∙ കൊലപാതകം നടന്ന ദിവസം

തെലങ്കാനയിലെ ദളിത് സമുദായത്തിൽ ജനിച്ച 1985 ബിഹാർ േകഡർ ഐഎഎസ് ഉദ്യോഗസ്ഥനായിരുന്നു കൃഷ്ണയ്യ. ഗോപാൽഗഞ്ച് കലക്ടർ ആയിരിക്കെ 1994 ഡിസംബർ 5ന് ഒരു പരിപാടിയിൽ പങ്കെടുത്ത് ഹാജിപ്പൂരിൽ നിന്ന് മടങ്ങുകയായിരുന്നു അദ്ദേഹം. അംഗരക്ഷകരായ ടി.എം. ഹെബ്രാമും ഡ്രൈവർ ദീപക് കുമാറിനൊപ്പം അംബാസഡർ കാറിലായിരുന്നു മടക്കം. ഈ സമയത്താണ് ആൾക്കൂട്ടം കാർ തടയുന്നത്. ആനന്ദ് മോഹനന്റെ എതിരാളികൾ കൊലപ്പെടുത്തിയ ഛോട്ടൻ ശുക്ലയുടെ മൃതദേഹവുമായാണ് ജനക്കൂട്ടം നീങ്ങിയിരുന്നത്. ആനന്ദ് മോഹൻ സ്ഥാപിച്ച ബിഹാർ പീപ്പിൾസ് പാർട്ടി നേതാവായിരുന്നു ശുക്ല. ആനന്ദ് മോഹനും ഭാര്യ ലൗലി ആനന്ദും മറ്റ് നേതാക്കളും ജനക്കൂട്ടത്തിലുണ്ടായിരുന്നു. ഭഗവാൻപൂർ ചൗക്കിൽ ജനക്കൂട്ടത്തെ അഭിസംബോധന ചെയ്ത ആനന്ദ് മോഹൻ കൊലപാതകത്തിന് പ്രതികാരം ചെയ്യുമെന്ന് പ്രതിഞ്ജയെടുത്തു. സർക്കാർ തങ്ങളെ തടഞ്ഞാൽ പാഠം പഠിപ്പിക്കുമെന്ന് ഭീഷണി മുഴക്കിയാണ് ജനക്കൂട്ടം നീങ്ങിയിരുന്നത്. 

കൃഷ്ണയ്യയുടെ കാർ ജനക്കൂട്ടത്തെ മറികടക്കുന്നതിടെ ജനക്കൂട്ടം ഖബ്ര ഗ്രാ‌മത്തിലെത്തി. ഈ സമയത്ത് കാർ ആക്രമിക്കാൻ ആനന്ദ് മോഹൻ ആഹ്വാനം ചെയ്തു എന്നാണ് പൊലീസ് പറയുന്നത്. അക്രമത്തിനിടെ കാർ മറിഞ്ഞു. കൊല്ലൂ, കൊല്ലൂ എന്ന് ആക്രോശിച്ചു കൊണ്ട് ജനക്കൂട്ടം കാർ വളഞ്ഞു. കൃഷ്ണയ്യയെ പൊലീസ് പുറത്തെടുത്ത് ആശുപത്രിയിലെത്തിച്ചെങ്കിലും മരിച്ചിരുന്നു. ആനന്ദ് മോഹൻ, ലൗലി എന്നിവരടടക്കം 36 പേരായിരുന്നു കേസിലെ പ്രതികൾ. പൊലീസ് ഉദ്യോ​ഗസ്ഥരും കൃഷ്ണയ്യയുടെ ഡ്രൈവറും സുരക്ഷാ ജീവനക്കാരുമായിരുന്നു കേസിലെ പ്രധാന സാക്ഷികൾ. 2007 ഒക്ടോബർ 1ന് അഡീഷനൽ സെഷൻസ് ജഡ്ജി ഏഴു പ്രതികൾ കുറ്റക്കാരാണെന്ന് കണ്ടെത്തി. അതിൽ 3 പേർക്ക് (ആനന്ദ് മോഹൻ, പ്രഫ. അരുൺകുമാർ സിങ്, അഖ്ലാഖ് അഹമ്മദ്) വധശിക്ഷയും ലൗലി ആനന്ദ്, വിജയ് ശുക്ല, ശശിശേഖർ താക്കൂർ, ഹരേന്ദ്ര പ്രസാദ് എന്നിവർക്ക് ജീവപര്യന്തം തടവും വിധിച്ചു. ആനന്ദ് മോഹൻ ഉൾപ്പെടെയുള്ളവർ പട്ന ഹൈക്കോടതിയെ സമീപിച്ചു, 2008ൽ കോടതി ആനന്ദ് മോഹനന്റെ വധശിക്ഷ ജീവപര്യന്തമാക്കി മാറ്റുകയും മറ്റ് ആറു പേരെ വെറുതേ വിടുകയും ചെയ്തു.

