുന്നത്. എന്നാൽ കാൽചുവട്ടിലെ കരിയില പോലും അനങ്ങാതെ സഞ്ചരിക്കാൻ ആനയ്ക്ക് കഴിയും. കാട്ടിൽ നടക്കുമ്പോൾ പൊടുന്നനെ മുന്നിൽ പ്രത്യക്ഷപ്പെടാൻ ആനയ്ക്കു കഴിയും. വെറുതെയാണോ അരിക്കൊമ്പൻ എവിടെയെന്നു കണ്ടെത്താൻ വനംവകുപ്പ് കഷ്ടപ്പെട്ടത്.

∙ കാട്ടാന, ഒരു സാമൂഹിക ജീവിയാണ്

മനുഷ്യന് മാത്രമേ സാമൂഹിക ജീവിതമുള്ളൂവെന്ന് കരുതേണ്ട. ആനകൾ ഒന്നാംതരം സാമൂഹിക ജീവികളാണ്. പരസ്പരം സ്നേഹിച്ചും ബഹുമാനിച്ചും സഹായിച്ചും അവ കഴിയുന്നു. കുട്ടിയാനകൾക്ക് പ്രത്യേക സുരക്ഷയും പരിഗണനയും ആനക്കൂട്ടം നൽകും. 1978 ൽ തേക്കടിയിൽ ചത്ത കുട്ടിയാനയെ മാറ്റാൻ വനംവകുപ്പിന് ദിവസങ്ങളോളം കാത്തു നിൽക്കേണ്ടി വന്നു. ചത്ത കുട്ടിയാനയ്ക്ക് ചുറ്റും ആനക്കൂട്ടം കാവൽ നിന്നതാണ് കാരണം. മറ്റ് ആനകൾ രണ്ടു ദിവസം കഴിഞ്ഞ് മാറി. കുട്ടിയാനയുടെ തള്ളയാന പിന്നെയും രണ്ടു ദിവസം കഴിഞ്ഞാണ് അവിടെ നിന്നു മാറിയത്. വിഷമം വരുമ്പോൾ പുറത്തു തട്ടി കൂട്ടാനയെ ആശ്വസിപ്പിക്കുന്ന ആനകളെയും കണ്ടെത്തിയിട്ടുണ്ട്. 

∙ ധീരൻ കുങ്കി, പേരു കളയാൻ പേടിത്തൊണ്ടന്മാരും

ആനകളെ പിടിക്കാൻ സഹായിക്കുന്ന കൊമ്പന്മാരാണ് കുങ്കികൾ അല്ലെങ്കിൽ താപ്പാനകൾ. കാട്ടില്‍ വലിയ പ്രശ്നമുണ്ടാക്കുന്നവരാണ് പിന്നീട് താപ്പാനയാകുന്നത്. എന്താണ് കുങ്കിയുടെ അധിക കഴിവ്? മറ്റ് ആനകളേക്കാൾ കുങ്കിയാനകൾക്ക് ആത്മധൈര്യം കൂടുതലാണെന്ന് വിദഗ്ധർ പറയുന്നു. കാട്ടാന തല്ലിത്തകർത്തു വന്നാലും കുങ്കി ഭയക്കില്ല. അവയ്ക്ക് ലഭിക്കുന്ന പരിശീലനമാണ് ആത്മധൈര്യം നൽകുന്നത്. ഇതിനും പക്ഷേ അപവാദങ്ങളുണ്ട്. 

വർഷങ്ങൾക്ക് മുമ്പ് വയനാട്ടിൽ ആനയ്ക്ക് റേഡിയോ കോളർ ഘടിപ്പിക്കാന്‍ ശ്രമം നടന്നിട്ടുണ്ട്. അതേസമയം റേഡിയോ കോളർ ഘടിപ്പിക്കാൻ മയക്കുവെടി വയ്ക്കുന്നതിനിടെ പിടിയാന വീണ് ചത്തതും വയനാട്ടിലാണ്. താപ്പാനയെ നിയന്ത്രിക്കുന്ന പാപ്പാന്റെ കൈയിലാണ് കടിഞ്ഞാൺ. വർഷങ്ങൾക്കു മുമ്പ് അസമിൽ കടുവയെ മയക്കു വെടി വയ്ക്കാൻ വനംവകുപ്പ് ഉദ്യോഗസ്ഥരും താപ്പാനകളും പോകുന്നു. ഡിഎഫ്ഒ അടക്കമുള്ള ഉന്നത ഉദ്യോഗസ്ഥർ താപ്പാനയുടെ പുറത്താണ്. ഇതിനിടെ താപ്പാനയുടെ മുന്നിലേക്ക് കടുവ എടുത്തു ചാടി. പാപ്പാന്റെ കൈയിൽ അടിച്ചു. പാപ്പാൻ പതറിയില്ല, താപ്പാനയും. അതും ചരിത്രം.

