∙ അണ്ണാമലൈയുടെ വാച്ചും കൊമ്പുകോർക്കലും

നിലവിലെ വിവാദങ്ങളിലൊരിടത്ത് തമിഴ്നാട് ബിജെപി അധ്യക്ഷൻ കെ. അണ്ണാമലൈയുമുണ്ട്. നേരത്തെ സെന്തിൽ ബാലാജിയും അണ്ണാമലൈയുമായി രൂക്ഷമായ തർക്കം അരങ്ങേറിയിട്ടുണ്ട്. അണ്ണാമലൈയുടെ ബെൽ ആൻഡ് റോസ് സ്പെഷ്യൽ എഡീഷൻ റാഫേൽ വാച്ചിനെ ചൊല്ലിയായിരുന്നു ഇത്. ഇത്തരത്തിലുള്ള 500 വാച്ചുകള്‍ മാത്രമാണ് ഫ്രഞ്ച് കമ്പനി നിർമിച്ചിട്ടുള്ളതെന്നും അഞ്ചു ലക്ഷം രൂപ വില വരുന്ന ഈ വാച്ച് വാങ്ങിയതിന്റെ രസീത് അണ്ണാമലൈ കാണിക്കണമെന്നുമായിരുന്നു സെന്തിൽ ബാലാജി ആവശ്യപ്പെട്ടത്. ഇതിനു മറുപടിയായി മുഖ്യമന്ത്രി സ്റ്റാലിൻ, മകനും മന്ത്രിയുമായ ഉദയനിധി സ്റ്റാലിൻ, മരുമകൻ ശബരീശൻ, ഡിഎംകെ നേതാക്കൾ തുടങ്ങിയവരുടെ സ്വത്തു വിവരങ്ങൾ പുറത്തുവിടുമെന്ന് അണ്ണാമലൈ വെല്ലുവിളിച്ചിരുന്നു. പിന്നാലെ ഡിഎംകെ നേതാക്കൾക്ക് കോടിക്കണക്കിന് രൂപയുണ്ടെന്ന് ആരോപിച്ച് ചില കണക്കുകൾ പുറത്തുവിടുകയും ചെയ്തു. 

നേരത്തെ സെന്തിൽ ബാലാജിയെ മന്ത്രിസഭയിൽ നിന്ന് പുറത്താക്കണമെന്ന് ആവശ്യപ്പെട്ട് അണ്ണാമലൈയുടെ നേതൃത്വത്തിൽ ബിജെപി നേതാക്കൾ ഗവർണർ ആർ.എൻ രവിയെ കണ്ടിരുന്നു. മെയ് മാസത്തിൽ ആദായ നികുതി വകുപ്പ് ബാലാജിയുമായി ബന്ധപ്പെട്ട കേന്ദ്രങ്ങളിൽ നടത്തിയ റെയ്ഡിനെ തുടർന്നു തന്നെ ഈ വിഷയത്തിൽ രാഷ്ട്രീയ വിവാദങ്ങൾ സംസ്ഥാനത്തുണ്ടായിരുന്നു. ‘ജോലിക്ക് പണം’ അഴിമതി കേസിൽ അന്വേഷണം തുടരാമെന്ന് സുപ്രീം കോടതി അനുമതി നൽകിയ സാഹചര്യത്തിൽ അദ്ദേഹത്തെ മന്ത്രിസഭയിൽ നിന്ന് പുറത്താക്കണമെന്നും അണ്ണാമലൈ ആവശ്യപ്പെട്ടിരുന്നു. ബാലാജിയുടെ അറസ്റ്റ് ഗൗണ്ടർ സമുദായത്തെ ചൊടിപ്പിക്കുമെന്നും ഇത് എഐഎഡിഎംകെയ്ക്കും ബിജെപിക്കും തിരിച്ചടിയാകുമെന്നുമുള്ള വാദങ്ങള്‍ ഉയരുന്നുണ്ട്. ഇത്തരമൊരു തിരിച്ചടി ഉണ്ടാവാതിരിക്കാൻ അണ്ണാമലൈ എന്തു ചെയ്യും എന്നതും പ്രസക്തം. പ്രത്യേകിച്ച് ജയലളിതയെക്കുറിച്ചുള്ള പരാമർശങ്ങളുടെ പേരില്‍ എഐഎ‍ഡിഎംകെ നേതൃത്വവുമായുള്ള ബന്ധം മോശമായിരിക്കുന്ന സാഹചര്യത്തിൽ. 

∙ അമിത് ഷായെ തടയാൻ ഫ്യൂസൂരിയോ?