∙ രജപുത്ര വോട്ടുകൾ ആനന്ദ് മോഹൻ സമാഹരിക്കുമോ?

2025-ലാണ് ബിഹാറിൽ അടുത്ത നിയമസഭാ തിരഞ്ഞെടുപ്പ്. അതിനു മുമ്പ് അടുത്ത വർഷം ലോക്സഭാ തിരഞ്ഞെടുപ്പ് നടക്കാനിരിക്കുന്നു. ഈ തിരഞ്ഞെടുപ്പുകൾ അടുത്തു വരുന്ന സാഹചര്യത്തിൽ ആനന്ദ് മോഹന്റെ മോചനം രാജ്പുത് വോട്ടുകൾ കൈക്കലാക്കാനുള്ള രാഷ്ട്രീയ നീക്കമായി തന്നെയാണ് കരുതപ്പെടുന്നത്. വലിയൊരു വിഭാഗം രജപുത്രർ ആനന്ദ് മോഹനനെ ആരാധിക്കുകയും അദ്ദേഹത്തെ കേസിൽ ബലിയാടാക്കുകയായിരുന്നു എന്നു വിശ്വസിക്കുന്നവരാണ്. ആനന്ദ് ജനക്കൂട്ടത്തിൽ ഇല്ലായിരുന്നെന്നും മറ്റൊരിടത്ത് നിന്ന് അറസ്റ്റ്ചെയ്ത് കള്ളക്കേസിൽ കുടുക്കുകയായിരുന്നു എന്നും ഇവർ വാദിക്കുന്നു. ജില്ലാ ഭരണാധികാരിയെ കൊല്ലാൻ തക്ക വൈരാ​ഗ്യമൊന്നും ആനന്ദിനില്ലായിരുന്നു എന്നും എല്ലാ ജാതിയിലും പെട്ട ജനങ്ങൾക്ക് വേണ്ടിയാണ് അദ്ദേഹം പ്രവർത്തിച്ചത് എന്നുമെല്ലാമാണ് ആ വാദങ്ങൾ. 

ബിഹാർ ജനസംഖ്യയിൽ 15 ശതമാനമാണ് ബ്രാഹ്മണർ, രാജ്പുത്, ഭൂമിഹാർ തുടങ്ങിയ സമുദായങ്ങളുള്ളത്. ഇതിൽ 3–5 ശതമാനമാണ് രജപുത്രർ. 2014–ലെ തിരഞ്ഞെടുപ്പിൽ ഈ 15 ശതമാനം ജനങ്ങളിലെ 63 ശതമാനം പേരും ബിജെപിക്കാണ് വോട്ടു ചെയ്തത്. 2019–ൽ ജെഡ‍ി(യു) കൂടി ഉൾപ്പെട്ടതോടെ ഇത് 73 ശതമാനമായി. അതുകൊണ്ടു തന്നെ ബിഹാർ രാഷ്ട്രീയത്തിൽ അഞ്ചു ശതമാനത്തോളം വരുന്ന രജപുത്ര വോട്ടുകൾ എല്ലാ പാർട്ടികൾക്കും പ്രധാനമാണ്. അതിനാൽ ആനന്ദ് മോഹന്റെ മോചനത്തെ ഒരു രാഷട്രീയ പാർട്ടിയും പരസ്യമായി എതിർത്തിട്ടുമില്ല. മുഖ്യ പ്രതിപക്ഷമായ ബിജെപി പോലും ജയിൽ നിയമ ദേദ​ഗതിയെ ചോദ്യം ചെയ്യുന്നുണ്ടെങ്കിലും ആനന്ദ് മോഹനന്റെ മോചനത്തെ എതിർക്കുന്നില്ല.