∙ സൂക്ഷിക്കണം, ആയുധം വച്ചുള്ള കളിയാണ്

മനുഷ്യനു മാത്രമല്ല ആനകൾക്കും ആയുധം ഉപയോഗിക്കാൻ കഴിയും. മനുഷ്യരെപ്പോലെ സങ്കീർണമായ ആയുധങ്ങളല്ലെന്നു മാത്രം. കമ്പുകൊണ്ട് പുറം ചൊറിയുന്ന ആനകൾ ഏറെയുണ്ട്. മദമിളകിയാൽ ആനകളുടെ കന്നത്തിൽ (കവിൾ) ചൊറിയും. ചൊറിച്ചിൽ സഹിക്ക വയ്യാതെ വരുമ്പോള്‍ കമ്പു കൊണ്ട് ചൊറിയുന്നതും പതിവാണ്. ഇത്തരത്തിൽ കന്നത്തിൽ ചൊറിയുമ്പോൾ പലപ്പോഴും സമീപത്തെ കണ്ണിൽ ക്ഷതമേൽക്കാറുണ്ടെന്ന് ഡോ. ഈശ്വരൻ പറയുന്നു. അതുക്കും മേലെയാണ് ചില ആനകളുടെ കഴിവുകൾ. ഡൽഹി നാഷണൽ സുവോളജിക്കൽ പാർക്കിലെ കൻഡുല എന്ന ആന പഴം പറിക്കുന്ന വ‌ിഡിയോ വൈറലാണ്. തുമ്പിക്കൈകൊണ്ട് പഴം എത്താതെ വന്നപ്പോൾ ചെറിയ കട്ട ഉരുട്ടിക്കൊണ്ടു വന്ന് അതിൽ കയറിയാണ് പഴം പറിക്കുന്നത്. പുല്ലിലെ പ്രാണികളെ കമ്പു കൊണ്ട് ഓടിക്കാനും ആനകൾക്കറിയാം. 

∙ കാഴ്ചയിൽ പിന്നിൽ, കണ്ണു കെട്ടുന്നത് അതിനല്ല

അരിക്കൊമ്പന്റെ കണ്ണു കെട്ടിയതിന്റെ പേരിൽ ഏറെ ചർച്ചകൾ നടക്കുന്നുണ്ട്. ചിന്നക്കനാലിൽനിന്ന് പെരിയാർ കടുവാ സങ്കേതത്തിലേക്കാണ് കൊമ്പനെ മാറ്റുന്നത്. പോകുന്ന വഴി തിരിച്ചറിഞ്ഞ് തിരികെ വരാതിരിക്കാനാണ് കണ്ണു കെട്ടിയതെന്നാണ് പ്രചാരണം. വാസ്തവം അങ്ങനെയല്ല. ആനകളുടെ കാഴ്ചയുമായി ബന്ധപ്പെട്ടു തന്നെയാണ് കണ്ണു കെട്ടുന്നത്. ശരീരത്തിന്റെ വലുപ്പത്തിന് അനുസരിച്ച് കാഴ്ചയിൽ പിന്നിലാണ് ആന. 50 മീറ്ററിനപ്പുറം കാഴ്ച കുറവാണെന്ന് ഡോ. ഈശ്വരൻ പറയുന്നു. 

