ആദ്യ റിപ്പോർട്ടുകളനുസരിച്ച് കേവലം രണ്ടോ മൂന്നോ മരണങ്ങളാണ് ബിപർജോയ് ചുഴലിക്കാറ്റിലുണ്ടായത്. ഏകദേശം അഞ്ഞൂറോളം മരങ്ങൾ കടപുഴകി. ആയിരത്തോളം ഗ്രാമങ്ങളിൽ വൈദ്യുതി ബന്ധം നിലച്ചു. ഇതൊഴിച്ചാൽ ജീവനു കാര്യമായ ഭീഷണി സംഭവിച്ചിട്ടില്ല. ഇതുപക്ഷേ ചെറിയ കാര്യമല്ല. കേന്ദ്ര– സംസ്ഥാന സർക്കാരുകളുടെ കൂട്ടായ പ്രവർത്തന ഫലമായാണ് ഇതു സാധ്യമായത്. ആയിരക്കണക്കിന് ആളുകളെയാണ് ശരവേഗത്തിൽ മാറ്റിപാർപ്പിച്ചത്.

എന്നാൽ ഒരു ചുഴലിക്കാറ്റ് വീശിയാൽ ഉണ്ടാകുന്ന സാമ്പത്തിക നഷ്ടം കോടികളുടേതാണെന്നതു മറക്കരുത്. ഒരു പ്രദേശത്തെ അതു പാപ്പരാക്കും. വ്യവസായങ്ങളും കൃഷിയും വീടും എല്ലാം കേടുപാടു മൂലം പ്രവർത്തനരഹരിതമാകും. ഒരു ചുഴലിക്കാറ്റിന്റെ ‘കണ്ണി’ൽ പെട്ടാൽ ആ പ്രദേശം കുറഞ്ഞത് 15 വർഷമെങ്കിലും പിന്നോട്ടു പോകുമെന്ന് പറയാറുണ്ട്. കാരണം മരങ്ങൾ വീണും ബോർഡുകൾ വീണും നഗരങ്ങൾ താറുമാറാകും. പിന്നെ ഇതെല്ലാം അറ്റകുറ്റപ്പണി നടത്താനാവശ്യമായ ഭീമമായ തുക കണ്ടെത്താൻ കഴിയാതെ പാവപ്പെട്ടവരും കർഷകരും കാലാവസ്ഥാ അഭയാർഥികളാകും.  

∙ കേരളത്തിലേക്കു കയറേണ്ടത്; തൊട്ടത് കച്ച്– കറാച്ചി  

കേരള തീരത്ത് ജൂൺ ഒന്നിനു കൃത്യമായെത്തിയിരുന്ന തെക്കു–പടിഞ്ഞാറൻ കാലവർഷത്തിനു കരുത്തു പകരുന്നതിനു പകരം ആ മുന്നേറ്റത്തിന്റെ മുനയൊടിച്ചാണ് തെക്കൻ അറബിക്കടലിൽ ജൂൺ ആദ്യവാരം ന്യൂനമർദച്ചുഴിയും തുടർന്ന് ന്യൂനമർദവും രൂപപ്പെട്ടത്. കേരളത്തിൽ അങ്ങിങ്ങായി മഴ കിട്ടുന്നുണ്ടായിരുന്നെങ്കിലും കാലവർഷത്തിന്റെ എല്ലാ അരങ്ങൊരുക്കങ്ങളോടും കൂടിയ ‘ഇടവപ്പാതി’ മഴ എത്താൻ വൈകി. ഇതിന്റെ ഫലമായി മൺസൂണിന്റെ തുടക്കം പ്രഖ്യാപിക്കാൻ ഇന്ത്യൻ കാലാവസ്ഥാ വകുപ്പ് (ഐഎംഡി) പോലും മടിച്ചുനിന്നു. 

ജൂൺ എട്ടിനാണ് തുടക്കം (ഓൺസെറ്റ്) പ്രഖ്യാപിക്കുന്നത്. അപ്പോഴേക്കും മഴ കേരളം വിട്ട് വടക്കോട്ട് വഴി മാറിയിരുന്നു. പിന്നീട് ഏതാനും ദിവസം കടലായിരുന്നു മഴയുടെ കേളീരംഗം. അതിശക്തമായ മഴമേഘങ്ങൾ പടിഞ്ഞാറൻ തീരത്തു വന്ന് കേരളത്തിലേക്ക് എത്തിനോക്കി. കേരളത്തിലേക്കു കയറാതെ കടലിൽത്തന്നെ അവ പെയ്തൊഴിഞ്ഞു. കൊച്ചി സർവകലാശാല റഡാർ കേന്ദ്രത്തിലെ ഗവേഷകനായ ഡോ. എസ്. അഭിലാഷും മറ്റും പങ്കുവച്ച ഉപഗ്രഹ ചിത്രങ്ങളിലൂടെയും മറ്റും കാലവർഷ നാടകത്തിലെ ഈ ‘വിരഹരംഗം’ മലയാളികൾ നന്നായി മനസ്സിലാക്കി. ശാസ്ത്ര സാങ്കേതിക വിദ്യയിലെയും ആശയവിനിമയ രംഗത്തെയും കുതിപ്പിനു നന്ദി.  