∙ പിന്തുണച്ച് ബിജെപിയും

‌ബിജെപിയുടെ രജപുത്ര നേതാവ് രാജീവ് പ്രതാപ് റൂഡി നിതീഷ് കുമാർ സർക്കാരിന്റെ തീരുമാനത്തെ സ്വാ​ഗതം ചെയ്തു. ആനന്ദ് മോഹനന്റെ മോചനത്തിൽ എതിർപ്പില്ലെന്ന് മറ്റൊരു ബിജെപി നേതാവ് ഗിരിരാജ് സിങ് പറഞ്ഞു. ബിജെപി നേതാവും കേന്ദ്ര മന്ത്രിയുമായ അശ്വനി ചൗബെയും തീരുമാനത്തെ സ്വാ​ഗതം ചെയ്യുകയാണുണ്ടായത്. കഴിഞ്ഞ നിയമസഭാ തിരഞ്ഞെടുപ്പിൽ ആർജെഡി–കോൺഗ്രസ്–ഇടത് മഹാസഖ്യത്തിന് രജപുത്ര വോട്ടുകളുടെ ഒമ്പത് ശതമാനം മാത്രമാണ് കിട്ടിയത്, അതേസമയം രജപുത്രരിൽ 55 ശതമാനം ജെഡി(യു)–ബിജെപി സഖ്യത്തിന് വോട്ട് ചെയ്തു. രജപുത്ര വോട്ട് ലക്ഷ്യമിട്ടുള്ള നീക്കം ‘ക്ലിക്കാ’യാൽ ലോക്സഭാ തിരഞ്ഞെടുപ്പിൽ മഹാസഖ്യത്തിന് അത് മുതൽക്കൂട്ടാവുമെന്ന് ഉറപ്പാണ്. നിതീഷ് കുമാറിന് ഇപ്പോഴുള്ള കുർമി, പിന്നാക്ക, അതി പിന്നാക്ക, മഹാദളിത് വോട്ടുബാങ്കിനൊപ്പം രജപുത്ര വോട്ടുകൾ കൂടി ചേർന്നാൽ ബിജെപി ഭീഷണിയെ ചെറുക്കാൻ കഴിയുമെന്നാണ് കരുതുന്നത്. അതിനൊപ്പമാണ് ആര്‍ജെഡിക്കുള്ള യാദവ–മുസ്ലീം പിന്തുണയും. സംസ്ഥാന ജനസംഖ്യയിൽ 15 ശതമാനം യാദവരും 17 ശതമാനം മുസ്ലീങ്ങളുമാണ്.  

അതേസമയം ജി. കൃഷ്ണയ്യ ദളിത് വിഭാഗത്തിൽ നിന്നുള്ള ആളായതിനാൽ ആനന്ദ് മോഹന്റെ മോചനത്തിലൂടെ മഹാസഖ്യം ദളിത് വിരുദ്ധമാണെന്ന് ചിത്രീകരിക്കപ്പെടുമോ എന്ന ആശങ്കയും നിലനിൽക്കുന്നുണ്ട്. മാത്രമല്ല, മുമ്പുണ്ടായിരുന്ന സ്വാധീനം ഇപ്പോൾ ആനന്ദ് മോഹന് ഇല്ലെന്ന വാദവും ശക്തമാണ്. 1990കളിൽ മണ്ഡൽ പ്രസ്ഥാനം ഉച്ചസ്ഥായിലായിരുന്നപ്പോൾ ലാലു പ്രസാദ് യാദവിനെ വെല്ലുവിളിച്ച് ജനതാദൾ വിട്ട നേതാവാണ് ആനന്ദ് മോഹൻ. കോസി മേഖലയിൽ ആനന്ദ് മോഹനും ആർജെഡി നേതാവ് പപ്പു യാദവും തമ്മിലായിരുന്നു പ്രധാന ഏറ്റുമുട്ടൽ. ഇരുവരും സ്ഥലത്തെ പ്രമുഖരായ ബാഹുബലികൾ. എന്നാൽ ഏറെക്കാലമായി ജയിലിലായിരുന്നതിനാൽ ആനന്ദ് മോഹന് രജപുത്രർക്കിടയിൽ കാര്യമായ സ്വാധീനമുണ്ടോയെന്ന് കണ്ടറിയേണ്ടിയിരിക്കുന്നു. പഴയ തലമുറക്കാർ അദ്ദേഹത്തെ പിന്തുണച്ചാലും യുവജനങ്ങളുടെ പിന്തുണ വേണ്ടത്ര കിട്ടാൻ ഇടയില്ലെന്നും നീരിക്ഷകരുടെ വിലയിരുത്തലുണ്ട്.

നേരത്തെ രാജ്പുത് വോട്ടർമാരിൽ ഒരു വിഭാ​ഗം സോഷ്യലിസ്റ്റുകളായിരുന്നു. അതുകൊണ്ടാണ് രഘുവംശ പ്രസാദ് സിങ്, ജഗദാനന്ദ് സിങ് തുടങ്ങിയ രജപുത്ര നേതാക്കൾ ആർജെഡിയിൽ ചേക്കേറിയത്. എന്നാൽ ഇന്ന് ഈ സമുദായത്തിലെ പലരുേടയും ചായ്‍വ് ബിജെപിയോടാണ്. 