മയക്കുവെടി  വയ്ക്കുമ്പോൾ ഞരമ്പുകൾ അഴയും. കണ്ണിനെ ബാധിക്കും. കാഴ്ച മങ്ങും. ഇത് ആനയ്ക്ക് അസ്വസ്ഥത ഉണ്ടാക്കും. വെപ്രാളം കാണിക്കും. ഈ സാഹചര്യം ഒഴിവാക്കാനാണു കണ്ണുകെട്ടുന്നത്. കാഴ്ചയുടെ കുറവ് പരിഹരിക്കുന്നത് മൂക്കാണ്. മണം പിടിച്ചാണു പരിസരം തിരിച്ചറിയുന്നത്. പെരിയാറിൽ ചെല്ലുമ്പോഴുള്ള വെല്ലുവിളിയും ഇതാണ്. പരിസരം പഠിച്ച ശേഷമാണ് കൊമ്പൻ പുതിയ വാസസ്ഥാനത്തേക്ക് ഇറങ്ങുക. സാധാരണ രീതിയിൽ പുതിയ സ്ഥലത്ത് ഒരു ദിവസം നിരീക്ഷണത്തിൽ നിർത്തി. പരിസരവുമായി പരിചയപ്പെട്ട ശേഷമാണ് മൃഗങ്ങളെ തുറന്നു വിടുന്നത്. 

∙ സ്ഥലംമാറ്റം; ഇനി അരിക്കൊമ്പന്റെ ‘അരികൾ’ ആരൊക്കെ?

ചിന്നക്കനാലിൽനിന്ന് നാടുകടത്തുന്ന അരിക്കൊമ്പന്റെ ജീവിതം എങ്ങനെയാകും? അരിക്കൊമ്പനെ പുതിയ വാസ സ്ഥാനത്ത് സുഗമമായി പാർപ്പിക്കാൻ കഴിയുമോ? അരിക്കൊമ്പൻ എത്തുമ്പോൾ മറ്റ് കൊമ്പന്മാർ അരികളായി (ശത്രുക്കൾ) മാറുമോ? പുതിയ സ്ഥലത്ത് വേറെ കൊമ്പന്മാർ ഇല്ലെങ്കിൽ കുഴപ്പമില്ലെന്ന് വനംവകുപ്പ് ഉദ്യോഗസ്ഥർ പറയുന്നു. 20 കിലോമീറ്റർ മുതൽ 40 കിലോമീറ്റർ വരെ ദൂരപരിധിയിലാണ് ഓരോ ആനയും വസിക്കുന്നത്. വെള്ളം, തീറ്റ, വെയിൽ കൊള്ളാതെയും മറ്റും വിശ്രമിക്കാനുള്ള സൗകര്യം ഇവയാണു പ്രധാന ആവശ്യങ്ങൾ. 

ഭക്ഷണത്തിനു വേണ്ടി 100 കിലോമീറ്റർ വരെ യാത്ര ചെയ്യാനും ഇവയ്ക്ക് മടിയില്ല. പുതിയ സ്ഥലത്ത് മറ്റ് കൊമ്പന്മാരുണ്ടെങ്കിൽ തർക്കത്തിന് സാധ്യതയുണ്ട്. അതേസമയം മദമിളകിയ മറ്റ് ആനകളുണ്ടെങ്കിൽ അതും പ്രതിസന്ധിയാണ്. മദത്തിലുള്ള ആനയുടെ സമീപത്തേക്ക് മറ്റ് ആനകൾ പോകാറില്ല. മദത്തിലായ ചക്കക്കൊമ്പനെ അരിക്കൊമ്പൻ ഒഴിവാക്കിയിരുന്നല്ലോ. റേഡിയോ കോളർ ധരിച്ചാണ് അരിക്കൊമ്പൻ പുതിയ സ്ഥലത്തേക്കു പോകുന്നത്. അതിനാൽ അരിക്കൊമ്പന്റെ അടുത്ത രഹസ്യം വേറെയാണ്- ആനക്കൂട്ടത്തിന്റെ ജീവിതം പകർത്തുക. അരിക്കൊമ്പന്റെ സ്ഥലംമാറ്റ ദൗത്യം വനംവകുപ്പിന് തീർന്നാലും കാടിനകത്തെ അരിക്കൊമ്പന്റെ ‘ദൗത്യം’ തുടരുമെന്നു ചുരുക്കം.

English Summary: Are Elephants more Intelligent than Humans? How Smart Are They? Experts Reply