∙ നിരന്തര നിരീക്ഷണം; കൃത്യമായ പ്രവചനം 

ഇതിനിടെ ബിപർജോയ് ചുഴലിക്കാറ്റിന്റെ ദിശ സംബന്ധിച്ച് ചെറിയ അവ്യക്തതകൾ ഉടലെടുത്തു. സാധാരണ ജൂൺ ആദ്യവാരം കാലവർഷത്തോടൊപ്പം അറബിക്കടലിൽ രൂപപ്പെടുന്ന ചുഴലികൾ ഘടികാര വിപരീത ദിശയിൽ കറങ്ങിക്കറങ്ങി വടക്കു പടിഞ്ഞാറായി സ്ഥിതിചെയ്യുന്ന യെമനിലേക്കോ ഒമാനിലേക്കോ ആണ് കയറിച്ചെല്ലുക. ഇക്കുറി ഇത് കുറച്ചു കൂടി വടക്കോട്ട് പോയി പാക്കിസ്ഥാനിലെ കറാച്ചിയിലോ ബലൂചിസ്ഥാൻ പ്രവിശ്യയിലോ കയറുമെന്നായിരുന്നു പ്രാഥമിക നിഗമനം. ചുഴലി മുംബൈ തീരത്തിന് 1000 കിലോമീറ്ററോളം പടിഞ്ഞാറ് എത്തുമ്പോൾ വരെ ഇതായിരുന്നു സ്ഥിതി. എന്നാൽ ജൂൺ 12 ആയപ്പോഴേക്കും ഇതു കുറച്ചു കൂടി വടക്കു കിഴക്കു ദിശയിലേക്കു വളയുന്നതായിമനസ്സിലാക്കി. 

അപ്പോൾത്തന്നെ ഗുജറാത്തിലെ കച്ച്, ദേവഭൂമി– ദ്വാരക തുടങ്ങിയ സ്ഥലങ്ങളിലേക്കാവും ബിപർജോയിയുടെ കണ്ണ് എന്ന് അറിയിപ്പെടുന്ന മധ്യതീവ്രഭാഗം തിരിയുന്നതെന്നു നിരീക്ഷകർക്കു മനസ്സിലായി. തുടർന്നുള്ള രണ്ടുമൂന്നു ദിവസംകൊണ്ട് ഈ പ്രദേശത്തെ ലക്ഷത്തോളം മനുഷ്യരെയാണ് സൈക്ലോൺ അഭയാർഥി ക്യാംപുകളിലേക്കും മറ്റ് സുരക്ഷാ കേന്ദ്രങ്ങളിലേക്കും മാറ്റിയത്. ഇന്ത്യയുടെയും ലോക കാലാവസ്ഥാ സംഘടനകളുടെയും ഉപഗ്രഹങ്ങളിലൂടെയാണ് സൈക്ലോണുകളുടെ നീക്കം തത്സമയം നിരീക്ഷിച്ച് സൈന്യത്തിനും റെയിൽവേയ്ക്കും കപ്പലുകൾക്കും വിമാനങ്ങൾക്കും സംസ്ഥാന ചീഫ് സെക്രട്ടറിമാർ ഉൾപ്പെടെ വിവിധ സർക്കാർ ഏജൻസികൾക്കും മുന്നറിയിപ്പു വിവരങ്ങൾ കൈമാറുന്നത്.  

∙ അറബിക്കടൽചൂടാകുന്നു; ഭാവി ചുഴലികളെ കരുതണം  

അറബിക്കടലിലെ പതിവിലും കൂടുതലായി അനുഭവപ്പെടുന്ന താപനഫലമായി ഓരോ വർഷവും ചുഴലിക്കാറ്റുകളുടെ എണ്ണവും തീവ്രതയും വർധിക്കുന്ന പ്രവണതയാണ് കണ്ടു വരുന്നത്. ഇതുമൂലം ഇന്ത്യയുടെ പശ്ചിമ തീരത്ത് കൂടുതലായി സൈക്ലോൺ രക്ഷാ കേന്ദ്രങ്ങളും ക്യാംപുകളും മറ്റും മുൻകൂട്ടി നിർമിക്കുകയോ തയാറാക്കി നിർത്തുകയോ ചെയ്യുക എന്നതാണ് സർക്കാരിലെ ദുരന്ത നിവാരണ രംഗത്തുള്ളവർക്കു മുന്നിലുള്ള വെല്ലുവിളി. തെറ്റില്ലാത്ത വിധം ഈ പ്രവചനം വിജയകരമായി നടത്താൻ ഇപ്പോൾ ഇന്ത്യയ്ക്കും ലോകത്തിലെ മറ്റു രാജ്യങ്ങൾക്കും കഴിയുന്നുണ്ട്. 

എല്ലാവരും പരസ്പരം വിവരങ്ങൾ കൈമാറും. ശാസ്ത്ര–കാലാവസ്ഥാ– ദുരന്ത നിവാരണ രംഗങ്ങളിലെ സമാധാനപരമായ ഈ സഹവർത്തിത്തം ലോകത്തിലെ എല്ലാം രാഷ്ട്രീയത്തലവന്മാരും പഠിക്കേണ്ട പാഠമാണെന്നത് മറ്റൊരു കാര്യം. ഇന്ത്യയുടെ നേതൃത്വത്തിൽ പാക്കിസ്ഥാൻ, ഒമാൻ, യെമൻ, ശ്രീലങ്ക, ബംഗ്ലദേശ്, നേപ്പാൾ, ഭൂട്ടാൻ, മ്യാൻമർ, മാലദ്വീപ് തുടങ്ങിയ രാജ്യങ്ങളുടെ കാലാവസ്ഥാ സഖ്യമാണ് ഇത്തരം മുന്നറിയിപ്പുകളും രക്ഷാദൗത്യങ്ങളും ഏകോപിപ്പിക്കുന്നത്. വെല്ലുവിളികൾക്കിടയിലും കാലാവസ്ഥാമാറ്റം മുന്നോട്ടു വയ്ക്കുന്ന നയതന്ത്ര– സമാധാന സാധ്യത ഇതാണ്.

English Summary: Cyclone Biporjoy Causes Large-scale Property Destruction: Explained