∙ വളർച്ച ലാലുവിനോട് പോരടിച്ച്

സ്വാതന്ത്ര്യ സമര സേനാനിയായ റാം ബഹാദൂർസിങ് തോമറിന്റെ ചെറുമകനായ ആനന്ദ് മോഹൻ വടക്കൻ ബി​ഹാറിലെ കോസി മേഖലയിൽനിന്നുള്ള നേതാവാണ്. ജയപ്രകാശ് നാരായണന്റെ സമ്പൂർണ ക്രാന്തി പ്രസ്ഥാനത്തിലൂടെയാണ് രാഷ്ട്രീയത്തിൽ എത്തുന്നത്. 1990ൽ ഹംഷിഹിയിൽ നിന്ന് ബിഹാർ നിയമസഭയിലേക്ക് തിരഞ്ഞെടുക്കപ്പെട്ടപ്പോൾ അദ്ദേഹം ജനതാ പാർട്ടിയിലായിരുന്നു. മണ്ഡൽ കമ്മീഷൻ റിപ്പോർട്ട് നടപ്പാക്കണമെന്നാവശ്യപ്പെട്ട് വി.പി. സിങ് സർക്കാർ തകർന്ന വർഷമായിരുന്നു അത്.

ചന്ദ്രശേഖർ സമാജ് വാദി ജനതാപാർട്ടി രൂപീകരിച്ച് കോൺഗ്രസിന്റെ ബാഹ്യപിന്തുണയോടെ സർക്കാർ രൂപീകരിക്കുകയും ചെയ്തു. ആനന്ദ മോഹൻ ജനതാപാർട്ടി വിട്ട് ചന്ദ്രശേഖർ വിഭാഗത്തിൽ ചേർന്നു രജപുത്രരുൾപ്പെടുന്ന മുന്നാക്ക വിഭാഗത്തിന്റെ നേതാവായി. 1991െല ലോക്സഭാ തിരഞ്ഞെടുപ്പിൽ മധേപ്പുരയിൽ പപ്പു യാദവിനോട് മത്സരിച്ച് തോറ്റു. ലാലു വി​രുദ്ധ നിലപാടിന് പേരുകേട്ട ആനന്ദ് മോഹൻ ബിഹാർ പീപ്പിൾസ് പാർട്ടി 94ൽ രൂപീകരിച്ചു. 94ൽ ഭാര്യ ലൗലി ആനന്ദ് വൈശാലിയിൽ നിന്ന് കോൺഗ്രസ് പിന്തുണയോടെ ഉപതിരഞ്ഞെടുപ്പിൽ വിജയിച്ചു. 1996ൽ ആനന്ദ് മോഹനും ലോക്സഭയിലേക്ക് തിരഞ്ഞെടുക്കപ്പെട്ടു.

15 വർഷത്തെ ജയിൽ വാസത്തിന് ശേഷം പുറത്തിറങ്ങിയ ആനന്ദ് മോഹനന്റെ മകൻ ചേതൻ ആനന്ദ് ആർജെഡി എംഎൽഎയാണ്. കഴിഞ്ഞ നിയമസഭാ തിര‍ഞ്ഞെടുപ്പിൽ ആർജെഡി ടിക്കറ്റിൽ മത്സരിച്ച ലവ്‍ലി ആനന്ദ് നേരിയ വോട്ടുകൾക്കാണ് പരാജയപ്പെട്ടത്. ആനന്ദ് മോഹൻ സിങ്ങിനും അദ്ദേഹത്തിന്റെ കുടുംബത്തിനും കോസി മേഖലയിൽ ഇന്നും ശക്തമായ സ്വാധീനമുണ്ട് എന്നതിന്റെ തെളിവായിക്കൂടിയാണ് ഇത് കണക്കാക്കുന്നത്. സഹർസ മേഖലയിൽ ‘റോബിൻഹുഡ്’ പ്രതിച്ഛായ ആയിരുന്നു ആനന്ദ് സിങ്ങിന് ഒരുകാലത്ത്. എന്നാൽ റോബിൻ ഹുഡ് അല്ല, വെറും ഗുണ്ടാ നേതാവ് മാത്രമെന്ന് വിശേഷിപ്പിക്കുന്നവരുമുണ്ട്. എന്തായാലും വരുന്ന തിരഞ്ഞെടുപ്പുകളിൽ ആനന്ദ് മോഹൻ പ്രധാനപ്പെട്ട ഒരു വിഷയം തന്നെയായിരിക്കും എന്നതിൽ സംശയമില്ല. 

English Summary: What is Nitish Kumar's Plan by Releasing Anand Mohan Singh In Bihar