കേന്ദ്ര ആഭ്യന്തരമന്ത്രി അമിത് ഷാ അടുത്തിടെ ചെന്നൈയിലെത്തിയപ്പോൾ വൈദ്യുതി നിലച്ച സംഭവവും ഏറെ വിവാദമായിരുന്നു. അമിത് ഷാ വിമാനത്താവളത്തിന് പുറത്തേക്കിറങ്ങുന്ന വേളയിൽ തെരുവിലെ വൈദ്യുതി വിളക്കുകൾ അണഞ്ഞു. തുടർന്ന് ബിജെപി പ്രവർത്തകർ പ്രതിഷേധിക്കുകയും ഇക്കാര്യത്തിൽ അന്വേഷണം ആവശ്യപ്പെടുകയും ചെയ്തിരുന്നു. വൈദ്യുതി പോയത് സാങ്കേതിക പ്രശ്നം മൂലമാണെന്നും എന്നാൽ ഇതിനെ രാഷ്ട്രീയവത്ക്കരിക്കുകയാണ് ബിജെപി ചെയ്യുന്നതെന്നാണ് ‍ഡിഎംകെ പ്രതികരിച്ചത്. 

വൈദ്യുതി മുടങ്ങിയ സംഭവം യാദൃശ്ചികമായി ഉണ്ടായതാണെന്നും എന്നാൽ ബിജെപി അതിനെ രാഷ്ട്രീയവത്ക്കരിക്കുകയായിരുന്നു എന്നുമാണ് വകുപ്പു മന്ത്രി കൂടിയായ ബാലാജി പിന്നീട് പ്രതികരിച്ചത്. സബ് സ്റ്റേഷനിലുണ്ടായ പ്രശ്നം കൊണ്ടാണ് വൈദ്യുതി മുടങ്ങിയതെന്നും 40 മിനിറ്റു കൊണ്ട് പ്രശ്നം പരിഹരിച്ചെന്നും അദ്ദേഹം പറഞ്ഞിരുന്നു. ഈ വിഷയവും ബാലാജിയുടെ അറസ്റ്റുമായി ബന്ധപ്പെട്ട് സോഷ്യൽ മീഡിയയിൽ സജീവമാണ്. 

∙ എന്താണ് ബാലാജിയെ കുടുക്കിയ കേസ്?

2014 നവംബറിലാണ് സംഭവവികാസങ്ങളുടെ തുടക്കം. മെട്രോപ്പൊലീറ്റൻ ട്രാൻസ്പോർട്ട് കോർപറേഷൻ വിവിധ തസ്തികകളിലേക്ക് ആളുകളെ ക്ഷണിച്ചു കൊണ്ട് അ‍ഞ്ചു പരസ്യങ്ങൾ നൽകി. ബാലാജിയായിരുന്നു വകുപ്പു മന്ത്രി. 746 ഡ്രൈവർമാർ, 610 കണ്ടക്ടർമാർ, 261 ജൂനിയർ ട്രേഡ്സ്മെൻ, 13 ജൂനിയർ എൻജിനീയർമാർ, 40 അസി. എ‍ൻജിനീയർമാർ എന്നിവരുടെ ഒഴിവുകളായിരുന്നു നികത്തേണ്ടിയിരുന്നത്. വൈകാതെ ഈ റിക്രൂട്ട്മെന്റിൽ ക്രമക്കേട് നടന്നതായ സൂചനകളും പുറത്തു വന്നു തുടങ്ങി. 2015 ഒക്ടോബറിൽ ഇതു സംബന്ധിച്ച ആദ്യ പരാതി ലഭിച്ചു. തന്റെ മകന് ജോലി കിട്ടാനായി പളനി എന്നൊരു കണ്ടക്ടർക്ക് 2.60 ലക്ഷം രൂപ നൽകിയെന്നും എന്നാൽ ജോലിയും ലഭിച്ചില്ല, പണം തിരികെക്കിട്ടിയതുമില്ല എന്ന് ദേവസഗായം എന്നൊരാൾ പരാതി നല്‍കി. 

അടുത്ത വർഷമായപ്പോഴേക്കും കൂടുതൽ പരാതികൾ കിട്ടിത്തുടങ്ങി. പണം വാങ്ങിയവരിൽ മന്ത്രിയുമായി ബന്ധപ്പെട്ടവരുമുണ്ടെന്ന് പരാതികൾ ഉയർന്നു. പൊലീസ് കാര്യമായ അന്വേഷണം നടത്താതിരുന്നതോടെ ഗോപി എന്ന പരാതിക്കാരൻ ഹൈക്കോടതിയെ സമീപിച്ചു. തുടക്കത്തിൽ കോടതി ഈ അപേക്ഷ തള്ളുകയും ദേവസഗായത്തിന്റെ പരാതിക്കൊപ്പം പരിഗണിക്കാൻ നിർദേശിക്കുകയും ചെയ്തു. എന്നാൽ ദേവസഗായത്തിന്റെ പരാതിയിൽ മന്ത്രിക്കെതിരെ ആരോപണം ഇല്ല എന്നതിനാൽ തന്റെ പരാതിയിൽ മന്ത്രി വരെയുള്ളവർക്കെതിരെ അന്വേഷണം വേണമെന്ന് ഗോപി ആവശ്യപ്പെട്ടു. തുടർന്ന് എസിപി തലത്തിൽ ഹൈക്കോടതി അന്വഷണം പ്രഖ്യാപിച്ചു. 2017 ൽ സമർപ്പിച്ച അന്വേഷണ റിപ്പോർട്ടിൽ മന്ത്രിയും ബന്ധുക്കളും ഒഴികെയുള്ളവരെ പ്രതികളാക്കുകയും ചെയ്തു. പണം നൽകിയിട്ടും ജോലി ലഭിക്കാതെ വന്നതോടെ നിരവധി പരാതികളാണ് പിന്നാലെ ഉയർന്നത്. കോടികളുടെ തട്ടിപ്പ് റിക്രൂട്ട്മെന്റുമായി ബന്ധപ്പെട്ട് നടന്നുവെന്ന ആരോപണം ഉയർന്നു. എന്നാൽ എല്ലാ കേസുകളിലും അഴിമതി ആരോപണം മാത്രം അന്വേഷണ പരിധിയിൽ വന്നില്ല. പണം വാങ്ങിയുള്ള വഞ്ചന തുടങ്ങിയ ക്രിമിനൽ കുറ്റങ്ങൾ‌ മാത്രമാണ് അന്വേഷണ പരിധിയിൽ ഉൾപ്പെട്ടത്.

∙ ‘ഒത്തുതീർപ്പ്’ പുലിവാലായി; ബാലാജിയുടെ രാഷ്ട്രീയ ജീവിതം മാറിമറിയുന്നു

2016 ൽ ജയലളിത മരിക്കുന്നതോടെയാണ് ബാലാജിയുടെ ജീവിതവും കീഴ്മേൽ മറിയുന്നത്. ജയലളിതയുടെ തോഴി ശശികലയ്ക്കും മരുമകൻ ടി.ടി.വി ദിനകരനും ഒപ്പമായിരുന്നു ബാലാജി. 2017 ൽ ഇവരെ പുറത്താക്കിയതോടെ ബാലാജി ദിനകരന്റെ പാർട്ടിയിൽ ചേർന്നു. 2018 ൽ ഡിഎംകെയിലുമെത്തി. 2021 ൽ കരൂരിൽ നിന്നും വിജയിച്ച് സ്റ്റാലിൻ മന്ത്രിസഭയിൽ അംഗവുമായി. 

ഇതേ സമയത്താണ് ബാലാജിയുടെ പിഎമാരായിരുന്ന ഷൺമുഗവും ആർ സഹായരാജനും കേസ് അവസാനിപ്പിക്കണം എന്നാവശ്യപ്പെട്ട് കോടതിയെ സമീപിച്ചത്. പണം നഷ്ടമായവർക്ക് അത് തിരികെ നൽകിയെന്നും അതുവഴി ‘ഒത്തുതീർപ്പി’ലെത്തി എന്നുമായിരുന്നു അവരുടെ ന്യായം. ഇത് ഒരു കേസിൽ കോടതി അനുവദിച്ചു. എന്നാൽ ഒത്തുതീർപ്പിലെത്തി എന്നതിനർഥം കുറ്റകൃത്യം നടന്നു എന്നു കൂടിയാണെന്ന് വ്യക്തമായതോടെയാണ് എൻഫോഴ്സ്മെന്റ് ഡയറക്ടറേറ്റ് രംഗപ്രവേശം ചെയ്യുന്നത്. 2021 മുതല്‍ത്തന്നെ ഇഡി ഈ കേസിൽ അന്വേഷണം തുടങ്ങിയിരുന്നു. ‘ഒത്തുതീർപ്പ്’ അംഗീകരിക്കാത്തവരും രംഗത്തെത്തിയതോടെ കേസിൽ ഹൈക്കോടതി പുനരന്വേഷണം പ്രഖ്യാപിച്ചു. ഇതേ സമയത്താണ് ഇഡി ചോദ്യം ചെയ്യലിനായി പ്രതികളെ വിളിപ്പിച്ചു തുടങ്ങുന്നത്. എന്നാൽ ഹൈക്കോടതി ഇത് റദ്ദാക്കി. ഇതിനെതിരെ ഇഡി സുപ്രീം കോടതിയിൽ പോയി. കേസിൽ അന്വേഷണം തുടരാമെന്നും രേഖകൾ പരിശോധിക്കാമെന്നും സുപ്രീം കോടതി ഉത്തരവിട്ടതാണ് ഇഡിയുടെ പരിശോധനയിലേക്കും അറസ്റ്റിലേക്കും നയിച്ചത്. മാത്രമല്ല, കേസിൽ അഴിമതി നിരോധന നിയമം കൊണ്ടുവരാതിരുന്നതും സുപ്രീം കോടതിയുടെ വിമർശനത്തിന് ഇടയാക്കിയിരുന്നു. കേസ് രാഷ്ട്രീയപ്രേരിതമാണെന്ന ബാലാജിയുടെ ആരോപണവും കോടതി തള്ളിക്കളഞ്ഞു.  

English Summary: Who is V Senthil Balaji, the Powerful DMK Minister from Tamil Nadu Who was Arrested by the Enforcement Directorate?